الأربعاء، فبراير 27، 2008

swaLef!

ماهي السعادة؟

~~~~~~~~~~

هل هي شئ مادي محسوس نلمسة بأيدينا في تحقق كل رغباتنا التي نريد ؟

ام هي قناعه داخلية تمنحنا نظرة رضا لواقعنا وتفاؤل لمستقبلنا؟

قد تكون السعاده رغبتنا في ان نكون سعيدين

!!

انا اريد ان اكون سعيدة بكل شئ

بكل مكان

مع كل شخص

اريد ان اجد السعاده في روحي وابعثها من عيني للآخرين

جني بديت اتفلسف؟

ما عليه تحملوني

:)





أعراس وليالي ملاح

~~~~~~~~~~~~

في الفترة الماضية تعبت من حضور الأعراس

كلهن قريبات لقلبي وحبيبات اتمنى مشاركتهن لفرحتهن وحضور اجمل ليلة في اعمارهن ولكن

كثرة تلك المناسبات وراء بعض انهكتني

!!

يضيع اليوم كله من اجل حضور ساعتين مساء

مليت من المكياج في بداية كل ليلة

ومعاناة التحرر من التسريحة في أواخر الليل

يا بخت الرجال...دشداشة واطمر

:Pp~





هلا فبراير استكانة

~~~~~~~~~~~

تقول أمي ان الوناسه لا تنحصر بمكان وزمان

علينا ان نستمتع بكل شئ ووبكل مكان

وانا استانست بعطلتي السابقه

يوم السبت الماضي كنا في زياره لمزرعة خالتي في العبدلي

الطريق الطويل ممل،استغليته بالنوم بما انه الوالد مفزعني مبجر

!!

أعاني من مشكله ،كل ما ركبت السياره وكان معي من يقودها غفت عيني ونمت

لا افتح عيني الا عند احساسي بأن السياره توقفت

حالة كسيفه تخجلني من نفسي،ويضحك عليها اخوتي

تسائلت امي عن سبب هذه الحاله ،لم يقنعها الا جواب ابي المبتسم:

تصدقين؟انا كنت معيب على صبي يشتغل عندنا

من يركب السيارة ينام

وسبحان الله العياب عند الباب

!!


العبدلي

~~~~

كان يومي ممتع بالعبدلي،في رحاب مزرعه جميله وما بين خالاتي

في الخيمة..بدأت مسابقات جميله اعددتها بنت خالتي لتسليه الجميع

تسحب ورقه ليتم سؤالك ومن ثم تسحب ورقة أخرى لتسلم جائزتك

يضحكني حماس جدتي،غضبها لعدم مجئ دورها بالاسئله

نظطر لتقديمها على الكل وسؤالها:

متى فرض الصيام؟

تقلب عينيها بلحظة تفكير

تنظر لي مليا لعلي اغشششها

ثم بكل ثقه تجاوب:

من عمر الدنيا فرض الصيام

هاااو هذا سؤال حمدلله والشكر؟

رغم كل الضحك الذي ضحكناه تصمم على جوابها

نظطر لسؤالها سؤال آخر:

من هو أول خليفه بعد الرسول عليه الصلاه والسلام؟

تبتسم بثقه:

مممممم اي سهل السؤال

اللي ماخذ بنته عليه الصلاة والسلام

وتالي عرس عليها بعد قلبي

ان ما خاب ظني (علي بكر)...استغفر الله

!!!!!!

نظرا لأجوبه جدتي المفحمة اظطرينا في النهاية ان نسئلها:

ماهو الدعاء الذي نقوله قبل النوم؟

والحمدللة فازت

:))




المطلاع

~~~~~~

يوم الأحد كان لي مغامرة أخرى استثنائية

تجمعنا في بيت جدتي ام ابي الساعة الثامنة صباحا

مأجرين باص كبير تجمعنا فيه جميعا ،عماتي واهل ابي والاطفال وانطلقنا للمطلاع

طوال الطريق صفقه وأغاني وطنية

واعلام ترفرف على كبر الباص

فرحة جدتي والعيايز بالباص

صفقه الاطفال

القعدة بالباص بشكل عام لها متعة أخرى،رغم ضحكة ابن عمتي ووصفه لرحلتنا برحله الشئون

:)

استقرينا في مرتفع جميل في المطلاع يطل على جون الكويت وعلى منطقة الجهراء

رغم قسوة الصحراء،رغم الجفاف العاطفي الذي تعاني منه..

تظل الصحراء جميله

تأمل المساحات الشاسعه

الفضاء الللامتناهي

غروب الشمس

ومعاكسة اشعه الشمس للغيوم

ظهور القمر

وتلألأ نجوم الليل

كل تلك الصور سحرتني في ذلك اليوم

!!



مقابل الخيام التي استقرينا فيها ،كان هناك عدد لا يستهان به من الجمال

يتمشون حولنا وحوالينا

استهبل الاطفال وهم يرون سفينة الصحراء بهذا القرب منا

بعد الغداء،وحفلة الأكل الي بدعنا فيها ذهبت للمشي بصحبة خالتي وقريبتي الأخرى وكلتاهما كبيرات بالسن

اثناء المشي اقتربت منا (ناقة) تتمشى بدلع وغرور

أشرت لها قريبتي وهي ضاحكة فإذابتلك الناقة تقترب منا بشكل كبير

لم اشعر بنفسي الا وأنا اركض بكل ما املكة من قوة بعيدا عنها

الغريب ليس اني هربت منها

الغريب انها ظلت تجري ورائي

انا اركض وخالتي كبيرة السن المتعافية تركض امامي

لا أرى الا غبرتها

!!

لم اتخيل ولا لحظة اني سأركض يوما هذاا الركض في صحراء كبيرة وتركض ورائي ناقه

هسترت من الضحك رغم نزول دموعي

ما ان وصلت للخيمة حتى سحبتني جدتي ام ابي بقوة

ونفخت في بطني عن الخرعه

LOOOOOOOOL:D~

في العصر مرو علينا سياير غريبة بمسيرة استهباليه في نص البر

شباب شعورهم كاريه

وبنات بياضهم وملامحهم غريبه جدا

البنات يترقصون

والشباب من زود الوناسه كفخو ببعض بنعل جدامنا

!!

اثناء شحاطتم واستهبالهم اضحكتني قريبتي:

عااااااااااااااااشو الكويتين اليدد عاااااشو

يا عوينتي توهم متجنسين من زود الفرحة هالاستهبال؟

:p~



الأحمدي

