السبت، يناير 26، 2008

شفت الليل

شفت الليل
~~~~~~~~~
الساعة 11 مساء
تنزل استكانه من عرشها الملكي للصاله
ترتدي كل ما تجده في طريقها
تممدد رويلاتها واللاب توب في حضنها
على يمينها،طاولة عليها ريمونت التلفزيون وموبايل
وعلى يسارها روايات لم تنتهي من قرائتهم
ومقابلها تلفزيون مفتوح طوال الليل
ويبدأ شفت الليل
المسنجر مفتوح...والبلوقات بصوب
اتمشى هني وهني
اكركر بروحي
واتفاعل من صجي
ساعة اقهقه،وساعه اتحلطم وينعفس ويهي
صاير لي عالم وهمي بعيد عن عالمي
صديقات اسولف وياهم عن كل شي
وبكل شي
وبكل وقت
!!
وعندي البلوقات عالم أخر
اقراها بقلبي
اتفاعل من صجي
واحس كلهم اهلي
ينيت؟
.
.
.
ولا تناصف الوقت،مثل القطط اتسلل للمطبخ
قهوة...شاي..كابتشينو...وجاي حليب
حسب مزاج اليوم!!
متعة ان تعد بيدك شي تتلذذ فيه
ايا كان هذا الشي بسيط
ومتعة جديده امارسها حاليا ...وهي أن أكون صديقة نفسي
.
.
.
أحيان يداهمني مزاج مفاجئ للكتابة
اتربع وتعزف اصابعي على الكي بورد
اكتب شي يطري في بالي،بلا مونتاج بلا تفكير
اكتب وانساه،نادر جدا ما أعيد قراءة ما اكتب
استرو على ما وايهتو يا جماعة
.
.
.
اشعر بملل....وأحيان فراغ
فراغ يعبث بمشاعري ومزاجي
يجعلني اجلس ساعات طوال اناظر سقف غرفتي
افكر باللاشئ
احزن دون سبب
وافرح لأتفه سبب
!!
.
.
.
عندما ينام الجميع تشتر استكانه جنها ينيه
اضاءة الصاله مفتوحه
وانا في مزاج ليلي رايق
حتى أذان الفجر.....أيقظ أبي
واكرر محاولاتي الفاشله مع اخواني
اتحرش بأختي
وأظل احوس أنتظر وصول جريده الصباح
يرجع أبي من المسجد بنصف عين...واكون انا في انشط حالاتي
اسولف
واضحك
وكل سوالفي ما تحلى الا بهالوقت الصباحي
مسكين يا بوي،عسى ربي ياجرك على صبرك على مأساتي
!!
.
.
.
اشوف صلاة الفجر في الحرم
تطلع الشمس
أقرا الجرايد
تبدأ الحركة في بيتنا
اتسلل لغرفتي
اظل اقرأ اي شئ
واضيع الوقت بضمير
ولا اندس في فراشي الا حين اتأكد من اني استنفذت طاقتي
اضع راسي على مخدتي ...في الساعة 7 صباحا وأنام
:(
وليمتى؟
ألوان
~~~~~~~~~~~~~
شنو يعني لون ياقوتي؟
عندما تصف هي لون شئ تتعب نفسيتي
لأن الألوان عندها مالها في عيني لون:
حشيشي
ياقوتي
بصلي
جويتي
بيدياني
!!
ماحب هذه الألوان ..ليش ما تعرف تقولي الألوان الأساسيه بس؟
أخر لون بدعت فيه :
شاريه بدلة لون الغيره
فكرت وايد،بس ما قدرت اسكت:
يعني اي لون؟
ابتسمت بثقه:
صج ما تعرفين؟
هذا
!!
وأشرت على اللون
يا جماعه لون الغيرة اصفر
احد يقولكم شاري بدله لون الغيره ترا الغيره اصفر
ياربي...ليش التضهول بعد قولي أصفر
!!منت رايق
~~~~~~~~
تسرف في حالها
تعاند كل احساسها
وتستقوي على كل ضعفها
تقهر بابتسامتها دمعتها
تضيع في زحمة الدنيا
تظن..انها تسامت فوق الألم
واندفن فيها كل حزن وهم
في وسط الزحمه تشعر بشئ هنا
مابين قلبها وروحها
شئ يعتصر
يخنقها
يتلامع دمعة في عينيها
تناظر السماء
ترفعها
علها تقف عند رمشها ولا تفضحها
تستنشق احساس الدنيا بنفس عميق
آه وتغمض عينيها
يتسلل لها صوت حنون:
اشفيج؟
منت رايق...فيك شي ومتضايق
منت في طبعك...ولا هذا مزاجك
!!
وتنهار قوتها امام دمعة فضحت كل احساسها
من القلب
~~~~~~~
نقية قلب
!!
لها قلب لا تملك امامه اختيار
ام ان تحبها او تحبها
ميزتني بإهداء اسعد ليلتي
شكرا لملح الجزيره كلها وملح الخليج
:**
.
.
.
صاحبة روح جميلة
وخفة طينة ماهي طبيعيه
أحبها بضمير
واتحرا في كل بوست وجودها
اصلا في احد ما يقدر يحبها؟
بخاطري اقولها مشكورة على وجودج الجميل بينا
لا خلا ولا عدم ..عسى خيمتج بالحب دوم عامرة
.
.
.
أما أنتي ...فلا أجد في معجم احساسي
ولا كلماتي
كلمة قد توفيك حقك
وتوفي مقدار احساسي بالامتنان لوجودك الحنون في حياتي
من يقول الزين ما يكمل حلاه؟
كل شي في الزين اكتمل
!!
مع صوت أم كلثوم تتحرش فيني بفكروني
ومع وصول قهوتي الليليه
اختم هذا البوست
قد يكون بوست بلا فكرة
ولكني شعرت برغبتي في كتابة شئ ما
...والآان
نبدأ شفت هالليله
:pP~

هناك 61 تعليقًا:

Mamloo7a Q8ia يقول...

