الخميس، يناير 10، 2008

مكربنه:P~

فستان أحمر مشيّر
موديله قرظه العافيه
عباءة فوق الراس
وطبقات من الملابس المتتاليه على جسدها
تنتظرني متململه منذ صباحها الباكر وما وصلت لها الا في ذاك الضحى العود على قولتها
لطيفه ظريفه ماما عايشة.. هي جدتي أم أمي خفيفة الظل والطباع
تغار من جدتي أم أبي،تلك المثقفه الحافظة لكتاب الله الهادئه الطباع وأنا اول حفيداتها
أتمنى ان اجمع بينهما فأخذ حكمة أم أبي وسرعه بديهه وظرافة أم أمي
!!
كنت قد واعدتها بأخذها للمكان الذي تريده في احدى هذه الصباحات البارده الجميله
صدمت..بأنها تريد الذهاب لسوق السمج ومن ثم الجبره
تقول تبي توسع صدرها
!!
ولأاني غير مستعده لأن اوسع صدري في سوق السمج والجبره قررت ان اقنعها بالذهاب للكوت خاصه انها لم تقوم بزيارته من قبل
.
.
.
.
قضينا الطريق في قصص من الخيال العلمي قهقهت لي قلت بس
يقولج اول في مرة وعليه ما رزقها ربي ذرية،راحت الطبيب وعطاها أدوا
اخذي الأدوا وحطيه على الكومدينه
وتعال يا المليقيف يا ريلها واشرب الأدوا تدرين شنو صار؟
شصار؟
حمل الريال
!!
وتوهقت المرة،ابونا حامل..خزياااااااااه خزيااااااه شتسوي؟
الناس تسئل،وينه أبوكم؟ علامه بو فلان ماطلع؟اشفيه ابوكم؟
تقولهم والله مو طيب تعيبين ابونا
خشته بالبيت مسيجينه
وتالي يا محفوظه السلامه ولد الريال وياب
ياب
!!قرعه
قرعه تركض على كبر الحوش تغسل المواعين،وتخم الحوش سنع الدنيا بقريعوه
الام تنادي قريعوه:يا قريعه غسلتي الحوش؟
قريعه:نعم
قالت اعطيج غدا ابوج تعطينه الصبيان
راحت قريعو وردت تغني:
كليت الخبز ولبانه
كليت ابوي وصبيانه
كليت الحمار وأذانه
!!
تصدقين بنيتي،.كنت اصدق وطول النهار افكر اشلون كلت الحمار وأذانه
اشهق من الضحك:
يمه اشلوووون الريال ايييييييييييييب أقرعه
!!
.
.
.
.
وصلنا للكوت الساعه العاشره والنصف صباحا،الجو اروع من رائع
استراحت على مقعدها المتحرك تحلطم على نفسها:
محروله انا تركبيني عربانه؟
جدتي منبهره بالجو..بالمكان ...بالمنظر الجميل والمكان الهادئ
دخلنا سوق الخضار في البداية:
بجم هذا؟
دينارين ونص حجيه
يالله عاد يلله،حدك دينار ونص
يشرح ويشتط البائع ويحاول ويحاول وتصدمه جدتي:
يالله ماكو غير دينار ونص ماني معطيتك
عندما يرضخ ويستسلم تهمس لي جدتي :
!!أمشي عنه بس امشي عيونه تتبازر بسم الله
@@
نذهب لآخر ومن البدايه يعطينا بدينار ونص
توقعت انها ستفرح ولكن اكتشفت انها ما زالت تمارس متعتها:
يالله عاد يالله،غير دينار ماني معطيتك
وان ناشبتني ربع بربع باخذه
قضينا وقت طويل نفتر بين الخضار شرينا للكويت كلها
انتقلنا لسوق السمج
قطط تتزحلق بين ارجلنا بحماس وتمكن
اتماسك وامثل الشجاعه
ثم استسلم بصرخة مدوية:
يممممممممممممممممممممه قطوة
تقف جدتي على رجليها بحركة مسرحيه جميله تاركة كرسها المتحرك راكضة خطوتين لمحل مجاور
اغشي من الضحك:
واي يمه اشفيج قمتي؟
تنظر لي بعين مخترعه:وين راحت القطوة؟
استكانه: انحاااشت هااا يمه طلعتي خوافه ماني ببعيده عنج عيل
عندما لاحظت بعض الأعين التفتتت علينا،وبعض الباعه يكتمون ضحكتهم افحمتني برد مبهر عجيب :
جبي جبيج الله
!!
أنا اخاف؟
انا قايمة اكشها عنج اصلا
بعد المشهد الكوميدي مع قطط سوق السمج استمرينا بالتمشي،جدتي تحرص على السؤال:
هذا سمج كويتي ولا ايراني؟
اي مبين من خشته كويتي هذا