~~~~~~

يوم الأثنين ذهبنا للأحمدي..الزينة تنور كل شارع وبيت

امي بخاطرها تشرب شاي في الحديقة

رغم عسارة أختي،وتحطلم الجميع ،قررنا تطيب خاطرها والتربع مع الجاليات في الحديقة

تصدقون وناسة

تغير عن المطاعم والتيبس في الافنيوز وربعه

:pP~

نصف ساعة واذا بصديقات أمي وازواجهن

وجارتنا وبناتها

والجميع في حديقة الأحمدي

وناسة رغم الهواء الغاضب العاصف الذي عفسنا

:D~





الحمدللة...تمتعت

اليوم عدت للعمل منذ الصباح الباكر

وغدا بإذن الله سانطلق لقضاء الويك اند في شاليهاات الخيران

!!


انا غارقه في الدوام الجديد

منهكة من المناسبات الاجتماعيه والاعراس

منشغله بتجمعات أهلي وزوايرهم

انا بإذن الرحمن سعيدة...واتمنى ان تكونو بمنتهى السعادة





حقيقة:

قد يحتفل بك البعض بيوم

وتبقين في القلب حبيبة العمر وكل يوم

كل العمر وكويتنا بخير

!!




همسة :

ما بعد برد الشتا...إالا نسمات الربيع




هناك 44 تعليقًا:

strawberry يقول...

looooooooooooooooooooooooooooooooooooooooooooooooooooooooooooooooooool

yadtch bad3at allah ya5aleha lekom enshallah

ana ma a7eb el23ras bas majboren nroo7 laha :( lama asaowy tasre7a o0 aba6el elmashat o0 halsowalf a7essssss b9daaa3 mo 6abe3y ;p at2asf eny re7t

aham shay ench estansty enshallah ayamch wansa o0 sa3ada o0 mat7sen la belmall wala belw7da

QiYaDiYa يقول...

رد طويل و عريض !
بالاخير ذهب مع الريح !!

;p


شلونج استكانة ؟؟
حبيت اسلم عليج ;*
و مبروك على الوظيفة ..
ادري انها متأخرة ..
بس ان تأتي متأخرا خير من ان لا تأتي ابدا ;) ;p


بوستج يحسسني بالسعادة ..
صج صج صج استانست و انا اقرا ..

طلعات الاهل على بساطتها دايما لها حلاوتها الخاصة الي تبقى طول العمر ..

الله يخليلج اهلج و كل احبابج و يجمعكم دايما على الحب و الخير ;)

shakshaka يقول...

ESTEKANAAAAAAAAAAAAA! manawarat il kwt? tawni wasla tawni:P estekanoo way mawateeeni mn ethe7ek ya7ilwich wo ya7ilooo suwalfich 3ayal naaga etraaketh waraach ma3laich 3ajabteeeha:P waaaay ya 7adeqat el a7medi awal omy etgoooli etemashoon wil shibeeeba ray7een radeen 3laihom wil ghitra 3al chatf qemmat el style ib thaak ilwagt:P


7adi walhana 3laich;*

Purgatory يقول...

هل المواقف ما تصير حق أحد غيرج، بس يو

هاد فن، و هذا المهم

حسافتج يا كويت يقول...

الأخت إستكانة

أولا : هنيالج باللمة الحلوة وعساكم متفرقون إلا بالخير يا ربي

ثانيا: ممكن أشرب إستكانة جاي مع يدتج اللة يحفظها؟؟
حدها ونيسة واللة يعطيها طولة العمر يا رب

ثالثا: بما إني بحري وحب الزفر فكلش ما تشوقت حق طلعة البر والمزرعة لكن عليكم بالعافية

وأخيرا وليس أخرا

بالنسبة لموضوع السعادة
أنا شخصية أحلى لحظات السعادة عندي بالليل وأنا منسدح على الفراش و أمسوي شي زين أم متنقص حق أمي نقصة و في نفس الوقت تكون زوجتي حبيبة روحي نايمة وهي راضية عني

والباجي ايوون تالي

ليش إنة أمي رضاها من رضا ربي بالأخرة
و زوجتي رضاها يجلب السعادة بالدنية

وشيبي الواحد غير سعادة الدنيا والاخرة


وشكرا

Salah يقول...

