الجمعة، يونيو 29، 2007

سوالف

من بدت الاجازة....هذا ثالث عرس اروح له وباقي لي 3 الاسبوع الياي
!!هذا غير حفلات التخرج وغير المناسبات اللي من روحي كنسلتها
موسم زواج وولادات وتخرج
عرس
استقبال
حفله تخرج
مكياج
شعر
تسريحة
بدله
كعب
ورووووووووووووووووووووووح
.
.
يا زين الريايل اذا انعزمو:دشدداشه واطمر
لا يحاتي احد شايف هالدشداشه عليه من قبل
لا يحاتي الشعر اللي بيغطيه بالغتره
لا يحاتي مكياج بيغسل ويهه ويروح
والسلام عليكم
وعليكم السلام
!!
.
.
.
اذا واحده فرحت بنفسها واهم يوم بحياتها ودقت تعزمني
نفسيا:استحي بأهم يوم اعتذر على ولاشي وبدون عذر
خاصه اذا البنت تعزني وتحبني وعندها انا شخص قريب جدا
وتعالي ضبطي البدله
وحجزي مكياج
وحجزي حق شعرج
ما توصلين العرس الا راسج كبر الكويت
.
.
.
في عروس على بساطتها تتمتع فيها،بفرحة اهل العروس واهل المعرس
في عروس احس جني قاعده اشوف فلم ،جامد ما فيه احساس
ياربي ليش انا عاطفيه زياده عن اللزوم؟
.
.
.
!!الحيا نقطة
والحيا بالبنت نعمه من رب العالمين وزينه تزين اي بنت
شي غريب:
مغني على طرف الصاله...والبنات ترقص
معرس مرتز يم عروسته...والبنات ترقص
فرقه داشه ويا المعرس
والدنيا ترقص
!!
ما تغار البنت على نفسها وتحس بقيمة روحها؟
اوكي سلمنا ما تغار...ما تستحي انزين؟
اوكي واميمتها؟تصفق وتيبب عليها
همست لي صديقه كانت قاعده معاي:
تهقين يبون ينخطبون؟
شي سخيف جداا انه ام تخطب حق ولدها اكثر بنت ترقص بالعرس
مشالله..أنعم وأكرم ونعم الاختيار صراحة
.
.
.
في عرس صديقه لي ،بس قعد المعرس قامت بنت ما تحل له وارقصت
المعازيم تبققت عيونهم
وباسرع من البرق مسكتها حرمة وقعدتها
!!وايد عجبوني
لو انا مكانهم جان مسّكت رفيجاتي خيرزانه بعد
ولو يدتي موجوده جان فرصتها وخلتها تندم على تهورها ورقصتها
:pP~
شكثر قعدت العروس بريحاتها وعليه جان رقصتي ،ما حلت الرقصه الا يوم دش المعرس
!!!
.
.
.
والغريب:الامهات يصفقون وايببون على بنيتهم بكل فخر واعتزاز
لو امي؟
جان خزتني ذيج الخزة اللي ترتعد لها فرائصي
hehehehe
ياحليل امل وحجوتها المعتاده:
الأم منظرة بنتها،كل الناس تجاملج الا امج
عادي كل الناس طايرة عينهم بالعروس
وامي طايره عينها فيني
يا شعرج
يا سنعي هالصوب
قعدي جذي
اشفيج جذي
اشفي هذا صار جذي
!!
مرة اتفقنا ما راح تعلق علي طول العرس بتسكت عني،بعد روحي اتعبت نفسيتها
:)
.
.
مرة سألت قريب يصير لي بعد عرسه:
شنو كان شعورك لما دخلت القاعه؟
!!كنت وايد مرتبك
جاوب:
تخيلي احساس بنت داشه دوانيه كلها ريايل
!!نفس احساسي
وما اشوف الا عيون مبققه وتخزني،شي طبيعي ارتبك
دخول ابوه واخوانه دعم نفسي ومعنوي للمعرس
لكن اللي ماله اي تفسير،انه عرس الريايل كله يدش بقاعه الحريم
!!
ويردون يسلمون عليه،انزين انتو مو مسلمين بره ؟اشحقه داشين كلكم
القراب امنا بللله،بس الباجي نعم؟
الريال برجولته
بسكبته
بهيبته
من يتلثم ويعفر ويستهبل ويرقص بوسط الحريم
.
.
.
!!يطيح من عيني
.
.
.
.
قبل سنه رحت عرس صديقتي وزميلتي بالكليه
يوم دشت القاعه عيزت ابتسم لها ووأشر لها واهي ماده البوز شبرين:
!!شفيها يا حافظ؟
قالو لي عيب تضحك،شنو اهي ما صدقت تتزوج؟
انزين اهي فرحاته تبتسم شوي
لا عييييييييييييييييييييييب
!!
دخل المعرس وسألت بنت خالتها:
منو ابو العروس؟
بققت عيونها:
عيب يدش،زين امها يايه
العروس عندها خوات ،واذا دخل ابو العروس جنه يعرض بناته
ممممممممممممممممم
تفكير غريب
!!
.
.
.
.
حلاهة الثوب رقعته منه وفيه
وحلاة كل معرس ياخذ عروس من مستواه
ومن نفس بيئته
مو اهيا دينه وهو فري اهله يبدعون
ولا اهل العروس متهاوشين ويا اهل المعرس ومسوين فريقين
ولا ناس بصوب ويخزون الباجي بصوب
.
.
.
الله يكثر الأفراح ويتمم على الجميع يارب