هههههههههههه
حلوه شفت الليل
الاخت صايره سوير الليل


ان شاء الله تتسهل امورج وعقب تتعدل نومتج وحياتج حبيبة قلبي

الله يعافي البلوقات اللي عرفتنا على بعض


يا حلو الكتابه بدون تفكير


هههههههه
حلوه سالفة الالوان والاحلى لون الغيره
هههههه
قتاااااال هاللون


ساعات الواحد يكبت مشاعره بداخله ومن كلمه صغيره تنفضح هالمشاعر المكبوته


يا حياااااتي والله انتي
مشكووووره على هالكلمات الرقيقه
والله اللي يعلم انه شعووور متبادل يالغاليه والله لا يحرمني منج
اخجلتيني بكلااامج


اما الغاليه دللي فشهادتي فيها مجروحه
صاجه ما عتقد فيه احد ما يحبها
تدخل القلب تدرعم وبدون استئذان
خف طينه وطيبه واخلاق عاليه
الله يحفظها ولا يحرمني منها

والعزيزه المبدعه زوزوتا اعتقد غنيه عن التعريف
الله يخليكم لبعض


الله على فكروني وام كلثوم
وكوب قهوه
يا سلاااااام
بالعافيه حبيبتي

new one يقول...

مساء الخير

الحمد لله مو بس أنا اللي يومي مقلوب
أعتقد اننا اخذنا دور الخفافيش صرنا احنا اللي سهارى وبالنهار نووووووم

آآآآآآآآآه وما احلى النوم شي عجيييب

وين هالغيبه؟؟
والله يوميا ازور البلوق اشوف اذا عندج جديد ولا لا

وأحيانا ارد اقرا القديم مع اني قريته من قبل

من سافرو اهلي وأنا مقيمه ع النت 24 ساعه باستثناء ساعات النوم

بصراحه استمتع بالبلوق مالج

تسلم اناملج

صقر قريش يقول...

اختي الكريمة استكانة :
لاتقلقي هذه حالة كثير من الأدباء واذا انتِ تريدين ان تكوني صديقة نفسك فانا عدو نفسي لا أدري ماذا أصنع عموما انا كثيرا ما أهذر وكثيرا ما أنتقد يقول لي احد اصدقائي من ناحية انت الذي ترضى عليه من الكتاب يجب ان يكون محظوظا قلت له على الرغم من هذا النادر لكني انانفسي لم أسلم من نفسي فكيف بغيري ؟ كثيرا ما اسهر وانا اقرأ لعلي الطنطاوي فانسى نفسي وانسى نفسي أكثر اذا قرات لمحمود محمد شاكر فانا شاكري متعصب واذكر اني ذات مرة استمتعت بالسهر لانهي مسرحية البخيل لموليير استمتعت بها كون اخاكِ يحب قصص البخلاء ويستمتع بها انصحكِ اذا اردتي النوم فقط اذهبي للتلفزيون وتابعي اي مباراة لمنتخبنا ول تلاحظي الا وابوك او أخوانكِ يوقظونك من نومكِ وسوف تدعين لي عن نفسي سأذهب للنوم الىن لانه بقي ساعتين على صلاة الفجر فان لم يوقظني المنبه لن يقصر الوالد اعانني الله اذا ذهبت لام الدنيا ماذا اصنع من دون المنبه الطبيعي والدي او والدتي حفظهما الله بالتوفيق لكِ وبإذن الله سياتيكِ النوم حتما اما بمباراة لمنتخبنا الوطني الأبي او اقرأي اي كتاب ممل :)ولا أنصحك بقراءة محمود محمد شاكر لأنك من الواضح عاشقة للغة العربية فان قرأتي له يوما ستجدين نفسك اغلقتي الكتاب والساعه هي العاشرة مساءً:)

esTeKaNa يقول...

mamloo7a q8ia
~~~~~~~~~~~~~~
هلا وغلا بصويحبتي
هلا بلي ساهر معي ليل الهوى كله
:))
وي يالله ياربي تتسنع نومتي المعفوسه
مفتر راسي
حتى مادري شنو الايام
!!
قتال الغيره؟
هههههههه
يالله سوي لي بدله بلون الغيره
اطرافها حقد
ومن فوق حب
يعني لويه راح تكون هالبدله
هههههههههههههههه
!!
وفعلا يا مملوحه
انا فيني هالطبع
تلقييني ساااكته
ويا زيني
بعدين اقل سؤال
لو اشلونج انعفس
:(
لا تشكريني على شي
هذا احساسي بناس لهم غلا بقلبي
واحساس ثاني
الله لا يحرمني منكم يارب
:**
ويعافيج ياربي
بس من باجر
راح نقلل القهوة
وعد
:)

esTeKaNa يقول...

new one
~~~~~~~~~~
يا هلا ويا مرحبا
خفافيش عاد
ههههههههههههه
ضج ضحكتيني
:)
وبعدين متى بتسنعين نومتج؟
خليني احط هدف اني اتحداج على الاقل واسنع نومتي
:pP~
يا بعد قلبي قلبج
البلوق كله تحت امرج
والله انا موجوده
بس عندي قحط فكري شوي
وبعدين كلها خمس ايام
على الاقل عشان تولهون ولا تملون مني
:)
من غير شر اهلج مسافرين
ليتج بس مسافره موسه صدرج وياهم
!!
والنت فايدنا يطير الوقت بشكل مو طبيعي
الله يحفظج يارب ويردون اهلج بالسلامة
:)

esTeKaNa يقول...

