الأحد، نوفمبر 04، 2007

هذيان استكانه

انشغل عنها بعنادي لنفسي
اتجاهل تحذيراتها المستمره
وبوادرها القادمه بقوه
وأمارس ذات الحماقات :
استمتع ببروده قطرات الماء العذب
وباندفاع الهواء البارد من تكيف السياره
وبنسمات الهواء البارد في كل مساء يبشرني بقرب الشتاء
تتكرر الحماقات،وتقل عندي المناعات
حتى تستسلم قوتي تحت تأثير سخونه تسقطني مابين سريري وغطائي ثلاثه ليال متتاليه
انتفض فيها بردا
وافقد في داخلي صوتا
واتحول لانسانه أخرى
تستغل كل فرصه لتلقي راسها تاره في حضن ابيها...وتاره في حضن امها
انسانه تغمض عينيها تفكر في كل شئ...وفي اللاشئ
!!
.
.
.
يخلو البيت من اهله،كل منهم لاهي في مكان ما.وحدي في تلك الليله كنت انزوي في احد اركانه
يراني ابكي بصمت،يفز قلبه،يجلس على ركبتيه يلبسني حذائي
يرتجف قلقا،ويبتسم كاتما خوفه ،يضحكني طوال الطريق
يختار ابو بكر سالم ليزعج مرضي،.كان يتكلم وانا صامته
يضحك وانا لا ابتسم
تحمل ثقل دمي وضيقي بقلب رحب
يركض بكرسي متحرك يجلسني عليه،انتفض فيغطيني بغطاء صغير ويبتسم
يباغت الدكتور بخوف:دكتور ترا حييييييييييل تعبانه وحرارتها حيل مرتفعه
يرد عليه الدكتور الغثيث:انا يا بني اللي بقول هيا تعبانه وحرارتها مرتفعه ولا لا
!!يصمت
يسأله الدكتور :جوزها طبعا؟
يكركر ويقهقه،ارفع عيني غاضبه:
ترا ما يضحك،الله يكبر حظي
لا دكتور هذا اخوي
!!
يقرر الدكتور الفلته مرضي في لحظة دون فحص ودون اي تحليل كالعاده
واقف بوجهه بشراسه رافضه تشخيصه وحتى علاجه
وارجع برفة أخي الاصغر،اخي الذي اصبح يفوقني طولا وعرضا
اخي...عزي وسندي...حنان الدنيا كلها في قلبه وروحه
يا عسى ربي يفتح عليك ويوفقك ويبلغني فيك
.
.
.
يأتيني صوتها يحتضني من بعيد:
حبيبه عمتها،بنيتي اشفيج
قبل اخذ نفس لارد تدمع عيني وابكي
!!
لما حين اكون مريضه
بضيقه
او ايا كان ما بي
ويقترب مني من احب ،من يفهم نبره صوتي ونظره عيني
ويسألني:اشفيييج؟
لا اجد غير عبره اخنقها وتخقنني لتعلن بانتصار انها قادمه بقوة
فاضحة لاحساس قلبي في لحظتها؟
.
.
.
تنظر لي بفرح،وتبتسم ابتسامه مشرقه، سعيده بنقصتها:
ترا انا رحت كاريبو شاريه لج بمبكن كيك تحبينها عشان تاكلينها قبل المضاد لانج مو قاعده تاكلين شي
!!
عشر سنوات تصغرني بها أختي الوحيده..والله وكبرتي وقمتي تتنقصين ويا الويه
يا زييييييينه من ويه
:pP
.
.
.
في حضنها وضعت راسي،اتأمل عينيها وهي تضع كمادات الماء البارد على وجهي وتبادلني الحديث
شعرت للحظة بأني سعيده بمرضي
بالدلال المحيط بي
بتلك الاعين التي تناطرني في كلي حين
سعيده باتصالات اقاربي ..واهتمام الجميع
سعيده،رغم انها ثلاثه ايام ومرض بسيط
ربما انا اقدس الاحساس،وللكلمه لدي الف حساب؟
.
.
تظن امي ان من يزرع الحب يجد حبا
ومن يتسع قلبه للدنيا...ستتسع له حتما
أحب أسرتي...تلك الجمله حين كتبتها ابتسمت ،وكأني اكتب تعبير مدرسي
ولكني فعلا..أحب اسرتي،هناك نوع من التوازن النفسي والعاطفي اجده هنا
في قلبي بيتي،وبين اخوتي وبوجود أمي وأبي
كلمات طفوليه....ولكنها حقيقيه
تصدقون؟
أحيانا اتمنى فعلا ان اكون قادره بناء اسره سعيده اعكس فيها استقراري الذي عشته في حياتي
اللهم لك الحمد
!!
ثلاثة أيام من الصمت جعلتني اتأمل العديد من النعم حولي
بدءا بصحتي...مرورا باحساسي ...وصولا لارتباطي باهلي
.
.
.
حان وقت مضادي الحيوي
ومحاوله النوم مرة أخرى
اتمنى ان اكتب بوست اجمل
واقصر
والذ
تحملو هذيان استكانه تحت تأثير ارتفاع الحراره الموسمي
:)
تصبحون على خير

هناك 64 تعليقًا:

Q80MINI يقول...

