الخميس، نوفمبر 29، 2007

اشفيني؟

أقف عند مفترق الطرق في احد اكثر الشوارع الأكثر ازدحاما في حولي
استعد للخروج من اللفه على شارع رايح راد
انظر لليمين...ثم الشمال
السياير قادمه باتجاه متعاكس
انظر للسيارت برهه من الوقت
اضيع فرصتي للخروج
يقتربون اكثر فاكثر
وعندما يصلون لاقرب نقطة مني
ادوس بنزين واطلع
!!!
هرنات وصراخ يتبعني بالشارع
وانا نفسي مستغربه...اشفيني؟
ماعندي تقدير للمسافه؟
.
.
.
بعد خروجي من دورتي في حولي،اتذكر ان السايق المرة الاخيرة دخلني في دواعيس وطلعني بسهوله
اعرف عن نفسي بأني اذا ذهبت للمكان مرة واحده ثبته
والآان سأكون اذكى من كل زحمات حولي وادخل في الطرق الداخليه لاتفادى الزحمه
ولكن..هيهات هيهات
ان وصلت لطريق مناسب،مافي لفه فوق تحت
وان وصلت الاشاره..ما تمشي من الززحمه
ومن شارع ليى شارع ومن زحمه الى زحمه
فجأة اتصلت على امي والعيون تصب دموع:
ترا انا تعبت من الزحمه
وين بيروحون كلهم؟
.
.
.
ترجل من سيارته ليعدي الشارع متوجها للقهوة القريبه من الشارع الرئيسي
وقف مقابل سيارتي،دست بريك واشرت له تفضل
ابتسم ...ثم عمل حركات خربوطيه شوي بالهوا
!!اكتشفت اني قاعده اطالعه،وهو واقف ،
عقدت النونه ونزلت عيني...اشرت له يمشي بسرعه
مع اول خطوة خطاها،دست بنزين
!!
الولد طلعت عيونه من الخرعه
مو قلت لكم صايره ما عندي تقدير للمسافه ؟
صراحة...اشفقت عليه من الرعب الذي اصابه
اكتشفت اني ابتسمت له ابتسامة عريضه
غبيه
خايفه
محاوله تبرير محاولة اغتياله التي كانت ستتم للتو
.
.
.
في عزيمه في بيت قريبتي،بعد العشا والحلو..سلمنا انا وامي واتجهنا للباب
امي تطالعني مستغربه
انتي مو ناسيه شي؟
بكل ثقه :لا
!!
ماعون الحلو خذيته وديته السياره
سكتت امي وتطالعني:
وبتطلعين جذي؟
تخيلو.....ناسيه جنطتي
وموبايلي
والاكبر والاعظم...ناسيه البس حجابي
وانا مو امس واليوم متحجبه
عمر عمر وانا وحجابي العززيز...واحبه واعتز فيه
اشفيني؟
خدايووو
.
.
.
.

هناك 41 تعليقًا:

Q8DOLL يقول...

اسم الله عليج استكانوووه
بعد عمري للحين بهالدورات؟
يالله يتوب عليج وتشتغلين
أشاركج البجي على زحمه حولي وصاجه وين يروحون؟؟
صدقيني الزحمه كلها من الوافدين
والا احنا شكثرنا بالله؟؟
وعساني ما أمر جدامج بالشارع ههههههههه لا صايره ارهابيه
ديري بالج يابنيه

وكلش ولا اطلعين مفرعه
يعني فسوق بعد الايمان
لوووووووووووول
ياحلوج
عادي بابا
ذكرتيني باللي خطب اختي وطلع من الدوانيه بيشوف اختي يعني الرؤيه الشرعيه
والا الأخ ياي حافي وماشي من الحوش للصاله حافي القدمين
من الخدايوه اللي فيه
والمشكله انه بيتنا سيراميك يعني ما تترقع انه فاصخ النعال بره ومايبي يدوس على الزل

ديري بالج على استكانه ترىها غاليه

غير معرف يقول...

mwteene mn el '67ik..awal salfst el 93aayda ele y6oofon mthlich bs tgurb el sayaraat loooooool

w lama bgeete tsheleen el walad..mseeken..gaal let ha ma 6wafatnee...w fashlitch ksarty 5a6re..

hathee el swalif t9eer etha kan baalch mash'3ool w loya b 7yaatch wayed matgdree trkzeen on the little things....

sa3aat ana asalm bel ym3aat 3ala n9 el 9alah w ag3ad w ansa aslm 3ala bajee..fashla 7sbaalhm labst hm wela mt3mdah.

bin3li يقول...