صقر قريش
~~~~~~~~~~~
ياهلا ويا مرحبا بالصقر والله
ما قلت لي هالمرة بخاطرك جاي نعناع؟
ولا جاي حليب؟
:)
حال الأدباء؟
سويتني اديبه مرة واحده
الله كريم يارب
الله يسمع منك واصير اديبه
كبيرة كبيرة هالكلمة ونستني الله يونسك بالعافيه يارب
!!
اكبر مشكله ان يكون هناك احساس متصارع في داخلك ...ان تكون عدو نفسك يعني انك لن تحبها بالقدر المطلوب وبالتالي لن تكون قادر على مصادقه وحب الأخر
لابد من ايجاد حل لهذه المشكله
:(
مباراه؟
لا لا ما اتحمل
وكل هذه النصائح منك يا سلام
ههههههه
الله يحفظ لك والديك
ويعينك على برهم
وصدقني مع التعود والحياة في ام الدينا ستكون قادر على تضبيط حياتك ويوم يارب
:)
نوم العوافي

عبدالرحمن يقول...

اسرفتي في حالج يابنت :)

bin3li يقول...

ذكرتيني بلعبة الواوي
عيل في لون في الدنيا اسمه خشبي!!
هذا اللون من اختراع عيال يرانها يوم يلعبون الواوي

بس شو البدلة إللي تبغينها لون الحقد و الغيرة و الحب
و لا علم الكاميرون
بعد بطولة أمم أفريقيا بادية لبسي البدلة و دخلي الملعب
:P

و بعدين لا تسمعين حق أم كلثوم بالليل
تبين تنامين حطي علي بحر
:P

`~MnO YeNSa! ~` يقول...

يــــــــــومج حلو مالج شغل و حلو الكتابة جذي بدون حدود و تفكير احسها عفوية

يستاهلون :***

ZoZOta يقول...

انا بتمزمز بالبوست اليوم
مع اني قريته من البارحه

بس كان لوقت متأخر وماكان عندي القدره على التعليق من شدة التعب

نبلش :)

تصدقين تخيلتج وشفتج وانتي نازله من السلم مع بيجامتج وروبج الثقيل
ودلاغ متين وشكلج جنج كره كبيره مدلقمه

الماسنجر مفتوح هذا اعرفها وايد زين والتمشي بين البلوقات والتكركر والتحلطم آنا يوميا اسويها

:)

ان تكونين صديقة نفسج
عجبني التعبير

انا قلتها لج من قبل
صح؟؟

تدرين احلى الأشياء اللي تنكتب من غير مونتاج ولا تفكير
تكون شفافه ونافذة لروح الكاتب

وتلاقين القارئ يتفاعل معاها اكثر لإحساسه انها قريبه من نفسه

اما بالنسبه للفراغ
فتأكدي مرحلة وتعدي وبترجعين تقولين يازينها من ايام

تعالي انا ليش على بالي لون الغيره البنفسجي؟؟؟

@@

:: :: ::
:: :: ::

اجمل بوح ما يأتي من القلب للقلب يا استكانه
:**

الكلام اللي عقب صعب على ارد عليه او اعلق
بس بقول لج اني احبج وايد
واحب كل الناس اللي تحبينهم

مشكوره على الكلام الطيب وياليت اقدر اسوي اكثر

:********

اليوم كتبتي استكانه
عجبني البوست

ولا تقولين مامو فكره
انتي شاركتينى ليلك يا الشيخه
وهذا اهم شي بالموضوع

فكروني

الله احبها هالأغنية

:**

حياتي هدف مو عبث يقول...

ماشاء الله عليج وصف عجييب

;p

وبالنسبه للنوم أتوقع هذا حال البعض إذا مو الكل

وحبيت كلمة صديقة نفسي

لأنها أحلى صداقه وإتم على طوول

;)

سدرة العشـــاق يقول...

أهم شي راحة البال النومة عدلة ولا معتفسة دام البال مرتاح الحمدلله

و عسى الله يديم المحبة بينكم و يجمعكم بالدنيا و الآخرة على خير يارب

الله يحفظج

:)

غير معرف يقول...

يا صبااح الشراحه والبريداات
لما ادش هالبلوق يلفحنى هواا منعش

:**

يا حلوهم ميزتى الاقرب لقلبى وحبايبى
الله لا يحرمنا منهم ولا من وجودهم بينه

نخش بأااا بلون الغيره
لووووووووووووووووووووول
موتنينى ضحك والله فرااغه اهم شى لون الغيره
ليييييييييييييش
ههههههههههه
مت ضحك اى والله شهالتضهول
هههههههههههه

واااى يا حلو هلايام الى تنقلب فيها نومتج يختج الليل حلوو
اصدقيين مرات استكانه اقول ليتنى اشتغل سستر بشفت الليل على الاقل احس انى اسوى شى اخذ من وراه اجر بدال البلعه والتلفزيون والنت
ولالا تسأليينى لييش سستر
ههههههههههههههه
ما ادرى ليش كنت ابى اطوع واصير سستر
لول

استمتعى وعلييج بالف عاافيه
بس لا تستمر وايد هالحاله ترى ماكو شى يعوض ساعه من نومت الليل

:**

بحفظ الله حبيبتى

كريزماا
من الدواااااااااام

بس مستانسه القبر اجازه
:)))

غير معرف يقول...

كل الشكر على ردج و اهتماماتج على التعليقات السابقة

Eng_Q8 يقول...

ذكرتيني بزماني الجميل

بس في فرق اني اكون بالدوانيه ... وبدال التلفزيون بلي ستيشن


وعلى طاري الالوان عمرج سمعتي بلون فيراني؟؟؟؟؟

يعني رصاصي ... اهم شي فيراني نسبة الى الفار

انا ماادري اشلون تعرف عليه شنو لون فيراني ؟؟؟؟؟

Najmah يقول...

انا بعرف ليش لما ادخل بلوقج وابدي اقرا أسكت كل اللي يمي
وآخذ لاب توبي واروح بداري عشان اعيش الجو؟؟ :)


يصير ايي اسهر معاج؟
:)

الخيلاء يقول...

اخ يا استكانه على شفت الليل و ايامه .. اوخيتج اتموت على الليل .. و السهر ..

بس الحين مع الدوام امارس هالهوس بالعطلات ..