ماتشوفين شر سلامات
بلشت عندي الدوخة
كلها يومين وشكلي بلحقج:)

Fahad Al Askr يقول...

سلامات يا الغالي سلامات

رحـّــال يقول...

سلامات
وماتشوفين شر انشاءالله

على سالفة الدكتور المصري اللي يشخص المرض قبل الفحص.. صارلي موقف طريف أيام الجامعة

كنت في عيادة أحد الأطباء الذين أكن لهم احتراماً كثيراً
دخل مريض، تحدث قليلاً، فسأله الطبيب سؤال أو اثنين، ثم وصف له دواءً وخرج قبل أن تمضي ثلاثة دقائق

ثم دخل مريض آخر، في نفس العمر، وبنفس الأعراض، فسأله الطبيب نفس الأسئلة.. وكانت هي هي نفس الأجوبة.. إلا أن الطبيب طلب من المريض أن يكشف عليه، فاستمع لرئتيه وقلبه، وفحص عينيه وفمه سريعاً، ثم وصف له نفس التشخيص ونفس الدواء..

استغربت.. سألته ولم أعطيت الثاني وقتاً أكثر؟

ابتسم ابتسامة العارفين وقال بأن الأول يعرفه منذ مدة طويلة ويثق به كل الثقة، أما الثاني فإنه ذو شخصية مختلفة، وإن لم أبين له اهتمامي الزائد، فإنه غداً إما أن يرجع للعيادة هنا أو يذهب لأخرى، وفي ذلك ضياعٌ لأوقات الجميع.. إن كنت واثقاً من التشخيص فعليك أولاً أن اتمنح المريض ثقتك قبل أن تمنحه رأيك

ياريت لو هالدكاترة عندنا شوي يتعلمون من هالدكتور

:))

عبدالرحمن يقول...

ماتشوفين شر

صج نعمه تستحق الحمد
الاستقراري الاسري شيء عظيم

الله يحفظج لهم ويحفظهم لج

ويقومج بالسلامه وانشالله عدوينج :)

ZoZOta يقول...

سلامات حبيبتى

وما تشوفين شر

عليج بشاي الزنجبيل الأخضر

وشوربة الدجاج

وان شاء الله ما عليج الا العافيه با بعدهم

:*

الدائرة الخامسة يقول...

مبدعة حتى في مرضك
وقبل هذا
ما تشوفين شر .. وطهور ان شاء الله
وألف لا بأس عليك

كما في عافيتك التي أدعو الله ان يمتع فيها
في مرضك تحولين الكلمات لشعور جميل دافي مليء بالحميمية والدعوات الطيبة والدفأ العائلي

ادعو الله ان تقر عينك هنيئه بالعافية
وان يمتليء جسمك بموفر الراحه
وان تتزينين بتاج الصحة

وربما تكون هذه الحالة لحظة حب مع الله
فأن الله سبحانه وتعالي اذا احب عبد أبتلاه

ودمتي بصحة وعافية

Mishari يقول...

لا لا خطاج السو وسلامات
:)

Q8i_Blogger يقول...

سلامات

والله يخلي احبابج لج .. ويقومج بالسلامه

على نفسها جنت براقش يقول...

مأجوره ان شاء الله
و فعلا الاهل ماكو مثلهم
مثل الفاكهه كل من له طعمه ووقته

غير معرف يقول...

السلام عليكم والرحمة

الف سلامة اختي استكانة والله لم استطع هذه المرة أن اقرا بصمت ولا ارد الله المستعان..ترقرقت الدمعة بعيني..طهوور ان شاء الله غاليتي..

أختك أمل
MissHope

DiLLi O MiLLi يقول...