عادي عادي
أنا أول أمس مسوي بلاوي في الشارع
:D

Selezya يقول...

اسمالله عليج شفيج ؟؟
لوول اهم شي انج ناسيه حجابج صارت فيني مره لوووول
كنت طالعه بروح ويوم وصلت عند باب البيت بطلع جان احس بالهوى وايد على ويهي وشعري وقفت حسسيت في ششي غريب ولا حجابي على جتفي ناسيه البسه لوول
--
حبيبتي انشالله مافيج الا العاافيه شكله شرود ذهني زايد هاليومين فيج بس ماعليه يروح عن قريب :)
تكفين الا استكانه :)

|:| DUBAI |:| يقول...

LooL

أنا مادري ليش الحساسات يا استكانة ما تشتغل وياي

تلقيني أخاف الصق في السيارة الثانية

و دوساتي الله يستر منها يوم أكون سرحانة

و البريكات لا حول و لا قوة

مستوية وايد أسرح مادري ليش!

بس ضحكتيني على المواقف ..اذا زحمة الكويت مطفرتنج

شو حياتج لو يربتي زحمة دبي؟

LOOL

بتكرهين سواقة السيارة

و اللي عطاج ليسن

lawyer يقول...

الناس كلها بتقوووولج متسبهه اكيد تحبين

بسسسسسسسسسسس اخذيها مني

مبروووووووووووك التخرج

هذا اول اثار التخرج من الحقووووووق

اتشيبيييين و عمرج 20

و تشيخييييييين و عمرج 30

تخدا المخ خلاص

محـــــارة يقول...

هلا حبيبتي .. عادي لا تفكرين تمر عليج أيام تبلم وتناحه قويه

وغالبا يكون تفكيرج مشتت وتحسين روحج ضايعه ساعات موضوع معين .. وساعات بدون سبب

SHAHAD يقول...

اسم الله عليج الرحمن
شفيييج ؟؟
بديت أخاف عليج لووول
عاد أنسى كل شي كل شي ما عدا الحجاب
ما ينفع تنسينه لووول
ديري بالج على نفسج ولا تطلعين بروحج نصيحه لووول
ترى هذي اشارات التقدم في السن :q
ترى أضحك معاج :))
اسم الله عليج مافيج إلا العافية
حالة وتعدي إن شاء الله :)

يعقووبوو يقول...

زحمة حولي مافيها شي. بالعكس استانس عليها تعلمني الصبر

بس بالصيف اهني اتنرفز D;

7osen يقول...

والله استكانه ضحكتيني

على السالفه الاولى

هههههههه

الله يعين السيارات عليج
مايصير جذي عاد

كل شي ممكن يتعدل الا هالسالفه
ديري بالج عدل

مو وقت قياس مسافات


والله ضحكتيني صج

بس تصير هالاشياء
وإن شاءالله تعدي على خير

:)

عبدالرحمن يقول...

عادي عادي انا صارلي فتره طايح في موضه اضيع البوك :)

اليوم ضيعته ادش الدوانيه ادور يسئلني ابوي شتدور اكيد البوك!

ادش البيت ادور الوالده تقول ضيعت بوكك !

اخوي يشوفني يقول جرب تضيع شي ثاني مو كل مره البوك !

اخوي الثاني يقول ياقرد حظ هل بوك اللي مايضيع غيره !