كل شي يحلى بالليل الاكل و الكتابه و المسنجر و الخبال حتى الدموع مايحلالها الا اليل تناجيه و تصارحه مكنونات صدورنا

نصيحه استمتعي بكل لحظه من لحظات الليل ..

انا الحين باجازه و محلله الليل عدل لول


***

اتصدقين انا من قريت لون الغيره على طول طرى علي الاصفر ..

استكانه معقوله ماترفينه ..

عيل ماتعرفين الاسود المزرق و المودماني .. سالي دلي و ملي عنهم ترى عرفتها عليهم لول

***

و في ناس تفهمنا و تعرفنا من نظره اتفجر فها مشاعرنا و تمسح فيها على قلوبنا .. الله يخليهم لنا ولا يحرمنا منهم :)

***

انتي وحده الله يحبج و محبب خلقه
فيج .. و تستاهلين هالصديقات عسى ربي يخليج لهم و يخليهم لج :)

***

دوري بروح ابدي شفتي الليلي :)

Sn3a يقول...

بالعكس
البوست اهو بحد ذاته فكره

وايد عجبني
يعطيج الف عافيه

احلى شي الاشياء التلقائيه

على نفسها جنت براقش يقول...

عندما ينام الجميع تشتر استكانه جنها ينيه



لووووووووووول


ترى فينى شوى اصفر

لووووووووووووول

نسيتى لون

فحمى

اسود كذاب

:)

صقر قريش يقول...

اختي استكانه:

طبعا جاي منعنع لو ابي جاي حليب لما تسوين مدونة تسمينها (بيالة)ذيج الساعه اطلب جاي حليب يله يامعلمه جاي منعنع وصلحوه :)ادري عشان انتي ماتتحملين نصحتج بجذي عشان اول ماتطالعين الا وانتي نايمة :)

someone_q8 يقول...

السلام عليكم

مدام السالفة شفت ليل ولوية خلاص بعينج عندنا بالدوام احسن من اللي يداوم ليل واول ما يدش يعطيها نومه و شكو مداوم مادري !

لو انا منج اروح ادش دورات واستفيد ,
فيه دورات تنباع بالمكتبات طبعا تكون على هيئة شريط فيديو و كاسيت وكتاب بإسم الدورة تلقينهم بمكتبة جرير

وفيه بيت القرآن اذا تبين تتعلمين كل شيء عن ديننا من قرآن الى سيرة الى احاديث الى فقه , ,,,,, طبعا كلامي هذا مو معناته انج ماتعرفين شيء عن الدين !
لكن اللي اقصده انج في هالمكان تكونين مرتاحه اكثر مافيه التزام مثل الجامعة او الدورات
اتمنى لج التقدم في حياتج وفي عملك المستقبلي :)

عــــاشــــه يقول...

عزيزتي

ذكرتيني بأيام الغربه
كنت مثل الخفافيش
حياة ليلية بمعنى الكلمة وأتم لين 7 ويلسه في الصاله من قناة لقناةوالاب توب في الحظن
والكتب حولي ...
والمشروبات الساخنه والبارده على حسب المزاج...
والمكسرات

ومرات أكتب ومرات أناظر النجوم من البلكونه ومرات أسرح

بس والله ياإٍستكانه
الحين على الضغط الي أعيشه أقول ودي أرجع لمرحلة الضياع (أناأسميها مرحلة الضياع)

متعه مافوقها متعه
ورقاد من 7 أو 8 لين 2 الظهر

حياة بارده بس تعلمت فيها أكون صديقه وحبيبه لنفسي وأفهم نفسي وأفهم خارظة تكويني
وإني أبدي نفسي على الغير وماأسوي شي الا الي يريحني ويرضيني

أمتعتيني قبل النوم وأقول جان زين أنا مثلها ,,,,

ههههههههههههه
والله محد راضي بإلي عنده

bin3li يقول...

يقولج صعيدي فهم
مات

و الظاهر هذا ينطبق علي، من الصبح أبغي أفهم شو يعني العنوان ، طول الوقت عبالي شفتي الليل = رأيتي الليل
أثاري طلع مشتق من الشفتات

صار لي 11 ساعة فاهم العنوان غلط!!

اثتكانة
عندي ثؤالين
الثؤال الأول
شو ثر تدليعج الريموت بالريمو(نـ)ت؟
الثؤال الثاني
متى نشأت رقصة الكمة-البردة؟
قبل حادثة بنات الجيب و لا بعدها؟
:P

غير معرف يقول...

صرت أمر على مواضيعج وما ألاقي رد..

حبيت عفويتج..
=)

هنـد}

Peace يقول...

اهم شي انج
تصادقين نفسج

لانه ما في احد يخاف عليج
اكثر منج

مع تمنياتي لج بالسعاده

DiLLi O MiLLi يقول...

ااااااااالله أســــمي طلــــع في بوســـت
لاااااا وعنــــد أستــــكانه
ياااااا حبيبتــــي أنتــي
:*


مشـــكوووورة على هالكلـــمات
اللي تسـرسـح مثل الماي البارد
يروي القلب وينعـش الأحســاس

والله يا أستــــكانة
أن الشعووور متبــــادل
وكلامج هذا أوجهه لج
بـــس
بدون الخيمه
:)


ما كــل غالـي بالقصايد نوفيه
بعض الغلا في داخل* القلب * ذكراه
دايــم لــكل إنسان "ميــزة" تحليه
وأنت بعينـي شي ما ألـحق أقصـاه
الله يطول عمر * قلبك * ويحييه
لشخص يشوفك أنت أجمل هداياه

منقول



هههههههههه
شكلج لابسه الكبت ونازله
أنا نفس جدولج مال الساعه 11 بفارق
أنا ما انزل
شغلي كله بغرفتي
بــس المشاريب لأ
المطبخ تحت ومالي خلق انزل بهالبرد
أنتي صديقة نفسج
وأنا نفسي صديقتي
ههههههههههه
ء(عشان لا يقولون قاعده تنقل كلامها)ء
:)

لاه لاه لاه
كلشي ولا الفراغ
هذا مرض بحد ذاته
أنشاء الله القوى العامله
تدوء-إليك تلافون وتبشرك بالوزيفه يا حبيبتي
:)

وليـــمتى ؟
لما أتوظفين
ما يعدل نومتج ألا الوظيفه
راح أتضبط أوقاتج
