الثلاثاء، يناير 08، 2008

تحلطم

(إهداء)
~~~~~~~~
ازعلي وارضي على كيفك أنا ...مثل ما ودك تلاقيني حبيب
واجرحيني ألف مرة بالهوى...تلتقيني مثل ظلك ما أغيب
~~~
صدقيني إنتي من نفسي ولي...أذكريني بس تلقيني قريب
مثل عينك للنظر لرموشها...مثل روحي لي وغيرك لي غريب
~~~
ناظريني بنور قلبك واسرحي...ظنك المشتاق ما والله يخيب
الهوى أنتي وأنا راعي هوى...والهوى لو تعرفي قسمة ونصيب
~~~
كملي المشوار يا روحي معي...جددي جرحي اذا جرحك يطيب
واحلمي لي ضاقت أحلام الهوى...يا عسى نفرح وأحلامج تصيب
~~~
هذه الكلمات إهداء مني لقلبي
ولكل قلب بنت يقرا هالكلمات
وبس
:pP~
.
.
.
.
وبعدين ويا قلبي؟
اذا ضايقني شخص ما أبحث في قلبي عن رصيد له
ان كان له رصيد مواقف وذكريات وحب عميق
أجد نفسي دون تفكير....أسامح
المشكله
!!
أني هاليومين اسحب من رصيد من لا رصيد له
ما زلت ارضى
واسامح
لست ملاك
!!
بس ماني عارفة ازعل
مشكله من لا يزعل مشكلة
فمن حوله يعتقدون انه بو خبه
يزعل شوي ويرضا
وهذا انا...ازعل
اصرخ بو صرخة صرختين
ارقع الباب
وافكر واتوعد وبسوي وبسوي
دقيقتين وارجع بروحي راضيه ومراضيه روحي
وبعدييييين؟
.
.
.
أحيانا ندخل في حوار طويل
قاسي
نتبادل الاتهامات
ونتحاسب على اقل التفاصيل
نهشم ذكرياتنا الجميله
وتبعدنا ظنونا القاسيه
وربما...كنا نستطيع اختصار كل تلك الجروح بكلمه
بمبادره جميله
بجبر خاطر
ولكن...تبعدنا عزة نفس
وكبر على الاحساس وكل شئ جميل
نفقد بعض بلا داعي
!!
يا بنت ياأستكانه
لا تستنفذين كل مشاعرج
ولا تحرقين قلبج وروحج على زعل ناس ما همهم زعلج
!!
يا استكانه يا خدايو
مو شرط توضحين مشاعرج
ولا شرط تشرحين وجهة نظرج ورايج
دام رايج ماهو مهم
!!
ولا شرط يشوفج الكل زينه
ولا شرط تكونين طول الوقت رايقه
!!
كافي تكونين بعين أبيج شيخة كل البناات
كافي تكون أميمتج راضية عنج
كافي تكونين انتي انتي
بصدقج
باحساسج
بروحج
وبقلوب الناس الطيبه اللي حولج
اللي يحبج...مسيره يرد
واللي ما رد...خيرة رب العالمين ببعدهم
!!
.
.
الحين
وش تسوا كسرة خاطري؟
.
.
.
ترا أنا معصبه على نفسي
!!
.
.
.
تعرفون احساس الطفل اللي حبوه
ولعبو معاه
ووكلوه
وحتى الدلال دللوه
!!
وعلى غفله
طلعو من باب خلفي وخلوه نايم
فتح عينه لقاهم سافرو وخلوه
يزعل بصمت
!!!
لما يردون يحبونه ويلمونه يلقى نفسه ساكت
خانقته عبرة ألم
زعلان
رغم انه ياهل بس زعلان
وزعله مخليه ساكت
بس يناظرهم بعيونه
انا قلبي اليوم هالياهل
!!
.
.
.
بعد اشفيني؟
مافيني شي
بروح ازين كيكتي الجميله
يا عسى تزين حياتي وحياتكم
واتعوذ من ابليس واتبدل
واروح ازور صديقتي
!!
ان شاء الله ارجع مساء وانا مزاجي رايق مو زعلانه على نفسي

هناك 44 تعليقًا:

غير معرف يقول...

غالباً عندما أقرأ ما تكتبين ..

أشعر بأنك تتحدثين عن قلبي .. عن ما امر به ويمر به كثيرون غيري..

مشاعر .. تجول بخواطرنا واحاسيس تملأ كياننا ..

ونجدك تسطرينها..

تعجبني كتاباتك ومواضيعك جداً..

أول مره جدني أرد على موضوع تطرحينه..

بانتظارك..

أختك.. هـند

joy يقول...

يا قلبي قلبج يا استكانة

ماشالله عليج

احاسيسج مرهفة ورقيقة

