الأحد، فبراير 17، 2008

طفولة..وهمسة أخيرة

أفكار خربوطيه
~~~~~~~~~~~~~
الأول في حياتي...بداية الرجوله ومنتهاها
أرقب حركاته،واحفظ كلماته،وأقيس رجوله كل فعل على افعاله
كان في كل عصرية يرتشف قهوته بينما أمي تتلذذ بالشاي
فارتبط بذهني آنذاك بأن القهوة فيها من الرجوله الكثير،وان الشاي هو شراب الحريم
!!
كنت في زيارة لبيت خالتي حينما رأيت أبيهم يشرب استكانة جاي وانبهرت
توترت
وشعرت برغبة بالرجوع للمنزل
اتصلت على أمي وبطفولة ساذجة:
يمة تعالي اخذيني ما اقدر اقعد عندهم بعد
شي كبير كبير ما اقدر اقوله
!!
تنطلق امي بصحبة أبي تعتقد اني تشاجرت مع ابنة خالتي
اركب السيارة متحلطمه
عيناي كلها كلام
امسك طرف دشداشة أبوي واشهق:
تخيل يبه ابوهم يشرب جاي
ما قدرت ما قدرت ...يبه في ريال يشرب جاي؟
تبادلت امي مع ابي النظرات وانفجر ابي ضاحكا ومحاولا فك الارتباط ما بين الرجوله والشاي
تلك واحدة من الكثير من الأفكار النمطية التي كنت احملها في طفولتي واحيانا اعجز عن ايجاد لها اي تفسير
هل تحملون من تلك الأفكار الكثير؟


من المخرج؟
~~~~~~~~
كانت عمتي الصغيرة مدلله لديها كل شئ
،هي الوحيدة التي كنت اجد لديها الافلام والمسلسلات الجديده أول بأول
ارتبط في ذهني بأن كل ما قد يعرض في التلفزيون تعرف عمتي نهايته
فكنت اذا تعبت من طول فلم او مسلسل اتراجاها ان تقول لي النهاية
ولا اسكت الا حين تغضب مني :
انتي عبالج انا المخرج؟
!!

رسائل
~~~~~~~
كنت استمتع برسم مشاعري كلمات على الورق
اكتب ادق التفاصيل وكل ما قد مررت به بيومي
ولزياده التوثيق لصقت رزنامة كبيرة على حائط غرفتي
اكتب بجانب كل يوم اهم احداثه ،المضحك بالموضوع اني ما زلت احتفظ بتلك الرزنامات
وعندما اقرأ ما كتبت اجدها رموز مضحكه لست قادره على فهمها الآن
مثال ذلك:

خمسة يناير:يمعه في بنيدر مع خالاتي

عشرون فبراير:وناسه زاروني لام ميم ونون
خمسة وعشرون فبراير:نمنا في البر ملاقه وتعسرت

تبعات تلك الهوايه تمثلت في تلك الرسائل والمعلقات التي كنت اكتبها

تارة لمجلة ماجد

وتارة أخرى لوالدي اذا رغبت في شئ:ا

كتب الطلب ومن ثم اعيد الله يخليك مليون مرة

اما اعظم رساله تلك المعلقه التي كتبتها لزوجه عمي بمناسبه زواجها من عمي وكنت اوصيها على عمي

واااااااااااااي يا ملقي

!!


كيف تغضب؟

~~~~~~~~~
كانا يجيدان اغضابي واخراجي من هدوئي
وكنت حينما اغضب واصل لقمة الغضب اقصى ما يمكن ان يخرج من لساني:
يا تعبان،او يا ح...وتلك اشد حالات غضبي،

سمعتني امي يوما فاصدرت قرار من السلطات العليا :

اذا عصبتي على اخوج وتهاشتو يا ويلج ان سبيتي

قولي يا برتقاله

يا تفاحة

يا موزه

حاولت وحاولت ولكن...كنت اذهب اليها الدموع لي الركب:

يمة قلبي يعورني ،لما اقول موزه وبرتقاله يضحكون ما يحترون

!!

كبرت ،تغيرت بي أمور كثيرة ولكن ما زلت حساسه بالنسبه لبعض الكلمات

ولا اقوى على التعايش مع اشخاص يسبون ،يلعنون ،او يدعون على الجميع في كل لحظة وثانيه