معنى السعادة

يعتبر من أكثر الأسئلة التي بحثها الفلاسفة من اليونانيين الى يومنا هذا.

طبعا فلسفة الوالدة عجبتني

"الوناسة لا تنحصر بمكان وزمان"

تحياتي

joy يقول...

يا حلوج يا جويهه وياحلو سويلفاتج

ونستيني واسعدتيني جني رايحة وياكم

بس افكر فيكم وانتو يلحقكم البعير كااااااااااااااااااااااك

والمتجنسين اليدد ورحلة الشؤوون



الله لا يخليكم من بعض ويخليج ويخليلج

اسعد الله سنك طووول العمر

joy يقول...

اي اي يدتج هذي الله يطول بعمرها ويخليها لكم

اجوبتها اسفة كيفكم بس مبدعة وفلة

علي بن بكر

ههاهاهاهاهاهاها

qesat_5ayal يقول...

الإنسان يخلقالسعادة ولو في غرفة صغيرة
صح


الله يهنيكم

كنت من اللي محتاجين لهذه الإجازة
استمتعت فيها حتى الرمق لآخر
وختامها ان ممطر


يا ترى هل هذا المطر
له علاق بالهمسة الآخيرة
كأن يكون اللقاء الآخير في هذا الشتاء




استمتعت بلحظاتكم
:)

esTeKaNa يقول...

stawberry
~~~~~~~~~~
يا مسا الفراوله اللذيذه
:)
يدتي انسانه مبدعه
اعترف بذلك
!!
امييين يارب

اصلا قمة المعاناة اذا رديتي البيت
تروح السكرة وتيي الفكرة
ومادري ليش كل عرس افكر بالعروس اشلون فلت تسريحتها
اقتراحي لكل عروس تفل شعرها وتحط باند
خوش تسريحة
:Pp~
يا بعد قلبي
امييييين
واجمعين يارب

esTeKaNa يقول...

qiyadiya
~~~~~~~~~~~
تدرين ردت روحي وانا اكتب اسمج؟
أنا بخير يا عسج بخيروصحة وعافية
انتي بشريني عنج شخبارج؟
ما تأخرتي ولاشي
كافي مرورج باي وقت يفرحني
!!
الله لا يحرمنا من اهلنا ولا كل حبايبنا
ان كان بوستي يحسسج بالسعاده
فمرورج حسسني بسعاده انا عاجزة عن وصفها

الله يديم الفرح بقلوبنا دوم
:))

esTeKaNa يقول...

shakshka
~~~~~~~~~~
الله يا زين اللي حضرت
غطت على كل الحضور
:pP~
ياهلاااااا
يا مرحباااا
حمدالله على السلاااامة
يا جاي من السفر
وحشاني الابتسامة
وشك ولا القمر
:))
اشلون سفرتج عسى استانستي؟
واي شكشوك الله يجبر بخاطري
من لحقني البعير وانا كل ما احط راسي على المخده اشوف بعير يركض وراي
ترا مو فال خير كلش
loooooooooooool
اييي خالتي من معبودات الجماهير بالاحمدي؟
الله يا كثر قصصهم هناك
وكله على هالحديقه
اهي دوار اصلا يفترون فيها طول النهار
:)))
خليني اشوفج
فينا سوالف

صقر قريش يقول...

ماهي السعادة؟


~~~~~~~~~~

السعادة تعريفها طويل ومختلف فيه وتختلف من شخص لآخر لكن يجب ان نفرق ليس كل من يضحك سعيد هناك فرق هناك فرق بين السعادة والسرور السعادة ان تكون راضيا في حياتك قانعا وغير ذلك السرور هي سعادة لحظية تأتي وتذهب بسرعة




أعراس وليالي ملاح


~~~~~~~~~~~~

اولا الله يديم الأفراح ان شاء الله ويزيد الأعراس صحيح من حظنا نحن اننا فقط في الدشداشة والغترة كل شيء عندنا بسيط ولله الحمد والعادة دايما معاي ومع الي مثلة كلمة تلازمني (الفال لك) (متى نفرح فيك)وانا أقولهم ان شاء الله لكن انتوا الله يعينكم استعداد انتوا عذاب والله.










هلا فبراير استكانة


~~~~~~~~~~~


نفس الحالة اذا كان الدرب طويل مو آنا الي أسوق ادوخ وانام :)




العبدلي
~~~~
الله يديم تجمعاتكم الطيبة والله يخليلج يداتج بس اهم شي (علي بكر) الله يطول بعمرها يحليل اليدات والله ذكرتيني بيدتي الله يرحمها الحين صارلها سنة متوفية وبصراحة لها بالقلب فرية





المطلاع


~~~~~~

اذا انتي انحشتي من ناقة انا انحشت من يني بس ماني قايل القصة الا إذا تبين تعرفينها واهم شي ومت ضحك على الي سوته يدتج معاج ماعيه اذا الولد بعين امه ياهل حتى لوكبر وعيل شلون عيل ولده زين اذا اعتبرته بالمهاد






