الأربعاء، أكتوبر 24، 2007

!!الفاضي يعمل قاضي

بعد اربعة اشهر من البطاله،وانقضاء رمضان وأيامه،نام من كان يشاركني السهر وعادت اسرتي لروتينها مع بداية الدوام وانتهاء نهار الصيام
اشعر بالفراغ،وليلي يشابه الصباح
في صباحات كثيرة،اعد قهوتي،واجذب معها جريده صباحيه،وابدأ بممارسه متعتي:
الو السلام عليكم،اختي حاطين اعلان عن دورة ممكن استفسر؟
الوو السلام عليكم،لو سمحت اخوي حاطين اعلان عن امتحان توفل متى بيكون وقته؟
الوو السلام عليكم..لو سمحت حاطين اعلان عن كذا وكذا؟
وهذي حالتي
!!
بعد سنوات قليله،قد اتصادف مع مجموعه ممن تخرج معي بذات السنه،منا من قد يكون طور نفسه في العديد من المجالات
ومنا من سيكون قد اوقف مخه منذ ذاك الحين واعدم اي مصادر للتطور بعد انتهائه وادائه لواجبه بأخذ شهده جامعيه والسلام
لا اريد ان اعاني من عدم لياقه عقليه بعد كم سنه
.
.
.
.
يومين بالاسبوع دورة في أحد المراكز الصباحيه،ترافقني وتزاملني رفيقه دربي (أحلى انجنير)،المشكله ليست في الدورة ولا في موعدها ولا في المسؤلات عنها،بل المشكله في زميلاتنا بالصف اللاتي هن عباره عن متقاعدات،وعجائز ونساء كبيرات بالسن
في منتصف الشرح تدخل واحده عرض بنص الشرح
او تشيل التليفون وتخرج فجأة من الفصل
غير الاسئله العجيبه التي انبهر فيها وأجاهد نفسي في قتل ضحكتي في حينها
الحمدلله...الدورة الصباحيه اعطتني رضا داخلي عن نفسي وسنعت نومتي ،اتمنى الاستمرار وتحقيق انجاز آخر
.
.
.
.
سجلت بامتحان التوفل،الامتحان الاول درجتي سببت صدمه لي ،،احاول استثمار صدمتي في الامتحان الثاني،ويا انا يا هالتوفل
:)
بعد نصائح عيال عمي وبنات خالتي ،اشتركت في دورة( اي سي دي ال)يقال انها مطلوبه حاليا في اكثر من مكان ومهم جدا ان توجد في ملفي الشخصي حين التقديم لاي وظيفه،اشتركت فيها ومدتها شهرين،ومادري ليش شايله همها ومستثقلتها
بس شسوي؟...مجبر اخاك لا بطل
افكر حاليا في التسجيل في نادي رياضي،اذا ربي كتب وسجلت اكون قد ملأت يومي من الصباح الى المساء
احتاج للياقه صحيه،واستثمار طاقتي بشكل جيد
هل من اقتراحات أخرى؟
:Pp~
.
.
.
ارتب افكاري وخططي،واقولب فيها يسار ويمين ،ومخمخها في بالي ،وانتظر بشغف وقت اجتماع امي وابوي وشرب جاي العصر لاخرج من غرفتي و ،انطلق
في شرح مخططاتي واهدافي وطموحي وشنو بسوي وما راح اسوي
يباغتني ابوي بسؤال :
يبه انتي شنو في بدارج؟
ينانوه تحجين وياهم طول اللليل وتيينا كل شوي بخطه؟
تكسر امي من مياديفي اكثر:
اليوم في اربع وعشرين ساعه،انتي جم ساعه تحتاجين؟هيعي وانا امج
!!
يتمتم ابوي بدعاء :
يالله يارب تتشغلين وتفكينا شوي من هالحنه
وتدخل امي بدعاء آخر سمعته وسويت روحي ما سمعته
هل انا عاله على المجتمع؟
ام وضعي مو طبيعي؟
مشكلتي الأزليه اني أفكر وأخطط بصوت عالي،مشاعري وكل ما فيني له صوت
اشششش...محتاجة اكون سايلنت شوي
:)
.
.
.
.
استكانه في أحسن حالاتها...انا بخير
فوق النخل؟
لا ...انا فوق السحاب

هناك 47 تعليقًا:

Najmah يقول...