احيانا الواحد تمر عليه ايام يصير ماعنده سالفه :)

esTeKaNa يقول...

q8doLL
~~~~~~~~
حيالله هالاسم والله
اي والله للحين بهالدورات
بس مستانسه الحمدلله
:)
واااي مو صح الزحمه تبجي؟
انا خنفتني العبره وقاومتها بس اخر شي ما قدرت انهرت صراحة
:Pp
HAHAHAHAHHAHAHHA
لا ترا اهو مسوي شي دودهني
عشان جذي انا دست بنزين
لو هو مار باحترام
جان حافظ على حياته
لوووووول


وي يا حسرتنا مفرعه؟
عشان ما يردني الا ساحة الصفاة تلقون ابوي معلقني
:))

واي كسر خاطري الخطيب والله
ههههههههههه
وعليه بس صراحة ما دش قلب اخيتج عقب هالحركة،يايها بحماس مسكين
هههههه



يا بعد قلبي انتي
الله لا يحرمنا
:**

esTeKaNa يقول...

aNoN.
~~~~~~~
we we we!!
يعني الحين انا اللي يشوفني اسوي حركه البنزين بالحظة الاخيره بيقول عني صعيديه؟
:)
ههههههه
اي كسرت خاطر نفسي لما قمت اتبوسم
زين ما نزلت سلمت
وانا ترا قلت اهو مسوي حركات خربوطيه عشان جذي بغيت ادعمه بس يوم شفت عيونه مسكين مخترع سامحته
hehehehehehhe

واي اسم الله علينا الرحمن الرحيم
ناس تدوس بنزين بتكرف الاوادم
وناس ما تسلم على نص الصاله
لوووول

esTeKaNa يقول...

بن علي
~~~~~~~~~
الله يستر
!!
يعني في من نوعي واحد ثاني بالامارات
اشوة انه مو ديرة واحده جان عفسنا الشوارع
لووول
:))








selezya
~~~~~~~~
مادري اشفيني
:(
اقري علي بلييييييز
!!

هههههههههه
صاجة اول شي تحسين فيه انه يطقج براد والشعر يحوشه هوا عقب عمر وعليه ما شاف الهوا اله ياجرنا بس ويثبتنا
:)



اي والله شرود ذهني
بالي وايد مشغول
:(
يا بعد قلبي واي كلمه الا استكانه عورت قلبي
:**

esTeKaNa يقول...

دبي
~~~~~
loooooooool:))
اشفينا اسم الله علينا؟
ليش عبالج الكويت مو زحمه؟
زحمه هاليومين بشكل مو طبيع يمادري ليش
والله يبعدنا عن كل الزحمات تنرفز صراحة
تقعدين على اعصابج وكل شي مو حلو يطري على بالي مادري ليش
!!

esTeKaNa يقول...

Lawyer
~~~~~~~~~~
واااااااااااااااي
مو بشاره مو بشاااره
يعني من كثر استهلاك المخ تطلع خيوطه في عمر مبكر
وااااحسرة قلبي والله
:)



















محاره
~~~~~~~
هلا بالطيب الغالي
:)
بالضبط هذي اهي
تنح وتبلم قوي الله يستر منه
:)

esTeKaNa يقول...

shahad
~~~~~~~~~
تقدم بالسن؟
لاالا لا تقولين
اذا فيها تقدم بالسن
ترا اتغشمر وياكم مو صج
مو انا مو انا
:)
وبعدين انا مستغربه انسى حجابي؟
يعني حجابي شي مني
مثل خشمي وعيوني
لوووووووول

اي والله يارب تعدي
مفشلتني هالحاله
:)

Zabo0o6a يقول...

olla qaweya estekana ! naseya el7jab marah wa7da , thakarteeni belwalda 6al3a theek elmara shayla elchan6a o nasya el3abat o 7jab.ha zain la7agt 3alaiha bel7oush :Pp

esTeKaNa يقول...