وماقلتيه اهوا عين العقل شيهمج ابهالناس دام ربج ثم امج وابوج راضين عنج

وانتي صج كسرتي خاطر نفسج وكسرتي خاطري ولكن كلنا كننا هناك وكلنا ايحوشنا هالاشياء
ولكن شتقولين لا حول ولا قوة اللا بالله
واكثري من الاستغفار تنسين الهم وتنسين الغم

وتحسين انج مع ربج وكل شي ثاني ما يهم


احبج في الله واتمنى ان تقبليني اخت في الله تشكينلي

qesat_5ayal يقول...

ما رجعتي
صارت الساعة 10

يمنع التجول بعد الساعة 10
لرقيقات القلوب
:P


ان شاء الله تستانسين
وأحلى شي أنج مسوية كيكة
شوقتيني بسوي كوكيز
:)


نسيتي الموضوع ولا بعد؟

tweety يقول...

أول شي
كل عام وانتي بخير وحب ومزاج ولا أروق منه
إش هاللوك اليديد ! حده يشوق الجاي ويا النعناع :)

والله ودي أنصح بس أنا من هالناحية نفسج للأسف أحيانا أحط إعتبار حق ناس ما يسوون وأخب عمري عالفاضي في الوقت اللي المفروض انقدر فيه نفسنا أكثر من تقديرنا للآخرين

تذكري اشكثر إنتي مميزة وفي ناس يحبونج ويتابعونج ويقدرونج حتى رغم عدم معرفتهم الكاملة فيج ومن هذا المنطلق حبي روحج جدا واعتبري نفسج دميتك المفضلة أو طفلتك الأولى أو صديقتك المقربة فاعطي مشاعرك الأولوية وإلتمسي دوما لها العذر ودلليها واعملي على سعادتها لأنها تستحق بل أكثر من يستحق

vancouver يقول...

مشكووووووووووووووووووووره على الاهداء
وايد عدل المود عندي



استكانة وصفج حق قلبج
كسسسسسر قلبي


شنو ياهل ويتعلق
باللي يحبهم
ويكشتون فيه
ولما يرجعون
يتشره بصمت بعد عمري

شنو شنو لييييييش تسوين جذيه

واااااااااااااي
ما اعبر انا
ترى
:\

Eng_Q8 يقول...

كلمات جميله

وانشالله مزاجج دوم رايق وما يعتفس :))

7osen يقول...

صباح الخير عزيزتي

حلو البوست كالعادة


إنتي بسرعة تسامحين لأنج إستكانة

إذا ما سامحتي ماتكونين إستكانه

:)

حلو وايد تشبيه القلب بالطفل الصغير
ومتقن

هنيئن لكِ بهذا القلب

ومالج شغل باللي ما يستاهلون
هذولي مشكلة كبيرة
لما تسامحه على باله إنك محتاجله أو ماتقدر على زعله

مشكلة هالأوادم

وبالعافيه عليج الكيكه
هالأيام صايره شاطره تسوين شغلات حلوة
شنو السر ؟

أكيد من الفراغ والبطالة
:))

تحياتي على هالبوست إللى خليتنا نشوف فيه كلامج مع نفسج

أتمنالج يوم سعيد

lawyer يقول...

ليششششششششش
احس ان اناااااااااا

هذي انااااااااا
هايه في نفس الاغنيه كلا منج

و ققققققققلبي

قلللللللللللبي
مشلوووووووووووع يا استكانه


ابييييييه الرصيد صار مكشووووف
من كثر ما يسحبون منه
و ادورلهم اعذااااار

الف يمين يسااار

اقلب ارشيفي
يمكن لهم مراااااا سامحوني فيه
خنسااامح الحين


استكااااااانه والله مو ضعف مني ما ازعل
بس هذااااااا حبيبي
اشلوووووووون اتغلى
اشلون يطاوعني قلبي و ازعل

اشلوووووووووووون و اشلون
روووووووحي


احد يزعل من روحه

ما يهوووووون
ماكو شي يهوووووون


عبدالرحمن بن مساعد يقول

سيد جروحي شمسعمري و ظلي البعد طول و الخطا منك واضح
اذا غروووووورك يمنعك تعتذرلي

لا تعتذرلي قووووول اسمي و اسامح
!!!


اناااااااا جذي

ابيييييه انا جذي

بسسسسسسسسسسسسسسس صكيت راسج صح؟؟