لا هذا مبين ايراني شوفي السمجة لا اله الا الله يبين
هههههههههههههه
اشلون يبين من خشته مادري
.
.
.
تركتها تنتظر في قهوة جميله بجانب سوق السمج ونقلت الأغراض للسياره
رجعت وجدت جدتي تغني بصوت خافت جميييييييييييييل:
كل البناااااات نجوووووووووووووم،واستكانه قمممممرهم
كل البناااااااااااااااااااااا نيوووووم ،واستكانه قمرهم
.
.
.
لم اتصور انها ستستمع هكذا ،ولم اتخيل ان الهدؤ الطاغي في الكوت قد يحول هذا المكان لجنة
ادخلتها للمحلات،استمعت بتقليب الملابس والسؤال عن اسعارها وبين الحين والآخر تكتشف شئ يضحكني:
وأنا اقوووول وين يروحون ما يبون الزواره اثاري جذي الكويت حلوة؟
وانا اقوووول من وين يشرون هالهدوم؟عمار يا الكويت كل شي عندنا
شدعوة هالكثر بلوزه قرظة العافيه؟ليش خيووطها ذهب؟
والله هالحريم كلهم بالمطاعم؟ومنو ينجب حق الريايل بالبيت؟
اشلون هالأواددم مجابلين بعض؟اشلون ياكلون وكل من مبقق عيونه على الثاني؟
.
.
.
.
دخلنا محل لاصحاب القياسات الكبيرة،الله يحفظها متعافية شوي
انبهرت بالمحل وفرحت:
ماخلو شي اهل فيلجا
شكو اهل فيلجا مادري؟
نادت البائعه الفلبينيه بالمحل:
عندج جاكيته لونها صتي مشيره؟؟
انا نفسي ما ادري شنو يعني صتي فما بالكم بالفلبينيه المسكينة
الصتي..لون رمادي مرعب
!!
اختارت 3 جاكيتات :
خضر وحمر وبنفسجي،انا من أواني احب الحمر لا تشترين شي يقمت قلبي
بس نادي هذي ام ويه ودر قولي لها الحين اذا صوبنتهم ما يدخلون
@@
حلفت عليها ان لا تدفع شئ وتعتبر تلك الجاكيتات هدية مني اليها
رغم اني انا التي سأدفع وجدتها تسحب الفلبينيه من طرف بلوزتها:
يالله عاد ماخذين ثلاثه جم اخر شي؟
تخيلو جدتي تكاسر في إيفانز
hahahahahahah
.
.
.
.
أثناء مشينا متوجهين لاحد تلك القهاوي نشرب جاي الضحى،مر بجانبنا شاب دايخ قال شئ ومضى
ارتجفت جدتي وسحبت عبائتها على نفسها:
قايله انا ماني لابسه هالمشير،شفتي شفتي كله جذي انا وانتي ما تفطنيني
خزياه بس
!!
في القهوة اسئلها:
تتدللي يا جميله انتي،شنو تشربين؟
شوفي...قولي لها تيب لنا قهوة تركيه مثل اللي يشربها خالج بس ابي شكر فيها
وتيب لنا بيالة جاي قطيرة
وجان في بسكوته ولا شي ابي حبيبة
!!
بس قولي لها كل شي تبينه مو تغربلين بنت الناس رايحة راده
hahahahaha
كانت تشكي لي عن بعض الامور وعن خدامتها المخديه كالعاده
انصحها بذكر الله والتعوذ من ابليس
تسمعني وانا اشتط واعطي محاضره دينيه ثم تبهرني برد مفحم:
شوفي انتي ياالشعراوي،اعرف انا هالحجي
تبارك حافظتها،معوذات اعرف،سبحان الله الحمدلله كل شي اعرف
مير البارحة ما تدرين تعسرت تعسرت بليل،لقيت كتاب اسمه الكرب
قريه وربي شرح صدري مرة واحده
قلت لااااااااااا اله الا الله طلعت مكربنه
!!
.
.
.
لا اعرف كيف طار الوقت
استمتعت بخفة طينتها
بغنائها الهامس بين الحين والآخر
بدعائها الصادق لي في كل خطوة
بعفويتها وهي تعظ طرف عبائتها
وهي تزفني جدام الناس ثم تسئلني بعد مرور وقت:
عسى ما زعلتي
!!
ببساطة تفكيرها وهي تسئلني:
يقولون الأولين الميتين يحجون
علامهم سكتو؟
استمتعت ونامت نوم عميق بعد تلك الطلعه الصباحية الجميله
رغم مرور وقت على ذاك اليوم ما زالت تتنطع بفرحتها وتذكرها في كل سالفة
ربي يرزقني جنة رضاج ويحميج يارب
الاسبوع الماضي كان لها..والقادم موعدي بالمباركية مع ام ابي
!!
هكذا تستمتع استكانه ببطالتها
:Pp~