سـلالالامااات مااا تشوووفين شـــر
أنا أقول الأستكانة اليوم حارة ما تنمسك !!؟؟
لالا ماكو ألا العافية
هالأيام تغير الجو .. يمرض فتحرصي

كالعاده
الطبيب بس يطل بويهج ويعرف اللي فيج
من هبابة الريح والشطارة ماشاء الله عليهم
أقولج سالفه حصلت من 3 أسابيع
حق وحده عزيزة علي
ودوها بنص الليل لطوارئ مبارك
ماتحس بينبها اليمين .. خدور بالويه وأييدها ما تفدر أتحركها
ولا تقدر أتكلم
أول ما شافها الدكتور
على طول أفتى أنه "بو الويوه"!! بدون فحص ولا أشعه ولا تحاليل
وصف لها همجة أدويه كورتيزون .. وخلاها تروح البيت
من صار الصبح .. خذوها مستشفى خاص
تدرين أشطلع فيها ؟؟؟
جلـــطه !!! حسبي الله ونعم الوكيل
أشوه ما زادة عليها بالليل جان راحت المره !!!ء
:(

يحليلج يا أستكانة
مكسوره وتبرد
حتى وأنتي مريضة .. مبدعة
ما شاء الله (مع أني ما أنضل)ء
:)

أحلا شعور بالدنيا لمة وتواصل الأهل
اللــه لا يخليـــج ياااارب


:)

lawyer يقول...

سلاااااامااااااااااااااااات


حياااااااااااااااااااااتي

بعد قلبي

اقرا بووووووووستج

يعصرني قلبي



لا باااااااااس طهور

سوووووووووري على امس

انتي ادرى شنووووو صاااااااار



الله يحفظ اهلج و يخليهم لج

وووووووووووووالله دعييييييييييييت لج
و امنت عليج

يووووووووم قلتي عسى ربي يرزقج
اسرة سعيده و صالحه يااااااااااااااااارب

aThooB يقول...

الانسان عند المرض
يتذكر النعم اللي حوله
واللي ممكن طموحه و مشاغل حياته يخلونه يغفل عن تذكرها
الحمدلله رب العالمين

سلامات و ماتشوفين شر اختي استكانة
طهور ان شاء الله

New Bride يقول...

سلامات و ما تشوفين شر

و الله يتمم عليكم احلى شي بالدنيا العلاقات الأخوية و الله استغرب لمل ادخل بيوت ناس نا عندهم هالشي

تدرين متى اكثر وقت راح تولهين عليهم

؟؟ لما انشالله تتزوجين

حسيت فيها صدقيني

محـــــارة يقول...

هلا وغلى بحبي ماتشوفين شر يالغاليه طهور إن شاء الله

الله يخليلج اهلج ويسعدج بقربهم وينور دربج ويشبع أحساسج وقلبج بحبهم بوقت المرض وبصحة والعافيه دوم بعون الله

هذا أحنا لما نتكلم عن مشاعرنا نحس روحنا أطفال بس ياحلاتها من طفوله دام فيها رسومات وكلمات تطلع من القلب للي بالقلب

bin3li يقول...

سلامات سلامات
الزجمة فايحة هالأيام
خذي بريك نقاهه و بانتظار جديدج :)

someone_q8 يقول...

السلام عليكم
سلامات ماتشوفين شر
وخطاج السوو اختي
وان شاء الله كل ما تعانين منه من الم فهو خير لانه يأخذ من سيآتج ويمحيها , ومن منا ليس لديه سيئات ؟
اسأل الله العظيم رب العرش العظيم ان يشفيج ( سبع مرات ) , واهم شيء ان اتحطين ببالج ان كل شيء فيه خير حتى المرض وكفاية ان الكل حواليج وهذه نعمة ما بعدها نعمة
لك مني كل تحية واحترام

مشاري الهاجري يقول...

سلامات وما تشوفين
شر

كثري من البندول والمضاد الحيوي اخذي دبل عشان تطيبين بسرعه

وسلامات

charisma يقول...

وي وى وى يا زيينه من هذيااان عسل عسل على قلبى
سلالامات يالغالى سلالامااااات
الف لا باااس واجر وعاافيه يالدلووووعه
:))))

:***
الله لا يحرمج منهم يا شيخة البنات انتى
ويخليهم لج ذخر اميين يا استكانه

واتمنى تكونين الحيين احسن وبالف خير
يااا رب
:*

حطى بالج على نفسج
:(
قمت احاتيج

nadeyah يقول...

سلامات ما تشوفن شر هذا تغير الجو
والله يحفظ لج اسرتج

shakshaka يقول...

3estekanoo? ma3adaiteeeehum?:P wa3alaya wana agraaa weeedi 3la galbee agool 3sa ma3adat;hooom:P


lool la la 3ad kilshay wala estekanaaa 3ain esai7 salamaaat yal ghaaali salamaaaaaaaaaat matshofeen shar enshallla .. (K)

SolaimaN يقول...