تصويرج للياااااااهل يقرف القلب

بالظظظظبط

اشلوووووووون يعني اشلون
دللوني
و عطووووووووووني

و طمعوووووووووووني

بعدين يهدوووووني؟؟

حق منوووو؟؟
و ليشششششش

اشلون اهون

ماني حمامه بييييت تنباع و ترد
عندي وفا و ماني جليل الذات
لكن ارد لا ما اررررررررد


هممممممم
لا هوووووونت استكانه

لاني اصلا ماطلعت عشان ارد



احببببببببببببببببببج

اتعرفين تقوليني و تقولين الي في بالي

ZoZOta يقول...

قولي لي انج احسن اليوم

وانا خاطرج طيب

وانا قلبج ماهو زعلان لم الحين

:(

كله من لوير

قالت لي اقري شاتبه استكانه

ضاق صدري لضيقتج يالغالية

:**

سدرة العشـــاق يقول...

بعد قلبي قلبج حبيبتي والله

يارج الله

و سوي مثلي سوي خير و قطيه بحر و أجرج على رب العالمين دام ربج و اميمتج و ابيج راضين بس اهما رضاهم بالدنيا و عسى الله ينولج مرادج و يرزقج باللي يحس فيج و يخاف اللله فيج حبيبتي

:****

78o8eYa يقول...

يسعدلي مساج
وتسعدلي صباحاتج
وتسعدلي أوقاتج على مر الأيام

:**

الحال من بعضه يا وخيتي
وما باليد حيله
لأني اقتنعت
إن الطيب ما يتغير لو مهما سوو فيه
ان ما شالتهم عينه
بيحضنهم بقلبه
..
وعمره الطيب ما راح يكون
عيبه
..
ربي يحفظج ويرزقج أحسن مافي غيبه
:*

مشكوره على الكلمات الروعة بالبداية
وشدعوه يعني ما نذوق شوي من الحلو
من ايد الحلو
;D
بالعافيه على قلبج
وناطرين نسمع الأخبار الطيبة

:*

darkness يقول...

مساج الله بالخير يا ستكانه

بت يا سكيننه

انتي يا بت

ايه ده كووولوو!!؟؟؟

يا ستكانه امبيه امبيه امبيه

شنو هالتشبيه

خنقتني العبره

:"(

تعوذي من بليس

ما فيج الا العافيه ان شاء الله

كلنا نقول بنتغير و بنصير قاسين بس قلوبنا ما تخلينا

عموما اتمنى لج كل السعاده و الراحه

و مشكوره على الاهداء

New Bride يقول...

waaaay taahbleen ya estakana zooga walah o galbich abyaath

فريج سعود يقول...

عليج بالامريكانو وقطعتين رهش ويصير مزاجك عال العال وادعي لي

حياتي هدف مو عبث يقول...

رضى الله ورضى أمج وأبوج
هذا المهم
والباجي مو مهمين يرضون إذا إنتي تدرين ان اللي تسوينه صح واهم ما عاجبوهم

بمعنى .. ليرضى من يرضى وليسخط من يسخط دام رب العباد راضي عنج :)

5roofa يقول...

:"""((

انا زعلت

امبي استكانه والله احس اني نفسج

هالايام وايد قاعده انهان و كرامتي ابلارض الله وكيلج

الله يعطيج القوه و يمسح علعلا قلبج حبيبتي


طمنيني علييج سويتي

salamz sis...

الخيلاء يقول...

مساء المزاج الرايئ.. شخبارج مزاجج اليوم ان شاء الله تمام :)

و دام امج و ابوج راضين .. ترى هذيل راس المال ولا الباجي الي بيرضى و يبج مثل ما انتي حياه الله و الي مايبي درب السلامه :)

و ساعات انكدر روحنا على ناس احنا اخر همهم .. فا مايسوى يكونون اول همنا ..

و مشكوره على الاهداء الرقيق برقه صاحبته ;).. شكله مسيو حلتيت مسوي الهوايل لول

esTeKaNa يقول...

هند
~~~~~
قمة الانجاز الذي قد يسعد قلبي في كل حالاته ان يصل احساسي لك
ولكل من يقرأ كلماتي
شكرا لك
ردك الأول افرحني
وبانتظارك في كل وقت
وفي كل بوست
:)