ويصير ليلج ليل
ونهارج نهار

وعلى طاري الألوان
أنتي قريتي تعليق الخيلاء عندي بالخيمه
سمعتي لما قالت : دللي
نسيت عندج كوتي الأسود المزرق !!؟؟
بذمتج هذاااا لوووون !!!؟؟
هذاااا كووت زانطينه ومزرق مثلاً
ولا مزرق من كثر طق !!!؟؟




بدوووون فكرة !!؟؟
عندما نترك القلم يترجم المشاعر دون أن نلجمه
يكون أقرب للقلب منه للأصابع التي تحمله
فينثر بكل ما يجيش به القلب من أحاسيس

ولا .. شــرايج ؟
:)


أأأأأأسعدني .. وأأأأمتعني .. وأأأأضحكني
بوســـــــــــــــــــــــتك
وااااااايد أأأأثرت فيني كلماتج فيني
مشــكوووووووورة مره ثانيه




:***

shakshaka يقول...

estekanaaaa 7abeebty sam7eeni 3al g9ooor walla adree ene mga9ra 7ady walhana 3laichhh;* shakhbarich shemsawya? 6ab3an lail7een magarait elpost bas darait enich lail7een galba enoma hahaha:P


miss u ;*

DiLLi O MiLLi يقول...

براقــــش
ذكرتني باللون اللي ينقاله
أسود كذاب !! ههههههه


هـــذا اللون
ذكرني بحسين عبدالرضا في درب الزلق
لما راح مصر
وقال : "باجر بنروح القناطر الخيرية
شنو قناطر خيرية !!؟؟ يعني بعد فيه قناطر شريّه !!!" هههههههه

أسود كذاب !!! وأسود صاج !!ههههههه
أسود كذاب يعني : يقول عن روحه أسود بس أهو مو أسود مثلاً !!؟؟
أنزيين أموووت أعرف عيل أهو أي لوون !!؟؟ هههههههه


فيه أبيض كذاب !؟
تروالي الجواب يعرفه
مايكل جاكسون

:)

أشسويتي فينااااا يا أستكانه
قمنا أنألف ألواااان !!؟؟؟
ههههههههههه



:)

5roofa يقول...

لوووول بوست روعه

امبي تصدقين تي عرات انا بعد اضحك بروحي و اعفس ويهي و انا شابكه

و تي اختي حمدالله و الشكر انتي مينونه

يااااااربي مايخلون احد ياخذ راحته حتى بويه لوول

يه يه خوش شغل علميني يا معوده شلون اسوي اي شي بالمطبخ تره افشل حديي
الجاي عندي شفااف و النسكافي بعد مالداعي اقولج النسكافي شيسوي فيني لووول

الاوان تصدقين صج والله في الوان غريبه المره الي فاتت رحت السوق ولا اشوف لونه اخضر
جان تقولي هيدا شقري

قتلها شقري شيطلع؟
جان تقولي يي شو بكي هيدا لون الشقر

يعني الشجر

مالت على الباميه و انا ليش اسمي اخضر لوووول

مشكله والله
:P

سوالف حلوه من بنت قلبها احلى

ربي يهنيج و يسعدج و يفتح عليج كل طريج يااارب

salamz sweetee...

charisma يقول...

استكانه بوسع صدرى عندج
تذكرت الالوان الى بقاموس العايله يدتى وخالاتى
اخذى

لون الجاى حليب
لون الفستقى
لون المطوولس
لون المدووعم
لون الحشيشى
احمر الرمانى
بنفسجى محتقن
ازرق نيلييي

هذا الى يحظرنى وما خفيه كاان اعظم
وتصبحين على خير
:**

الخيلاء يقول...

احم احم ..

جني اشم ريحه طنازه على كوتي هني .. انا اقول جنه مو متاكده :P

Selezya يقول...

ههههههه تصدقين نفس الحاله بالضببطط ماكو أي اختلاف :) انا من عطلة الصيف اللي طافت وانا قاعده بالبيت لا شغل ولا دراسه :) قالو عني فاره بس بالليل اقوم ويلقون الصبح المطبخ عفيسه ومفتكين مني صالتي بغرفتي حاطينكل شي عشان ما اطلع بره واذيهم ههه شفتي شلون صرت فاره ومزعجه ومخربه كل هذا من الفراغ


في الوان قلتيهم صراحه ماعرفتهم والغيره هذا بعد توني ادري عنه مشكورة على هالمعلومه العالم الحين ما قاموا يفهمون الا بهالالوان


وكل البنات اللي ذكرتيهم حلووين واموورات والله لا يحرمنا منهم انشالله

وانتي احلانا بعد شرايج لوول وبعدين وراج انا :p
j/k

:)

White Wings يقول...

مرحبا استكانة
كنت زايرة بعفس المدونة عندك غيرة على المملوحة الكويتية، صديقتي العزيزة
:)
بس كلماتك أسرتني، وقصة سهرتك اليومية ستبدأ صداقة بيننا على ما أتمنى
الله لا يخليكم من بعض، تراني أتغشمر
:)

فريج سعود يقول...

واحنا شخرب حياتنا الا شفت الليل
هني الوحدة تحلى والتفبكر يصفى ويصير لونه
ليلكي
:\

bo rashed يقول...

هلا باخيتي استكانه نطريني شوي اشرب جويهتي واعلق
:)
يا سلام خوش جويهه نبدي الحين تصدقين انا حالتي من حالتج سهر بهالليل جني يني
بس انا بدال لا اشرب قهوه واسمع ام كلثوم اروح القهوه وادق ناي مع الشيشه وبر وبررر تقول اقزوز مع الدخان
لووووول
وعللى طاري الالوان انا احب الفلفلي وايد يعجبنب خاصه لي صار مع دشداشه كركميه مع قحفيه موف وغتره عسليه
لووووووووول
والله ان الدشه عندج تشرح الصدر وتوسع
البال المحتاس الله يحفظج من كل شر ويعدل نومتج ونومت كل سهران قاعد يكوكس مع افكاره
:)
تحياتي

esTeKaNa يقول...

عبدالرحمن
~~~~~~~~~
مؤثرة الكلمة اكثر من ما تتصور
مؤثرة لدرجة انها تخزنت في ذاكرتي
:p~
أنا اقول لا تسرف في حالك يا بو بدر
:)

