الاثنين، فبراير 04، 2008

back!!

قادمة من غياب
على جناح من الشوق تطير
اشتاقت لكم،لدفأ وجودكم الصادق حولها
سبعة أيام،احتضنت روحها
جمعت افكارها
واعادت ترتيب فوضى احساسها
كانت هناك...هي مع نفسها
في حضن احب الناس اليها
تذوب في دلال أبيها
وتتلذذ بحب أمها
تجن في كل لحظة مع اختها
وتستمتع بصداقتها مع عمتها:
أحبهم اكثر من نفسي
وجودهم حولي يعيد التوازن لروحي
يحبوني بلا سبب...سوى اني ابنتهم المجنونة
!!
.
.
.
في مطار الاسكندريه التحفة نزلنا
على درج الطائرة وانا اناظر مطارهم القديم جائتني احساس فاتن حمامه
وشعرت بأن رشدي اباظة ينتظرني بفارغ الصبر الآن
لم (ادقر) احساسي ابدا...لوحت بيدي للفراغ
سئلتني امي:
منو تأشرين له؟
قلت لها :
احمد يا ماما
:Pp
اسكندريه ممتعة،أجمل ما فيها المنتزه وقصر الملك فاروق
والذ ما فيها أكلة سمك وربيان في الفش ماركت
.
.
.
من سيدي بشر ركبنا القطار
وعاد لي احساس الفلم مرة ثانية وانا اشاهد المودعين على رصيف المحطة
كنت اسرح بعالم آخر،اجد نفسي فجأة بين ناس لا اعرفهم
مبققه عيوني ومتفاعله وياهم
شكرا لأمي...التي كلما سرحت سحبتني من يدي
:)
.
.
.
وصلنا للكاهره.او القاهرة كما يجب ان تكتب
جميلة ،تستقبلك بحبها اللذيذ.،وروحهاالظريفه
ببردها القارص،ونيلها الجميل
بالهرنات التي تصك راسك في كل حين
بالعشاق اللي في كل مكان مندعسين
بالعرايس السعيدات على ارصفه النيل وفي دوار الجامعه متجمعين
!!استمتعت
بركوب خيل أبيض في يوم مشمس هوائه بارد
بالصراخ فوق ظهر جمل استخف عشان يوقف
بالتصفيق وانا متربعه في وسط حنطور يفتر على النيل
بشراء روايات من على رصيف شارع
بشرب قهوة في جو بارد في بلكونة شهدت كتابتي لفيض افكاري
في استمتاعي بتجاذب اطراف الحديث مع مجهولين أعلم بأني لن الاقيهم في يوم آخر
جددت حيويتي ونشاطي
.
.
.
ورجعت..أحمل من الحب الكثير
في بالي اكثر من فكرة وخاطرخزنتها في ذاكرتي لحين اقلاع الطائرة
كتبتها بصدق،لم يقاطعني فيها الا المضيف الدفش:
عصصير
اقوله :لا لا
يرجع بدفاشه اكثر:
فوووطه
اجاوبه :
لا شكرا
يرجع بدفاشه متصاعده:
تبين قهوة
يعتفس ويهي وينفذ صبري منه
أوفيييه وتاليتها ليش يقطع حبل افكاري؟
واذكر نفسي عيب يا استكانه
هذا مضيف وانتي بطيارة
منتي بدارج واحد مدرعم عليج
!!
.
.
.
كنت قادمة بانطلاق طفلة ،تحمل في وسط قلبها سوالف
عندما اقتربت من مدونتي رأيت زينه مضاءة
وصوت الفرح طاغي على المكان
وقلوب تناظرني بفرح
لم اكن اعرف السبب الا حين توجهت لذاك الخبر
تدرون شنو صار؟
احسست بأني اريد ترتيب ملابسي
ناظرتكم بخجل
طويت ورقه كتبت فيها بوست من خيالي في حقيبتي
وجلست في زاوية البلوق متكتره ومستحية
سعادة ممتزوجة بخوف
وفرح يرمش بخجل
هل استحق كل هذا؟
وماذا سأكتب بعد كل ما قيل؟
ارتبكت افكاري ووجدت الكلمات تنسل مني
ولا أجد تعبير واحد قادر على التعبير بدقة عن ما اشعر به
لكني تذكرت شئ
مممم سر
!!
اقولكم سر؟
قبل فترةبسيطة من سفري
ضاقت في عيني دنيتي الوسيعة
كنت اشعر بألم يطوي قلبي كطي الورق
وتشككت بنفسي وقدراتي وكل ما احمله في ذاتي
دفنت احساسي بقلبي
داريت كسرة روحي ونفسي
لما اشارك من احب بهمي؟
كتبت بفرح
وعايشت الأمل
ووعدت نفسي،بأن الغد سيكون أجمل
منذ ذاك الوعد وانا اتحسس الفرح
ابحث عن كل ما قد يسعدني
لو كلمة...لو احساس...لو اكله لذيذة
كان عندي استعداد للفرح...هل تعرفون هذا الاحساس؟
وانا اليوم سعيدة
!!
اليك....واليها
الى كل قلب أحب استكانة
الى كل من احاطني بتواصله طوال اربع سنوات ونصف عشتها من عمري هنا
الى كل من دون كلمة
عاتبني بصدق
انتقدني بحنان
الى كل من اهتم باستكانه كأخت وبنت وصديقة
ماهو أجمل وأعمق من كل شئ،احساسكم الصادق فيني
ان تملك قلب واحد نقي يحبك بصدق نعمه
فما بالك بتلك القلوب الصادقه الجميله التي تملكونها وتسعدني بصدقها في كل تعليق
!!
شكرا من القلب لكم
والى الأخ مرزوق....اخجلتني
هل استحق كل هذا؟
اللهم اجعلني خير مما يظنون واغفر لي ما يعلمون وما لا يعلمون
أتمنى ان اكون عند حسن ظنك
واستحق تلك الكلمات الراقية الجميلة فعلا
هل يكفي شكري لك؟
انا عاجزة عن ايجاد تعبير يليق بمدى امتناني وشكري لمقالك المعنون باستكانه
!!
.
.
.
.
بهذة المناسبة أهدي نفسي أغنية مغبرة:
مواق في مشيته مواق
ومن الغوا كانه فيه نعاس
:pP~
اي أحد عنده رغبه اصور وياه؟
اوقع؟
ترا متواضعه أنا رغم الشهره
:)
....وأخيرا
أرسل تحياتي وكبلاتي(قبلاتي بالمصري)لسديقتي خروفه
وصاحبة الخيمه العامرة دلي
على اهتمامهم الواضح
والشكر موصول(موصول هذي متعوب عليها)للغاليه فانكوفر على رعايتها للسامري في خيمة دلي
وعلى العشاء المقام هناك
الحديث لا ينتهي ...ولكني الآن انتهيت من التعب
والنشله عامله عمايلها
تصبحون وتمسون على خير