joy
~~~~
يا زين كلامج والله
وفعلا الاستغفار شي عجيب
ومفعول سحري
ذكرتيني...عسى الرحمن يذكرج بالشهاده
وأحبك الذي أحببتني فيه
يزاج الله كل خير
يا اختي العزيزه والغاليه
:**

esTeKaNa يقول...

qesat-5ayaL
~~~~~~~~~~~~~
hehehehe
تصدقين وصلت البيت عشر ونص وشي
امي عطتني زفه معتبره
بس شسوي ما تحلى السوالف والضحك الا اخر شي
:)
والله ما نسيت
بس وايد احسن
:*
تسلمين لي ما قصرتي








tweety
~~~~~~~~~
وأنتي بخير وصحة وسلامة يا الغاليه
يا زين هالبوست اللي تطلين فيه
صج استانس لما اشوف ردج ووجودج
:*
ما تتخيلين شكثر تأثرت بكلامج
اني اكون الدميه المفضله
والصديقه المقربه
وطفلتي الأولى
اول مرة افكر جذي
!!
شكرا ..لانج اوحيتي لي بطريقه جديده للتفكير بنفسي وحبها
:)

esTeKaNa يقول...

vancouver
~~~~~~~~~~~
واي تر انا ما اسوي
انا اقول شي احسه
اشوف قلبي بالصورة واله العظيم
شفتي كسرة هالياهل
كسره بمعنى كسره
قهره على نفسه
وسكتته سكته واحده
!!
أحس هذا قلبي بالموقف اللي مريت فيه
شسوي؟
راضيني
عطيني مليون
:Pp~











Eng-q8
~~~~~~~~~
شكراا:)

esTeKaNa يقول...

7osen
~~~~~~~~
يا هلا ويا مرحبا
اشفي المزاج هاليومين عندنا وعندك؟
:(
اي والله يا حسين لو ما اسامح ما اصير استكانه
يمكن اكون فنيال
:pP~
عسى ربي يجبر بخاطرك مثل ما جبرت خاطري بكلامك الحلو
:)
شكرا من قلبي
والكيك ملاحظني؟
صايره احب المطبخ
بس والله واله
لفراغ ولا غير الفراغ
خله يطلع بالمطلخ ولا شي ثاني
:)













lawyer
~~~~~~~~~~
هذا صكة راس؟
هذي فضفضه قلبج اللي احبه
وما يقدر احد ما يحبه
:)
هذا شوي وللحديث معاج دايما بقيه
بقيه طويله
ممتعه
مجنونه
بس في مكان اخر
:Pp~
تحبيني؟
انا بعد
احبج كثر ماكو كثر
:))

esTeKaNa يقول...

ZoZoTa
~~~~~~~~~
يا ضايق الصدر بلله وسع الخاطر
دنيانا يا الزين ما تسوا الضيقه
:**
الحمدلله انا بخير
دام قلبج
وقلب لوير
والناس الطيبين اللي مثلكم معاي
:))