من ينسى؟

~~~~~~~

هناك ذكريات طفوله تنحفرفي قلب الطفل ولا ينساها مهما كبر

لم ولن انسى تلك اللحظة...في سرداب بيت جدتي اثناء الغزو العراقي للكويت

شهر ينايرمع بداية الحرب الجوية

كنت في السادسه من عمري ويكبرني اخي بسنتين

أمي بثوب صلاتها تتربع على الارض تناديني انا وواخي تقطع علينا اللعب

سولفت لنا عن قصة للكويت الجميلة،وعن واقع الغزو الأليم بأسلوب يناسب اعمارنا انذاك

كانت تتكلم واخي يتحرش فيني..تارة يرفسني وتارة أخرى يسحب شعري

لم نكن نعي ما تقول حتى وصلت لبيت القصيد:

يمة وليدي باجر راح تيي طياير كبيرة عشان تحرر الكويت

اخاف ان يصير شي،تبدي الحرب يتكسر البيت تقومون ما تلقوني

صارخو...ونادو حيل لما تطلعون

وامسك اختك،هذي اختك مو تخليها

!!

كانت ما تقوله اكبر من استيعاب عقولنا

ظللنا ننظر اليها مشدوهين تتلامع الدموع في اعيننا

اخي شعر بمسؤلية رجل هو طفل ظل يسألها عن كل شئ عن كل ما قد يحصل وهو يرتجف:

يمة ليش ما ننام ويا بعض عشان اذا صار شي نكون ويا بعض؟

يمة ليش تخلوني انا ويا اختي بروحنا؟

اما ان فكنت ابكي..انتحب..امسك طرف ثوبها امسح دمعي واسألها:

يمة واخوي الصغيراخذه معاي؟

تلك اللحظة ظلت محفورة في قلبي رغم مرور السنين

الله لا يعود الشر ويحفظ لنا ديرتنا كل العمر والسنين

همسة على طاري الذكرى الأخيره

هناك أنواع من الحب لا تقبل القسمة على اثنين

حبنا للكويت لا يقبل المساومه ولا التشكيك

ان كان لك وطن يستحوذ على فكرك وولائك...فارحل اليه


الكويت لاتحتاج لامثالك من اصحاب الذمم الواسعه

!!

دمتم بحب

هناك 72 تعليقًا:

Najmah يقول...

enty 3asaaal
ma ynlam ely y7ebich

ly 3awda etha rby ketab

hatha mo ra'9y yktb 3araby =\

bs magdar amr bdon ma a3ali8

:**

Mamloo7a Q8ia يقول...

ههههههه
يا حلاتج وحلاة افكارج الخربوطيه

انا مثلج عندي روزنامات اكتب فيها الغاز
لكن المشكله لا ييت عقب جم سنه اقراهم وما اتذكر الرموز والالغاز اللي كاتبتهم؟؟؟
:(


الله لا يعيدها ذكريات الغزو

واضم صوتي لصوتج
اللي ماله ولاء لهالوطن الحبيب
خل يخفف علينا ويروح المكان اللي يحبه

والله يحفظالكويت واهلها من الفتن ما ظهر منها وما بطن

عــــاشــــه يقول...

باحلات تدويناتج يوم أقراهن قبل لا أرقد

والله نفس حركات مريومتي

ضحكتيني يوم تسبين ... ههههههههه وتحترين يوم ماينقهرون

والا سالفة القهوة والشاي

أنا كانت عندي سالفه يوم صغيره
كنت أفكر إذا نصوم لازم ماناكل ولا نشرب وحتى الحمام مانورح

وتخيلي لين الحين انا حرمه عوده عمري 34
كل رمضان وإنتي بكرامه كل ماأدخل الحمام أتدوده (حلوه هاي كويتيه هههه) ماأعرف أركز الي أسويه صح وإلا بيفطرني

وسالفة الغزو وإنتوا يهال تعور القلب

الله لا يعودها من أيام

والله يديم الأمان على ديارنا

وعمار يالكويت عمار

Purgatory يقول...

بوسط لطيف زي التفاح

ملاحظة: التفاح ليس نفس التفاح المستعمل في المسبات حيث أن ذاك تفاح أخضر و أنتي تفاحة حمرة و تم ترك التفاح الأصفر جانبا بيكوز ما يعجيني اللون الأصفر

و دمتم سالمين

البرغ السكري بو قذلة

Mesba7 يقول...

طفولتج بريئه تعكس روحج

حاولت أذكر شي ما يفشل و ما يكون دفش و يكون عرض على البوست لكن ما طاوعتني ذاكرتي

تحية من القلب على آخر ما كتبتي بالبوست :) و عسى الله يحفظنا و يحفظ ديرتنا من كل شر

غير معرف يقول...

كلمات من القلب ....تدش القلب بسلاسة...اخر كلامج عور قلبي و ذكرني بالغالية الكويت ...ولهانة عليها ...صج ماكو وطن مثل وطنا...الحمد لله اني كويتية من الدم الازرق ..ولائي لها وبس........

DiLLi O MiLLi يقول...

ههههههههههه
ههههههههههه
ههههههههههه
أشدعوه !! ماكل حسوو !!؟؟
:D


ذكرتيني في أبوي الله يحفظه
كل ما دخل علينا أنا وخواتي
ولقانا منسجمين ونبجي على أحد الشخصيات في فلم تموت
قال : اشدعوه !! ألحين هاللي مات خل أيوخروون عنه الكاميرا
تلقونه قام جنه حصان مافي ألا العافية
لاااااا وضحكته مع المخرج شايله من ورا الكاميرا
أبذمتج
ألحيين ويناااا وووييين الأندماج
:(
لوو الفلم شاعري .. قال هالبطل أصلا متزوج في الصج
فيحسسنا أنه فعلاً يمثل دور الحب
ونفقد أنسجامناااا بالفلم
الفلم الوحييد اللي ما يتحرش فينا .. لاااا ويندمج معانااا
أهو الفلم الكوميدي


شوووفي أنا أصدقج
لااااااا
أثاريج مليقه !!؟؟
وووويه ضيقتي خلقي
:(
لام .. ميم .. نون
حشاااااا تشتغلين في
CIA ?!
:)


هههههههههههههههه
برتقالة
تفاخه
موزة
حشااااا صاحبة بسطه بجبرة الخضرة !؟
هههههههههههه
:)
أمي وأبوي
عودونا من وأحنا صغار لااا يينا نسب
بما أن مسبة الحمار أهي اللي دارجه
عودونا لااا أحترينااا ونبي نسب .. نقوول
يا حصاااان
بما أنها لفظياً قريبة من حمار
وللحيين وأحنا أمهات كبار نقولها ساعات
بينا وبين بعض
وعلمناهااا عيالنا


يااااا حبيبتي
:"(
الله لا يعييييد ذيييك الأيام
ويحفظ الكويت وأهلها

أهلـــها الحقيقيـــن
اللي يحبونـــها .. ويحبــوون أهلــها
اللي يخــافون على عيــال غيرهــم
مثل مــا يخــافوون على عيــالهــم
اللي لــو في شك 1% بأنسان
قضي على 2 من شبابها
أعتبرة مجرم وعدو
موو أروح أدافع عنه
وأعتبرة شهيد
وأسويله مجلس تأبين

حسبنا الله ونعــم الوكيــل
الله ياااااا حرررررتي على اللي اللي صار
لااااا ويهدد وزير الداخلية على تصريحاته
هــــــــــــــــــــــــــــــــــــزُلـــــــــــــت

ومثل ما قلتي
بـــس بصيغــــتي
أذلـــــــف .. روووووح للديـــرة اللي ولائك لــــها
الـــديــرة بغـــنى عــن أشـــكـالك

غير معرف يقول...

دمتي لي استكانه..
أرتشف منها في كل ووقت وأترقبها كل حين..
يبقى كلامج جريب من القلب..
وتظل كتاباتج تستهويني..

أختج ~هند~

سدرة العشـــاق يقول...

راقية بطرحج و بأسلوبج

عسى الله يحفظج و يحفظ لج اميمتج و ابيج و اخوانج و لا يفرقكم و يجمعكم على خير بالدنيا و الآخرة


عسى الله يحفظ ديرتنا من شر الفتن و لعن الله موقظها
حسبنا الله و نعم الوكيل

حفظج الرحمن
:*

اجار الدين كشمش يقول...

الله يا استكانه

على كلمة

حب الكويت ما ينقسم على اثنين

عسسسسسسسسسسسسسساه دوم
ونورثه للعيالنا

ما فيني شده حتى ابتسم

كالعاده ..انا في حالة

ما اعرف شسميها !!!1

فمالله

Organic Kuwait يقول...

waw. very nicely written.

`~MnO YeNSa! ~` يقول...

كلمـــــــــــاتج اتينين احبها واستانس عليها و على صاحبتها :* و انقهر لما تخلص بوستج لاني وايد استمتع فيه ,,, مواقفج وايد اثرت فيني حيــــــــل ,, كلماتج قريبه يمكن لان عشنا كلنا لحظات مشابهه ,,

و استانست لانه اسمي له نصيـــــــــب ببوستج ..لما قلتي

مـــــــــن ينسى ... استانس :)

الزين يقول...

العزيزة جدا استكانه

ماهي افكار خربوطية
هي براءة متناهية ترس الجيلة


من المخرج؟؟
........
أبيه انا لما الحين ساعات التفت على اللي يمي واقول يعني شنو ؟؟
شصار؟؟

شنو يقصد المخرج
:)))))

الكبر شين


رسائل
.......

بذمتج مو لما الحين تكتبين بروزنامتج
بس يمكن تغير شكلها

انا اكتب بس اشياء بعدين اقول لج عن الأشياء اللي اكتبها

ومرحلة مجلة ماجد بيييييييه
ذكرتيني
أبيه مريتي بمرحلة اصدقاء بالمراسلة

:)))))

ياحلو ايامنا قبل



كيف تغضب