esTeKaNa يقول...

بن علي
~~~~~~~~
لا لا
انا الحين بخاطري جاكيت لون خشبي
البسه معه جينز
تهقه بيكون حلو؟
:Pp~
ودي البسها وادخل الملعب
بس اخاف الناس تخلي المباراة وتطير عينها فيني
واصير مشهورة
وانا يا بن علي اتحاشى الشهره
:)
بحر؟
امممم
يبيله
لان ام كلثوم لاعبه لعب هاليومين وياي
:)

esTeKaNa يقول...

MNo yNsa
~~~~~~~~~~~
حلت دنياج قولي آمين
كله اقول بسئلج وانسى
ليش نكج منو ينسي؟
:)

esTeKaNa يقول...

ZozoTa
~~~~~~~~
هني للبوست اللي بتمزمزين فيه
:)
هلا بالزين كله
هلا بالطيب والحنان


كبيرة مدلقمه
هههههههههه
تينن الكلمه حسيت ياهل مال تقرص مو انا
:Pp~
عبالج لون الغيره بنفسجي؟
يمكن ما تغارين
!!
وانا اشك في ذلك
لانه اللي يحب لازم يغار
مممم
يمكن ما تعرفين لغة الألوان نفس حالتي
:)
انا اشهد ان اجمل بوح هو الاكثر عفويه وصدق...من القلب الى القلب دائما

أحبك الذي أحببتني فيه
والله لا يحرمني من وجودج الجميل والراقي في حياتي
ديري بالج على نفسج
وارتاحي مني هاليومين
شوي وراده لج
:**
فكروني ازاي؟
هوا انا نسيتك
:)

ولد الديرة يقول...

دايما يراودني امل ان نثمن الكويت و نشتري قسيمة كبر الكويت في القطب الشمالي علشان يصير عندنا ليل 6 اشهر

بس المشكلة في ال 6 اشهر نهار اللي بتيي عقب

وين نولي

احلى شيء بالبوست ان عندكم كابتشينو

:)

لون سيارتي سابقا بني و صدمني صديق لما قال لي ان لونها بيدياني

كرهت السيارة عقبها لأني قمت اتخيل ان شكلها وانا اسوقها جنة كرتون من كراتين خضرة المزارع الكويتية

مرتي كرهتني من قز البلوغز

كل الشكر :)

esTeKaNa يقول...

حياتي هدف مو عبث
~~~~~~~~~~~~~~~~~~
عجبج الوصف؟
اصلح اصير حبابه واقص قصص؟
:))
اي والله احلى صداقه
واكيد بتم على طول
لانج مهما تهاوشتي ويا روحج
ما ردج لها
:)

esTeKaNa يقول...

سدرة العشاق
~~~~~~~~~~~~~
هلا بسدرة العشاق هلا
هلا يا حلوة الاوراق
يا رقة الاحساس
اشرايج فيني وانا ااهلي وارحب فيج؟
:))
صاجة والله
أهم شي راحة البال
عسى ربي يريح بالي وبالج وكل من نحب
الله يسلمج ما قصرتي

esTeKaNa يقول...

كريزما
~~~~~~~~~
هلا بالطش والرش
:*
انا الله يسلمج رافعه كل الستاير
وفاجة الدرايش عشان يصير في تيار هوى على كبر البلوق
عسى بس ما حاشج هوا؟
:))
يستاهلون الغالين
ما قلت شي زود
هذا اقل شي ينقال فيهم
نخش على الألوان
هههههههههههههههه
عبالج شويه لون الغيره؟
ترا قتال على قولة مملوحة
وما ينلبس الا اذا كلش الغيره عامله عمايلها
:Pp~
سستر؟
واي ما اصدق
ههههههههههههههه
تخيلي راحة دار الشفا
الا طالبين سسترات
وموظفات يردون على التليفون
وما اقص عليج فكرت
بس في واحده زفتني
سستر
اخرتها سستر يا استكانه
هههههههههههه
وشكيت روحي بس اشوة ردت روحي يوم قريت انه انتي بجلاله قدرج فكرتي بهالشي من قبل
:))
وي يا زين اللي توسع صدرها عندي
اشهالألوان؟
وين اويلللي وبنتون عنكم؟
ههههههههههههههههه
مطولس يعور القلب
ليش ليشش
!!
انا يدتي عندها لون صتي
اهو ظيييم شوي
بس يعني تقدرين تقولين رمادي
على اسود جذاب
اييب القامت

لوووول

esTeKaNa يقول...

Anon.
~~~~~~~~
لا تشكريني على واجب
انا اللي اسفه على التأخير
واتمنى طيبت الخاطر
:)





eng-q8
~~~~~~~~~
مادري ليش ما عرف اندمج ببلاي ستيشن وهالسوالف
!!
فيرااني
واااااااااااااي
لون يضيق الخلق
رصاصي؟
يا سلاااااااام
يبيلك دشداشه فيرانيه
:p~

esTeKaNa يقول...