هناك 66 تعليقًا:

bin3li يقول...

الحمدلله على السلامة
باجر قعدي ويا القبقب شجعي
و أنا بقعد ويا خالد حرية
بس إن شاء الله الفوز لنا
قولي آمين :)

Lala* يقول...

الحمدلله على السلامة

..أقرا لك بصمت من زمان
بس هالمرة كان لازم أكتب واقول

..لج وحشة يالعزيزة
*** صج ولهنا

الدائرة الخامسة يقول...

صباح الخير يا خير صباح
اينما تذهبين
تتركين للوجود شذاك
تتركين بصماتك الجميلة والرائعة
وفي كل زاوية لكي قصه
وعندما ذهبتي .. كان المكان شاغر
والزوايا خالية
كنا بانتظار .. أبداعك وتميزك
ومع عودتك بالسلامة عاد الابداع

وما كتب في المقالة شيء تستحقينة
وشرف لكل المدونين الكويتيين

ودمتي برقي

Krakatoa يقول...

الحمدالله على السلامه..ونورت الديره

New Bride يقول...

الحمدالله على السلامه
واااي يا حلو القاهرة واااي عالم ثاني هالديره تينن :)

تستاهلين كل خير يا استكانه

DiLLi O MiLLi يقول...

أولاً : الحمدالله على السلامة
نوّووورتِ الكوييييت لييكِ وحشـه .. على قولة أخوانا المصريين
:)

ثانيا : تستااااهلييييين كل خيرررر
واللي كاتبينة عنج أنا أعتبرة شوية
وأوجه شكري للسيد مرزوق الحربي أهتمامه بالمدونيين


عندددي لج رشدي أباظة كويتي قاعديين أندورله فاتن حمامة
أشرايج ؟
:)

آآآآفاااا طلعتي من آكلة لحــوم الزفـر !؟
الله على وصفج للقاهرة عيشتيني الجو
بس أنا ماياني أحساس فاتن حمامه
أنا ياني أحساس ماري منيب !! ههههههههه
ماا أدري ليييش !!؟ يمكن عشااان السن له أحكام !؟
:)

وبعددددييين طبعاااا تستحقييين
وخليج مثل ما أنتي عفوية في كتاباتج
المقال لا يغير شي .. ألا نفسيتج
لآزم تكونين سعيدة وفرحانة أن كتاباتك لقت طريجها للرأي العام
وهذا أول السلم
وترى البلوقرز ما قصروا في كل تعليق .. يساعدونج ويعضدونلج للصعود عتبة عتبة
:)

لاه لاه لاه مووو خوووش سرررر !!! ليييش !!؟؟
ضاقت الدنيا !! ألم يطوي قلبك !! والتشكيك بذاتك !! كسرة روحك !!؟؟
ياااا حبيبتي يا أستكانة
أنتي توج صغيرة على هالأحاسيس
أشخليتي للمستقبل !!؟؟
ترى الياده اللي بتمشين عليها موو كلها مدجوجه
يااااماااا رااااح تحووشج مطبااات .. ولازم أتخطينها بعزم
ولاااا ماراح تقدرين تكملين مشوارج أذا ما قويتي قلبج وترفعتي عن الهموم الصغيرة
أنتي توج زبوط النقعه .. وتقولين ضاقت فيني الدنيا !!؟؟
الواحد يحمد ربه على نعمة الصحة والعافية
ويدعي ربه أن الله يخليله حبايبه وغالينه حولينه ولاااا يفرقهم من شر .. هذا أهم شي

تفاااائلي ... مثل ما وعدتي نفسج بأن الغد سيكون أجمل
تفائلواا بالخير تجدوه


أأأأأأي .. طلعـــت الصجيـــه
مـــواااااق !!! هاااا ؟؟؟؟
:)
أأأأيه .. الله كـريم
نفتر على مدونين مستجديين أنتشيحط عليهم

وبهذه المناسبة السعيدة
سيكون هناك حفل كبير يوم الخميس في خيمــة
DiLLi O MiLLi
وسيكون برعاية رائدة الخيمة ومؤسسيها فانـكوفـر .. وحضرتونا




والـدعـوة عـامة

الرجـاء عدم أصطحاب الأطفال
أو .. هالأيام يكتبون
نوماً هنيئاً للأطفال



:)

`~MnO YeNSa! ~` يقول...

واللــــــــــه تستاهلين كل الخيــــــر ..
يريت الكل نفسج :*

و نسيت اقول الحمدلله على السلامة .. و الاقيت بالحفله :) ..

سدرة العشـــاق يقول...

الحمدلله على السلامة حبيبتي و تو ما نورت المدونة والله

لج فرية

و تستاهلين كل خير والله و عسى الله يوفقج

عسى استانستي بمصر ؟
عليج بالعافية

:)

غير معرف يقول...