.........

مت من الضحك
كلش عاد ولا يعروج قلبج
سبي يا ماما سبي

تصدقين انا نفس الشي
ما احب التحلطم ولا التدعي واللعان
وحتى السب له حدود عندي

يعني ما اقدر بصراحه ما اقول حق هندي ماسك لي اللين الشمال بالهاي ويي وماشي عشرة

ياحم.......ااا؟؟؟

ايه ايه

ما اعبر
لا تغيرين رايج فينى

:)


من ينسى؟
.........

تدرين
الشي الحيد اللي ما قدرت اتخطاه بهالسالفة
اغنية وطن النهار
لما الحين لما اسمعها
اغص بدموعي
مدري شيصير فيني



أما عن الهمسة الأخيرة

خوووووووش طراق
جك جك جك جك جك

عفية عليج
وتسلم لي هالأنامل الذهبية

:*****

charisma يقول...

يا حلو الطفوله
وسبحان الله فعلا فى امور ما ينساها الطفل

وعجبنى التوثييق
هههههههههههههه


اهم شى توثيق الزواير واليمعات

وااى لو بوثق انا ما تكفينى الصفحات من الزواير واليمعات

اسبوعى كله زواره

يسمونى كريزما زواره ربعى

دهرى ازوووووووووووووووور

تعبت تعبببببببت
://

يا حلوج ويا زين طفولتج وسوالفج
:**

واضم صوتى لصوتج بمسك الختام

الى له ولاء فى مكان ثانى خل يروحله

هذا الكويت واحنا كويتيييييين

Expatriate يقول...

بوست حلو يا استكانة .. كالعادة مو شي يديد


اذكر وانا صغير مرة ما اذكر شنو كان الموقف بس كنت منقهر وابي اسب احد .. وما عرفت شقول.. جان اقوله
يالـ عا

شنو معناتها مادري .. اللي جدامي واللي معاه استغربوا. . شنو يالعا ؟ انا منقهر اني مادري شنو معناتها بس بردت جبدي
هههههههههههههههه

وبالنسبة لآخر فقرة
مع اني ما احب السياسة
لكن اقول صح لسانج يا استكانة

ما شاء الله عليج

bin3li يقول...

و الله أنج انتيكه
يعني نحن ما يصير نشرب شاي
:P

في النقطة الأخيرة و الله مب الكويت بس
هذا بلاء حايشنا كلنا
في شباب مغسول مخمهم سواء كان من المذهب السني أو الشيعي
إذا متشددين ، فولاء السني للسعودية و ولاء الشيعي لإيران، ودام هم جذه خلاص كل من يروح للديرة إللي تريحه و يخلونا ببلادنا نعمرها بعرفتنا

مع احترامي لشعبي البلدين و لكن حكوماتهم تدعم جماعات تسيس الدين لغاية التوسع الجغرافي
و بش

لاتبطين علينا و نزلي بوست كل سبع ساعات
الله يخليج الله يخليج الله يخليج الله يخليج الله يخليج الله يخليج الله يخليج الله يخليج الله يخليج

:P

بنت الشامية يقول...

اجمل شيئ لما تتذكرينى ايام طفولتج

انا عندى شيئ كل ما اتذكره استحى من نفسى واحس انى غبيه واااااايد
عندى خالة وحده بس وحبيبه احبها واايد واايد الله يرحمها....اسمها منيره
وحسبالى كل وحده عندها خالة لازم يكون اسم خالتها يكون خالتى منيره
اكو غباء اكثر من جذى لوووووووول

========
الله يحفظ الكويت
ويرحم شهداءنا
ويبارك لكل من دافع عنها
علينا كلنا ان نحافظ عليها
و نسكت كل صوت للفتنه فيها

=======

5roofa يقول...

واي استكانة اخر شي عورتي قلبي والله دمعت عينيي

الله لا يعيدها من اياام يارب


طبعا قبل ما تدمع عيوني كنت ميته من الضحك لوول على سالفت الجاي
و المخرجه
لووووول غشيييييييت

امبي وانا ياهل كنت اغلب الفتره بره عشان ابوي كان يدرس

بس اذكر كنت لي رديت الكويت كله افكر انه عيال خالتي و عمتي فقارة و ماعندهم فلوس لانه كله يشوفون باباي توم وجيري الحلقات القديمة
لوووول
و مو مستوعبة شلون ما يشوفون اشياء يدديه لوول

و كنت اقول حق امي لمه اشوف الريايل بدشاديش


mamy why men wear dresss

و انهاار و ابجي لي بايو لبس
و الحين اموووت على الريال بالدشداشه لوول تحسين ردت فعل عكسية
:p

لوول حدي كنت سخيفه


امبي على النوتات وااي انتي لو تشوفين داخل صندوق ذكرياتي في فضايح و صج كله حجي شفرات لوول و قولي ادري منو الحين

والله ولا اذكر

يسلمو يالغاليه و ماننحرم من هالدم الخفيف و القلب العسل يارب

SALAMZ SWEETEE...

الخيلاء يقول...

هههه استكانه خرعتيهم :)

عيل انا اذا عصبوا علي خالاتي ..

والله اعلم عليكم ابوي .. و الي يحرني يضحكون :)


انا محتفظه بقصاصات المحاضرات .. لما اقراها اموت من الضحك و اتسائل بيني و بين روحي ..

شلون نجحت بالمحاضره و انا كل هالاوراق مكوده عندي :p

اذكر الرسايل الي امي كانت اطرشها لي مع اي احد طالع من الكويت الاني كنت مسافره مع خالاتي و صار الغزو

واذكر الكاكاو الي كانت يدتي الله يرحمها تشتريه و تعطيني اياه اتقولي هذا من امج

الله لا يعيدها من ايام :"(

الله يحفظنا من الفتن و يرد كيد كل من اراد الكويت و اهلها بسوء بنحره و يجعل تدبيره تدمير عليه

Sn3a يقول...

الابو
اخيه والله هالنعمه مكانها كبير عندي
جد والله الابو يمثل كل شي خصوصا حق البنت
اهو ميزان الرجوله اللي تقيس فيه باجي الذكور
خصوصا ان كان ربي كمله بالخلق والسمعه الشريفه بين الناس

سالفه الجاي قويه


ربي يخليلج ابوج


انا كنت من ربع مجله ماجد
بس ولا مره دزيتلهم


اما سالفه المسبات مشكله
احنا هني بالبيت يدورون صفه فيج او شي سويتيه
فماراح تسوي علينا


ايام الغزو معني ما اذكر معظمها
بس اذكر لما امي شالتني من داري انا واخوي ونومتنا بدارها
واذكر لما ولدت اخوي بالغزو
واذكر لما قعدنا بسرداب بيت عمتي
اذكر الجنود واهم يدشون بيتنا بس غريبه كانو بمنتهى الاحترام يما منهم يخرعون
اذكر اخوي ماكان يتكلم مع ان اللي بسنه تكلمو فتخيلو اول كلمه قالها أدام يعني صدام
مو خوش بدايه


ربي يحفظ الكويت من كل الفتن الداخليه والخارجيه
لو صلح الداخل
تميز الخارج
قبل الكويت كانت بالرياده لأن عيالها كانو يطلقون على نفسهم كويتيين ومذهبهم يطبقونه على نفسهم
اما الحين
كل من حسب ان مفاتيح الجنه بيده
وكل فلان وعلان نزل على نفسه فتوى
او سبب فتنه مالها سبب

الديره تحتاجنا
والاشيا اللي قاعده تصير بره الديره قاعده تشغلنا بمشاكل داخليه وفتن عظيمه وتوقعنا بالكثير من الشكوك والذنوب
حرام اللي قاعد يصير والله



يعطيج الف عافيه
ربي يحفظ الديره

محـــــارة يقول...

حبي بجيتني على كلمة الوالده ... وااااخ على هاللحظات الله لايعيدها

ياربي الكويت غاليه تهقون الي لهم مليون وطن يحسون فيها مثل ما أهيه بقلوبنا ؟؟!! ماظنتي ولا جان ماغفت عينها وهما يبجون على مجرم سيح دمها بيوم

يربي تحفظها لنا وتسعدنا بنهضتها وتطورها بالي يرضيك ويرضينا .. ياكثر غلات هلأرض على قلبي .. محد راح يحس بمعنى هالكلمة إلا الي نحرم بالعيشه بأرضها سنين وهو من ترابها من ولد

أحلى شعور أحسه كل ما أزعل السنوات الأخيره أقول لعمري محاررره أنتي مستوعبه أنج صرتي تعيشين بالكويت .. سكتي هذي نعمه نطرتيها وااايد والحمد لله تحققت وعسى ربي لايحرمني لذت البقاء بالوطن

Q80 Blogger يقول...

بوووست روعه

بس ذكريات الغزو اتعور القلب
عندي ذكريات مشابهه تمام لذكرياتج
انا واختي الي تصغرني عامين
ونفس الموضوع .. مع الوالده مسكينه

الله لايعودها من ايام
عشناها بارض الكويت وماتخلينا عنها !!

والحين يايين ناس يساومون بوطنيتنا .. وشايفين روحهم الوطنيين الوحيدين .. واهما ابعد مايكون عن الوطنيه .. بل هو التحزب للأعداء للأسف



سالفه القهوه مشكله .. لأني ما اشربها للأسف
شككتيني بروحي :P

تحياتي استكانه جاي :)

esTeKaNa يقول...

najmah
~~~~~~~~
يا بعد قلبي انتي والله
:**
لا مو قبول
خليه يكتب عربي ورجعي غردي في سما بلوقي
:))