الأحمدي


~~~~~~

تصدقين انا كنت مناك!!بس يوم السبت :) الأحمدي ما كأنك بالكويت أصلا انا رحت بروحي لقافة رايح والمشكلة دشيت داخل الأحمدي بعد ماخلصت اتطمش على البيوت بس وين الطلعة قعدت ادور لين حصلت الطلعة :)

موضوعج ممتع ويونس لايوقف اقول استكانه ببوستج الي طاف سميتيني معرس بهالبوست بتخليني متزوج :).

esTeKaNa يقول...

نعتذر عن الغياب جم يوم وارد على الجميع باذن الله
:))

غير معرف يقول...

الله ذكرتيني بهالطلعااااااات




وناااااااااسه



يعل ربي يجمعكم انتي واهلج على الخير يارب
ومايفرقكم ابد

قاعدة اتخيل شكلج وانتي تركضين منحااااشه من الجمل
لوووووووووول
عسى مصورينج بس
ههههههه


ورحله الباص
لااااا تعليق
:D

علي بكر
بدددددددددددددعت يدتج
لوووووووول

ان شاءالله سعاااادتج دووووم يارب
وخوش بوست ومغامرات و سوالف
:D

فانكوفر
:)

دلال يقول...

عساج دوم مستانسة و سعيدة :) والله يخلي لج يداتج ويطول بعمرهم
يا حلوهم ويا حلوا سوالفهم

q8-diver يقول...

هذه الكويت صل على النبي !!

:)

Big Pearls يقول...

I know what you mean about getting ready for weddings..we spend more time getting ready than the actual time we spend at the wedding!

ٍٍStock يقول...

قد تكون المرة الاولى التي اعقب فيها في مدونتج


بصراحة استمتعت


بالتوفيق ان شاء الله

`~MnO YeNSa! ~` يقول...

zoooooooqaa

استـــــــــــــانس لما اقرى كلمات تحسسني بالسعادة صج صج جو بلوقج مريح و اسلوبح خيالي
مشالله مشالله

الله يونسج بالعافية مثل ما ونستيني و عسى الله لا يفرقكم وتعيدون هاليمعات


وآخر شي الهمسة وايد اثرت فيني


ما بعد برد الشتا
إلا نسمات الربيع
:*

سدرة العشـــاق يقول...

ونستينا بهالبوست تونسج العافية

يعل الفرحة و الوناسة ما تفارقج و لا تفارق أهلج الكرام و يجمعكم على خير بالنيا و الآخرة و لا يفرقكم ظالم


حفظج الرحمن

:)

Organic Kuwait يقول...

sowalfech etwannes :)

الدائرة الخامسة يقول...

السلام عليكم
راح أبدأ من نهاية كلامك
+ ما بعد برد الشتاء ألا نسمات الربيع +
شعورد جميل ودافي وحنون
وصور رائعه ومميزة
ما كانت بس نسمات الربيع
كانت نسمات حب وجمعه ولمة
قدرتي تصورينها بكلماتك الحلوة
جمية مشاعرك

ودمتي بحب

darkness يقول...

شلون الموظفه اليديده؟

عسى مستانسه بالوظيفه

شلونها مع الفزعه من الفير؟

السعاده

هي شي حسي غير ملموس

يختلف من شخص لشخص و يتنوع بتنوع الظروف

هناك سعاده لحظيه و هناك سعاده ابديه و هناك سعاده داخليه و هناك سعاده جماعيه

<<< بدت الفيلسوفه الثانيه

ما عندي مانع اكمل بس ما ابي اعور راسج

هههههه

ويه يا عله سعيد و مبارك و يا علي اشهد عرسج و تنزفين لواحد سنافي الكل يشهد انه ريال و يخاف الله فيج

قولي امين

:)

@@

ستكانه ليكون امي امج؟؟

ويه تعالي نسيت انه ما عندي خوات

:p

ههههههه

ما يسمونج السيلانيه

انا اهلي مسميني السيلانيه لاني ادوخ بالسياره و الطياره و الطراد

:(


عليكم بالعافيه العبدلي شموديج ذاك الصوب؟؟

الحمد لله على السلامه

و صاجه امج العوده من عمر الدنيا

ههههههه

و اشوه انها فازت و عسى دوم متجمعين بالفرح و المسره

:)

وناااسه

دريولنا عاااش عااش

دريولنا دي دييد

ههههههه

عليكم بالعافيه و يا رب دوم متجمعين بالفرح و الخير

ويه ويه ويه

عسى ما خرعتي الناقه؟؟؟

:(

و يا رب احفظ الكويت من هالاشكال

:((

ههههههههههههه

عسى صوتو بالحديقه

ههههههههه

و كل يوم و الكويت و اهلها بخير

:)

يعطيج العافيه

بوست رايق

و ان شاء الله تستانسين بالخيران

:)

الخيلاء يقول...

استكانه

وصفج للاحداث يعطيها طعم غييير :)

السعاده من منظوري احنا نوجدها .. لازم تنبع منا ونحسها .. لو مهما كان هالشي يونس اذا ماحسيناه لا يمكن نحس بالسعاده

دايما يقولولي انتي قنوعه كل شي يونسج مانتعب اذا بنونسج :)

احلى شي بالعطله يمعت الاهل و ضحك اليهال ..

انا عطلتي قضيتها بالشاليه و يمعات
مع خالاتي و اليهال صج متعه ضحك اليهال بروحه يحسسج انه الدنيا بخير



موقف الناقه .. حصل لنا م قف مثله قبل جم سنه كنا بمزرعه خالتي و قاعدين انتمشى و وقفنا يم شبك داخله بعارين و الي داخل الصبي .. يضحك قالنا تبون افجه و يركضون وراكم لوول
قالت له خالتي يلا عاد بلا خبال .. مامداها كملت الا و اهو فاج السور و و ينهدون علينا لا وحده ولا ثنتين قطيع كامل و احنا انتشروا على كبر البر و الضحك ضحك تهستر

و اخرتها اشتكى علينا عند الريايل و اهما رايحين المسيد الحريم و اليهال خرعوا البعارين و خلوها تركض على كبر البرو انا تعبت و انا ايمعهم :/

بس لي يومج نذكر الموقف و نضحك :)

Kuw_Son يقول...

السعادة ..

يتراوالي السعادة انج لما تكونين طالعة رحلة برية لمدة أسبوع من غير قهوة أو ككاو .. و عقب ما تردين على الشارع تدورين أقرب بقالة علشان تشترين سنيكرز و تفترسينه !

هذا مفهوم السعادة
:P

الأعراس ..

الحمدلله اني رجل :)

هلا فبراير ..


الحمدلله استانست في العطلة ..
قضيتها في الصحراء كلها !

العبدلي ..

الله يحفظ يدتج :)

المطلاع ..

رحلة ممتعة و فيها جانب مبكي !

الأحمدي ..

مكان جميل للتصوير ..



همسة ..

سامعها بلحن بس يا ترى وين !!؟

ManalQ8 يقول...

استكانة