عسى ربي يكتب لج الخير بكل خطواتج ويوفقج

خوش مشاريع استغلي وقتج وكملي :)

من الحين أدعي اذا تخرجت أتوظف على طول مااعرف أقعد جذي :")

وان شاء الله دوم فوق السحااااب =)

Very.Q8ya يقول...

LOL! la mafeech shay, o wath3ich 6abee3ey, bs ana agol istathmerray hal 3e6la o ikhtthay dawrat o 6awray min nafssich ib majal takhasosich + il-majaal ili raa7 teshtaghlaain feeeh .. o b3dain 4 sh'hor, tra muDDa 6abeeee3eyya JIDAN :p la yetheg khelgich o la tetkaderaain .. la7ga 3al sheghel, ilsheghel mara7 ye6eer, o inshallah yarzgich rabbich bil mokan ilzain ;)

bin3li يقول...

و الله خطوة زينة
الله يوفقكم

:)

Zabo0o6a يقول...

عساج دايم عالقوة .. يالغالية
فاهمة احساسج لما يكون الف مخطط ببالج نفس الحالة بس انا اقعد واهذر مع روحي تهقين يحوشني ينون؟
بس زين تسوين قضي وقتج ولا مجابل الطوف

على نفسها جنت براقش يقول...

شلونك
لا تخلين احد يكسر مجاديفك
صيرى مثلى ثانى ماجستير و بروح امتحن و مو دارسة شى و ما ظلت دورة ما خذيتها
و الكل يقول لى الى متى و انا ارد
تو الناس

3ebaR يقول...

وضعج طبيعي جدا ...

هذا حال الخريجين ...

اللي ادور السنة و مالقوا الوظيفة اللي اتناسبهم ..

:)

الحال من بعضه ..

مشاري الهاجري يقول...

عادي وهونيها تهون.انا كنت ثلاث سنوات بدون شغل, استثمرتهم باشياء مفيده مثل التوفل والعزف

كلنا لازم نمر بلحضات هادئه نجمع بها اوراقنا قبل البدء بحياه جديده

هذي هي الحياه
والا بلاش

محـــــارة يقول...

أحلى شيء أنج فوق النخل .. وعادي مو بروحج كلنا جذي مانسكت ولا نخطط بهدوء العالم كله يخطط معانا وهالشيء ميزه بس ساعات نمصخها

عن نفسي أنا وحده من كثر ما أحب أستشير الي أثق فيهم قمت امل وأتمنى أكون عنيده وراسي يابس أسهل بحياتهم من الي تسمع وجهات النظر مثل حالتي

بسالفة أي سي دي ال أخذيها ولا تحاتين أنا بظرف أسبوعين بس دشيت امتحانات بدون حتى ما أخذ دوره عشان أبيها والحمد لله سهاله حتى تدريب ماسويت لكن أنا اساسا تخصصي computer scince

بس أختي نفس الشيء مو تخصص والحمد لله مع كتبهم وروحي الاب أدربي قبل كل امتحان ولا دوخين روحج حتى بالدوره إذا الكتب عندج لأن صج سهله خاصه للي ياخذونها بالعربي انا اخذتها انجلش والحمد لله ماخذت مني وقت وأنصحج تأخذينها بمعهد انفوسنتر أعتقد اسمه جذي بحولي عموما المعاهد الي مو مشهوره أفضل أنا اخذتها بنيوهرايزن هذولا أكثر شادين من المعاهد بوطقه والشهاده أساسا مو من عندهم تيي من برا مختومه ومالها شغل بأي معهد أخذتيها

بموضوع التوفل بإذن الله بقدم عليه بس قبل بس مادري شايله همه وكله أجله أقول قبل ما اقدم للماستر أخذه وإن شاء الله على السنه اليايه أشتغل عدل للماستر وربج يسهل على الجميع

الله يوفقج واستمتعي بدورات وأنيده أنتي مختارتهم وأنصحج بدورات مثل تطوير الذات والـ

npa
وايد يمدحونهم

Fahad Al Askr يقول...

مبين إنج فوق السحاب دام الدعوة توفل ودي سي إل

وعلى فكرة ترى وقت الجد كل هذا ما يفيد، خلج على القانون أحسن لك

بنت الكويت يقول...

حلو انج تشغلين وقتج في شي مفيد

والله يوفقج انشاءالله :)

The Voice Within يقول...