احساسي ماخاب :(

لاباس عليج ،،طهور انشالله

Very.Q8ya يقول...

hal-hathayaan ya 7alata min hathayaan :** salamtich yal ghalya yal 7abeeba salamtich ;***

o allah yekhaleech 7ag ahalech o yekhaleehom lich golay ameeen :*

ya 7alat ekhtch 7abait'ha wehya metnaqsatlich LOL! zoqa ;*

عــــاشــــه يقول...

سلامات وماتشوفين شر يالغاليه

عليج بالسوائل والتبوله والأناناس

غير معرف يقول...

اجر وعافية
الله يخلي اهلج لج ويطول باعمارهم انشاالله

q8-diver يقول...

هذه حزة الصفري

يعني الله يعنيا و ياكم على الجو

:(

ما تشوفين شر إن شاء الله

ZoZOta يقول...

استكانه

انا داشه اتطمن عليج

هاااا

غلبتى الفلو لو غلبتج

:*

اجر وعافيه حبيبتى

بنت الشامية يقول...

اجر وعافيه يااحلى استكانه
وما تشوفين شر ....والله يخليي لج اهلج
هم عزوتج بهالدنيا
الله يحفظهم لج
وسلامات

7osen يقول...

ماتشوفين شر يالغالية

وسلامتج الف الف سلامة

وعسى الله يخليلج أهلج ولا يحرمج منهم ولا يحرمهم منج

كلامج كالعادة خاطب القلب والروح

تحياتي لج عزيزتي
اتمنالج كل الصحة والعافيه

|:| DUBAI |:| يقول...

Ajer o 3aFya ya Sis,,

MaShofeen Shar !

o allaH y7f'9 Lech Ahlech ya rab !

Najmah يقول...

سلامات يااستكانة اجر وعافية يارب
وعسى ربي يخلي ج كل اهلج واحبابج

توني صحيت شوي من المرض صج حسيت بهالمشاعر :)

charisma يقول...

يا ربى تكونين احسن من اول
:*
من غير شر

الـفــــجـــ الــبـــعـــيـــد ــــــر يقول...

صباح الخير..

الحمدلله على السلامة وماتشوفين شر الغالية

والله يديم المحبة مابينكم يارب

SolaimaN يقول...

خنت حيلي اخيتي مخنجره هاليومين

:(

امرج باجر اوديج الخطيب ؟

:P

اجر وعافيه يا يا يا يا يا

مادري شقول....!!؟
























يا شمعه البلوق كله والله

ZoZOta يقول...

لأ لأ لأ

انا عن جد بديت انشغل عليج

شلونج يا بنية

لما الحين تعبانه؟؟؟

يغربلها من فلووووو

ابر يا استكانه

مالج الا الأبر

:*

اجر وعافية يالشيخه

ray يقول...

استكانة موضوعج مرضني وياج

"sniff""sniff"

Kuw_Son يقول...

يبيلج استكانة جاي لومي
:P

سلامات و ما تشوفين شر و خطاج السو و عسى الله يقومج بالسلامة ..

الله يحفظج و يحفظ لج من تحبين و أهلج أجمعين :)

Sn3a يقول...

الف سلامه انشالله
ماتشوفين شر

تدرين
انا حالتي بالمرض مشابهه لحالتج خصوصا ويا اهلج

عندي اخوي كله معاند الدنيا وكله مظهره قاسي
لما امرض يضيق خلقه حيل وكله مجابلني


الله يخليلنا اهلنا
ويحفظهم ويطولنا بأعمارهم انشالله

DanDash يقول...

سرمات استكانة و ما تشوفين شر ان شاء الله

و الله انا صرت ما اثق بالمستوصف الصيف حاشتني انفلونزا و ما احس روحي اشوى اشوي الا تزيد و الكحة الي تعور القلب و كل ما رحت لا ده التهاب في الشوعب الهوائية معلش ياخد وقت

ودتي اختي الله لا يخليني و لا يخليج ان شاء الله و اشوف الدكتور الظريف ابراهام و ينكت و يستظرف دمه و انا مالي خلق و يعطيني ابرة ليومين و تحاليل و الدوا بعد التحاليل طلع عندي حساسية و وصفي الدوا و الحمد الله و من يومها و انا قررت لالا للمستوصف لالالا

qesat_5ayal يقول...

ما تشوفين شر

طهور إن شاء الله

Talal يقول...

ماتشووفين شر اختي الكريمة

أجر ان شاءالله

والله يخليج هالعائلة ..
ولا يحرمكم من بعض اميين

..
نفس الحالة الماي البارد وتكيف السيارة

Talal يقول...