maMLoo7a q8ia
~~~~~~~~~~~~~~~
يا مسا الافكار الخربوطية كلها
:))
واي ليش الالغاز؟
ههههههههههه
انا حسيت اني مباحث امن الدوله
كاتبه هاليوم شفنا اللي اللي
بس انا حسيت ...ولما رديت معصبه
!!
تخيلي جذي كاتبه كلمات متقاطعه
هههههههههههههه



اللهم امين...اي والله
فتن الباطن اكبر واشد
الله يستر على ديرتنا ويحفظها

esTeKaNa يقول...

عاااشه
~~~~~~~~~~
هلا وغلا بأم مرايم والله
حلت دنياج قولي آمين
:)
اي احتر لاني ابي احرهم وهم يضحكون
ههههههههه
واي عااااشه انا كنت مثلج
وهالشي عقدني ببدايه صيامي في رمضان
ههههههههههههههههه
هههههههههههههههههه
حالتنا صعبه
!!
اي والله الله لا يعودها
وعمار يا ديرتنا
ويحفظ الرحمن اماراتنا الغاليه
:*








purg.
~~~~~~~~
معقوله؟
من وين طالعه الشمس؟
يا سلااااااام يا سلااام
شنو هالتعليق التفاحي الجميل
شنو هالقذله الستايل؟
:))

New Bride يقول...

واي استكانه زوغة سوالفج تهبل

انا اول عبالي كل جدة لازم يكون اسمها مريم لأن يداتي الثنتين ام امي و ام ابوي اسمهم مريم كنت اتهاوش مع البنات اللي تقول اسم يدتها نورة او حصة

واي الغزو مادري ليش ممسوح من ذاكرتي مع انه كان عمري 9 سنين بس ما اذكر

الله يحفظ الكويت احبها

esTeKaNa يقول...

mesba7
~~~~~~~~~
يا هلا ومرحبا باخوي المسباح
:)
هذا البوست بعد المونتاج
لو اكتب كل شي بتغير رايك فيني يمكن
:pP~
شكرا من القلب على تعليقك الجميل
الله يحفظ لنا ديرتنا يارب
نورت البلوق
:)







anon.
~~~~~~~
ياهلا ويا مرحبا
كنت اتمنى ان أقرأ لك اي اسم تختارينه حتى اكون قادره على الترحيب والرد كما يجب
:)
ديرتنا ديرة العز
عسى ربي يعزها ويحفظها
ويردج لها سالمة وغانمه
شنو قصدج بالدماء الزرقاء؟
!!
خلاص اسميج كيويته ذات الدماء الزرقاء؟:))
حياج الله

esTeKaNa يقول...

dilli o milli
~~~~~~~~~~~~~~~
لو شارب حسو اظنتي جان طبيت من الدريشة
هههههههههههههههههه
:))
مشالله على الوالد
كلش ما يساعد على الاندماج
هههههههههه
ترا انا سوي جذي حق روحي اذا حسيت اني متأُثره بفلم
عشان ما اتعمق وياهم وايد
:))
واي سالفه مرت عمي اذا ذكرتها اتفشلني
يعني تخيلي بنت حماي توني مالجة تعطيني معلقه تعبر عن مشاعرها وتوصي على المعرس
مو لقافه؟
هههههههههههههههه
وبعدين انتي لو شايفه الرزنامة جان شكيتي فيني لاني شكيت بروحي
كله حروف ورموز
ههههههههههههههه

حصان؟
مير حصان جنها مدح
!!
انا كنت اغلي من داخل
بس امي يالله من فضلك تقولي البنت ما تسب،ولا توسخ لسانها
تخيلي شطتي ومعصبه وبصارخ اقول يا برتقاله
يضحكون علي وانا الدعله ابجي
حسافتي على دميعاتي
هههههههههههههههههههه



امييين يارب
واي كلامج يبرد القلب
اصفق لج؟
جكجكجكجكجكجكجك
لا لا مابي
تعالي بحب راسج على هالحجوتين اللي تبرد القلب
:**

esTeKaNa يقول...