أحس اني حبيييييت نااااس...

وحشتيني استكااانه..

خيتج.. هند

DanDash يقول...

استكااااااانة وحشتيني مووووت موووت موووووت

اخبارك ايه و ازي مصر عاملة آية

آآآآه يا إستكااانة ليش ليش ليييش
عيشتيني بجو رشدي أباظة و فاتن حمامة :(
عاد اذا شفت فلم من أفلامه اصير صمن بكمن و اتابع بصمت و اسرح معاهم

مصر تقدرين فيها غرائب الدنيا السبع و يمكن تلاقين العشرين
اهي الدولة الوحيدة الي في العالم مجرد اني اطلع من البلكونه يتغير مودي و ماعندي مانع طول اليوم اقعد اتطمش على الرايح و الي ياي

حمد الله على السلامة يا الغاااااالي
وماتشوفين شر ان شاء الله


تستاااهلين كل خير و صاج الأخ مرزوق في الي كتبه و مشكووور يا اخ مرزووق

محـــــارة يقول...

حبي وصديقتي وأخيتي وربي أنتي دانة وشاي يركد الرأس يمن حظه إلا بيالتج قدرت يستطعمها وتعدل مزاجه

يبختنا فيج وربي يحفظج ويحميج .. كلامج دائما ممتع ويدش القلب ابساطته وبترتيب أفكاره وحلاوة كلماته

وأنا بلاغة الشف أنطر الورقه الي صفتيها :)

7osen يقول...

اولا الحمدلله على السلامة

ثانياً تستاهلين يا إستكانه والله

تستاهلين أكثر
من مقال

تستاهلين تنزلين كتاب فيه هالإبداع الجميل إللى تكتبينه

إنتي مميزة لأنج صادقة وتكتبين بإحساس عالي

أتمنالج من كل قلبي المزيد من التقدم ومن التألق
لإنج بكل صدق تستاهلين
والأهم أتمنالج مزيد من الحب

ياالله عاد
متى العشا
بهالمناسبة السعيدة
:)

غير معرف يقول...

الحمدلله على السلامة

magnoonah يقول...

ستكوووووووووووووون

حبيبة قلبي ولهت عليج وعلى سوالفج
حمدلله على السلامه نورتي ديرتج ومدونتج يالغاليه



وترى شوي بحقج انتي تستاهلين كل خير وعسى منها للاعلى يارب


:)))

الخيلاء يقول...

استكانه عندنا ..

يامرحبا يا مرحبا :)

تو مانورت الكويت ..

و مبروووك الف برووك على المقاله تستاهلينها و انتي شرف حق كل مدون .. :)

انتي اتقولين مواق ..
و انا اقولج ايا غالي يا بو الموقه :)

فقدتج والله

shakshaka يقول...

3aaash GHAAAYEB! mawaag 3aal haa? chene ashoofich estekanaaaa mashya metrain 3an el arth wo daaabgha entay wooo qiiryich westekantich:P ma6aar 6ayrn wartf3 ela kama 6aar waqa3:P la laa kilish wala il sitkin:P testahlaaain 7abebtyyyy(K) bacher ogaflich eb laftaaat 3nd majlis il ommma afa 3laich mo bas jareda entay ne6la3leech beshari3:P

Selezya يقول...

الحمدلله على السسسسسلامه يالغاالية :)

تستاهلين كل خير حبيبتي
:***

Peace يقول...

الحمد لله على السلامه

لكن صج عجبتج الاسكندريه
لانها ما عجبتني

احنا اللي لازم نشكرج على هالمواضيع
اللي تعبر عن صفاء و نقاء قلب كاتبتها

جد مو مجامله

الله يسعدج دنيا و اخره

بنت الشامية يقول...

هلا وغلا ان زاد اشوف الكويت فيها نور وايد يكسر العين...اثر استكانه ها هنا......الف حمد الله على السلامه
وزيك وزي الصحه كل عام وانت بخير ياااافندم
عجبه نزلة سلم الطيارة وفاتن الحمامه عاد مره وحده رشدى اباظه العاده عبد الحليم والا خفيف الطينه عماد حمدي
لوووووووووووول
ويحقلك مووواق بمشيته موااااق
يكتبون اسمج بالجرايد...ويمدحونج
اقدر اخذ منج موعد علشان بسويلج لقاء بمونتى الكحيانه
الله يخليج لا تردينى بعدين ازعل وابجى
وطوفنى الخيمه .....الافتتاح هالاسبوع
بطيح له تصوير بصوركم كلكم وبعدين ابتزكم واهددكم.....شريره مو..!!!!ء
نورتى الكويت

عيون الحب يقول...

ألف الحمدلله عالسلامة عيوني
الله عشت جو ياسلام
اقول انا شكلي بحرم ادخل مدونتج
تتعبيني أعيش الجو خياليا وبعدين انصدم في الواقع يوم اشوف نفسي قاعدة عالكمبيوتر واقرا هههههههههههههه

ألف الحمدلله عالسلامة صدق لج وحشه مو طبيعية
والمقال تراج تستاهلينه والله
فرحتي فيه خلتني احس كأن اللي انكتب عن مدونتي والله

مادري وصلج الاحساس ولا شكلي عفست السالفة
حدي تعبااانة وعيوني تتصكر وابطلها غصب
:)

OutOfReach يقول...

7emdellah 3la eslama :)

5roofa يقول...