يعقوبو
~~~~~~~~~
hehehehe
:)
ما شاء الله عليك والله
تفكر بايجابيه
انا مادري طلعت مو صبورة
ولا ميده
ولا شي ابدا ابدا
:؛Pp~

esTeKaNa يقول...

7OSEN
~~~~~~~~
يعني خايفين على السيارات والشارع
ما خفتو على استكانه هاااا
@@
Heheheheheh
الله يستر بس
جيكو علي ببين فتره وفتره
من اغط بلغو عني
:))

esTeKaNa يقول...

عبدالرحمن
~~~~~~~~~~~
loooooooooooooooooool:))
بو بدر والبوك
!!
اهم شي ضيع شي غير البوك
اي والله نوع شوي
كل مرة البوك؟
لوووووووول
انزين اربطة
سوا قلب سوار اي شي
بس حل هالمشكله
والله منت ببعيد عني
الله يستر شهالحاله؟
:))

esTeKaNa يقول...

زبوطه
ّّ~~~~~~~
وي وي
يااااابعد قلبي قلبها
شوفي انتي شمسويه خليتيها تنسى حجابها وعباتها يا بعد قلبي
:))
عاد انا طالعه عليها الظاهر
شكو اطلع على امج مادري
بس طالعه عليها
بس تدرين اهي عقب زواج
وعيال
وكفاح
انا الحين مسويه جذي
عقب شنو بسوي؟
الله يستر
:))

Glass Fabric يقول...

enshalla etkon fatra base6a wet3addi l2ana etha 6awlat allah yaster :p

DiLLi O MiLLi يقول...

لالالالا ... طلع الجانب العدواني من شخصيتج !! هههههههه

ممكن تعطيني جدولج اليومي
والشوارع اللي تمرين فيها
ونوع سيارتج
ولونها
وأذا حافظه رقمها يكون أفضل
أي .. الواحد لازم يتحرص
العمــر غـــالي

:)




وأستكانة يا حبيبتي
الكـــبر شــــين

:)


:*

magnoonah يقول...

صباح الخير
:))

اللهم لا شماته
تدرين عاد انا ما افكر الا وانا اسوق والسرعه حدها وكل من ركب السياره معاي قال انت ي وايد زينه بس بريكاتج عجيبه

:))

اما الحجاب لا يبا اول شي واخر شي من صجج

هذي فيها قطع رقاب ودم للركب


ما فيج الا العافيه
بس شوية شرود من كثر التفكير ومعذوره منو فينا باله خالي


ديري بالج على نفسج

shakshaka يقول...

b3ad 3umreeeee elrayaal baghaa erooo7 mn cheees ahala eb sebat tahawuruch ya estekanoooo:P 7asbeyallaah 3la ebleees wahala .. lool 3yal nasya 7jabich haa?:P geltaay eljaw 7elooo khalna entenafaaaaaaah;p

على نفسها جنت براقش يقول...

عادى
هذا فيروس منتشر هالايام

DanDash يقول...

عادي عادي هذس حالة طبيعة دندوشية يمر فيها كل إنسان طبيعي

لاحظي قلت دندوشية لأني تخصص و بكل فخر في هذي الحالات

ابسط شي ابسسسسط شي

كنت رايحة إستقبال مع امي و اختي و عشتو انا الي بسوق فقلت لهم على ما تخلصون انا بوقف السيارة يم الباب و بكل جداااارة كاشخة و حالتي حالة و نزلت السيارة و انطرهم بالسيارة بس احس في شي غلط اطالع لا الحمد الله حجابي علي اشيك هدومي لا اوكي اشوف تحت ياااالهوي طالعة بالسليبر صراحة كان شكلي كان راح يكون تحفة مع السليبر التوت لووووول
واعرف وحدة ما ادري اقول اسمها و لا اخليها تعترف
عادي هم بتطلع و عند السايرة طلعت شي من جنطتها و طلعت وياه البوك و حطته على السيارة و مشت كملت طريجها و اخوها اخترع لانه شاف بوكها بالشارع و بعيد عن بيتهم و يخترع يدق عليها و اهيا مصرة انه بوكها بجنطتها ويوم فتحت الجنطة و تكتشف الحقيقة
اقووول ولا اخليها اهي تقر و تعترف;)

عادي بالعكس يصير اكشن في يومج بس ديري بالج و انتي تسوقين

بـركـــــان يقول...

لا تعليق على قيادة النساء بالكويت ... بما فيهم الوالده .. الله يحفظكم و يحفظنا منكم


الثائر

5roofa يقول...

امبي استكانه اول شي مسمله عليج شفييييج
والله لا تزعلين بس مت من الضحك على الصبي
لوووووووووووووووووووووول غشيت واااي تخيلته و اهو متصرقع لووووول

امبي حبيبتي عادي تي عرات الانسان فجاه يصير لويه و باله مو معا معنه باله مو مشغول بشي

ماتشوفين شر يالغاليه و تبكرين و تنسين لوول

Salamz sweetee...

ray يقول...

و هذا دليل قاطع على ان البنات ما المفروض يسوقون ;)

Mishari يقول...

هههههههههه

الكبر شين الكبر شين :)

اهم شى الواحد يتجنبج بالشارع لا تكفخيني وانا مار والله يستر

انحش لا يطلع شي بعد هالصوب :)

Mishari يقول...

نسيت خل اعطيج وحدة من ابداعتي بهالسوالف

اتكلم بالموبايل
والله والله والله

اني اكون ابى اسأله تصدق ما ادري وين حاط موبايلى :(

غير معرف يقول...

اللي مأخذ عقلك يتهنا فيه
حوادث - وناسية حجابك وشنطتك وموبايلك
السالفه جايدة وايد

على كل حال سالفة الزحمة سهله وايد تعودت ان احولها لشيء مفيد بحياتي
عندي اشرطة كاسيت مخليها لزحمة بس
اتصالات مهما ونقاشات اهم ما تحلى الا بالزحمة
بس اللي مو سهلة انك ناسية .. العدة

هذي فيها أن
وان كبيرة وايد

esTeKaNa يقول...

glass fabric
~~~~~~~~~~~~~~~
hehehehehe:))
اي والله الله يستر
الله يسمع منج يارب