الغالية والعزيزة

اتحفتينا بسوالفج الحلوة

الله يديم المحبة واليمعة يا رب

ويخليلج احبابج

بعد ما قريت البوست شد انتباهي رد الاخ حسافتج يا كويت

@
بالنسبة لموضوع السعادة
أنا شخصية أحلى لحظات السعادة عندي بالليل وأنا منسدح على الفراش و أمسوي شي زين أم متنقص حق أمي نقصة و في نفس الوقت تكون زوجتي حبيبة روحي نايمة وهي راضية عني

والباجي ايوون تالي

ليش إنة أمي رضاها من رضا ربي بالأخرة
و زوجتي رضاها يجلب السعادة بالدنية
@

والله كلامة درر

ما شاء الله
ادعي ربي يوفقة دنيا وآخرة
وللجميع بعد

السعادة راحة بال
وراحة البال ما تيي الا من الانسان الي يدري انه مو مقصر بشي تجاه ربه
وتجاه الناس من حولة


والحمد لله رب العالمين




موفقين غاليتي

magnoonah يقول...

ستكون

ما ادري انتي حاسه الي احنا نحسه لما نقرى بوست منج


متعه والله استمتاع ببطريقه عجيبه

احب سولفج يا بنيه واستمتع لما اقرى لج اي شي



الله لا يغير عليكم وعسى السعاده ما تفارقكم

فعلا جو العائله وازدحامات المناسبات والدوام ياخذ منج ومن وقتج بس شي ممتع ومو خساره باحد

عساج عالقوه والله يعطيج العافيه


اما سالفة الناقه
لووووووووووووووووول
اللهم لا شماته
وباص الشؤون
احب اعترف الفكره روووووووووعه
اهنيكم عليها

SHAHAD يقول...

عساااج دوووم سعيييدة
وعسى السعادة ما تفارقج دنيا وآخرة
وربي يخليلج أهلج ويخليهم لج
صدقيني ترابطهم هو مصدر سعادتنا :)
استمتعت جدا ببوستج
وعيدي يا كويت يا أحلى بلد :))

Purplecious يقول...

بوست ممتع و راقي و عفوي كالعادة

هالمره قلت لازم اعلق غصب طيييييييب بعلق
لي متى بدش بسكات و أطلع بسكااااات؟؟
هههههههههه

الله يونسج بالعافيه
و السعاده اكييييد قناعة و رضا
الله يتمم عليج و عسى كل ايامج سعادة

و مره ثانيه نبي صور
أنا أحب الصور
صج انج مشاءالله عليج بوصفتج ما تخلينا نحتاجها بس ايضا ما يمنع نمتع نظرنا بمناظر حلوة

:)

a7La eNG يقول...

يا حــلاتـــج
اعرف الســالفة و لا زلت أضحك
:D


السعادة ..قرار و اختيار شخصي
كليا لا جزئيا
:)


عسى الله يبلغني باليوم اللي انا اسولف لهم عن عرسج
;*

eeee

و كل شي بوقته حلووو
ليش مستعجل عليها
:P

°l||l°ρίnķ gιяℓ °l||l° يقول...

يا حلاتها قعدت العيايز
ذكرتني يدتج يبدتي الله يرحمها
ربيه يحفظها لكم يا رب
وان شاء الله حياتج دوم تكون سعادة فسعادة حبيبتي ^_^

Desert-Roses يقول...

Liked the way how you write your posts..unique...
it is a mix between 5wa6er ..and telling a story....

well..ma8ariata kellaa...bs i agree with you about the wedding thingie

غير معرف يقول...

يازين سوالفج يا إستكانه
:D
أظن عرفتيني ؟
شله قاطعتنا هناك ؟
والله لا اله الا الله خوش جدول
وخوش طلعات هذي للي تسر بدل التسمت
في المجمعات على قولتج :P
ومبروك الوظيفه .. الله يوفقج يارب
أنتي انسانه تستاهل كل خير صراحه
والله يدتج الله يطول بعمرها ذكرتني بيدتي
لهم طولة العمر إنشالله
إستكانتي العزيزه استانسي
في الشاليهات
:D
ونبي نشوف صور ;)
SIMPLE

Q80 Blogger يقول...

اول شي
انا حتى الدشداشه واطمر مالي خلقها

العزا وايد اسهل الصراحه :)


لا بس قصصج عجيبه
زين انج تنامين وفي احد يسوق
انا اذا انعزمت بالعبدلي
يضيق خلقييييي
لأنه الطريج طوييييل
وانا الي اسوق وهم انا الي انام
كل مره اقول آخر مره ازورهم اهناك
بس مانقدر

وسالفتج مع الناقه عجيبه
طول عمري اقول استكانه قويه ومايهزها ريح
آخر شي ناقه ودموووع
افا والله :P

والله دقيت على الاهل .. نفس الحاله .. طالعين الخيران .. بعدين البر .. بعدين الاحمدي .. وراها مادري وين راحوو !!

ويقولولي القصص .. بس يحروني

وانا اقولهم قصصي اهني ببط جبدهم .. يعني تحدي
بس صرااااحه .. اعتراف .. انتو الغالبين دام بالكويت :)

يعطيج العافيه على البوست الحلو

Shaima'a Alkandari يقول...

سوالفج حلوه وماينمل منها وايد ابتسمت وانا قاعده اقرا البوست

انزين تركضين وتنحاشين والناقه وراج صار سبااااق زين فزتي فيه :)

والله يعينج على كثرت مشاويرج بس تحسين بوناسه وتغييييييير

ياربي ليش جذي فجأه ماعندج وقت تحكين فيه راسج من الاشغال واوقات تبين مناسبه تبين شي ماكووووو

ووناسه استانستوا بالعبدلي

ولو كنتى مصوره جم صوره علشان تراوينا خوش على خوش

بس ماعليه اليايااات اكثر

وموشي سالفه تنامين بالطريييج سويتها مره يوم كنا رايحين البحرين حق عمتي ونمت بالسياره بس حسيت بصداع عقبها حرمت انام



استانسي بالخيرات

غير معرف يقول...

مساء الخير


ان شاء الله دوم مستانسه

الله يعينج على الركض اللي ركضتيه مع الناقه

بس لو انج وقفتي وبس لمستي رقبتها جان لزقت فيج اليوم كله وبس تمشي وراج>>>>مجربتها


الله يوفقج


new one

حلم جميل بوطن أفضل يقول...

Show me the money

هذه هي السعادة الحقيقية

New Bride يقول...

waaaaay zooga sawalfich estkenaa :) alaah ykhalee yadetich likom o 3aleeeech bl 3afeyaaa ya galbee

Najmah يقول...

عساج دوم فرحانة وعسى السعادة ماتفارقج
وعسى ربي يخليج لكل أهلج واحبابج
ويجمعكم دنيا وآخرة

مشتاقه حق سوالفج :)
استمتعت وايد :*

esTeKaNa يقول...

Purg.
~~~~~~~
وتهقه ليش ما تصير حق غيري
!!
:)
شخبارك؟