ماتشووفين شر اختي الكريمة

أجر ان شاءالله

والله يخليج هالعائلة ..
ولا يحرمكم من بعض اميين

..
نفس الحالة الماي البارد وتكيف السيارة

Talal يقول...

ماتشووفين شر اختي الكريمة

أجر ان شاءالله

والله يخليج هالعائلة ..
ولا يحرمكم من بعض اميين

..
نفس الحالة الماي البارد وتكيف السيارة

حمودي يقول...

ماتشوفين شر انشاله

a7La eNG يقول...

مراسلكم من عندها
:P

الحمدالله صاااارت احسن بوايد
يزاكم الله خير كلكم

راح الكثير و باجي الدلع بس
hehehe laa et3a9been 3laay :*

Selezya يقول...

اولا عسا الله يخليلج كل من حولج
وماتشوفين شر وسلامات
بتقومين بالسلامه انشالله لان توووووني الحين صحصحت من المرض اكلني اسبووع كامل ماكو شي ماصار فيني
بس الحمدلله الحين وايد احسن :)

الجو وتغيراته

charisma يقول...

طق طق ياا هل البيييت

احلى انجنيير
حبيبتى انتى الله يطمن قلبج انج طمنتينا على الدلوعه
:))

الله لا يخليكم من بعض
واجر عافيه يا شيخة البنات
:*

5roofa يقول...

سلامااات سلامااات

امبي شفينا على المرض تصدقين بالجو والله انا صارلي دهر ولا راضيه اروح الطبيب مادري ما قمت احبهم عندي ابلع بالبندول ليما اطيب

اجر و عافيه يالغاليه و ربي يخليلج اهلج يارب

salamz sweetee..

SolaimaN يقول...

ahaaaaaa



جذيه السالفه ،،، مابقى الا الدلع ؟


اشوه الحمدلله


:)


تعقبنا عليج العافيه يا اخيتي



لج وحشه والله

SolaimaN يقول...

اسف ،،، شكرا احلى انجنير



والله انج احلى رفيجه



:)

b9mah يقول...

استكانة
ادمعت عيني وانا اقرى البوست
لاتسأليني ليش


لاباس طهوره ان شالله
: )

esTeKaNa يقول...

واي انا مبتسمه ابتسامه عريضه وانا اقرا هالتعليقات الحنونه علي
!!
تدرون اني انا احبكم صج؟
صج يعني من قلبي
حلو الانسان يكون له عايله وحبايب هني بالنت،عسى الله لا يخليني يارب
صار لي فتره عايشه على الماي وبس
وهذا اللي متعبني صج
:(
بس افز من النوم احس انه راسي يفتر
وبس اسوي لي جم مشوار احس بصداع متعبني
وهذا اللي مبعدني عنكم هالفتره
معدتي اللي متصاومه عن الاكل وشويه ظروف هني وهني
:(
عسى الله لا يخليني منكم يارب
والحين اقدر ارد على شخص شخص
:)

esTeKaNa يقول...

q8mini
~~~~~~~~
الله يسلمك من الشر
عدو يومين...وأتمنى انك ما لحقتني بالمرض
بشر اشلون صحتك؟




fahad alaskr
~~~~~~~~~~~~~~
الله يسلمك من الشر يا بو عسكر
:)





رحال
~~~~~~~
الشر ما يجيك يا دكتورنا
وصراحة...عجبتني قصه هذا الطبيب
صراحة ذكي
!!
كثير من الاطباء ما يقدرون نفسيه المريض وهذا اهم من المرض نفسه
انزين بما انك دكتور قولي
اشفيني ماني قادره اكل ولا شي
فاقده متعه التلذذ بالاكل
اكل اقل القليل فقط لاعيش واكل لي حبه او حبتين من الدواء
:(












عبدالرحمن
~~~~~~~~~~
الشر ما يجيط يا طويل العمر
والحمدلله عسى ربي يتمم على الجميع استقراره وسعادته
عدويني؟
ما من عدوين وللله
:))
















zoozota
~~~~~~~~~~~
هلا بالزين والله هلا
هلا بالغاليه اللي اهتمامها فيني يفرحني
تدرين؟
والله كل ما ضايق خلقي ومافيني اقرا شي من الكتب والقصص اللي عندي،كنت بسكات ادش بلوقج
اقرا شميس وبزه
وقرا لي جم قصه
وافتر في بلوقج وارد
ودي اكتب لج اشيا وايد بس احس مابي اكتب اي كلمه وامشي واظلم هالبوستات الحلوة
:)
انا بخير ان شاء الله
الله لا يخليني يارب







الدائرة الخامسة
~~~~~~~~~~~~~~~~
يا سلام يا اخوي
ابدعت انته في اناره جانب ايجابي لي وصفت فيه حالتي من خلال كلمه حاله حب مع الله
!!
دعائك اثلج صدري
وطيب خاطري وافرحني
اللهم امين واجمعين يارب
:)
وشكرا على مرورك
وعلى كلماك الرقيقه دائما في حق هالكلمات اللي اكتبها













mishari
~~~~~~~~~
الله يسلمك ما قصرت
:)








q8iblogger
~~~~~~~~~~~~~
امين
والله يسلمك من الشر ما قصرت
:)