هناك 44 تعليقًا:

Eng_Q8 يقول...

عسى الله يطولج بعمرها

يحليلها تونس :)))

ويازين حجي حريمنا الاولين

وبارك الله فيج .. ترى اهم الخير والبركه والناضي لا ما نتركه :)))

غير معرف يقول...

صج وناسه..

ربي يحفظها لكم..

زعاااااشت البطاله ..

أختج .. هنـد

غير معرف يقول...

صج وناسه..

ربي يحفظها لكم..

وعاااااشت البطاله ..

أختج .. هنـد

DR.HAMAS يقول...

هههههههه

ربنا يكرمك أختنا

كلامك طريف و جميل

رغم انه بعض التعبيرات لم أفهمها

بحكم انى مصرى

لكن حقيقى بوست جميل

و حكايتك مع جداتك ممتعة

جزاكم الله خيرا



د.حمـــــــاس

DiLLi O MiLLi يقول...

هذي بطـــــالـــــه !!؟؟

هـذا عمـل يـدخلـــج الجنـــة
وعســــاج من ســـكانها

اله يحفـــظ يديداتج
ويطــول بعمــرهـم
يـــاااااارب


أنا كنت وايد قريبة من يداتي
أم ابوي توفت الله يرحمها
وأم أمي ما تحرك ولا تكلم
بس من تشوفني داخله عليها تضحك
ياربي تبعد عنها كل ضيقه وكل ألم
وتخفف عنها معاناة الكُبر



تصبحين على خير حبيبتي

:*

Q8i_Blogger يقول...

لا لا لا
خليج مع ام امج
صراحه وايد تونس

كل يوم طلعيها مكان .. ونبي بوستات عاد

ضحكتيني بسوالفج

ولا سالفه القطوه .. والشجاعه :)

Ra7aLaH يقول...

hehehe ;p allah ykhaleha lich inshala!

darkness يقول...

صبحج الله بالخير

:)

الله يخليها لج

و يرزقج رضا والدينج

هههههههههههه


سالفة مكربنه ساااالفه

هههههههههههههه


لا و طلعت شجاااااعه

:p

تدرين شوقتيني اقعد معاها

ربي يرزقها الصحه و العافيه و يطول بعمرها بالطاعه

:)

Najmah يقول...

استكاااانة
هالمرة دموع فرحاانة :)

اتييننن زوووغة ربي يحفظها ويخليها لكم ويخليكم لها

احب اقع مع الحريم الكبار
احب سوالفهم وعفويتهم
احب حجيهم
واحب اطفرهم :P

سلمي عليها وااايد
قوليلها وحدة من النيوم اللي انا قمرهم تسلم عليج :P


الله يونسج بالعاافيه والجنه الدافيه قولي آمين

الخيلاء يقول...

estekana
---------

الله يخليلج يداتج و يمشيهم بالعفو و العافيه ..