حسافتج يا كويت
~~~~~~~~~~~~~~~~~
أولا:
آميين وعسى ربي يحفظك انته واهلك وكل من تحب يارب
ثانيا:
هذي الساعة المباركة يا اخيي،يدتي تحب الناس والجماعه بس فيها طبع عجيب،اذا حبت شخص يا هلا ويا مرحبا واذا ما حبت تلوي البوز وما تجامل
!!
بس انا اكيد امثالك ينحبون
:)
ثالثا:
يا عاشق الزفر ترا عندنا وعندك خير،بس احا نحب التنويع ما تشوفنا عقب البر رحنا الشاليه


اييي يا اخوي الغالي...تمنيت زوجتك تقرا هالحجوتين اللي انته كاتبهم
لانه الكل ردت روحه مع تعليقك الطيب الراقي باحساسه
عسى ربي يرضي عليك اميمتك ويحفظ لك زوجتك ويسعدكم دوم











Salah
~~~~~~~~
حيالله صالح
ربما لان لها معنى متغير متجدد حسب اللحظة والاحساس فلم ولن نجد لها يوما تعريف واحد
!!
انا اشهد..انه فلسفه الوالده اقنعتني
:)











joY
~~~~~
ياهلا ويا مرحبا بجوي
هذي الساعه المباركة والله يا ليتج رايحة ويانا
:)
وخلي البوست كله بصوب وقصة هالبعير بصوب
تصدين يومين بعدها من احط راسي على المخدة يطري علي شكله هو يراكض ورانا بسم الله
سوا لي كوابيس اللهم يا كافي
:)
ويدتي زوقه ..تبهرج باجوبتها
ههههههه









Qesat-5aYaL
~~~~~~~~~~~~~~
مو بس صح...اللي تقولينه كل الصح
:)
ختام ممطر يرد الروح
اتمنى..ان يكون اللقا قريب
لقا يشع بالفرح
يبشرنا بقدوم ربيع جميل
:)
استمتعت بمرورك