dilli o milli
~~~~~~~~~~~~~~~~
انياهاهاهاها
بعدج ما شفتي شي
انا فيني استكانه طيبه واستكانه شريه
الشريه قامتتها
بس هاليومين طالعه بزود
يا حسرتي شر وخداي؟
:(
اقري علي اقري
:Pp~
وي وي يا حافظ
انا يوم شفت حرصج على انج تعرفين جدولي قلت البنيه خلاص حبتني
تبي اليوم اللي تشوفني فيه
اثاااااري يا دلي خايفه مني
افا بس افا
:Pp~

esTeKaNa يقول...

dilli o milli
~~~~~~~~~~~~~~
تعالي تعالي
مو الكبيره اللي تقولين لها الكبر شين
@@











magnoonah
~~~~~~~~~~~~
مساج الله وصبحج بالورد كله
:)
اللهم لا شماته؟
واي واي
حسيت روحي مو صاحيه
راعي مشاعري يا بنيه
!!
اي والله فيها قطع رقاب
الا حجاااابي
امشي واغني ...الا صلاتي
الا حجابي
واحبه وفخورة فيه
والله مادري اشلوووون
سامحني يا حجابي سامحني
ترا ما تهون العشره ابد
:))
ان شاء الله بدير بالي على نفسي
وانتو ان غطيت سئلو عني









shakshaka
~~~~~~~~~~~
اي والله بغى يروح من جيس اهله
بس ماحد قاله يسوي شي بيده يدودهني
بعدين اقولج شنو سوا
لووووووووووووووول
يعني اهو اللي حثتني اتهور صدقيني
:))
لوووووول
اي والله بعد مرات الواحد يشتهي هالبراد يطق شعره،بس شنسوي جهاد جهاد عسى ربي يرزقنا برد الجنه يارب

esTeKaNa يقول...