هاااااااااااااااااااااااااااااي

انتيي اهنييي

حمدالله على السلاااامه
لوول توه ما نورت الكويت خيتوو

صج صج صج صج عااد صج فقدتج
كل يوم ادش اقول وينها اهي قالت سبوع
تدرين اسبوع بالكويت عن ثلاث اسابيع لول

و اناااا ابيي توقيع
و صوره الصراحه لااازم شي ضروري باجر ما تدرين تصيرين وزيره الا اقولهم
شوفو تره انا كنت اعرفها لووول

تدرين شنو موتيني من الضحك على تاشرين احمد يا ماما

مت من الضحك

ونااسه تدرين انا لو اسوي جذي و ابوي يمي جان رادني الطياره و يقولي امشي الطب النفسي الحين

بس شيشتيني بسويها بلندن لي رحنا

حق مارك ولا انتوني لوول
:P

و شدعوه والله انتي تستاهلين كل خيير
و الكلام الي نقال عنج اصلا اصلا شوي بحقج

انتي تستاهلين اكثر و هذي مو مجامله من البي ألويك إيها والهي والهيي
لوول

منور خيتووو

o uv beeeeeeen 9ij 9ij 9ij missed

salamz sweet sis...

اجار الدين كشمش يقول...

الحمد الله على السلامه

دحنا منأدرش...ع الشهره وجرااايد

ابق استكانه ع طوووول واوعي تتكسري علينا من الغرور

تسسسسسسسسسسسسسسستاهليييين

كافي خفة دمك وطيبتك

توصيه خاصه من دولي عليج

لا تزعل استكانتنا يا اجار خل نشرب منها العسل والشهد

حاضرين يا دولي ..نحن احرص منك
على استكانتنا

فمالله

bo rashed يقول...

الحمدلله عالسلامه يا ياي من السفر

تحيه كويتيه على لبناني

اذا انتي ما يكتبون عنج من يكتبون عنه

ادب وظرف وسلاسه وفكر

ملاحظه

ليش مسافرين على الجزيره

مو شي ما يعطون وجبات

;P

حياتي هدف مو عبث يقول...

الحمدلله على سلامتج أخيتي .. وتستاهلين كل خير .. ومنها للأعلى وللأفضل

الله يحفظج يوفقج لكل خير

:)

darkness يقول...

جمد لله على السلامه يا جي من السفر

وحشااانه الابتسامه وشك و لا القمر

ستكاااااااااااااااانه

والله فرحت بالمقاله

و تراج تستاهلين كل خير

سامحيني على التاخير كنت خارج منطقة التغطيه


:)


وين صوغتي؟؟

mtfa2el يقول...

الحين شرايج بالمصريات ؟
اتزوج مصرية ؟
لأني فلست من الكويتيات !!

esTeKaNa يقول...

بن علي
~~~~~~~
الله يسلمك من كل شر
انا اشجع مصر
وتأهلت حق امم افريقيا
وفايزين بالكاس خمس مرات
:D~
ومابي اقعد مع احد
خلنا من المباراه احسن
:)







LaLa*
~~~~~~~~
يا هلا ويا مرحبا
ما يوحشج غاااالي
تدرين؟
وجودك الصامت
وتعليقك الجميل
ارحني اكثر من ما تتصورين
:**

esTeKaNa يقول...

الدائرة الخامسة
~~~~~~~~~~~~~~~
يا مسا الورد
يا صباح الاحساس
يسعد لك الرحمن كل لحظاتك يارب
كما تسعدني بكل تعليق وتعقيب
:)
اتمنى ان استحق ذلك فعلا
وجزاك الله كل الخير
اخجلتمونا








karkatoa
~~~~~~~~~~~
ياهلا ويا مرحباااا
نور البلوق والله
:)
الله يسلمك من كل شر
منورة بوجودكم

esTeKaNa يقول...

new bride
~~~~~~~~~~~
الله يسلمج من الشر
هالديرة عالم ثاني حق اللي يعرف يستانس فيها
وايد ناس ما يحبونها
!!
مشكورة ما قصرتي

esTeKaNa يقول...

dilli o milli
~~~~~~~~~~~~~~~
يا الف وستمية مرحبا
يا اهلا يا اهلا
وأحلى تجية لسمو الاميرة دللي
تن ترارار تن تن
:D~
يا بعد قلبي انتي والله انج ما تقصرين
ما تتخيلين شنو قيمة كل كلمة تكتبينها من قلبج بهالبلوق
قيمه الصدق
قيمة القلوب النظيفه النقيه اللي حولي هني الله لا يحرمني منج ولا منهم:**


اي والله احب السمج انا واتنطع بالسي فود...بس اذا هالشي يفشل عادي اقول
امبيييييه ويع
زفر زفر
:Pp~
ممممم عندج رشدي اباظه؟
عاد رشدي حلو
اذا رشديكم حلو مابي
اخاف يطلع مواق مواق
هههههههههههههههه

ماري منيب عاد؟
يا حلوها انا احبها
ما تروح عن بالي لا ماري منيب ولا زينات صدقي
هههههههههههههههههه
يضحكوني صج
وتذكرني ماري منيب بواحده كل ما اقول امي تزفني
هههههههه
:)


مممممم دلي
تعالي قعدي يمي بقولج شي:
الاحساس مافي احد صغير وكبير عليه
ولا احد بيده اي ظرف يمر فيه
انا عندي يقين انه مافي طريج من غير مطبات،والياده المو مدجوجه ندجها افا عليج
!!
ماني من اللي له تحرشت فيه الضيقه شرع لها البيبان وقال حياج
لا
اعاندها...ساعه اكسر راسها
وساعه تسدحني بالقاع
بس الحمدلله هالمرة انا سدحتها بالقاع
:)
وفعلا ..كافي نعمة الاهل
وحبهم
ودلالهم
كافي القلوب الطيبه والصحة والعافيه
الف الف لحمدلله