9ara7atan 9ara7atan shahadti majro7a magdr afti bhalsalfa

lol! Abaih chinich ana ! Madri shasawi bro7i

Kil yom withani 6aga wayhi shlala o ray7a mgadma 3ala mokan

O a7la shai idiwan ga6ini ib jiha ana mo mgadma 3aleeha fa il7al kan ini as7ab 3aleihum :p a9lan mgadma 3ala ildiwan 3aba6atan la akthar , 3an il7asafa ;p

Amma ildawrat fa mushkila! Li yomich ma riseit 3ala dawra :s


Wilom! shai thani! A9lan la s2aloni shkithir nimtai agolohum si2law shkithir ga3adtai ;p


Sorry lajeitich ;p hatha ham min il shortcomings malot il b6ala :p

حمودي يقول...

تاخذين التوفل عقب ما تخرجتي ؟؟

الله يوفقج انشاله

ezain_kilah يقول...

لوووووووووووووول وي سلم قليبه والله! عاطلة عن العمل؟ عادي حياتي...أنا اشتغلت عالة على المجتمع لمدة سنة وثلاث شهور قبل لا ربج يفرجها علي

عادي عمري أنتي بعدج نم-نم وصغيرونة وشي طبيعي واصلاً مطلوب إنج تكونين كلج طاقة وحب بالتعلم ورغبة بالإنجاز...وعادي أكثر إن أهالينا بس يبونا نهيع والله يستر علينا ونتزوج-كأنه ياختي الله مو ساتر علينا أو قاعدين نمشي مفاصيخ وأنا ماأدري؟؟؟

المهم...دورة...رياضة...جذي مو ناقصج إلا الإنجاز, فكرتي تتطوعين بمكان؟ أنا تطوعت بالمركز الكويتي لمتلازمة الداون اللي بالخالدية,إذا حابة

this is my e-mail:
fantooger@yahoo.com
and i'll tell you all about it and other places to volenteer to

big bosa 4 u *

esTeKaNa يقول...

najmah
~~~~~~~~
آمييين يا الغاليه واجمعين ان شاء الله
لا لا ...لا تشتغلين على طول
ترا حلوة البطاله
خاصه برمضان كانت شي عجيب
الله يوفقج يارب
:)))








very.q8tya
~~~~~~~~~~~~~
ما فيني شي يا دكتورة؟
اشوة الحمدللله
وضعي طبيعي
:Pp~
اي يا بعد قلبي انتي،انا ناطرة مكان زين ولامستعيله كلش على الشغل
بس ابي اسوي شي يديد بحياتي
اطور من نفسي
اجدد نشاطي
على االاقل احس بالفرق بين الايام
:))

esTeKaNa يقول...

Bin3Li
~~~~~~~~~
اجمعين
شكرا
:)








zabooo6a
~~~~~~~~~~~
يحوشج ينون؟
لا اسم الله عليج الرحمن الرحيم
الشر بره وبعيد
لو بيحوشج شي جان حاشني انا قبلج
:)
مشكورة ما قصرتي

esTeKaNa يقول...

على نفسها جنت براقش
~~~~~~~~~~~~~~~~~~~~
حيالله من يانا
نور البلوق نور
اييييييييييييه عفيه عليج
انتي من ربعي
وماني عنج ببعيده
شكلي بصير مثلج
:)









3aber
~~~~~~~~
ياهلا ويا مرحبا
وضعي طبيعي بس ما دارت علي السنه
لا دارت علي السنه وطلعو علي زكاه اظنتي بستخف
:)
حياج الله

esTeKaNa يقول...

مشاري الهاجري
~~~~~~~~~~~~~~
ثلاث سنوات؟
@@
لا ما اعتقد اقدر احتمل 3 سنوات جذي
صراحة..ما شاء الله عليك
:)
بس عجبتني كلمتك
ارتب اوراقي لبدايه حياه جديده
مشاري...حياك الله هذي الساعه المباركة
:)








محارة
~~~~~~~~
هلا بالانعكاس الروحي هلا
:)
وبعدين يا محاره ويانا؟.
احس روحي مشتغله سبيكر،وهاليومين امشي واقول ترا انا بصير اللي يقضون حوائجهم بالكتمان،وترا بخطط واطبق واعطيكم خبر
وماكو فايده
:))
الاي سي دي ال ماخذتها بمعهد بشهرين على قولته:(
بس شسوي لازم اخذها
والتوفل اهو اللي لا تشيلين همه،سجلي بامديست بين فترة وفتره عندهم توفل

وتطوير الذات اهي خطتي الخمسيه عشتو
:)

esTeKaNa يقول...