هند
~~~~
الله الله يا هند
خلج من كلامي
قولي لي ليش كل تعليق تكتبينه احلى من الثاني؟
وليش تعليقاتج تفرحني؟
ما راح تحطين بلوق وتكتبين لنا؟








سدرة العشاق
~~~~~~~~~~~~~~
هلا بسديرة هلا
:)
الرقي قليل مما عندكم
اللهم اميييييييين واجمعين يارب
ما قصرتي
ياربي تعليقاتج ودعائج يسرح الصدر
:*








أجار الدين كشمش
~~~~~~~~~~~~~~~~
ما ينقسم
ما نساوم عليه
ولا يهتز ولو لحظة بقلوبنا


اللهم امييين وما قصرت
مافيك شده تبتسم؟
الابتسامة ما يبيلها اي شده
عسى ماشر؟
ضيقت خلقي
:(

esTeKaNa يقول...

Organic Kuwait
~~~~~~~~~~~~~~~~~~~~
شكرااا
:)






mno Yensa
~~~~~~~~~~~
كتبت منو ينسى وذكرتج
:*
مع انج للحين ما قلتي لي ليش اخترتي هالاسم
:)
تنقهرين اذا خلص البوست؟
وي اسم الله على قلبج والله
انا بكبري موجوده معاج
وبكتب لج معلقات شطوووولها بدل البوست
تامرين امر
:)

esTeKaNa يقول...

الزين
~~~~~~~~
شيخة الزينات كلهم
صبحج ربي ومساج بكل خير
:*
براءة متناهيه ترس الجيله؟
الله على توظيف المفردات الكويتيه الجميله في شرح احساس جميل
:)

من المخرج؟
انا بعد اسويها
واعتبره من تبعات تفكيري اللي يصير مرات بصوت عالي ويا نفسي
:)
الكبر شين؟
منو كبير هني؟
ما عندنا كلنا شباب شباب
!!
ولا تنسين تقولين لي شنو كنتي تكتبين
الحين يشتغل الفضول عاد



الهندي قولي له
مممممممممم
مممممممممممممم
يا موووزه خايسه
بس ديري بال تسبين
هههههههههههههه
ما اقدر اغير رايي
ماخذه قلبي تدرين
:**
والله الله على وطن النهار
من تبدي لي تخلص وانا اتعبر وياها
عجيبه هالاغنيه


ويااااااااااي
يوم صفقتي حسيت اني بدور
ههههه
الله لا يحرمني منج يا كل الزين
:)

esTeKaNa يقول...

charissma
~~~~~~~~~~~~~
هلا هلا
واااااي ولهت ليج وعلى كل تعليقاتج
:*
اييي يعني الزواير اشله توثيقها؟
اخا مذكرات الاميرة ديانا بس
هههههههههه
انا بعد خبرة سنوات بالتويثق قمت ما اكتب الا اذا سافرت لانه في اماكن غير الزواره
عيل تقولين اسمج كريزما زواره؟
هههههههههههههه
ههههههههههههههه
موتيني من الضحك
يختج واصله واصله كلج سنع


الله يحفظ ديرتنا يا كريزما
في اشيا صج تضيق الخلق
:(

esTeKaNa يقول...

expat
~~~~~~~~
يا هلا ويا مرحبا اخوي العزيز
حلت دنياك قول آمين
يا العا؟
ههههههههههههههه
هههههههههههههههه
اهم شي انه برد قلبك
شوف اهي العبره باحساس قلبك مو بالكلمه
يعني انا كنت اصارخ يا موزه
يا برتقاله
بس لانهم يضحكون احتر
:)))
ولا انا احب السياسه ذاك الزود
بس هذي يا اخوي ديرتنا
لابد من قرصه لو خفيفه تذكرنا بهالشي

حياك الله
اتمنى تكون انته وكل من تحب بخير

esTeKaNa يقول...

bin3Li
~~~~~~~~
لا ما يصير
شربو قهوة كلها رجوله
hehehehehe
:))
اشوة انفك الارتباط في بالي من زمان
ولا جان تعبت نفسيتي
:Pp~
عدل كلامك
للله يحفظ بلادنا ويبعدنا عن الفتن يارب

وشوي شوي يا بن علي
انا حاليا موظفه وانته تدري
وبعدين لا تقلدني بليز
ههههههههه

:)

esTeKaNa يقول...

بنت الشامية
~~~~~~~~~~~~~
يا هلا ويا مرحبا
هههههههههههههه
ههههههههههههههه
واي مت من الضحك
انا كنت اقول ليش يغنون مناير خزنه التاير؟
يعني اهي حديده اللي بتاير السيارة؟
شي ما يونس
!!
اي والله يا بنت الشامية
الله يحفظ ديرتنا من الفتن
اللهم امين

esTeKaNa يقول...

خروفة
~~~~~~~
هلا بالخروفه هلا
والله اني كل ما ذكرت هسالفه دمعت عيني
على اني كنت صغيره ب سماني قادره انساها
!!
عبالج عيال عمتج فقاره عشان توم اند جيري؟
هههههههههههههههههه
واي خروفه ضحكتيني
يا سلااااااااااام
ما كنتي تحبين النفنوف الابيض الملقب دشداشه
والحين ياخذ القلب هااا؟
Heheheheheh
ونبي بوست نبي بوست
كتبيه عن صندوق الذكريات
هههههههه
خروفه انا شكيت بنفسي
كله حروف وشعر
وكلمات غريبه
ولا بالمراهقه شي عجيب
:))
نورتي يا الغاليه

esTeKaNa يقول...

الخيلاء
~~~~~~~~
تعلمين ابوج؟
هههههههه
انا جذي
تخيلي من كثر ما اقول يبه
مرة بالجامعه مشتطة اكلم الدكتور واقوله يبه ويبه
قالي الظاهر وايد تحنين على ابوح
:))
واي عورني قلبي
يا بعد قلبي اميمتج
عيل ذاب قلبها عليج؟
اي والله الله لا يعودها من ايام ويحفظ لنا ديرتنا واهلنا يارب

esTeKaNa يقول...

sn3a
~~~~~~
اي والله يا السنعه ان الابو نعمه
الله يحفظه ويرزقنا بره قولي آمين
:)
من ربع ماجد طلعتي؟
انا كنت احب الاربعا عشان ماجد
بس ما دزيت
بس اكتب واخشش
هههههه

واي انتي كنتي صغيره بالغزو مثلي
انا ا اتذكر تفاصيل
بس اذكر مشاهد ما انساها
!!
عور قلبي اخوج
تخيلي ياهل صغير اول كلمه يقولها صدام
اسم الله عليه الرحمن الرحيم
الله لا يعود الشر يارب

والله يا السنعه الفقره الاخيرة من تعليقج كلها عقل وسنع
ليش نشغل نفسنا بغيرنا
احنا ناقصين؟
الله يصلح مافي النفوس
ويحفظ ديرتنا من كل الفتن يارب

اسمحي لي اشكرج من قلبي
ما قصرتي على هالكلام والله
:)

esTeKaNa يقول...

محارة
~~~~~~
عسى ربي ما ينزل دمعتج من شر
وعورتي قلبي
الوطن واحد
والحب له ما ينقسم على اثنين
الله يبلغنا بيوم تهدا فيه هالفتن وترد على ريلها توقف ديرتنا
ونعمة انج تكونين بالكويت
عايشه فيها وبظلها نعمه ما بعدها نعمه
انتي ادرا فيها
الله يحفظج ياالغالية
:)

esTeKaNa يقول...

q8i-blogger
~~~~~~~~~~~~~~
الأروع هو مرورك اخي العزيز
ممممممم
نفس ذكرياتي
واخت تصغرك بعامين
وصمود
ممممم اخاف انته اخوي صج
:D~
لا تتشكك بنفسك
انا فكيت الارتباط في بالي مابين الرجوله والقهوة الحمدلله
:))
وعدل كلامك اخوي
الله يحفظ ديرتنا من كل الفتن
ويبقينا على قلب واحد يارب

esTeKaNa يقول...

new bride
~~~~~~~~~~~
كل يده اسمها مريم؟
هههههههههههههههه
هههههههههههههههه
واي انتي اللي زوقه والله
وبنت الشامية توها معلقه تقول عبالي كل خاله لازم يكون اسمها منيرة
صج بدعه يا حلاتنا ويا حلاة طفولتنا
:)
حبتج العاااافية
امين يارب

اجار الدين كشمش يقول...