صقر قريش
~~~~~~~~~~~
عشرة على عشرة تعليقك
راح احط يم اسمك نجمه
:)

نبهتني لنقطة التفريق مابين السعادة والسرور
وسالفه تعدذيب ما قبل الاعراس لبنات فهذا سبب لتشكر عليه ربك في كل يوم انك خلقت رجلا
الله يرحم جدتك وعساها بجنات النعيم قول امين
قولي كل القصص يا صثر الا سوالف الينانوة
ترا انا هني اعترف اني اكون جبانه
وحيالله معرسنا
:)

















فانكوفر
~~~~~~~ه
حيالله فانوكفر
علامج متنكرة يا حافظ?
:))


اللهم امين ولا يخليج من كل حبايبج
لا اشوة مامداهم يصوروني
يالله ولبهم يقرون علي وينفخون ببطني
يومين وانا بس احلم بالبعير المطيور اللي ركض وياي
الله حفظني
:))

نورتي يا الغاليه








دلال
~~~~~~~~~
هلا بدللي هلا
:))
اجمعييييييييين يارب
ماقصرتي







Q8-diver
~~~~~~~~~
اهي ديرتنا وفيها اللي نبي
:)
عاش من شافك
شخبارك؟












Big pearls
~~~~~~~~~~~~~~~
ياهلا ويا مرحبا باللولو
:))
اي والله
هذا واحنا معزومين
الله يعين العروس عيل








Stock
~~~~~~~~
هذي الساعة المباركة اخوي العزيز
ولا طاب لك هالبلوق عاود
:))






Mno Ynsa
~~~~~~~~~~
هلااا بالطيب الغالي
هلا هلا
:)
تدرين شنو قمة وناستي؟
اني اقرا تعليقج واحس كلماتي خذتج وياي وعشتي جوي
:)
عساج يا الغاليه دوم بفرح وسعاده
وهمستي كانت باذنج
وباذن كل قلب طال شتاه ولليله
ترا ما بعد برد الشتا..الا ربيع بيفرحنا ويرد ارواحنا
:**












سدرة العشاق
~~~~~~~~~~~~~~~
هلا وغلا بسديرة
:)

يا ليتني بس حاطة صورج اللي تينن ملوت المطلاع والجليب
اللي لو انا مو شايفتهم بالصج جان صدقت
:Pp~
امييين واجمعين يارب










ORganic Kuwait
~~~~~~~~~~~~~~~~~
الله يونسك بالعافية
:))











الدائرة الخامسة
~~~~~~~~~~~~~~~~~~
وعليكم السلام ورحمة الله وبركاته
الدائرة الخامسة له الحق ان يبتدأ من النهاية او البدايه او اي مكان يشاء
مشاعري جميله لجمال اعينكم التي تقرأني باحساس راقي دائما
حياك الله
:)










Darkness
~~~~~~~~~~~~
ياهلاااااااااااااااا
يا مرحبااااااااااااا
الموظفه اليديده تعيش لحظات غير سعيده مع كل فزعه فير
تخنقني العبره وانا افارق فراشي الحون

وي يا زين السعاده وانتي توصفينها
لا لا...ما تعورين راسي
بس يبيلي اتكتر وياج بالبلوق ونسولف على كيف كيفنا
يا بعد قلبي على هالدعوة اللي تينن
استحي اقول امين
اشرايج باجمعين مو احسن؟
اذا انتي تخافين امي امج
انا اخاف انتي انا
لان كل من يقولي على نومه السيارة يا سيلانية
هههههههههههههههههه
انا ما خرعت الناقه مير اهي وقفت قلبي والله

الحمدلله توني راده من الخيران وووايد استانست
حياج الله:*







الخيلاء
~~~~~~~~
السوالف طعمها وياك غير
انا لي شفتك احس إني بخير
:**
اكتشفت اني احب اسولف معاكم
واسمع صدى احساسي بقلوبكم وتعليقاتكم
وصفج للسعاده عطاني عمق اكبر بقيمة كل سعاده


واي موقفكم يضحك
ههههههههههههههههههههههههههالحين انتو اللي خرعتوهم
ولا اهم اللي استهبلو عليكم
لا ويشتكي بعد
هههههههههه
عساكم دوم على الفرح متجمعين يارب
:**
















Kuw-son
~~~~~~~~~~
السعاده اللي وصفتها خطيرة
يا سلاااااااام عليك
مصور مو بس بالواقع
حتى بالكلمات
مبدع
:)
الهمسة مقطع من اغنية لعبدالمجيد
اسمها:
تنتظر كلمة أحبك
الاغنيه راحت من بالي وبقت هالفكرة
ما بعد برد الشتا الا نسمات الربيع
:)










manaL-q8
~~~~~~~~~~~
ياهلا ويا مرحبا بالاخت الغاليه منال
الله يحفظج ويا هلا ويا مرحبا فيج
فعلا رد اخوي حسافتج يا كويت يرد الروح يزاه الله خير والله يعطيه على قد نيته
:)