مت من الضحك على موقف القطوه ..:)

و الكبار اهما بركه البيت كل شي يتغير لي غابوا ..مايعود للمكان زهوه ولا اللعيد فرحه ..

عسى الله يطول بعمر يداتج و يخليج ذخر لهم .. و يشوفونج عروس :)

|:| DUBAI |:| يقول...

LOOOOOOOOL

يحليلها .. العيايز يمتلكون خفة دم

و سوالف ..صدق صدق تخليج تنسين همومج و اتمين تضحكين من الخاطر

الكوت ..في الاصل سوق شو؟ ..يعني كل شيء ؟ خضرة و فواكه و سمج و ملابس؟ .. و لا شو السالفة؟

: )

الله يحفظ بركتكم يا رب

حلم جميل بوطن أفضل يقول...

اللهم إمنحنى إيماناً كإيمان العجائز

الجلوس معهم متعة ما بعدها متعة

سدرة العشـــاق يقول...

قولي آمين
عسى الله يحفظ يدتج ام امج و ام ابوج و يرزقج رضا الوالدين و والدا الوالدين يارب و يرزقج بعيال اعيال يبرونج و يطلعونج و يونسونج ... تونسج العافية

يا حلو اعييزنا و حجيهم مال اول يازينه والله الله يرحم الحيين و الميتين و يرحمنا وياهم يارب

و عسى الله يطول بعمر يدايداتج و يرزقهم العفو و العافية و طولة العمر
اختيج سديرة
:)

غير معرف يقول...

ذبحتيني من الضحك .. استكاانة سواالفج وااايد عجييبة
و جو العياايز أحلى جو .. شنو وناسة القعدة وياهم

مبطلين حلوجنا مسبهين ننطر سالفة يديدة

يدتي أم أبوي كانت ونيسة جذي .. دوم تحازينا .. كانت مسويتلنا جوو " الله يرحمها"
يااالله ربي لاتحرمنا من هالناس الطيبة في دنيتنا

أم أمي العكس هادية

تدرين كلة آدعي ربي.. يالله تخليني عيوزة فلة وترزقني أحفاااااد وعياال واايد
ويرد الزمن مرة ثانية لأيام البساطة اللي عاشوها

ياختج اشتط القلب

أهوو بروحه ولهان
كثري من هالسواالف العجييبة
وسلمت يمناج غاليتنا

SMile يقول...

ويه نسيت أقولج
هاذي آنة SMile

=)

البحرين


تدرين شنو أتمنى؟
إني ألتقيج بيوم من الأيام
ومن يدري ! يمكن تصير

جنون إحساس يقول...

الله الله ع البوست قريته وانشرح قلبي, يا زين اليدات ويازين سوالفهم

على طاري القهوه التركية اللي تسويها مرت خالج اللي طالبتها يدتج
مرة آنا ماخذه يدتي ستاربكس جان أقولها هاه يمّه شتبين أييب لج؟
جان تقولي جدام الأوادم

(يمّا ما عندهم جاي حَمر؟)

يا فشلتي هههههه
يدتي عبالها داشين قهوة شعبية

ياخي اليدات أحسهم بركة :)

عسى الله يطول لج في عمر يداتج ان شالله

Sara يقول...

وناسة خوش بوست حده يشوق

الله يخليها لج ويطول بعمرها ويخليكم لها :)

حدها ونستني بسالفة النحشة من القطوة لوووول .. عاد الله يهداكم هذي قطوة لو انا اللي شايفتها جان ما خليتها تروح أحبهم

وترا اليدات عليهم سوالف .. ناوية اكتب بوست انشالله عن سوالف يداتي عليهم سوالف عنيفة :)

الدائرة الخامسة يقول...

بوست رائع وجميل
أبدااااااع الى اخر حدود الابداع
والله يرزقك بر جدتك ويخليها لك

مـــــي وعشرون عاما يقول...

والله فكرة سوبر رائعه وياحليلها والله يطول باعمارهم
تدري انا مفكرة اجرب اطلع جدتي:) بس المشكلة جدتي من عشاق ستار بكس:b

New Bride يقول...

3asa alaah y6awel b3mrha o ykhaleeha lich enshalaah :)

alaah ewafgich estakaanaa san3aaa walah

Sn3a يقول...