على نفسها جنت براقش
~~~~~~~~~~~~~~~~~~~~~~
يا سلام على التشبيه والتعبير البليغ
الله يسلمج ما قصرتي
:)

esTeKaNa يقول...

أمل
~~~~
وعليكم السلام ورحمة الله وبركاته
يا بعد قلبي والله ...الله يحفظج ويسعدج وآاسفه ان ترقرقت دمعتج بسبب كلماتي
اتمنى ان تكون دموعك دوما دموع فرح يارب
:)











dilli o milli
~~~~~~~~~~~~~~~~~
هلا وغلا...هلا بالطيب الغالي والله
:**
وااااي اسم الله عليها اشوه انها تحرصت وما خذت بحجوته،مرات الواحد من كثر التعب يصدق اي شي
!!
وليش تروحين بعيد؟
العام انا ليله راس السنه واحد واحد كنت بالاميري،مرو علي جم خفاره
تخيلي اول خفاره قالو فيني دوده زايده
الثانيه قالو حصوه مراره
ويوم اده الفير قررو انه لا يودوني الولاده
!!
وانا انقلبت جني ذيبه من يقولون لي شي صرخت :
لااااا ما فيني ما فيني
انا ادرا بروحي ما فيني
!!
والله ونقضي السهره بالاميري انا والدرب
وافج عيوني الصبح الا امي وابوي بعد قلبي متربعين على فراش جبالي ياكلون جباتي وجاي حليب ويكركرون ويسولفون
ماني قادره انسى اشكالهم ضحكوني
:))
وزي ما رحنا ردينا
ولي يومج مادري ذيج الليله شنو كان فيني
:)))
مبدعه؟
وي عسى الله يجبر بخاطرج يارب
ويا حلو النضله جانها بتييني منج
:**














Lawyer
~~~~~~~~~
اجمعييييييييييين يارب قولي آمين
واي فطومه مادري اشفيني
!!
احس صايره جني سيلانيه وانا اتشكى
مو عادتي جذي
بس احس اني شي ويذبل
!!
بس ان شاء الله بصير احسن
:)














athoob
~~~~~~~
اي والله صاجه يا العذوب
الشر ما يجيج وما قصرتي يا الغاليه
الله يحفظج ويحفظ لج بنياتج الحلوين
:)















new bride
~~~~~~~~~~~~
الله يسلمج من الشر
ترا البيوت المترابطة نادره
الله يحفظ لج اهلج ويقدرج تكونين اسره طيبه ومترابطة وحبيبه مثل اسرتج
قولي آمين
:)))













محاره
~~~~~~~
هلا بانعكاسي بروحي هلا
الله يسلمج من الشر ما قصرتي
اللهم امين واجمعين يارب
وفعلا حسيت روحي طفله ترسم كوخ وبحيره
وتكتب انا احب اسرتي
ليش موخ ووبحيرة مادري...بس يمكن لأني طوال طفولتي كنت احب ارسم هالرسمه
:))











bin3Li
~~~~~~~~~
اخيرا اخيرا...اول مرة بن علي يعطيني بريك نقاااهه
يا بختي
:))
الله يسلمك من الشر
ماقصرت






someone-q8
~~~~~~~~~~~~
وعليكم السلام ورحمة الله وبركاته
الله يسلمك من الشر وما قصرت اخوي
ويزاك الله خير على الدعاء وكلماتك الطيبه
والله هالكلام الطيب مثل الماي البارد على قلبي
:)












مشاري
~~~~~~~~
الشر ما يجيك ما قصرت
انا بدعت بالمضاد...انساه
:(
بس ان شاء الله قاعده اطيب والحين احسن
ما قصرت يا مشاري
:)

esTeKaNa يقول...