Magnoonah
~~~~~~~~~~~~~~
أجمل ما في الكون
أنا وهالمجنوووون:**
انا لي وصلني احساسج احس بدافع اني اكتب زود
وفي لحظات تصدقين؟
اخاف ازيد كلمة وامللكم مني زود
!!
امييين واجمعين
وسالفه الناقه لا تضحكين ترا العياب عند الباب:)

فكرة الباص وايد وايد وايد تونس
جربوها وادعولي









شهد
~~~~~~~~
آمييين واجمعين يارب
فعلا...حياتنا بوسط اسره تنبض حب وترابط سبب من اسباب السعادة
حيالله الشهد
:)











Purplecious
ّّّّّّّّّّّ~~~~~~~~~~~
وي يا زينها من صديقه
هااااديه
بسكات تدش وتطلع بسكات
:)
يا بعد قلبي انتي يزاج الله خير على هالحجوتين نورتي البلوق كله
وتصدقين انا مصورة عيزت ابي انزلهم تعسرو ما رضو
لانه الاشتراك يوم ما كتبت البوست كان مستخف
!!
عاد مشالله خضرااا
بحيرات
ذيج الجبال
ذاك النهر
شي شي
ما جنه بالكويت
:Pp~
Hehehehehhehe
تامرين امر
ان شاء الله اليايات اكثر








A7La-eNg
~~~~~~~~~~~
تشتاق لك روحي
:*
وايد انا ولهانه عليج من صجي
وحلت دنياج كلها يا قلب استكانة انتي وروحها
وصاجة
انته ليش مستعجل عليها
:Pp~








PINK GairL
~~~~~~~~~~~~~~
اي والله يا حلاتها
الله يرحم جدتج وعساها بجنات النعيم قولي آمين
:)





Desart-roses
~~~~~~~~~~~~~~~
شكرا لمجاملتك الرقيقة
وحياج الله نورتي البلوق
:)






















Simple
~~~~~~~~~~
يا مسا الورد ويا صباح الهنا
ترا مو قبول
لازم تعرفين عن نفسج
انا شكيت باحد بس يوم قلتي قاطعتنا خفت
من اللي قاطعتهم انا من غير شر
؟
:)
ياااااابعد قلبي واي صج احساسج اني انسانه استاهل كل خير هذا من طيبج وطيب اصلج
الله يحفظ يداتنا ويطول بعمرهم ويرزقنا برهم يارب
والحمدلله توني راده من الشاليه
وما قصرت
ابي احد يهمزني عقب القاري اللي ركبته
:)











Q8I-BLOGGER
~~~~~~~~~~~~~~~~
واااااي دشدشة مالك خلقها
يا زينها بس
تحلي
وبراد
وهيبه وكل شي زين فيها
الله يا يزيد الافراح بس
:)
تسوق وتنام؟
مممم اسمعني وانا اخيتك
انا كله احط حق ابوي واخوي بنك وحب ياكلونه اذا الطريج طويل
ترا يلهي ويضيع الوقت
وما يدوخ ما يخليهم ينامون جرب خطتي
الله يحفظك يارب


استكانه قوية ما يهزها ريح؟
مممممم
لا اشاعات
استكانه رقيقه تهزها الريح ترا
بس استر على ما وايهت
:)


اوخ اهلك نفس جدولنا؟
والله انا شاكة انك من الاهل
:pP~
يالله هانت هااااانت
باجر ترد الكويت متخرج وخالص وتسولف وتحن حق ايامك هناك
الله يوفقك يارب ويبلغنا فيك







شيما الكندري
~~~~~~~~~~~~~
ياهلا ويا مرحبا بشيخة الكنادره كلهم
قبل اسبوع كنت بعرس كندري حتى النخاع
طريتي في بالي قلت يا ليتني اعرفها
:))
عساج دوم مبتسمة قولي آمين
وفعلا...يا فراغ ماكو شي مولية
يا لوية كلها مرة واحده
غريبه هالدنيا مرات
:)
حياج الله










New oNe
~~~~~~~
مسا الورد
اي والله تميت يومين ريولي تعورني
جني عيوزه
:)
بس من قالج ابيها تلزق فيني
ترا استكانة جبانه كللللش
ويوفقج يارب







حلم جميل بوطن افضل
~~~~~~~~~~~~~~~~~~~~
أنا اشهد انها سعاده
بس اللي ما عنده
شيسوي؟
ينتحر
ترا مرات يكون الفقر نعمه صدقني
:)








New bride
~~~~~~~~~~~~~
انتي الزوقه والله
:)
الله يعافيج يارب ويحفظج لحبايبج وكل اهلج










Najmah
~~~~~~~~~
ياربي هالنجمة لسانها ينقط عسل
آمييين واجمعييين يارب
:)
ياعساج دوم مستمتعة وربي يحفظج ولا يخليني من مرورج البراق كبريق النجمة دوم:*

حسافتج يا كويت يقول...

إستكانتنا ما قصرتي

وأدعوك لزيارة مدونتي الجديدة وإنشاء اللة تنول إعجابك وإعجاب الجميع وشكرا

ray يقول...

لو كان في كاميرا بس :D

كان ودي أشوف منظر الركض :P

Desert-Roses يقول...

Hon ana ma agamel...

I just see things from another perspictive ;)