واي استكانه
جد احب اقرا هالاشياء لأنها واقعيه وبريئه جدا
ربي يطولج باعمارهم انشالله


اهم شي انا خذيت 3
تكاسر بايفانز
ماقدرت اقمت الضحكه
فديتها



ربي يكتبلج رضاهم ورضا رسوله ورضاه ان شاء الله

vancouver يقول...

استكااااااااااااااااااااااانة
يعلج العافية
موتيني ضضضضضضضضضضضضضضحك
هههههههه

واي واي تيييييييييينن يدج الله يحفظها
انا لومنج 24 ساعة مجابلتها
ياخف طينتها والله

امووووووووووووووت واعرف الشايب الدايخ اش قاااااااال
ههههههه

اكيد قالها
حمام(ن) شاقني فنه
ههههههههه
انا اطرب كل ما غنى
هههههههه


واي تينن

احلى شيء
واناترى مجربه هالشغلة
لما تنزفين جدام الاوااادم
ههههههه
الله يخليييييييج كل اسبوع نبي المغامرات
اللي من صوب ام الام
واللي من صوب ام الابو
هههههههههه

ترى طحت بالقاااااااااااع
لما قريت
اشلون تلت الفلبينية تكااااااااااااسرها بايفاااااانز
لوووووووووووووووووووووووووووووووول
هههههههه
استكانة
قولي امين
يعل ربي يعطيج احفاد يبرونج
مثل ما تبرين
ماما عوده
هههههه

vancouver يقول...

سلامي للحلتيت والملتيت

لوووووووووووووووووووول

Mr_CHoCoLaTe يقول...

الله يعطيج العافيه

و يخلي يدتج لج يا رب

و ان شاءالله تستمتعين مع كل اللي تعرفينهم و يحفظكم لبعض

و مشكوره على الموضوع الممتع اللي امتعنا في جو الدراسه المكهرب هي هي

باي باي

charisma يقول...

لوووووووووووووووووووووول
واى مت من الضحك
والله احلى بطاااله اصلا اسمها متعبه هذى ههههههههههههههه
الله يوسع صدرج دنيا واخره
والله لا يخليج منهم
اهم الخير والبركه

سبحاان الله جنج اتسولفيين عن يدتى هههههههههههههه

:**
تصبحين على خير يالغاليه

esTeKaNa يقول...

eng_q8
~~~~~~~~
الله آمين ماقصرت
والغاليه هذي...صج استانس وياها
:)
الله يبارك بحياتك
واهم شي الماضي ابد ما نتركة
hehehe






هند
~~~~~~~
hahahaha
اي والله عاشت البطاله
وعاشت هند اللي توسع صدري بردودها والله
:)









dr-hamas
~~~~~~~~~~~
ياهلا ويا مرحبا
زياره اولى اسعدتني ونورت مدونتي
ونأسف لأن بعض مصطلحات هذا البوست غارقه باللهجة المحليه
:)

esTeKaNa يقول...

dilli o milli
~~~~~~~~~~~~~~~~
يابعد قلبي يا دلي
اللهم آمين يزاج الله كل خير
!!
عسى ربي يرحم جدتج ام ابوج وعساها بجنات النعيم ويحفظ لج الغاليه ام امج
بعد قلبي والله
يكسرون الخاطر اذا كبرو
الله يعينا على برهم ورضاهم



وانتي من اهله
:*







q8ibllogger
~~~~~~~~~~~~~~
اي والله تونس الله يحفظها
بس لا تستعسر تعفسنا
!!
انا اقدر استغنى عن الثنتين؟
الله يحفظهم يارب
وابشر بالبوستات دام البطاله شغاله
:)







re7alah
~~~~~~~~~
امين ما قصرتي
يزاج الله خير
:)

esTeKaNa يقول...

darkness
~~~~~~~~~~~
صبحج الله بالنور والسرور
:)
اي اهم شي مكربنه
تدرين صايره هذي الشفره السريه بينا
من نقولها نضحك
لانه يا بعد روحي تتعبر واهي متكشفه انها مكربنه
:)
امين ويزاج الله خير
طول ما انا بطاليه وموجوده وياها راح يكون في نقل مباشر للسوالف
:)








najmah
~~~~~~~~~
ياهلا ويا مرحبا بنجمة البلوقرز كلهم والله
اي والله القعده وياهم تونس وتوسع الصدر
ربي يحفظهم ويبارك لنا بعمرهم
وواصل سلامج يا شيخة البنات
بس هم دموع؟
يعني ماكو فايده لازم نبجي اا وياج؟
:)