charissma
~~~~~~~~~~~~~~
واااي حبيبتي انتي
واي انا صايره دعله لاحظتيني؟
انا الحمدلله وايد احسن
بس معدتي مضيقه خلقي
ماني قادره اتنطع باكل
اغصب روحي على عصير ولا فاكهه وبس
فاحس مافيني طاقه
!!
كله دايخة وراسي يفتر
ابي اكل بس ماني قادره اكل
وامي وبعض الناس عبالهم اتدلع
:Pp~
والله مو قاعده اتدلع
وان تدلعت بعد يحق لي
ولا شرايج
:))
حبيبتي انتي اشلونج؟
اشلون روحتج الويك اند اللي طاف عسى استانستي؟











NAYdyah
~~~~~~~~~~
اي والله تغير الجو الكل مريض
والله يسلمج ما قصرتي
:)
















shkshaka
~~~~~~~~~~~
LOOOOOOOOOOOOOOOOOOOOOOOOL:)))
واي طاعي شنو تحاتي؟
واي انا حسيت علي حجر صحي الاسبوع اللي طاف...بنت خالتي حامل ولهانه عليها ماتبيني
!!
ويدتي مريضه بزورها يقولون لي لا لا تروحين لها
:(
حبيبتي الشر ما ييج ما قصرتي
:)



















SOLaiman
~~~~~~~~~~~
شنو احساسك اللي ما خاب؟
واي حجوة مخنجره
وتالي شمعه البلوقات
واي ختقنتي العبره
شوي عن اذنكم بروح اتكتر فيني بجوة
:(










بس خلصت بجوتي
الحين يا سليمان شفت اللي داشين عرض يوقولون اتدلع؟
اي اشفيها
!!
الواحد يحصل له فرصه كل يوم يتدلع؟
:))
ترا كل كومنت منك فرحني
لا خلا ولا عدم ما قصرت
:)

esTeKaNa يقول...

very q8
~~~~~~~~~
يطلع مني حجي سنع وانا اهذي؟
يا حليلي
:))
ايي لاحظتي نقصة البمبكن؟
يا حلوها حبيبتي بدت تصير سنعه
ولو انه خطواتها في عالم السنع بطيئه جذا بس في تقدم
hehehehe
امين واجمعين ...الله يسلمج من كل شر ما قصرتي
:)








عاشه
~~~~~~
ابي جاي كرك
:(
تدرين عيزت ابي ادز لج مسج مو راضي تليفوني يرد على المسج الحلو اللي جاني منج
:(
وشكرا على النصيحه
ذكرتيني في التبوله...يبيله تبوله
:)

















anon.
~~~~~~~
شكرا ...وامين اجمعين يارب
ما قصرت يا صاحب التعليق المجهول
:)













q8i-diver
~~~~~~~~~~~~
@@
ياهلا ويا مرحبا
من وين طالع؟
:)
اي والله الله يعين الجميع الجو يمرض
والشر ما ييك ان شاء الله











zozota
~~~~~~~~~~
هههه
كنا في صراع
تغلبني واغلبها
بس استكانتج سبع سبع
غلبتها في النهايه
:))
















بنت الشامية
~~~~~~~~~~~~~~~~
الله يسلمج من كل شر ما قصرت يا شيخة الشاميه...الله يحفظج ياربي ويحفظ لج عيالج وأبيهم ان شاء الله
:)











7osen
~~~~~~~~
الله يسلمك من كل شر يا حسين
والله يحفظ لك اهلك يارب
ويسعدك مثل ما انته دايم تطيب خاطري بكل كومنت
:)










dubai
~~~~~~~~
الله يسلمج من الشر
وامين اجمعين يا دبي
ما قصرتي ...يا زينه بنات الامارات
:)











najmah
~~~~~~~~
حبيبتي سلاماتج من الشر يا الغاليه
ويالله هذا الجو وما يسوي
والظاهر عيزنا يا النجمه صرنا عيايز
:))))













charissma
~~~~~~~~~~~~
:**
واي الله لا يخليني من هالحس
استانس كل ما شفت منج كومنت








الفجر البعيد
~~~~~~~~~~~~~~
اللهم امين يارب
وشكرا من القلب ما قصرتو
:)













solaiman
~~~~~~~~~~~~
رديت عليك فوق
بس برد مرة ثانيه بقولك ترا قلبي يعورني اذا احد سوا لي جذي
:(
وبعدين كل شوي ابجي؟
ترا صايرة ام دميعه خلف الله علي
:))











zozota2
~~~~~~~~~~
واااااااااااااي ما احب الابر
بس الدنيا حدتني عليهم
ولا اخيتج مثل الياهل
للحين اتنافض اذا قال الطبيب ابره
:)
بس انا بخير الحين الحمدلله













ray
~~~~~~
لا لا
لو سمحتي ابتعدي ابتعدي عن البلوق
:pP~