سدرة العشاق
~~~~~~~~~~~~~
ليش ضحكتني كلمة يارج الله؟
:)
حسيت روحي مهوله كل اللي فيني
بس صج كنت متضايقه
وتعليقج يبرد القلب
لا مو يبرد القلب
تعليقج حنوووون
تدرين انج حنونه؟
ربي يهنيج ويهني فتى الجبل
:*

esTeKaNa يقول...

78o8eya
~~~~~~~~~
هلا بالقلب الطيب
هلا بالحنان والسنع كله
هللا بلي مشتاقه لها وايد
هلا بالاحساس والفرح كله
:*
اي والله وانا اشهد ما يتغير
بالعكس
شي فيه يزيد ويزيد
امين واجمعيييييين يا الغاليه

افا عليج بس
انتي تتدللين
قريبا قريبا
لازم نتشاوف ونقعد قعده حلوة مثل قعدتنا ذاك اليوم:**








darkness
~~~~~~~~~~~
مساج الله بالنور وصبحج دوم بالخير
:)
واي اذا التشبيه يخنق العبره
انا شنو احساسي
ترا كان صج ضايق خلقي
بس الحمدلله انا بخير
وكل الخير ان شاء الله
بس صايره سيلانية وايد اتشكى
:)
امييييييين
ويسعدج رب العالمين ويريحج
وتستاهلين الاهداء وكل كلمه حلوة
:*

esTeKaNa يقول...

new-bride
~~~~~~~~~~~~
واي حسيت ابي المج
:**
تعليقج ووجودج اللي يزوق
:))








فريج سعود
~~~~~~~~~~~~
أثق فيك
!!
راح اجرب امريكانو ورهش
وبدعلي لك سواءجربت ولا ما جربت
:)

esTeKaNa يقول...

حياتي هدف مو عبث
~~~~~~~~~~~~~~~~~~
الله يرزقنا رضاه وجنه بر والدينا
يزاج الله خير يا اختي العزيزه
:))







5roofa
~~~~~~~~
واي لا
!!
انا ازعل
وانتي تزعلين
ترا تصير حفلة بجي
:(
لا تقولين كرامتي بالارض
الا هذي
ان شاء الله ربي يعزج ويعز شانج
وانا بخير
عساج دوووم بخير

esTeKaNa يقول...

الخيلاء
~~~~~~~
يا مسا الجمال كله
:*
الحمدلله انا بخير
والمزاج ان ما كان رايق
انا اروقه
:)
وصاجة
تعور هالفكرة...انا نكون اخر هم لمن هم اول همنا
!!
بس لازم نواجه الفكرة ونتعايش وياها
الاهداء من القلب للقلب لكن
والحمدلله عجبكم
وتصدقين من طلع حلم الحلتيت
والاشاعات اللي طلعوها الطابور الخامس
وانا ماني بخير
hehehehehehhe
:Pp~

اجار الدين كشمش يقول...

اسسسسسسسسسستكانه

اشقاعده تكتبي واليوم 8. يناير

ولا تدرين ماذا يعني هذا

التاريخ حق المراه الكويتيه

ابله نوريه..فازعين عليها

ريايل ]في المجلس وانت حاطه

صينيتج واستكاناتج وغوريكم

والمووود واصل فوق وفاصل

اشتبيني اسويلكم

يالله قومي انت ويمعتج لا اكسر اماعينكم

واستكاناتكم..روحي دافعي

عن من الي علمتج تقراين وتكتبين الشعر

ابله نوريه محتاجتكم
ههههههههههههههههههههههههه
فمالله

سالفة قلب يقول...

تدري متى الجرح يبطي وقعه ويألم؟؟

لاجاك من نــاس انت تعالجها

**********

باختصار لديك قلب يشرح قلوبنا

esTeKaNa يقول...

أجار الدين كشمش
~~~~~~~~~~~~~~~~~
علامك خذيتني بشراع وميدار؟
ابله نوريه تنطرني؟
كاني الحين بحذف الاستكانات
وبحط عباتي فوق راسي
وبروح لها اركض
:Pp~
ياربي ادري الديره معتفسه
بس كنت متعسره
يعني اسكت اسكت ماعبر عن مشاعري
ما يصير
:)






سالفة قلب
~~~~~~~~~~~
قريت كلمتج وغمضت عيني
!!
اي سالفه قلبي هذا اهو
جرح من قلوبنا تعالجهم
وتعالج كل هم يجيهم
اشلون تقريني وتحسين فيني؟
اشلون بكلمه تختصرين احساسي؟
:)
لك بالقلب مرباع ونصيف
عسى ربي لا يخليني
:*
يا مسك ختام هالاحساس كله

charisma يقول...
أزال المؤلف هذا التعليق.
charisma يقول...