الخيلاء
~~~~~~~
ياهلا بالخيلاء والله
فعلا...اهم بركة كل شي الله يحفظهم
وصالفه القوة سالفه
!!
المشكله اهي اللي خايفه وقطتها براسي وزفتني بعد
بس تمون تمووون
:pP~

esTeKaNa يقول...

DUBAI
~~~~~~~
lOoOoOoOoOL:)
الكوت مجمع تجاري في منطقة فحيحيل
ينقسم الى قسمين
قسم فيه سوق للسمك والخضار
ومقابله القسم الآخر فيه محلات وقهاوي وكافيهات على البحر
يالله دبي حياج بالكويت
زورينا وخلينا نستانس معاج
:)















حلم جميل بوطن أفضل
~~~~~~~~~~~~~~~~~~~~
أنا اشهد
!!
اللهم آمين













سدرة العشاق
~~~~~~~~~~~~~
سديرة
!!
شنو هالدعاء الحلو اللي يوسع الصدر والخاطر؟
اللهم آمييين واجمعين ما قصرتي يا الغاليه
:*

esTeKaNa يقول...

smile
~~~~~~~
ياهلا وأميه هلا
ويا رحب وأميه رحب
هلا بأهل البحرين الطيبين
نور البوست
والبلوق
وفرح قلبي بوجودج يا الغاليه
تتمنين؟
وماكو شي على ربج بعيد
ياعل ياربي تشوفين الكعبه
وانا شي سهل تشوفينه وتلتقينه
حياج الكويت زوريني
:)))
ويارب يارب يحقق كل امانيج
وتصيرين يده فله
ويرزقج احفاد يبرونج ويحبونج
وانا بعد ابي اصير يده طيبه
بس لاحظتي؟
انه شقحنا كل مراحل العمر ونفكر اشلون نصير يدات
لوووووول
وسعيت صدري بتعليقج عسى ربي يوسع صدرج دوم،لا تحرمينا من طلتج وتعليقج الحلو
:**










جنون إحساس
~~~~~~~~~~~~~
من وين طالعه الشمس اليوم؟
انتي وينج ولهنا عليييج
شنو هالغيبه هذي
!!
تبي جاي حمر
@@
ممممممممم
عيل اكيد انتي بنت خالتي
ويدتج اهي يدتي
تموت على الجاي الحمر
وتسميه جاه حمر بعد
لووووول

الله يحفظهم يارب








sara
~~~~~~~
هلا وغلا ساره
يا ليت بس تعلميني اشلون اصير شجاعه
يختج انا من اشوف قطوة افقد حتى قدرتي على السيطرة على نفسي
!!
خوافه
:(

ويالله ناطرين بوست يدتج على احر من الجمر
:)

esTeKaNa يقول...

الدائرة الخامسة
~~~~~~~~~~~~~~~~
شكرا لمرورك وكلماتك التي تقطر عسل
:)
اللهم امين واجمعين






مي وعشرون
~~~~~~~~~~~~
زيارتك الاولى موضع ترحيب
حياج الله دوم
:)
وجربي الطلعه وسولفي لنا
يا حلوها يدتج كشخة اذا تحب ستاربكس
:pP~









new bride
~~~~~~~~~~~~
يا بعدقلبي انتي
تهقين انا سنعه؟
مممم
سنعه بمزاجي
مرات اخوره
:))
امين وحياج الله

esTeKaNa يقول...