عاااااجل

"""""""""""""""""""""""
لاخواني الاحبه المدونين

تم سرقة اسمي

اجار الدين كشمش

من احد الحراميه ويبدو

من لهجته انه غير كويتي

ويدور بين المدونات

لاشعال الفتنه بيننا

وخااااصة اخواني الاحبه
في البلوغات
اللذين اختلف معهم

بالراي واللذي لايفسد لمحبتنا للكويت وودها

قضيه
""""""""""""""
اهيب بمن يريد ان يطفأ

الفتنه ...ان ينشر

وشكرا للاخ مطقوق الشاب في عمره والرائع في عقله

وشكرا ل احلى مهندسه
ولجميع من كشف اللص

الفتني

ونقول للص وايد عليك
اجار سطوح الكويت المتماسكه ..بحب الكويت
""""""""""""""""""""
فمالله
من اراد التأكد بروفايلي

غير بروفايله

غير معرف يقول...

أهلا استكانتي..

أخاف اني أحط بلوق وما أهده..

وأنا وراي دراسه..

>>>يمكن عقب ما أتخرج أفكر

~هند~

جنون إحساس يقول...

الله شالذكريات الحلوة
فصلت من الضحك ع الجاي لووول
أمي عندها رسايل منّي وآنا ياهل
عاد كلا كاتبة طلبات ماكو حجي سنع
^__^

الله يحفظج

وعلى طاري الأخ
ياريت يسحبون جنسيته بأسرع وقت
"الخاااين"

Najmah يقول...

بااااااك

1-لووول
امبييه
صج صج ضحكتيني
وشي كبير ماقدر اقوله ها
:P


2-
هذي انا كله مالي خلق اتابع
وعلى طول أسأل يدتي
قوليلي شنو يصير
واذا قالتلي مادري اقولها متى الحلقة الاخيرة؟
:P


3-
لما الحين أذكر الرسايل اللي كنت اكتبهم حق ابوي واخشهم بجنطته قبل مايسافر
كل ما قال لي اخوي الصغير كتبيلي رساله حق امي او ابوي
ولما الحين اتذكر رسماتي الخطيره
كل ماشفت الرسمة اللي رسمها وقال لي هذي انتي :P

مجلة ماجد
ذكريات خااصة
احبها لما الحين
وعندي ظرف فيه 10 دارهم محتفظة فيهم
فزت بمسابقة فضولي
:P


4-
لووووول
أكره شي عندي السب
وخاصة لما يطلع من بنت
فعلا ماقدر اتحمل هالشي
اذكر مرة قطعت علاقتي في وحدة وصكيتها بلوك وديليت
عشان كانت كله تسب
!!
اقول بقلبي
مو نوعي اتصرف جذي
بس صج شي ينرفزني واايد =\


5-
ما اتذكر من هالايام شي
الا موقفين انحفروا بذاكرتي
الأول لما قمت بالليل مخترعة وأمي يمي تلمني وتقول الأدعية وتقرا عليي
والثاني لما كنا بالسيارة ووقفنا شرطي عراقي وخذا مني جيس كنت حاطة فيه ألعابة جان أصرخ عليه بكل قوتي
عطني العااااااااااابي :P


ربي يحفظ ديرتنا من كل شر
الانسان مايحس بنعمة الامان الا اذا فقدها

همستج الاخيرة
تسوى كلمات الدنيا كلها
ياليت الناس تفهم
للأسف اكتشفت ان فيه ناس ماتستاهل الكويت


امبيه بوستاتج تخليني اتكلم وايد
يصير جذي
;)

صقر قريش يقول...

اعلن انا صقر قريش اني قاطعت

استكانة الجاي ومن الحين ماشرب الا فنيان

قهوة وذلك لسبب :

لأنه استكانه باعتقادها ان الجاي للحريم
والقهوة للرياييل :) اعتقادات

الطفولة مضحكة مثلا انا عندما تحجبت

ابنة خالي في اليوم الذي يليه لبست

الغترة وكان عمري 6سنوات قالت لها امي

مبروك لأنج تحجبتي كلمتها انا وقتلها انتي
تحجبتي وانا تغترت :).

اما الغزو كان عمري خمس سنوات اذكر

انه دشوا علينا الجنود عشان يدورون

على اسلحة مني ولامني بالبيت وكان بيت

يدي الله يرحمه المهم كان ولد عمنا وهو

كبير قاعد وياهم فاسألوا عندكم رشاشات

؟ قال لا انا فزيت وقلت اي ان اعرف

العراقي استانس وولد عمي حده خاف لأنه
بيروح من جيس اهله المهم واحد من الجنود

وكان طيب قال حق قايدهم :سيدي هاذ

ولد مايعرف شي قال القايد:اسكت وين

الرشاشات يابني؟ المهم وديتهم فوق وولد
العم قلبه بريله المهم خذيتهم داري و

كانت يم دار ابوي وامي المهم كانت امي

بالغرفة بروحها ولما سمعت باللجة الي

بره طلعت وكانت بثوب صلاتها ولد عمي

قالها مسكي ولدج ترى شكله بيودي ابوه

بداهية (هو خايف اوريه شوزان الوالد

مالت الصيد) المهم دخلتهم داري وامي و

ولد عمي حدهم خايفين المهم طلعت لهم

رشاشي الأزرق اللعبة :) الحمدلله الله ستر و

ما انا رحت من جيس أهلي والله ذكريات

الغزو ماتنسي الله لايعيدها.

استكانه يابرتقالة:) متى تشرفين مدونتي

ولا المقاطعة نهائية :).

مـــــي وعشرون عاما يقول...
أزال المؤلف هذا التعليق.
مـــــي وعشرون عاما يقول...

اذا على تفاشيل الطفوله عندي كثييير
اتذكر مره في احدى العطل طلعنا كعائله مع جدتي مدينة الطائف جدتي تحب تعطل هناك لانو برد (مدينه جبلية) المهم انا طفولتي كانت تتميز بالتالي حساسه بكاية ماادري وين الله موديني كانوا ادائما يقولولي انت عقلك وين اخر مره حطيته او وين ضيعتي عقلك المهم وفي هذا العطله اجتمعت انا وولد خالتي الذي يحمل نفس الصفات المهم وانتهت العطله نزلنا الحوش ننتظر الجموع الغفيره خلاص نازلين جده متحمسين انا وولد خالتي تعبنا من الوقوف جلسما على كرتون المفاجاءة الكرتون كان ممتلئ بالبرشومي (صباااار)ومو
indian fig
ولمدة ساعتين جالسين على ركبنا في ال
مع الشنط gmc
الى ان وصلنا جدة ولكم مطلق الحرية في
التخيل والحقيقة كانا نكتة الموسم الى الان

بـابـل يقول...