فهد العسكر
~~~~~~~~~~~~~
يااللله صباح خير
ليش يا فهد تكسر مياديفي
توفل حق الماستر والدورة الاي سي دي ال حق الدوام
:)








بنت الكويت
~~~~~~~~~~~~~
يا بعد قلبي قلبج
ما تقصرين مشكورة
:)

esTeKaNa يقول...

the voice with then
~~~~~~~~~~~~~~~~~~~~~~
LOL!!
انضمي لمجموعه الخريجات العاطلات عن العمل
بالضبط ما ندري شنسوي بروحنا
انا امشي واتحطلم على روحي
لا الدراسه ريحتني
لا القعده مونستني
الشغل مابي الحين
شسوي انتحر؟
:)))
ومالج شغل بديوان الخدمه
على كيفه يستهبلون مرات
انا قطعت الحق من نفسي ومو مقدمه

وعلى طار يالنوم،انا ملامح المخده تقدرين تشوفينها بويهي
لووووول








حمودي
~~~~~~
اي يصير اخذها بمعهد
واذا يبت النتيجة اللي المطلوبه
اقدم على ماستر ان شاء الله

اجمعين
:)

esTeKaNa يقول...

الزين كله
~~~~~~~~~~~
ياهلا ويا مرحبا بالزين كله
صبحج الله بالخير
:)
اهم شي انج اشتغلني عاله على المجتمع
لووووول
هذي خوش وظيفه اكيد ديوان الخدمه عينوج فيها
:Pp~
فكره التطوع وايد يازت لي
شكرا جزيلااا
ان شاء الله استفيد من افكارج الحلوة
:)

غير معرف يقول...

السلام عليكم

ماشاء الله أختي أيامج حافلة

بس أنا مستغرب أنه عندج وقت فراغ !!ـ

سبحان الله كنت أحسبك من أصحاب الهمم العالية .. وإن شاء الله لا أكون أخطأت في ظني

الإنسان المسلم لا يمكن يكون عنده وقت فراغ خصوصا بهالزمن المر

نحن المسلمين حين نرى وضع الأمة المخزي منذ مايزيد على القرن حين سقطت الخلافة تئن قلوبنا شوقا إلى الماضي الجميل .. إلى أيام الرسول والصحابة .. إلى الخلافة الراشدة .. إلى عمر بن عبدالعزيز .. إلى صقر قريش .. إلى الأندلس المفقود .. إلى تلك الدنيا التي ملكناها قرونا

نحن المسلمين إذا نظرنا لهذا العالم الحيران ... العالم التائه .. العالم الذي ينتظر رحمة الإسلام وعدله .. نحن المسلمين تمتليء نفوسا عزيمة ورغبة بالتغيير .. كل من ثغره وكل في مجاله وعلى قدر استطاعته .. في دراسته وعمله وفي وقت فراغه .. كل خطواتنا وكل حركاتنا هي مجرد خطوات نحو الهدف السامي المشترك .. إخراج الناس من الظلمات إلى النور .. ومن الذل إلى العز .. ومن البوءس إلى السعادة .. ومن جور الطواغيت إلى عدل الإسلام

نعم قد نتعب وغيرنا يتنعم .. قد نضحي وغيرنا يجني .. قد نموت ولما تحيا أحلامنا .. لكن لا ضير .. راحة المسلم هي في أول خطوة في الجنة

وصدقيني ، من عنده هدف محدد لا يمكن أن يجد لحظة واحدة من فراغ لتضيع في مجالس اللهو أو أمام التلفاز أو في قرائة مالايفيد من مجلات وصحف صفراء ... فهو إما في دراسة جامعية .. أو في دورة تربوية .. أو في عمل تطوعي .. أو في برنامج دعوي .. أو في تنمية هواية مفيدة .. كل هذا من أجل تحقيق الهدف الأسمى

المسلم متى ماوجد فسحة من وقت .. وجد ألف باب من أبواب الخير يطرقه و ألفا مثلها من الثغور يسدها وهكذا كل يعمل حتى ينير الكون بنور الإيمان

السموحة على الإطالة .. لكنها مجرد خواطر تخطر لي كلما مررت من هنا فأحببت أن أهديها لك ولزوارك الكرام

وفقك الله لما يحبه ويرضاه

عثماني يقول...

ان شاء الله دايما فوق السحاب

موفقة استكانة

:)

lawyer يقول...

دوووووووووووووووم يارب باحسسسسسسسسسن حالتج و فووووووق النخل

:*********

الأستاذ بلاليط يقول...

ربي يوفقج ان شاء الله

bin3li يقول...

على طاري التوفل
نصيحة لا تمتحنين في أوقات متقاربة لان النتايج بتكون مثل مثل
كل ثلاث شهور زين

شي طبيعي جدا جدا أن أول نتيجة تكون صدمة و ممكن تقضين سنة كاملة تمتحنين لين ما تيبين السكور المطلوب

كثفي قرائتج لكتب بالانجليزي
كتب التنمية الذاتية انجليزيتها سهلة
و ممكن معاهم روايات صغيرة و الجرايد

المهم في التوفل السرعة و قبل و وقت الامتحان مهم جدا أنج تكونين ريلاكس

esTeKaNa يقول...

anon.
~~~~~~~
وعليكم السلام ورحمه الله وبركاته
جزاك الله كل خير اخي العزيز
وشكرا على هذا المرور الطيب والنصيحة الجميله
اللهم اجعلني خير مما يظنون واغفر لي ما يعلمون وما لا يعلمون