Sn3a
~~~~~~
اللهم آمين واجمعين يارب
!!
انتي مبدعه
فلما تحبين تقرين كلماتي احس بسعاده لذيذه
:)
مكاسر ايفانز شي مو طبيعي
اشوة ماكان في احد بالمحل
لانه بصراحة انا بدعت وانا اضحك
:)














vancouver
~~~~~~~~~~~~
واي موتيني ضحك
هههههههههههههههههههه
الشاب الظريف بدع حجوة ما تنقال يا وخيتي
والله اعلم قصد ام نفنيف حمر مشير
ولا قصدحرم الحلتيت
لوووووووووول
!!
وطبعا الزفه جدام الناس غير نمونه
اهم شي ويهي لما ينقلب واتبوسم
جنه ترا عادي عادي
وانا اطبخ من الفشله
لووووووووووول
يابعد قلبي قلبج انتي
امين واجمعييين يارب
ونسني ردج والله
انتي والله غاليه وعزيزه
بس لو تخلين الحلتيت بحاله
لوووووووووول

:**









mr_choclate
~~~~~~~~~~~~~~~
ياهلا ويا مرحبا
يبيله جوكلت ويا هالبرد
:)
الله امين وشكرا ما قصرت
وعسى ربي يوفقك وتبشرنا بالنتايج الخلوة يارب
حياك الله















charissma
~~~~~~~~~~~~
هلا بالطيب الغالي والله
:*
واي اشرايج فيني وانا استغل بطالتي؟
كل يوم طالعة بخطة يديده
الله يخليج عالفراغ على خير
:)
وانتي من اهله يارب

Peace يقول...

الله يخليهم لج يا رب
و ديري بالج عليهم

كونهم على طبيعتهم هي سبب سعادتهم

الله يزيدهم سعاده

وتأكدي انج محظوظه بوجودهم بحياتج

في ناس ما شافوهم
مثلي
:(

Mamloo7a Q8ia يقول...

ما شاء الله عليج يا استكانه حتى بطالتج حلوة مثلج ومثل اخلاقج

الله يخلي لج جداتج ويطول في اعمارهم
ويساعدك ويقدرج على ارضائهم

وصج صج استمتعت في هالبوست وسوالف الحريم الكبار اللي ما نمل منها

الله يعطيج الف عافيه حبيبتي
:**

حياتي هدف مو عبث يقول...

يحليلها تونس :P

الله يحفظها يارب ويطول بعمرها

ويجعلج ربي من البارين :)

محـــــارة يقول...

الله يخليهم لج ويخليج لهم

ياحبنيلج وحبنيل يداتج .. ياهي يدتج لذيذه حبيها لي حيييييييل ولميتها وقولي لها من رفيجتي ومرأتي

أحب العيايز حدي وأحب هالأماكن يحنا متوالمين حتى بنفسية المكان .. أقول مريني لما تروح لمباركية يالله من فضلك بس أم ابوج تسولف وتقول قصص أنا ابي وحده اشبع من تراثها فيني فقر

الله يطول بعمرهم ويسعدج معاهم

بـابـل يقول...

صباح الخير


يابختك بهالجدة الطيبه

ياريت عندى مثلها


أشيلها بالرموش



والله بوست مممتع وسوالفكم ماتنمل



وبس


بابل

Selezya يقول...

عسا الله يطول باعمارهم ثنتينهم


وناسه والله احب هالسوالف تحسين تحرجج بمواقف قويه بس تنسين بسرعه من كثر الوناسه

:) يخليج لهم انشالله

someone_q8 يقول...

السلام عليكم

وانا اقرأ البوست من اول كلمة وانا مبتسم لي نهاية البويت , لان الكلام الكويتي القديم وايد احبه , احس لما اسمعه اسمع صوت البحر والهو يامال , لما اسمعه احس بالتعب والشقا والحالة اللي كانوا فيها اهلنا قبل , لما اسمعه واقراه احب بصفاء النفس ونظافة النيية وحسنها

قبل كنت احب اقعد مع يدتي وايد عشان اسمع سوالف قبل والامثال الحلوه والغريبة بنفس الوقت للجيل الحالي

الله يخليلج يدتج ويحفظها من مكروه اهيه وباقي اليدات اهم الخير والبركة اللي بقت في زمن غلب عليه المادية والتفاخر

ابي منك طلب اختي استكانه وهو ابيج اتحبين يدتج ام امج وام ابوك على راسهم مرتين واتقولين لهم هذه من ولدكم انسان كويتي امانه اتوصلينها
وعساج عالقوة وفي برك فيهم
لكي مني كل تحية واحترام

ZoZOta يقول...