الله يا استكاانه غرامى هالاغنيه

خصوصا اذا بدنيتج ناس اتسمعج اياها دووم


ازعلي وارضي على كيفك أنا ...مثل ما ودك تلاقيني حبيب
واجرحيني ألف مرة بالهوى...تلتقيني مثل ظلك ما أغيب


ويا حبيبتى انتى
ريحى قلبج ولا تاكليين بروحج
الى يبيج مسيره يرد
والى ما يرد فخيره
وقلتى كلام واقعى
احنا بشر نغلط ومحد معصوم
بس فعلا فى رصيد للناس بقلوبنه
اذا فلانه بينى وبينها عشره عمر وشالتنى باخذ وقت وبنرجع
بس الى مالها رصيد وبينت افعالها مو مريحه شلنا بعوار الراس
الله يوفق الجميع ويرزقها الى احسن منا

وهذى منى لج اهداء
(مسيره يرد)

مسيره يرد مسيره لي ذكر يشتاق مسيره الود يرده من بعد الفراق
حبيبي واعرف ااطباعه زعله مايدوم ساعه
عليه ولهاااان وشوقي له على عيوني حزينه باان
انا بلياه جزيرة شوق شواطيها بلا عنوان
حبيبي الطيب يبين فيه وشاري دنيتي بعمره
على طبع الوفا مربيه وعليه ماترخص العشره
تمر ذكراه على الخاطر واصبر شوقي الملتاع
على دروبه انا ناطر حبيبي شاري مو بياع
اكيد انه علي ولهان مثل مانا عليه ملهوف
احبه وحبي له عنوان اصيل ويذكر المعروف

:**

فكلشى خيره من رب العالمين يا استكانتى
ولالا يضييق صدرج واحنا حواليج
اشراى بس الى تبينا
امرى تدللى شتبيين ؟؟

darkness يقول...

:)

استكانه مساج الله بالرضا و العافيه

اشوه طمنتينا عنج

عسى الكر و الضيج ما يدل لج دروب

:)

Najmah يقول...

استكااانة

تعرفين لما ودج تزعلين من شخص
عشان تحسسينه انه ضايقج

وكل شوي تمسكين تلفونج

تنطرينه يدز كلمة حلوة تجبر خاطرج

وتنطرين وتنطرين وتنطرين


وآخر شي نقولين حق روحج خلاص طاف

وانتي اتدزين له مسج انج اشتقتي له

!!!!!!


اتعرفين لما تقولين حق شخص ترى ضايقتني كلمتك

وانتي تدرين ان بكلمة وحدة يقولها راح ينمسح كل الضيق اللي بقلبج

بس يستكثرها عليج ومايقولها

وتقولين حق قلبج خلاص ازعل عليه

وقلبج يقولج ماعرف ازعل


!!!!!


اتعرفين لما يتعود قلبج لا جرحوه الناس اهوا يعتذر منهم

مهما حاولت فيه مايتخلى عن طبعه


شنسوي بعد



مادري جني قرقت وخربطت على راسج

شسووي بقلبي واايد :)

qesat_5ayal يقول...

أفا أفا
أفا


انزين تعالي عندي
اليوم
واليوم بس راح اضيفكم شاي
:)
مو قهوة ولا عصير

حياج
منطقة بلوقر
شارع بلوق سبوت
بيت قصة خيال
البيت الازرق


الازرق بس ما فيه خط
:P

Ni3Na3aH يقول...

الله يبعد الزعل عنج
و الله جم شغله قلتيها جني قاعدة احاجي نفسي فيها
هونيها و تهون و ان شاء الله ماكو الا الخير
:)

Sara يقول...