Najmah
~~~~~~~~
أسهر معي ليلة
حاول تحس بلوعتي ليلة
عد النجوم شكثرها
ياللي بقلبي كثرها
:))
ويا لييييتج يا نجمه ساهره وياي
اقولج باحساس قلبي
وتكتبين لي قصايد
تعاون مشترك راح يثمر اروع الكلام ولا شرايج؟
:))
يا بختي والله بللي بتعيش الجو وياي
عيشيه
وخلي الكل وياج يعيشه
:*

esTeKaNa يقول...

الخيلاء
~~~~~~
هلا وغلا بالخيلاء
هلا بام كوت اسود مزورق
يختج لا تلبسين هالكوت فتنه فتنه
بعدين شيفكنا من المعجبين ها؟
:))
وااااي يا بعد روحي انتي
كلامج عور قلبي
الله يسمع منج واكون ممن احبهم رب وحبب خلقه فيهم يارب
!!
وعاشت اللي بدت الشفت الليلي
اذا بغيتي اشي شي بانصاف الليالي
لا يردج الا لسانج
انا عندي خفاره ليل
:)

esTeKaNa يقول...

sn3a
~~~~~~
يامسا السنع كله
الله يجبر بخاطرج قولي آمين
:)









على نفسها جنت براقش
~~~~~~~~~~~~~~~~~~~~~
تكركرين ها؟
انا الحين في وضع الينيه
والمشكله وراي سفره الصبح
الحين ينيه
وباجر اقط راسي يمين وشمال
:)
فيج اصفر؟
خلج على الاصفر لا تقلبين لون الحقد
ترا صعب اللون
هههههههه

esTeKaNa يقول...

صقر قريش
~~~~~~~~~~~
معلمه عاد؟
ههههههههه
شكرا للنصايح الثمينه
:))







some0one_q8
~~~~~~~~~~~~
وعليكم السلام ورحمة اله وبركاته
والله ودي
بس الوالد حجر
ماعندنا بنات يداومون نص الليل
الا اذا تبي ابوي ينومني بره السكة هذا شي ثاني
:))
شكرا على النصيحة يا اخوي العزيز
وبالعكس..اقدرها وفاهمتك والله
انا كنت في دار القرآان
بس خلصت دورتي
احتاج دورة جديده
الله يوفق الجميع

esTeKaNa يقول...

عاشة
~~~~~~
هلا بغلا الامارات كلها
هلا بالوزيره عواشه والله
:)
عاد بالغربه حياتهم تنتهي بسرعه
انا اذا سافرت غصبن علي انام مبجر من الملل
!!
يا بعد قلبي يا عاشه
انا اشهد انج مضغوطه حيل
بس لنفسج عليج حق
ريحي
لا مرحله ضياع
ولا عاد هالتعب اللي عايشه فيه

الله يا عاشه حلو هاالتعبير وايد
خارطة نفسي
!!
سنظل طوالالعمر نبحث في هذه الخارطةونعييش من خلالها
ههههههههه
اي والله ماحد راضي بشي
الله يهدينا بس
:))
نوم العوافي يا الغالية
:*

esTeKaNa يقول...

بن علي
~~~~~~~~
LOOOOOOOOOOOOOOOOOL:))
واي ما اصدق
!!
تميت كل هاللوقت تفكر بالعنوان؟
اسئلني ثؤال
قولي شنو يعني هالعنوان
والله راج اجاوبك
ولا اخليك بهالعذاب
:)
جواب الثؤال الأول:
بدلية طوفها
:(
الثؤال الثاني:
ههههههههههههههههه
ههههههههههههههه
لا والله توني متعلمتها من مملوحه
واذا تبي شرح مفصل
تقدر تلقى الشرح عند دلي
هههههههههههههههههه
صج ضحكتني
:))

esTeKaNa يقول...

هند
~~~~
أتمنى ان لا يكون عدم وجود رد لانه البوست مو حلو
!!
حبتج العافيه يا صديقتي
:))




PEACE
~~~~~~~
عدل كلامج
اجمعين يارب
:)

esTeKaNa يقول...

Dilli o Milli
~~~~~~~~~~~~~~~
هلا هلا
وسعو المكان يا جماعة
شيخة البلوقرز مسيرة علينا
:)
وي يا زينج ويا زين كل كلمة تقولينها
بس بس ما نبي نتحلى على بعض
وتدلليني وادللج
نخلي الاوادم تطير عينها
يصكونا عين
نتهاوش
بس بس
هههههههههههههههه

انا احب قعدة غرفتي
بس يختج احب الحس
تلفزيون
اخواني يسرون من الدوانيه نص الليل
يعني اشرح لي من داري
واذا مالج خلق تنزلين تحت
ناديني
انا اسوي لج روم سيرفس
:))
الله يسمع منج ويدقون علي
احس صرت وقف خيري
لو يقولون لي انتي خريجة شنو
اقولهم معهد موسيقى
افتر راسي
:Pp~
كوت الخيلاء؟
هذا غير نمونه
سكتي انا قلت لها لا تلبسينه
فتنه فتنه
هههههههههههه


تقولين شرايي؟
انا سرحت بالفقره بالذات
ابداع يا دلي
عطي احساسج فرصه يكتبج وخلينا نتلذذ بهالابداع
:)

حياج الله
تنورين بوست ورا بوست
:*

esTeKaNa يقول...

Shakshaka
~~~~~~~~~~~
البعد هو بعد القلوب
لا ما تباعدنا الدروب
الدنيا ما تغير وفي
مهما في مشاكلها نتوه
:*
حبيت اكتب لج هالجم بيت
واقولج مامنج يا الغاليه قصور
ولهانه عليج واااااااااااايد
وولهانه على سوالف تالي الليل الناطعه
:*