عدل كلامك،والحمدلله حاليا مع الدورة الصباحيه وبعض الانشطة هنا وهناك فعلا لا وقت فراغ لدي كما كان بالسابق
:)
شكرا مرة اخرى من القلب

esTeKaNa يقول...

عثماني
~~~~~~~~
حيالله عثماني والله
أجمعين يا رب
:)








Lawyer
~~~~~~~~~
اجمعييييين يارب
خلج من مناجر الخدم وتعالي وياي
فوق
فوق
فووووووووووق السحاب
:))












الاستاذ بلاليط
~~~~~~~~~~~~~~~
أجمعين يارب
:)












بن علي
~~~~~~~~~
تصدق بن علي ،عيل انا ناصحيني اخذ التوفل في فترات متقاربه لانه نماذج الامتحانات تتكرر احيانا
:)
وبالضبط اهو لابد من سرعه
ومشكلتي...بطيئه
:(
حاليا قاعده احاول اطور من قرائتني واراجع شوي،المشكله الثانيه اللي اعاني منها انه دراستي الجامعيه كانت بالعربي،وحتى مواد اللغات فرنسي مو انجليزي
:(
الله يسهل يارب

جنون إحساس يقول...

الله لا يغير عليج ان شالله دوم فوق النخل
زين ما سويتي, آنا جربت أقعد كورس في البيت مو بس استخفيت إلا تمنيت الأرض تاكلني من الفراغ وضيقة الخلق
شغلت روحي بأشياء إلى أن جاء الفرج

دورة الكمبيوتر تنفعج
وتخلي لج أولوية بالتعيين
بس عاد موشهرين؟
آنا قارية شهر


الله يوفقج ان شالله

Sn3a يقول...

شي وايد حلو انج تستثمرين هالوقت بهالطريقه
انا ودي اسجل توفل


لكن دراستي ماتسمحلي باي وقت اكسترا

bin3li يقول...

الله يهداج من يقدر يتذكر اسئلة التوفل
أنتي لو امتحنتي نفس الامتحان مرتين ورا بعض ما راح تتذكرين أن نفس الاسئلة مرت عليج

عطي نفسج الوقت إنج تتدربين
و أنا أقولج نصيحة شخص مجرب و نصيحة مدرسين متخصصين في تدريس التوفل
اخذي الامتحان على فترات متباعدة
على العموم أنتي ما تقدرين تاخذين الامتحان غير مرة وحدة في الشهر

و موضوع تطوير اللغة سهل جدا أكثر مما تتوقعين
بتلاحظين التطور في غضون شهور

:)

DUBAI يقول...

Omee 5athet il ICDL : D !!

alaaH Ayam ilBe6aala Kant Shia Shia Shia Shia fee Galbi : (

Eshtgt leha..

7ta ilMalal ely feeha 7aDha 7aDHa Tshweg : ( !!

HnyaalCh ya Estekana !!

5roofa يقول...

دوووومز ياارب

لوول موتيني من الضحك على دعاء الام و الاب ربي يخليهم لج و يطول بعمرهم

تبين الصج اما هم ابي اشترك بنادي و لازم اخذ دوره الاي سي دي ال و متعيزه لووول

يالله موفقه يارب و اشالله عن قريب انشوفج وزيره لووول
;p

salamz sweetee...