قوة استكانة حبيت اسلم عليج وآخذ أخبارج :)

ماعاش من يزعلج وانشالله دوم مزاجج رايق .. ماكو شي يسوى الزعل والصراخ :) والعمر فيه كم يوم حتى نعيشه بآه :)

esTeKaNa يقول...

charissma
~~~~~~~~~~~
الأغنيه قديمه بس تينن
واذا ما عندج ناس يسمعونج ايها
سمعيها نفسج
ما تشوفيني أهديتها حق نفسي ولا كسرت بخاطر روحي؟
:))
يا بعد قلبي انتي
عاد انتي بالذات احسج بهالشي مثل حالتي
لا خلا ولا عدم يا حنان هالدنيا كله
ومسيرة يرد عجيبه
تهقين كل شي يرد
وان رد يرد مثل ما كان؟
هذا الحجي
!!
واي احسكم خواتي صج
:**

esTeKaNa يقول...

darkness
~~~~~~~~~
يابعد قلبي قلبج انتي
يزاج الله كل خير
واجمعين يارب
:**




najmah
~~~~~~~~
نجمه
!!
تدرين بجيت؟
والله العظيم ردج بجاني
ما اقدر اقولج اكثر من انه كلماتج بجتني
اي نجمه اي
اعرف ولاني اعرف هالشي بنفسي
وامر بهاللي تكتبينه
معورني قلبي
:(
انتي ما قرقتي
انتي قلتي بالضبط اللي بقلبي
:*

esTeKaNa يقول...

qesat-5ayaL
~~~~~~~~~~~~~
وي يا زينج ويا زين عزيمتج
يييتج
وتلذذت بأحلى عزيمه
:*







ni3na3ah
~~~~~~~~~~~
ياهلا بالمنعنعه والله
!!
دام الانسان ويا ربه كل شي يهون
حياج الله دوم
:)









sara
~~~~~
هلا وغلا
انا بخير عساج دوووم بخير يارب
اي والله ماكو شي يسوه
الحمدلله
:)
انتي مسك ختام هالبوست
وصلني ردج وانا اكتب البوست الجديد
حياج الله يا السهرانه
:*

DiLLi O MiLLi يقول...

يا حبيبتي أنتي

شوفي
الأنسان اللي ينكشف رصيدة
على طول سكري حسابة
وقضبيه الباب

دام ما عنده رصيد عندج
ليش تضغطين على روحج
وتقثين عمرج

بـــــــس
الأنسان اللي بينج وبينه عشرة سنين
وكان معاج بالحلوة والمرة
صعب أتقبلين أخطائه
وفي نفس الوقت
صعب تخسرينه أو تنسينه
ممكن الواحد يسامح
بس ما راح يقدر ينسى
ولا راح يرجع الوضع مثل ما كان
صعـــــــــــــــب

شخص إلا مني مضى لي معه يوم
أندم على أيام مضت قبل ما ألقاه
أحتاج له لاصار في صدري هموم
ولو ينكسر ساقي .. تسندت عليه
جعل المعزه بيننا دايم الدوم
هذا الرفيق اللي من الصعب
أنســـــــــــــــاه



تدريــن عاد
أصعــــب شي لما تكون الطعنة
من القريــــــــب !!!ء
تـذذذذذذبـــح



بس أحنـــــا هني
آآآآآفــاااااا عليـــج
رقبتنـــااااا سدااااده
تبيين صدر تحطين راسج عليه وتريحينه ؟
تبيين أذن تسمعلج ؟
تبيين عين تسهر عليـج ؟
تبيين كتف أتّسندين عليه ؟
حـاااااااضــــريين
يا الغـاليـــــــة

:*

esTeKaNa يقول...