:))))))

يا مالج الستر يا استكانه

مت مت مت ضحك

حبيتها يدتج

وحبيت سوالفج معاها

يختج العيايز عليهم حركات وخفة طينة ما صارت ولا استوت

الله لا يحرمج من يداتج ويبلغهم فيج قولي آمين

:**

esTeKaNa يقول...

peace
~~~~~~~
اللهم آمين
لا توصين حريص يا الغالي
ثنتينهم بعيوني
:)
وفعلا بساطتهم سبب من اسباب سعادتهم
وياربي تشوفينهم بالجنه قولي آمين
:)









mamloo7a q8ia
~~~~~~~~~~~~~~~
هلا بالملح كله هلا
:*
يا بعد قلبي قلبج اانتي
ياربي كله تجبرين خاطري
الله ياجرج لانج تدخلين السرور لى قلب اختج المسلمه اللي اهي انا
:D~
امييين
وحياج الله دوووم
:*








حياتي هدف مو عبث
~~~~~~~~~~~~~~~~~
اللهم آمين يزاج الله كل خير
:)











محارة
~~~~~~~
ياهلا بمرآاتي وانعكاس روحي
:*
يا حبنا لج والله انتي
يا حبي لج هالحجوة ما زانت الا عليج
:)
يوصل يوصل لا توصين حريص
اي والله شفتي
!!
اصلا يوم رحت الكوت ذكرتج انج كاتبه بوست عن المكان فعلا الصبح يصير شي عجيب
ويا ريت والله ناخذج ويانا
لازم اضبط لج طلعه صباحية مع جده من جداتي
:)
ترا فاقدتج وايد من غير شر
ان شاء الله اشوفج بأقرب وقت على خير







بابل
~~~~~~~
صباااح الورد
الله يا باب عليك
عجبتني كلمة اشيلها برموشي
!!
هذا اللي ياربي الله يقدرني واسويه
واشيلهم بعيوني ورموشي

حيااااك الله نورت البوست
:)







selezeya
~~~~~~~~~~
اللهم آمييين
:)
اي والله ويهي قام يقلب ألوان
بس اهم شي استاااانست وايد
حياج الله
:)










someone-q8
~~~~~~~~~~~~
وعليكم السلام ورحمة الله وبركاته
وانا ابتسمت من قلبي وانا اقرا ردك الحنون والجميل
:)
سلامك واصل بإذن الرحمن
وعساك دايم مبتسم وبخير








zozota
~~~~~~~~
يا هلا بالزين كله
كل ما ضحكتي انا ينشرح قلبي
عساج دوووم بخير يارب وفرحانه
اي والله خفة طينه
انا وايد افكر اشلون بصير اذا صرت يده؟
لاحظي اني اشقح كل مراحل العمر شوفي شنو افكر
heheheeheheh
بعد قلبي يزاج الله خير
:*

عــــاشــــه يقول...

ياربي فديت يدتج ياإستكانه

والله حبيتها بشكل مو طبيعي
سوالفها تقولين يدتي الله يرحمها ... كانت نفس الشي وعندي الكثير من قصصها وحركاتها

وعكس جدتي أم ابوي الي حافظه القرأن أماأم أمي الله يرحمها بدوية وتحب البر والمزيون والقصيد والطلعات


عاد شوفي إذا ييت الكويت لازم أشوفها

الله يباركلكم فيها ويطوللنا بعمرها

وتراني سميـّتْها

ههههههههههه

esTeKaNa يقول...

عاشة
~~~~~~
هلا بسمية الغاليه هلا
هلا باهل لندن
اشلونج؟
اكتب التعليق واحس ببرد لندن جاني مع تعليقج
:))
أتمنى تكونين بخير
الله يرحم جدتج ويحفظ الغاليه
الظاهر لازم يكون ف اختلاف في الشخصيات عشان يحققون التوازن في شخصياتنا نحن
هههههه
لازم تشوفينها
انتي بس تعالي الكويت وبشري بالخير
ما راح تشوفين الا كل شي حلو ان شاء الله
:**

|:| DUBAI |:| يقول...

استكانة

ايوا يبالنا فرة فيه عيل

lol



أنا هالويكيند في الكويت ان شاء الله

: D