انا زبوط النقعه؟
ههههههههههههههههه
ههههههههههههههههه
واي بموت من الضحك
لووووووووووووول
صج وناسه احساس البنت انها صغيره ودلوعوني وانا صغيره
بس عاد زبوط النقعه
توج تقولين عندنا رشدي اباظة
واخرتها صرت زبوط النقعة
واي راعي مشاعري قولي توج كتكوته
توج بيبيه
زبوط النقعه؟
:D
عيل بتروحين تتشحطين على مدونين يدد؟
ههههههههههههههههه
بس تعرفين تمشين مشيه مواق مواق
ومن الغوا كانه فيه نعاس
ترا هذي مشيه فيها غوا يالله سترك
:)
ويا بعد قلبي على هالعشا
انا ترا بلويه ادور بدله حق العشا
وخذيت موعد مكياج وتسريحه
خووووووش دعوة
وكتبي بالطرف..يمنع اصطحاب الكاميرات والموبايلات وبنحط مفتشه عند الباب
هههههههه

esTeKaNa يقول...

mno Yensa!
~~~~~~~~~~~~
يا بعد قلبي انتي
بس الكل نفسي؟
لاوي اسم اله عليكم
ترا انا مرات اصير خربوطيه
مو كله اصير خوش بنيه
لي عرات الله يستر منها
:)
الله يسلج من كل شر
اي ان شاء الله...عاد تعالو مبجر خنساتنس
:)








يا سدرة العشاق
~~~~~~~~~~~~~~~~
الله يسلمج من كل شر يا الغالية
ما قصرتي
والله استانست الحمدلله
مصر ونيسه...خاصه اذا معاج ناس سمحين ويعرفون يستانسون
:)

esTeKaNa يقول...

هند
~~~~
ما يوحشج غالي يا الغاليه
حيالله اختي الغاليه
:)







dandash
~~~~~~~~~
يا اهلا بالست هانم الصغيره
وحشتني يا قميييييييل
بالاحضان بالاحضان
:**
بعد هذا الفاصل نقلب الشريط
اييييييييييي يااخيتي
انا احب رشدي
عتيجة ادري
بس يختج ذاك الطول
خف الطينه
استانس عليه
:)
وصاااااااااجة
والله لو بلكونه وتتطمشين توسعين صدرج
بس مو كل من يعرف لها


الله يسلمج من كل شر وما قصرتي حبيبتي
:**

esTeKaNa يقول...

محارة
~~~~~~~
يمة يمة
!!
محارة انا خشيت ويهي بيدي
استحيييييييييييت
شنو هالحجي اللذيذ
شنو هالكلام الحلو
والله مادري شقولج
الله لا يحرمني منج ومن صدق احساسج الراقي
والوريقه المصفوطه يوما ما ستنشر
لاني ببساطة كنت حابه كل كلمه فيها
:)
وللحديث معك دوما بقية
:*









7osen
~~~~~~~
ياهلا ويا مرحبا باخوي حسين
الله يسلمك من كل شر
والله خجلتم قلبي وقلمي بهالكلام الطيب
وهذا بعض مما عندكم
:)
العشا يوم الخميس عند دلي وملي
روح طل شوف الاستعدادات على قدم وساق
الله يعافيهم ما قصرو البنات
:)

esTeKaNa يقول...

anon.
~~~~~~
مع انها حمدالله على السلامة
بس مادري حسيت ابي اعرف منو اللي يتحمد لي بالسلامة
:)
الله يسلمك او يسلمج من الشر








magnoonah
~~~~~~~~~~~
واي يا زييييييينها يا زينها
ولهت انا عليج
من زمان ماحد قالي ستكون ام عناقيص
:))
الله يسلمج من كل شر ما قصرتي






الخيلاء
~~~~~~
يا هلا وأمية هلا
الكويت منورة باهلها
وانا يا الغاليه والله وناستكم معاي اهي للي مونستني
!!
الحين خلينا من هالحجي
عسى جهزتي نفسج حق يوم الخميس
ترا العشا عند دلي بعد ما يحتاي احرصج
:)

esTeKaNa يقول...

shakshaka
~~~~~~~~~~~
انتي يا نفرتيتي
يوم انه اسم اله عليج تعرفين امثال ما قلتي الا ما طار طير
@@
يمه يمه منج
عاد ان طحت ماني طايحة الا صوبج
ولقيني
يا ويلج بعد ان ما قضبتيني
:pP~
hehehehehehe
واااااي يا زينج زيناه
يا ام عيون تايقر انتي بس وقعي لي
صوري وياي
ما نبي لافتات كافي علينا دعمج لنا
دعمج معنوي بس ها
:Pp~






SeLezYa
~~~~~~~~~
الله يسلمج من كل شر
ماقصرتي
:)

MaNaYeR يقول...

الحمدلله على السلامه

مدونه رااااااااقيه بمعنى الكلمه ما الوم الي نشر مدونتج بجريده الوطن
على فكره انا قريتها بالجريده وقلت شنو هالمدونه لازم امرها لازم اشوفها وفعلا كان اختيار موفق




الحمدلله على السلامه مره ثانيه

وابي توقيعج

لوول

esTeKaNa يقول...

peace
ّ~~~~~~~~
الله يسلمج من كل شر
ويسعدج بكل لحظات حياتج
كلماتج وهالسطرين فرحوني
اللهم يرضا عليج يارب ويرضيج


مممم ماحبيتها؟
ما رحتي المنتزه؟
انا وايد حبيته








بنت الشامية
~~~~~~~~~~~~~~~
يا هلا يا هلا
هلا بالطش والرش
على بالشيخة هلا
الله يسلمج من كل شر ما قصرتي
والديرة منورة باهلها
:*
انا بخير زي الفل
لووووووووووووووووووووووووول
واي جنج تدرين
من رديت من مصر وانا كل ما اشوف احد اقوله كل سنه وانته طيب
!!
يختج دودهوني كل ما احد قالي جذي سئلت امي ...ياينا عيد؟
راس سنه؟
رمضان؟
شصاير؟
وبعد هابين بحجوة يديده انا معلقه عليها
يا الف وستمية مرحبا
:)
يا بعد قلبي انتي
يحق لي؟
تصدقين انا كنت ماشيه مواق مواق
ليما قالت لي دلي يا زبوطه النقعه
جان انصدم تكرفست وراحت المشيه
ههههههههههه
وافا افا يا بنت الشاميه
انا اللي يحصل لي الشرف
بس ترا انا قايله حق دلي في واحده تفتش عند الباب ممنوع التصوير
:Pp~
ماني خابرتج شريرة
شمتغير ؟
ماكله شي يديد
مرافجة ناس يدد
:)
نورتي المكان كله

esTeKaNa يقول...