Dilli o milli
~~~~~~~~~~~~~~
يصير احد يلمني؟
انا ابي ابجي من صجي
!!
مابي اقص على نفسي
انا حيل متضايقه
وقلت وارد اقول
اللي يعور حيييل لما تييج كسرتج من قريب،ومو اي قريب
اقرب قريب
!!
بلحظة صدق تدرين ماكو حساب لهم
بس ما تقدرين تعترفين حق نفسج بهالحقيقه
دلي
تدرين شنو المشكله؟
لما تصيرين وفيه لكل تفاصيلج
لكل شي بحياتج
ترتبطين بذكرى
باحساس لحظة
باي شي حلو جمعج معهم
وتقدرين
كلمه قالوها
فزة قلوبهم مرة
فرحتج فيهم مرة
تقدرين كل شي وتخلين له قيمة واهميه
ويعز عليج تلغينهم من حياتج
!!
وتستغربين..اشلون انتي يعز عليج تلغينهم من حياتج وهم بكل سهوله الغوج
هل هذا قدرج عندهم؟
معقوله هذا انتي بقلوبهم بس
!!
دلي...ما عندي خوات
انتي
سالفة قلب
كريزما
وكل قلب يحس فيني هني
انتو خواتي
لا خلاااا ولا عدم
والله كلامج احسه لمني وبرد على قلبي
:**
غثيتكم صايره اتشكى جني سيلانيه
عشان جذي كتبت بوست خفيف طينه عشان اوسع صدوركم
:)
ترا احبج في الله
:*

طائر بلا وطن يقول...

يطري علي شطر بيت

/

من يمسح الدمعة اللي ما بعد طاحت

/

اللي يداري و يطوي حزنه و يضمه في صدره
عن الناس يتعب وايد

لأن بشر حاله من حال الناس
اللي مو حاسه اشكثر هو قاعد يجاهد
و يمكن يكون منهار من الداخل

بس من يفهم أو يكون عنده تصور عميق
لنفس أي إنسان منا و إدراك مسبق
لإحتمالات الحالة اللي هي مستقرة أو غارقة
فيها؟

من يمسح الدمعة اللي ما بعد طاحت
؟؟

الله يبعد عنك الحزن
و يجملك و يجمل كيكتك
:)
و يحمعك مع من يحب الله لك


تصبحين على خير

new one يقول...

صباح الخير مجددا ومجددا

شكلي بكمل اليوم على البلوق مالج مع اني سهرانه بس تستاهلين


وربي نفس حالتي مع الزعل..أزل وأرضى بروحي..مرات أرضى لأني أحب الشخص حيل ومابي المواضيع البسيطه تأثر علينا...وباقي المرات أرضى لسبب واحد موجود معاي من صغري..وهو اني دايم أنسى إني زعلانه!!!

بس هذا شي لصالحي..الناس اللي يحبوني ماراح يزعلوني واذا زعلوني يراضوني بسرعه لأنهم ما يحبوني أزعل لودقيقتين..

بس المشكله ان في ناس بتستغل طيبتج وتاخذ منج مصلحتها وبعدها يجرحونج بأقوى طريقه يقدرون عليها..

لا تغيرين قلبج بس حاولي تعلمينه شلون يختار اللي يدخلونه...

اعذريني ع الاطاله

وتسلم ايدج ع البوست

esTeKaNa يقول...

طائر بلا وطن
~~~~~~~~~~~~~
أخيييه يا طائر
شنو هالتعليق الحنون
!!
علمني امسح دمعتي وأروح
علمني ازعل منك لو مرة

صايره اغنيها حق نفسي احيانا
:)
الله اعلم مافي النفوس
تعليقك سكتني
ممكن شفته متأخر بس اثر فيني كثير
تعليقك يقولي هالطائر يا استكانه اخو عشرته مع هالبلوق خلاه يفهم ما بين السطور


شكرا لمرورك الجميل
تصبح وتمسي على خير
:)










new one
~~~~~~~~~
صباحج ورد وخير ونوير
البلوق
والبوست
وصاحبة البلوق تحت امرج
انا لو ادري انتي سهرانه هني
كنت جهزت لج حليبه بقصم اثناء قراءة كل بوست
:))
والله يا الغاليه كانج تتكلمين عن شي بقلبي
انا جذي
يا انسى اني زعلانه
يا افكر شنو قيمة هالزعل مقابل احساسي بالحب مع الناس القراب؟
انا ما شتكي من قلبي
ولا اشتكي من هالطبع
الحمدلله
ربي يرزقني قلوب قريبه يشترون الدنيا برضاي
ولكن في قلة يعتقدون انه رضاج وعدم زعلج شي مفروض عليج يخليهم يتمادون في حقج
!!
نورتي البلوق
والساعه المباركة والله
:)