صباح الورد


والله أحلى بوست قريته هالأسبوع هالبوست

ماعندى رد يساوى جمال هالبوست والبراءة والصدق اللامتناهي اللي فيه

تسلمين عزيزتى استكانة

وبس


بابل

mtfa2el يقول...

و الله بالغزو كنت بو ثمن سنين و قاعدين بره الكويت و ما كنت ادري شصاير بالغزو ولا بالطاخ طيخ فالوضع كان عطلة لمدة سنة كاملة و عايشين حياتنا و اخر حلاوة
ولا لما امي و عماتي يقعدون جدام التلفزيون و يشوفون رويشد و اهو يقول اللهم لا اعتراض و يبجون وياااه
كان فاصل فكاهي بالنسبة لي ..و الله لي الحين اضحك عليه
اما اصحاب الذمم الواسعة ...فمبرد جبدي ببوست عنهم
و لو اني لي الحين منقهر

shakshaka يقول...

LOOOL YA MOZA YA BURTAQALA! ana kanat kil sabaty basamy el 6ayaran ya7maa... wo ya lufthanza wo ya british LOOOL! la wala 3ad lufthanza lakint 9ij em3a9ba YA LUFTHAAAAAAAAAANZA qemmat elsbaba 3ndi a7es;ha mo3abera:P

darkness يقول...

ويه يعني الحين اللي يشرب شاي مو ريال

:(

عيل منو بقى؟؟!!؟؟

و انزين عيل منو طلع المخرج؟

عمتج و الا غيرها؟؟

و يا الفراوله يعني الحين معصبه انا عليج

هههههههههههههه

يا حلوج و يا حلو طفولتج

و الاحلى خوف امج عليكم الله يحفظها و يطول بعمرها بالصحه و الطاعه

و الله لا يعودها من ايام


شلون الدوام معاج؟

esTeKaNa يقول...

أجار الدين كشمش
~~~~~~~~~~~~~~~~~
علم علم
الله يسامحه ويهديه
ويزاهم الله خير كل اللي كشفوه
وتبقى اخونا العزيز الغالي

esTeKaNa يقول...

هند
~~~~~~~
الله يوفقج وييسر دربج ويبلغج باعلى الدرجات بالدنيا والآخره
والله زين تسوين
انا ايام الدراسه كان البلوق مهربي
ياما ايام نسيت الوقت وجابلته
ينزل علي الوحي كله بس اقول بدرس
:)
بس الحمدلله تخرجت
والفال لج يارب
الله يوفقج اختي العزيزه




جنون احساس
ّ~~~~~~~~~~~~~
هلا بجنون الاحساس كله
هلا بالطش والرش
:)
شي جميل انج تقرين الرسايل وانتي كبيرة
انا وايد يضحكني خطي
لانه كان كبييييييييييير
حتى العمي يشوفه
!!
لازم يوم نحط رسايل الطفوله على البلوق
واشاركج الراي..ان شاء الله يسحبونها باسرع وقت ممكن يمكن تبرد قلوبنا

esTeKaNa يقول...

najmah
~~~~~~~~
يصير ونص
:)
يا بخت عيني
ويا بخت البلوق كله ونجمه تسولف عندنا

تصدقين صاجة زين تسوين اللي صكيتها بلوك وديليت لانج ببساطة منتي مجبوره على التعايش وياها ولا التأقلم دامها ماهي اختج ولا من باجي اهلج
!!
البنت يزينها الحيا ورقي الاسلوب والادب
ان كان في شي بسيط جدا قد يشفع للريال طول لسانه فما اعتقد في شي بالدنيا يشفع لبنت لسانها زفر
:(
والله يا نجمه قلبي يعورني على ديرتي
وعلى هالحاله اللي واصلين لها
الله يحفظ ديرتنا ويطفي اي نار فتنه فيها

esTeKaNa يقول...

صقر قريش
~~~~~~~~~~
ترا انا يا مغتر لابسه بوشيه وقاعده
تدري ليش لابسه بوشيه؟
مستحية منك
!!
والله مقصره ادري
بس من داومت وانا يومي معتفس
اداوم من الصبح وارد البيت العصر
ولوية عندنا مناسبات هاليومين وضيوف
مو لاقيه وقت حق شي ابدا
:(
سامحتني؟
الله يخليك
الله يخليك
الله يخليك
الله يخليك
سااااامحني
:)
الحين بما انك سامحتني خلني اضحك
هههههههههههههههههه
هههههههههههههههههه
واي بدعت
اهم شي انها تحجبت وانته تغترت عشتو
يختي يختي
:))
واتخيل ويه عمك والوالده والاهل وانته بغيت تبدع فيهم الا شويه
!!
الله لا يعود الشر يارب
ويحفظ لنا ديرتنا

عيل انا برتقاله؟
هههههههههههههههههه
اوكي اوكي
ارضا لك شوي تنفس عن ما في قلبك لانك زعلان علي
:)

esTeKaNa يقول...

مي وعشرون عاما
~~~~~~~~~~~~~~~~
انتي وين عقلك اخر مرة؟
هههههههههههههه
ههههههههههههههه
والله بدعتي انتي معاه
وايد ضحكتيني
:)
يا حلو هالذكريات اللي تبقى في البال
ويا حلو الجمعات بين الاهل والعطلات
الله يحفظكم يارب
:)

esTeKaNa يقول...

بابل
~~~~~
يا مسا الورد
يا صباح الاحساس كله
...بابل
وجودك في البوست يزينه
ينثر به ورود
ويفرح قلب استكانة
شكرا لرقتك
شكرا لانك توجت هذا البوست برايك المميز
:)

esTeKaNa يقول...

متفائل
~~~~~~~~
اثاريك طلعت بعطله وربيع؟
انا كنت متفاعله وصامده عشتو
واللهم لا اعتراض كنت مو ابجي
كنت اشاهق
مع اني كنت ياهل
بس لي يومك اذا حطوها اتعبر
واااي
كسرت خاطري الوالده والاهل يا بعد عيني
وانته كلش ما كسرت خاطري
:))
الله يحفظ ديرتنا
ويبرد قلوبنا يارب

esTeKaNa يقول...

shakshaka
~~~~~~~~~~~~
يا صفاايح القشطة انتي
وينج من غير شر؟
ترا أنا فاااقدتج يا موزه
هههههههههههه
واي مسباتج كشخة
جتج تقولين لهم ماركات مو مسباات
ههههههههه
يختي انلام اذا حبيتج؟
راقيه حتى وانتي معصبه
:))