dilli o milli 2
~~~~~~~~~~~~~~~~~~
hahahahahhahah
hahahaahahahhahaha
:))
واي كركرت من صجي
حتى حسي طلع
اي والله
وليش بتجذب علينا يالاسود؟
اي حدد موقفك

وقناطير خيريه ها؟
ههههههههههههه
على فكرة
باجر الصبح انا بديرة القناطر الخيريه
ما تامرين على شي؟

esTeKaNa يقول...

5roofa
~~~~~~~~~
هلاو هلاو خروفتنا
واي جنج انا ويا تعبيرات الويه
!!
امي كل ما شافتني مشتطة
قالت الله مجابله هالصنم وتضحكين؟
الله يخلف على اميمتج
تعبت عليج واله
ما هقيت اخرتها تستخفين
هههههههههههههههههه
وافا عليج
انا اسوي لج دورة حق هالخرابيط
جاي
نسكافيه
وحلو بعد
:p~
شقري؟
هاو
انا عبالي اشقر لوووووول
اخاف شذري بس
!!
يا بعد قلبي ..حلا قلبي شي قليل مما عندج والله
:*

esTeKaNa يقول...

charissma
~~~~~~~~~~~~~
نسيت اقولج
الجاي حليب يعني ابيض وسخ؟
في لون امي تسميه ابيض وسخ
لووووووووووووول
وبعدين علامه البنفسجي محتقن
واااااااي
يعني تفنن في وصف اللون بالضبط بالضبط









الخيلاء
~~~~~~~~~
لا ية تعوذي من ابليس
اهم بس يقولون شايفين عليج كوت يالله من فضلك نااااااااازك
بس هذا اللي قالوه
!!
وي اخاف احد شايفنا نشعر
ونغن
ونرقص ذاك السامري وينضظلنا
:pP~

esTeKaNa يقول...

selezeya
~~~~~~~~~~~
واااااي
أخيرا في احد نفس حالتي
تعالي نامي عندنا
:Pp~
عسى بس عرفتي الألوان؟
باجر اذا قالو لج لبسي بدله غيره
تعرفين اي لون
شفتي اشلون انا خوش بنيه قاعده افيدكم؟
Hheheheheh
يا بعد قلبي انتي ما عليج زود

esTeKaNa يقول...

White wings
~~~~~~~~~~~~~~
ياهلا يا هلا
انا شفت هاللي مجبله من بعيد لابسه ذاك الفستان اللي لونه لون الغيره
!!
بس اشوف الفستان انقلب لون الصداقه جنه
:Pp~
انتي بس جيكي على فستان ها ولون الصداقة
Heheheheheh
والله هذي الساعة المباركة نورتي البلوق كله
ولا طاب لج المكان عاودي
نشيلج بعيونا والله
:)

esTeKaNa يقول...

فريج سعود
~~~~~~~~~~~~
إي والله
إي والله
اقراها بلغه سعد الفرج وهز راسك
ترا قاعده اكتب الكومنت واسوي نفسه
:D~
التفكير يصفى انا اشهد
بس الوحده تحلى؟
مو كل مرة وانا اخيتك
ساعات تتعسر منها
:)

esTeKaNa يقول...

bo rashed
~~~~~~~~~~~~
ياهلااا
يا مرحباا
هني هني
اي اشربه لا يصير حاجم
هذا جاي ورق بسرعه يغمج
:))
تروح القهوة بنص الليل؟
والله يا هنيالك وعليك بالعافيه
طبعا قصدي طلعة الليل
مو البررررر برررررر
اهم شي المؤثرات الصوتيه
ههههههههههه
يعني حسيت الكومنت فيه نقل حي ومباشر
من موقعك الي مدونتي
:Pp~
دير بالك على صدرك يا بو راشد
لا تضره بهالشيشه وانا اخيتك
:(
دشداشه فلفي وكركمي
وقحفيه موف
وغتره عسليه؟
لاااااااااااا
هذي حفلة تنكريه
هههههههههه
لا لا
انا هالمموديل وهالالوان تاخذ القلب عاد ولا الموف
اوووو...غير نمونه
:))
وي يا عل صدرك دوم منشرح وفرحان
والله جنك تدري
الافكار اول اللليل تكوكس
وبنص الليل تستهبل
ومع اذان الفجر تسوي وقوف على الراس
يالللله سترك
:)
اميييين واجمعين يارب
يالله عاد اهووو رد البيت
بسك من برررررر برررررر
:pP~

esTeKaNa يقول...

ولد الديرة
~~~~~~~~~~~~~
يه يه يه
ولد الديرة
بتثمن الكويت كلها؟
هذا يبيله درب زلق ثاني بس عشان يقولون لنا عن هالحلم اللي يرادوك
:Pp~
ياز لك الكابتشينو؟
ترا متعوب عليه
واسوي موديلات بالكاكو لما ارش فوقه
ادلل روحي وزوار مدونتي العزيزه
:))
واااااااااااااااااي
الله يسامح صديقك
انا جذي
البيدياني يخليني اشم ريحة بيديان اصلا
اشوة انها سيارتك سابقا
!!
ولد الديرة
نتمنى تنسيق وقت قز البلوقات عندك
حفاظا على مشاعر المدام
ترا اهي الخير والبركة
:)

|:| DUBAI |:| يقول...

استكانة .. أم بشت أسود

كيف حالك؟

LOOL

أيوا أيوا .. أحلى شيء شفتات الليل

خاصة يوم البيت فاضي رقود كلهم و أنتي بس واعية

المزاج على سنقة عشرة

و البطن يتقبل كل شيء

و تمرين الاصابع على الكنترول ..الله أكبر ماشاء الله شغال

: P

و تحسين الحياة حلوووووووووووووووة

و من تحطين راسج ما تفكرين في شيء

و لا هم في قلبج

يا ربي لازم كل بوست اقولج البطالة نعمة

خخخخخخخخ