عيون الحب
~~~~~~~~~
يا هلا بالحب كله هلا
تسئليني وصل احساسج؟
وصل ولقا له في وسط قلبي مكان
يا الله شكثر هالتعليق منج عفوي وجميل
:)))
لا لا اشلون تحرمين؟
يطاوعج قلبج اكتب وما تقرين لي؟


سكرت عينج؟
نوم العوااااافي يارب










Out of reach
~~~~~~~~~~~~~~
الله يسلمج من كل شر
:)

esTeKaNa يقول...

5roofa
~~~~~~~~
اهلا اهلا
بالاحضان يا حبيبتي
:**
يا بعد قلبي انتي الله يسلمج ما تفقدين غالي يارب
واي صج
انا مادري اشلون مر الاسبوع اللي طاف
بس هالاسبوع احس بدا الوقت يتغير
والايام بطيئه حيل
!!
وزيرة مرة واحده
وي وي
عشان بس يقولون استجواب
استكانه دموعها لي الركب
لوووووووووووول
وي الله ياجر امي وابوي
بدعت فيهم خروفه
اخر شي وصلت مرحله بجو رمانسي
وشمعه
وقاعدين
قلت لهم ابييييه
ترا انا ابي احب
لوووووووووووووووول
فيعني عادي عادي
سوي اللي تبين
مو اهم اهلنا؟لازم يتحملون
:)
يا بعد قلبي ما عليج زود ماقصرتي
:**







اجار الدين كشمش
~~~~~~~~~~~~~~~~~~
يا هلا باجار بن الدين كشمش
الله يسلمك من الشر
هوا انا اقدر يا باشا؟
زي ما تقول الشهره قيد
والكلام ده وسام على سدري
:Pp~
بس تعبت من كلام المسلسلات
خلني اصير استكانه:
يا زيييييييييين هالكومنت والله والله استانست من قلب قلبي
ولا ازعل ولاشي
في بنت تزعل من اخوها؟
:)

Expatriate يقول...

الحمدالله على السلامة
Welcome Back

:)

esTeKaNa يقول...

BOrashed
~~~~~~~~~~
حيالله بو راشد
عسى بس انردت البيالات؟
اخيتك عيوز كل شوي تعد اغراضها
:Pp~
من قالك الجزيره؟
لوووول
على الكويتية
بس هذا قبل لا نطير انا مطلعه اوراقي وهالمضيف الدفش تسلط علي
:(







حياتي هدف مو عبث
~~~~~~~~~~~~~~~~~~~
الله يسلمج
ويزاج الله كل خير
امين واجمعين يارب
:*









DARKNESS
~~~~~~~~~~
هلا وغلاااااااا
لا تتعذرين
اللي اهم من المقال
ومن الكومنت
ومن كل شي انتي

من قلبي اتمنى انج تكونين بكل خير
بشريني عنج
قولي انج الحين دخلتي بالتغطيه لشركة السعاده كلها؟
:))
يالله شرعت الجنطة
تدللي
كلها تحت امرج

esTeKaNa يقول...

METFA2EL
~~~~~~~~~~~~~
يا خراااااااااااابي
@@
متفائل :
لاااااااااااااااااااا
بالفم المليان لا
واي تر بعصب عليك
!!
مع احترامي لهم
وصداقاتي من هناك كثيرة
بس حلاة الثوب رقعته منه وفيه

لا لا
اسمح لي انا ناطرة بس توصل احلى انجنير وراح نسوي اجتماع على مستوى رفيع لازم نوحد الجهود ونسوي تعاون مشترك
انا بدور لك عروس
اذا تثق باستكانه يعني
:))

AseeL يقول...

لا مو كافي

نبي استكانة بـ مسلسل :)

حمدالله على السلامة

Peace يقول...

esTeKaNa

بلى رحت المنتزه
كان مكان حلو

احلى مكان هناك
:)

لكن ما رحنا له الا اخر يوم


ان شاء الله دوم فرحانه
:)

vancouver يقول...

حمدلله عالسلااااااااااامه
ياجااااااااااااي من السفر
وحشانااااااا الابتسامه
وشششششششششك والا الأمر(القمر)هههه




ام الحلتيت والملتيت
سلامات من النشله
عاد اكو مشااااااااااهير تحوشهم النشله
؟؟
واخزياه
وين الطبيب الخاص
ومدير الاعمال
والوصيفه الخاصه
؟؟؟


حبيبتي
معقووووووله محد حتى دزلج مسج بالسفر يقولج
؟؟
يعني صج اطلعت مفاااااجأة
وناااااسه والله

هههههه

ريييييييييييييحة الجمري المشوي
لاااااااااااازقه بجناطكم
هههههههههه

وصفج حق مصر
خلاني احن لها والله

عليييييييييييكم بالعافيه الوناسة


ورقصني ياجدع
لووووول
مو يايه من مصر
؟؟

3teej يقول...

الحمدلله على السلامة

وتساهلين واكثر مما كتب عنج ومنها للاعلى انشاءالله

darkness يقول...