darkness
~~~~~~~~~~~
لا وي
اللي يشرب جاي ريال ونص
هذا اول اول
الحين اذا بفكر جذي ماكو ريال بيبقى
:pP~
آمييين يحفظنا الرحمن ويحفظكم
ويفي نار الفتنه اللي باديه تشب بديرتنا
:(
والدوام زين
بس قعده الصبح تعور القلب
والله تخنقني العبره
خاصه اني ارد متأخر فيومي كله احس اني دايخة وخارج منطقة التغطيه
!!
هذي السلبيه الوحيده
بس المميزات كثيرة اهمها اني فعلا مستمتعه
:)
الحمدلله

بعثرة مشاعر يقول...

اهم شي ان مو عاجبج ريال يشرب جاي

والله مت ضحك عليج

لوووووول

شنو الغلط في الموضوع

;p

ReLaaaX يقول...

جاااااااااان اتعبر :/


روووووووووووووووووووعة مو خربوطية


وترى تفاحة وبرتقالة هم جربناها بس الحمدلله كنا كلنا نقولها ونقعد نضحك على بعض ;p

magnoonah يقول...

خربوطيه؟؟
حرام عليج وسعتي صدري فيهم

انا طفولتي كالمعتاد لج عليها
يعني ما عندي ذكريات وايد

قبل كنت اعتقد انه الريال هو الي يولد الولد والمره تولد البنت وكبرت على هالتفكير


:)))

عجيب الذكاء عندي موو؟؟!!!
اما المسبه الخطيره والعجيبه الي تقولها الاخت مجنونه

فهي كلمة ليومج هذا الكل يقلدني فيها وخصوصا شلون كنت انطقها
هي
يا قليل الادب
او يا قليلة الادب
وبس اقولها الكل يقعد يضحك
اعطيهم ظهري وامشي


اما الغزو ما اذكر وايد عمري مع انه عمري 5 سنوات بس ما كنت احس بشي


وفعلا حب الكويت شي ما نتفاهم فيه يا نحبها يا نحبها
الي مو عاجبته الكويت يروح للديره الي عاجبته من غير مطرود
مو ناقصين فتنه ولا ناقصين تفرقه

احنا كلنا كويتين

تدرين مقهوره وساكته والله غصه ببلعومي الي يصير بس الحين خلاص هني وبس حرام عليهم الكويت مو رخيصه لهالدرجه
ترى مثل ماراحت عشانها ارواح راح تروح ارواحنا فدوه لها


ستكون والله محتره ومقهوره

دلال يقول...

والله العظيم عسسسسسسل

تصدقين اني متابعه لكتاباتج ( بصمت ) من سنتين تقريباً

بس اليوم غصبٍ عني تكلمت

أحبج في الله

عسى الله يوفقج :)

vancouver يقول...

لووووووووووووووووول



عيل عندكم عيب الرياييل يشربووووون شااااااااي

يا حلوج والله
هههههه



ترى حييييييييل اخنقتني العبره وانا اقرى وصيه امج لاخوج ايام الغزو
الله لا يعيدها من ايام

كانت بنت خالتي عمرها خمس سنين
اتصدقين بالغزو تقول انا مو خايفة من القنبله
لاني لما اموت راح اروح الجنه
بس اخاف تعورني وااايد قبل
ما اموت وما اتحمل
ابي اموت بسرعة

تخيييييييييييييلي
!!

الله يحفظ الكويت واهلها قولي امين

salfa3ajeeba يقول...

gowwa

adri imgasrah bs ma 3leeh
bs 3a6eeni 3 years o ra7
aftha:)) wayed 3,
inzeeen a'7alehom 2 years and a half zeen:))

ya 7elw thekrayatech w sij thekrayat il6ofolah
itshaweg

ama 3n il'3azo itsdgen ma ansa halsalfah,

fi awal yom il'3azo
weld i'7ti kan 3omrah 8 years yomha ma retha yakil wala shy wallah il3atheem insadat nafsah
in7awel feh killish mo rathi:(

حلم جميل بوطن أفضل يقول...

أنا عندي عقدة من الفنايل بو علاق

اللي يلبسها مو ريال

فاهمة يا البرتقالة؟

:)

esTeKaNa يقول...

بعثرة مشاعر
~~~~~~~~~~~~~~
الغلط انه ابوي ما يشرب جاي
لوووووول
:))
كبرنا الحين وافتهمنا
الجاي ماله علاقه لا من قريب ولا بعيد بالرجوله ولا جان ما بقى احد
!!










ريلاكس
~~~~~~~~
هلا بالطش والرش
هلا بريلاكس شيخة كل البنات
:)
اسم الله عليج من التعبر
اي والله كنا نضحك
يا زين الطفوله ويا زينا
:Pp~

esTeKaNa يقول...

magnoonah
~~~~~~~~~~~~
هلا بالطيب الغالي هلا
اهم شي عندج منع اختلاط حتى في مستشفى الولاده
لووووووووووول
:))
يا قليله الادب؟
واي زوقه انتي
ترا انا بعد اقولها وارص على الحجي
يعني معصبه
:))
يا بعد قلبي قلبج يا الغاليه
كلنا مقهورين
بس بردي قلبج وارفعي ايدج وادعي للكويت
الكويت تحتاج دعائنا وتحتاج وقفه قويه وصارمة من الجميع
الله يحفظ الكويت ويبعد عنها كل واحد في قلبه شر عليها
قولي امين
:**

esTeKaNa يقول...

دلال
~~~~~
سنتين يا دلي وبصمت؟
:))
وليش ما تخليني انا اشوف العسل وانا اقرا تعليقاتج؟
أحبك الذي احببتيني فيه
وشرح صدرك ووفقك دنيا وآخرة
اللهم آمين
:)

esTeKaNa يقول...

vancouver
~~~~~~~~~~~
تخيلي للحين عبالي ان الشاي له علاقه بالرجوله؟
جان ما بقى بعيني ريال
اشوه اني افتهمت
لووووول
:)
يا بعد عيني بنت خالتج
واي كلامها يعور يعور القلب حييييل
يعني كل هاللي صار فينا
ويبونا ننسى؟
حتى اليهال نطقو
ويبونا ننسى
ونسامح
ونرضى واحد المفروض منا وفينا يشكك بكل مبادئ الووطنيه اللي عشنا عليها؟
لا والله ما نرضى
!!
الله يحفظ ديرتنا ويبعد عنها شر كل واحد بقلبه ذره حقدعليها

esTeKaNa يقول...

saLfa3jeeba
~~~~~~~~~~~~~~
يااااا هلا وأمية هلا
حيالله السالفه العجيبه
اشلونج؟
شخبارج؟
ترا ولهنا عليج بس من غير تشره
ولا انتي مقصره ولا شي
الغالي غالي لو تبعدنا عنه الظروف
وانتي معذورة بدراستج
اشلون امورج؟
عسى كل شي ماشي تمام؟



بعد قلبي ولد اختج
ويقولون الياهل ما يحس؟
الا يحس ويتذكر
الله لا يعودها من أيام
!!

esTeKaNa يقول...

حلم جميل بوطن أفضل
~~~~~~~~~~~~~~~~~~~~
أبيييييييييييييييه
تدري اني مت من الضحك؟
لاني كنت بكتبها واستحيت
بس اشوة انك قلتها عشان تشجعني اعبر عن مشاعري بهالموضوع:
انا لي يومك الفنيله بو علاق تسبب لي مشكله،احس اي ريال يلبسها مو ريال
!!
فاهمة فاهمة
الحين انا برتقاله؟
لا تسبني بليز
:Pp~