على نفسها جنت براقش
~~~~~~~~~~~~~~~~~~~~~
اشوة طمنتيني
يعني وضعي طبيعي ان شاء الله
:))










dandash
~~~~~~~~~
حاله دندوشيه؟
وي يا حسره قلبي
عسى مالها اي اعراض اخطر من جذي
قولي لي بليز عشان اتحرص على روحي
:))
واااااي اهم شي السليبر
بعد قلبي هابه الريح طالعه قبلهم
وسليبر؟
جان كشختي رحتي فيه يطلع فنتق زمانه صدقيني
لووووووووووووووووووووول
ومنو اهيا ام البوك؟
واي طلعت المواهب
واحد كله مضيع بوكه
والثانيه تحط البوك فوق السياره وتروح
واي حسافه علينا شباب الكويت وبناتها
:)))

esTeKaNa يقول...

بركان
~~~~~~
hehehehehehe
الله يحفظ الوالده يارب
بخليها قدوتي
:))













5roofa
~~~~~~~~
ما شفتي ويهه
لووووووووول
تعرفين اللي عيونه طلعت فجأة
زين ما بجى
بس قلعته
كل منه اهو دودهني
:))
اي الظاهر بالي مشغول
الله يستر بس

esTeKaNa يقول...

ray
~~~~
تهقين؟
:))
انا مرات ماحب احد يسوق فيني
ومرات اتعسر اذا ابي شي لاني مابي اسوق
صج ابي احد يسوق فيني
مزاج
!!


















mishari
~~~~~~~~~~
واي مشاري لا لا
لا تقولي الكبر شين
توني بزر
:)
لا افا عليك بس
يوم انه مشاري بيمر
تبيني ادوس بنزين؟
ابداا وكلا
نطفي السياير كلهم ونوقف الشارع عشان الشيخ مشاري يمر


عيل تسولف بالموبايل وتدوره
لوووووووووووووووووووول
وتقولي الكبر شين ها؟









anon.
~~~~~~~~~
منو ماخذ عقلي اسم الله علي؟
عقي عندي بالحفظ والصون
بس بالي مشغول بجم شغله
:))
انا ايام الدراسه جذي
كنت ماحس بالزحمه من العالم اللي عايشته بروحي بالسياره ويا هلي اسمعه من اشرطة
بس من تخرجت نسيت الزحمه والتأقلم وياها
!!
واي لا تخرعوني
ان...وان كبيره وايد؟
لا لازم اراجع نفسي

طائر بلا وطن يقول...

لا خلاص مع هالزحمة الواحد تعود
قام يسكت و يكتم و يحط في قلبه
هههههه

الزحمة اختبار لطولة البال
و وسع الصدر

و ممكن تكون من غير لا تدرين وسيلة و طريقة
لتمرين الذات و تقوية قدرتها على التحمل
:p

أهم شي انك اتصلتي على أمك
:D
و بجيتي عاد :)؟


لا ديري بالك .. ثبتي يا استكانة
شكل العواقب الله لا يقول بتكون وخيمة

هذا نفسي يوم دشيت حمام الطالبات بالجامعة
ههههه


كان يوم أسود بكل المقاييس


تصبحين على خير

esTeKaNa يقول...

طائر بلا وطن
~~~~~~~~~~~~~~
هلا بطائر المسا
اللي يسير على البلوق بتالي اليل
ويمسينا بالخير ويطير
:)
والله نظرتك للزحمه يا طائر حكيمه
انا كنت صبورة
بس مادري اشفيني
بهاليوم ما قدرت
دقيت وبجيت
امي مسكينه انا اتعبر وهي تصارخ:
اشفيييييييج؟
اشفييييييييييج؟
خرعتها حبيبه قلبي
:))
دشيت حمام البنات بالجماعه؟
لوووووووووووول
لووووووووووووووول
واي ما اصدق
هذا بوست ثاني غير بوست المدرس كيفك لازم تقول شنو صار
لووووووول
عاد انا كل مكان عام اجابل الصورة ساعه
بنت
اي بنت
اي تنورة هذي
اوكي بنت
يعني حمام بنات
شوف الحرص يالله من فضلك
فيني فوبيا من هالموقف
اشلون كان احساسك؟
:)))

وانته من اهل الخير كله