صبااااحج شاي بزعفران

شوفي على يوم نبي جاي الضحا بمدونج

:)


الحمد لله على كل حال

انا جد منحرجه منج لاني متاخره حدي

بس هم فرحانه وايد كل شويه مبطله المقال و اقراه و اقول صاج صاج

ههههههههه

الله يعافيج ابي الدراعه الصفره و الحمره

ههههههههههههه

تسلمين

Q80 Blogger يقول...

الحمد لله عهلى السلامة

اتصدقين نفس الشعور
انا عندي مصر شي غير طبيعي .. مادري ليش احبها .. وصج كل موقف يصير فيها يذكرني بفلم شايفه .. شي غريب

الخبر كان عجيب
ورجائا مانبي مره ثانيه اخبار قديمه وبايته
احنا قريناه وسولفنه عنه عند ابله خروفه
اخبارج اووووولد :P

يالله عاد لاتفشلين الجماهير
الحين عليج ضغط عالمي
انا قمت اشوف سيايير حاطيت استكرات على شكل استكاين !!!

تره الشهره مو حلوه .. دايم يقولون جذي
الله يعينج عليها :)

انا عندي فنيله المنتخب .. ودام مافي لاعب يستاهل نسميه لاعب
ممكن توقيعج على الغووله .. الغين مادري ليش :)

rwatan يقول...

ولكم باك
welcome back :D

Broke يقول...

توني أقرا البوست

المقال << خوش خبر و وصفه لما تكتبين صحيح

;)

أما وصفك للقاهرة . فزاد شوقي لزيارتها من جديد

I can't stop missing Egypt !

أحبها .. و خاصة قراها السياحية الجديدة

فريج سعود يقول...

الحمد لله على السلامه
طحنا عليكم طلعتي اخت سنعة
يمكن الباقي يدرون من زمان بس انا توني ادري
عاد بمصر الشاي ما حطونه باستكانه عندهم عيب وبخل
لازم الشاي في الخمسينة وعلى ميّه بيضة

bin3li يقول...

huh!!
@@
سنعة و استكانة خوات!!!
ما أصدق

عــــاشــــه يقول...

ياربي ماأًدصدق
رجعتيلنا ... الحمدالله على السلامه

ترى وايد إفتقدتج

كنت أطل كل يوم على المدونه أقول لابد تزورها بالغلط من أي نت كافيه

إزي مر وإوزي أهلها

تدرين عاد إنج فعلا معيشتنا الجو وأحس إني رحت معاكم في هالسفره

والدقايق الي أتكلم فيها معاج العصر أو بالليل أحس كأنا عايشين في بيت واحد...

الله لا يحرمنا صدق هالمحبه
...................

تهدينا الدنيا إخوة
نتذوق معهم صدق الإخوة
إخوة ماحملتهم بطون أمهاتنا
وإحساسنا بوجودهم ضياء على قلوبنا
اللهم إحفظهم لنا
وأسعدهم وبارك لهم في سائر أيامهم

والمقاله جدا مشرفه وعاد تراني أريد أوتوجراف واحد لي وواحد لمريومه بنتي
;)

someone_q8 يقول...

السلام عليكم
الحمدالله على السلامة اختي
توه مانور البلوق

روحي ريحي ونبي نشوف المواضيع و المشاهدات اللي شفتيها بالسفرة

بـابـل يقول...

صباح الورد


حمدلله عالسلامة

ومصر حلوة وأحلى من الحلوة

لك وحشة استكانة

ونبي بوست بحجم الشهرة :)




تحياتى


وبس

بابل

esTeKaNa يقول...

Manayer
~~~~~~~~~
يا هلا ويا مرحبا
حيالله مناير خزنة التاير
:)
صج والله كان سبب زيارتج للمدونه اهو المقال؟
الف الحمدلله
والله فرحتيني بمرورج وتعليقج اكثر من ما تتصورين
تبين توقيعي؟
افا عليييييج
وصورتي بعد
:Pp~
هذي الساعة المباركة حياج الله












EXPAT.
~~~~~~~~
الله يسلمك من كل شر
عاش من شافك
:)










eseeL
~~~~~~~
مسلسل مرة واحده؟
لووووول
الله يسلمج يا الغاليه من كل شر








Peace
~~~~~~~
مكان راقي
انا سرحت بعالم ثاني هناك
:)
اجمعييين يا الغاليه
:*








vancouver
~~~~~~~~~~~~
يااااااااا الف وستمية مرحبا
بالأحضان يا حبيبتي
وحشاني أوي
:***
الحين تونا قميل؟
اشياب طار يالحلتيتتتتتتت
@@
لازم يعني تخلوني اتعقد من هالحلتيت؟
هههههههههههههههه


بعدين تعالي غششيني
الحين المشاهير ما تييهم نشله؟
ويييييييييي
نسيت نسيت
بعد تدرين انا يديده على الشهره
بس توصيت بروحي عدل
ما بقى شي من الحواي من شربته
خبرتج ام الحلتيت
لووووووووووووووول
بس قلت لازم اباري روحي وراي حفلة يوم الخميس وتصوير مو حلو بعد اييكم الحفله قاضبه قوطي كلنكس فشله بعد
:Pp~

انتي تدرين اني مسافره من غير موبايل؟
ههههههههههههههههههه
وصج صج صج كانت مفاجأة
اقولج قمت اطامر بالصاله
ابوي وامي يركضون وراي
يوم يبت الجريده استحيت
شقولهم؟
يوم قراها ابوي قالي :
حلو حلو مشالله
بس عاد بنيتي مرة شكبرج ليش استكانة؟
ههههههههههههههههههه


اي حدا رقصني يا جدع
بس مو هنييي
خوفج تتبازر علينا العيون
بالخيمة بالخيمه
:pP~
وعااااشت فنكوفر عاشت

esTeKaNa يقول...

3teej
~~~~~~~
الله يسلمك من كل شر
وجزاك الله كل خير ما قصرت
:)








darkness
~~~~~~~~~~
يا صباح الورد
يا صباح الهنا
يا هلا ويا مرحبا
بس جاي ضحى؟
افا بس افا
انتي تتدللين
انا واستكاناتي كلها تحت امرج
بس انتي جذي تكونين رايقه ومستريحة
انا مستعده اسوي لج كوفي شوب
:)
ليش تنحرجين مني؟
انا اختج غصبن عليج
:*
حمرة وصفره؟
هذي برد صاروخ
ههههههههههههه
قصدج ثنتين؟
اييييييييييي فهمت فهمت
افا عليج تامرين امر
:pP~

esTeKaNa يقول...

q8i-blogger
~~~~~~~~~~~~~~
الله يسلمك من كل شر