KUw_son
~~~~~~~~~~
الله يسلمك من الشر
وأمين اجمعين يارب ما قصرتي
ايييييييييه يبيله جاي لومي
بس انا مزهبتها حق البرد الشديد
وخيمه
وهوا لذيذ
حين ذاك لابد من استكانه اللومي
:))

esTeKaNa يقول...

sn3a
~~~~~~
اللهم امين يارب
ويبعد عنا وعنكم المرض
مرات...نحتاج نشوف غلاتنا بعيونهم
والجانب الايجابي حق كل ضيقه تزور الانسان اهي احساسه بغلاته عند القلوب اللي يحبها
الله يحفظ لج اخوج يا السنعه
واهلج وكل من تحبينه
:)










dandash
~~~~~~~~~
الله يسلمج من كل شر يارب
وييي اسم الله عليج الرحمن الرحيم
!!
لا خطاج السو ما تشوفين الشر
اي المستوصف ظيييييييم
اقولج انا ما سوا لي شي غير الحراره وطل بويهي وقرر من روحه فيني التهاب حاد؟
شدرااااك فيني التهاب حاد؟
عسى الله لا يطيحنابين ايدهم بس
واجر وعافيه يا الدندش
:)



















qesat-5ayal
~~~~~~~~~~~~~~
الشر ما ييج ما قصرتي
:))











TaLaL
~~~~~~~
الشر ما يجيك
وجزاك الله خير ما قصرت
الله يحفظك ويحفظ لك اهلك وحبايبك
وفعلا...المكيف البارد في هالجو صاير سبب رئيسي للمرض
للله يحفظ الجميع
:)













حمودي
~~~~~~~
الشر ما ييك انشالله
:)




















a7La_eNg
~~~~~~~~~~~~
وي يا زين المراسلين والله
hehehehehe
احد يحصل له فرصه يتدلع وما يتدلع؟
ولا شرايج يا ام عذاب؟
:Pp~












SeLezya
~~~~~~~~~~~
الف الحمدلله على سلامتج
انا اليوم بخير والحمدلله
بس قلت لكم...الاكل مضيق خلقي
تخيلي صار لي شكثر ماني قادره اكل شي
:(
بس الله كريم

















charissma
~~~~~~~~~~~~
الله يعافيج يا اغلى من الغالين والله
:**

esTeKaNa يقول...

soLaiman
~~~~~~~~~~
ما يوحشك غالي
فداك الف غالي
:))
شكرا سيلمان على كل كومنت
انا مريحة ملائكتي شوي ومريحتكم منكم
بس ابشر ابشر...يايتكم انا وقرقتي بالطريج
:)































b9mah
~~~~~~~
لا لا كل شي ولا الدموع
اسم اله عليج الرحمن الرحيم
ماكو شي بالدنيا يسوا دمعه من عيونا ترا
واذا ضايق خلقج علي ..ترا هااا
انا زي البومب
زي الحصان
:))

عثماني يقول...

سلامات استكانة

اتمنى مرض كمرضك ..شريطة وجود احباب كاحبابك

الله يحفظكم لبعض

يعقووبوو يقول...

ذكرتيني بهذياني لما اصير مريض |:

لي درجة اسميها هلاويس مو بس هذيان ×:

يعقووبوو يقول...

هلاويس يعني هلاوس
سوري (:

magnoonah يقول...

الي كنت بقوله

سلامات وما تشوفين شر يالغاليه

خطاج السوء
:)

انا اسفه متاخره بس ترى امس الفير دريت انج تعبانه

ولا انتي تدرين مالنا غنى عنج



يالله بسج دلع وردي مثل قبل فراشه بين المدونات تنشر الفرح والسعاده بكلامها الي يدخل القلب ويتربع فيها

ولا تنسين هالله هالله بالسوائل ترى وايد مفيده لحالتج


دمتي بصحه وعافيه
:)

esTeKaNa يقول...

عثماني
~~~~~~~~~
لله يسلمك من الشر
وعسى ربي ما يبين غلاتك من شر
:)














يعقوبو
~~~~~~~~~~
هلا هلا
الله يعافي هلاويسي اللي خلتني اشوف تعلقيك:)
الله يسلمك من الشر








مجنونه
~~~~~~~~~~
يا بعد قلبي قلبج انتي
افا عليج بس...مسموح يللي تعذر
اهم شي انج انتي تكونين بصحة وعافيه وكل أمورج تمام
والله يعنيكم علي كاني يايه بقرقتي
بدل اسبوع الصمت اللي مر
:))

Mamloo7a Q8ia يقول...

سلاماااااات يالغاليه سلاااااامات
ما تشوفين شر ان شاء الله واجر وعافيه يا رب . تدلعي على كثر ما تقدرين هو حد لاقي يدلعونه ويقووول لااااا؟؟؟؟