تدري ليش نتذكر افلامهم؟
لانها مو بعيده عن واقعهم
عن حياتهم اليومية
:)


ااخباري اولد؟
احم احم
لاني انا بكبري ما درت الا متأخر
ميخالف تحملني اخر مرة
:Pp~



سياير عليها صورة استكانة؟
اخاف دعاية حق قهوة ولا شي
هههههههههههههههه
ياربي مشكله الشهره ترا
:Pp~




غوله؟
يممممممممه
تعرف اول يقولون امنا الغوله
هذا شي يخرع
قوله قوله
:pP~
افا عليييييييييك
اوقع لك ذاك التوفيع الشاخوطي شي غير نمونه
:D~






rawtan
~~~~~~~~
شكرااااااااا
:)










broke
~~~~~~~
هلا بالطش والرش
:)
الله يكتب لج روحة قريبه جدا
جدا
مفاجئة
ومع قروب مختار من اللي يحبهم قلبج
:)

esTeKaNa يقول...

فريج سعود
~~~~~~~~~~~
الله يسلمك من كل شر
:)
طحت علينا؟
متأكد؟
هههههههههه
ههههههههههه
يا حلوها ويا زينها
بس مو اختي الا بلوقيا
واهي موجوده تشوفك هالكومنت وترد ان شاء الله
:)
انا يعجبني التفكير المنطقي المتسلسل
بس باأت محاولتك بالفشل
ميخالف ميخالف
يكفيك شرف المحاولة
:Pp~
اي صح
بس ما اشرب جاي بمصر
:)






Bin3Li
~~~~~~~~
يا زينها من سنعه
بس اختي بلوقيا
:)
انا بعد مو مصدقه
:Pp~








عاشه
~~~~~~
ياااااااااااابعد قلبي قلبها هالعاشه
وحشتيييييييييييني
ازايك يا عيشه
وازاي ميمي بنتك
:pP~

ما يوحشك غالي
فداك الف غالي
يامن ذكرني وانا غايب الدار
:**

الله عليج يا عاشه
فعلا...الصدق هو اجمل ما يميز اي احساس
ويشهد الله علي ما يحمله قلبي من صدق المحبة لك
ومن عرفتك وانا كل فرصه احن على اهلي ابي اروح الامارات
:)

اوتجراف بس؟
افا يا ام مرايم
انا كلي تحت امرج انتي ومريومه
بس مريومه وضع خاص
ودلالها عندي شي ثاني
:**

esTeKaNa يقول...

Someone-q8
~~~~~~~~~~~~
وعليكم السلام ورحمة الله وبركاتة
الله يسلمك من كل شر اخي العزيز
البلوق والله منور بتعليقاتكم
:)
ابشر بالخير








بابل
~~~~~~~
صباح الفل
:)
الله يسلمك من كل شر
والبوستات قادمة بإذن الله

حياك الله

|:| DUBAI |:| يقول...

مصر البارحة لعبت ..شجعتيهم يا استكانة؟

LOOL

نورتي داركم

: )

و حمدلله على سلامتكم

!!

esTeKaNa يقول...

DuBai
~~~~~~~
افا عليج
كان عندي حفلة وياهم
شجعتهم بضمير
loooooool:)

الله يسلمج من كل شر ما قصرتي

Najmah يقول...

استكااااااانتي
الحمدلله على سلامتج حبيبتي
حاولت ادخل بلوقج وانا هناك بس مادري ليش مادخل عندي
مشتاااااااااااقتلج
تستاهلين كل هالكلام واكثر
ربي مايحرمنا من قلبج الحنوون

ابي توقيع
وابي صوورة
;)))

esTeKaNa يقول...

najmah
~~~~~~~~
هلااااااا وغلا
تو ما نور المكان
حمدلله على سلامة نجمتنا الغاليه
والله اني فقدتج من غير شر
!!
اتمنى تكونين استمتعتي
والله يسلمج من كل شر
تبين توقيع وصورة؟
افاااا عليييييج
انا لي الشرف اصور يم نجمة البلوقات كلهم
:**

SolaimaN يقول...

يا هلااااااااااااا ويا مرحبا

:)

اسفرت وانورت والله ،،، يا حيا الله استكانتنا

اللي مالنا غناة عنها ،، شي طيب انج رديتي

بروح احلى واستفدتي من هالسفريه المفاجئه

والمعنويه ان شالله عاااااااااال العال

،،

لا شك ان المدونينين عددهم ليس بهين انما يظل التمييز

حكرا على المتميزين فقط ومن يملكون القلم الفذ

والحس الكتابي المناسب والخيال الفسيح

واعتقد ان الاستاذ الحربي لم يقصر في وصف مدونتك

اللذيذة ،،انما ارى التأخير واضح جدا في ظهورك

على الساحه العامه سواء بالصحف ام الاصدارات الخاصه

المهم ،، جميعنا فرحين جدا بهذي العوده الميمونه

عوده اختنا العزيزه ومدونتنا الراقيه المايجه

:P

ممممممممممم ،،،عيل تقولين احمد ؟؟

:)