عبدالرحمن يقول...

استكانه في أحسن حالاتها...انا بخيرفوق النخل؟لا ...انا فوق السحاب



دوم يارب :)

Shaima'a Alkandari يقول...

مافيج الا العافيه
صح لازم تنمين نفسج بهالدوارات وتتثقفين وتطورين من نفسج
وياحلااتج ويازينج
وعلى سالفه الاسئله العجيبه فعادي ياما بتشوفين الهوايل

ANgEL_BaBY يقول...

صباح الخير يا ويه الخير


وايد وايد حلو انج تملين وقتج جذي.. بالعكس كملي زود اذا تقدرين ..استثمري وقتج وزيدي قدراتج ونميها بدورات وغيره.. وصج كلام عيال عمج الاي سي دي ال مهم واااااااايد زين اخذيه ولا تخافين منه.. والتوفل مليق مو خوش ولد .. انصحج تتعاملين معاه بالقوه خخخخخخ

والله يوفجج فيهم اثنينهم

اما الرياضه فهي مهمه جدا تنشطج وتحرك الدوره الدمويه وتحافظ على لياقتج واشياء طيبه وايده تسوي نفسيتج تصير اوكي اكثر

وحياتج بطبيعة الحال تصير هم اوكي !

يلا جذي انتي كامله مكمله بس ناقصج دوره اخيره بالاداره والتعامل مع الضغوطات وهل سوالف وايد زينه بعد

وامج وابوج شكله فاهمين الوضع غلط

مايدرون انه بنيتهم قاعده تعد لقائده مستقبليه بتكون فلته :)

الله يكون بعونج .. وربي يوفجج ويسهل طريجج

احلا التحايا يا اختي الفاضله

Q8i_Blogger يقول...

فتره تمر بالجميع
وادري انها مو شي بالمره .. جربتها
بس حلو تفكيرج انج ماتبين اتضيعين شي على روحج

واذا على التوفل
بالتوفيق
بس هذا صج ابيخ امتحان خذيته بحياتي
الامتحان الوحيد الي استسلمت جدامه
بس هم على حسب الدرجه الي تسعينلها
وبعد سامع غيروا طريقه التوفل الحين
بالتوفيق

وبالتوفيق بال ICDL
اتوقع سهله عليج هل دوره

بوغازي يقول...

إنت الصح.. والغلطان من لا يفكر بمثل تفكيرك... وخليج دايما فوق النخل... بس ديري بالج لا تطيحين وتنكسر ارقبتج.. إنشاله بعيد الشر عنج
:)
.
أنصح بالقراءة ثم القراءة ثم القراءة... وبالتوفيج إنشاله
:)

esTeKaNa يقول...

جنون احساس
~~~~~~~~~~~~
اجمعين يارب..لا مو فوق النخل
لا لا
فوق السحاب
:)
وترا القعده تونس مرات ،بس مرات لما تحسين انج سويتي كل شي وماكو شي تسوينه عاد تبدين تتعسرين من الفراغ
:)
اي والله شهرين للاسف،اتمنى انها تطير بسرعه وايد مستثقلتها مادري اشفيني
ويوفقج يارب

esTeKaNa يقول...

sn3a
~~~~~~
لا صيري احسن مني
انا ايام الدراسه قلت ما عندي وقت وتحسفت وايد،لانه اهو كله امتحان بيوم واحد ما راح ياخذ وقت منج
بس على الاقل يصير عندج فرصه بدل المرة تقدمينه مرات اكثر
:)
موفقه يا السنعه









بن علي
~~~~~~~~~
hehehehehe:))
اي والله يا بن علي
انا بامتحان التوفل اييني احساس اني قاعده اركض اركض لي اخر دقيقه بالامتحان وانا عندي هالاحساس اني قاعده اركض
:)
انا اقدر اسجل بالامتحانات ورا بعض وتقريبا بينهم اسبوعين واكثر
وبحاول اطور لغتي ،شكرا بن علي

esTeKaNa يقول...

دبي
~~~~~
وي يا زين الوالده واله
زين تسوي والله
انا امي مشتركه معاي بدورة الصبح بس خليتها بفصل ثاني لانها تستحي مني
LoL!!
واي يا دبي،حسستيني بقمة هالايام
كل من يقولي ما راح تنعاد
:))
الله يهنيج بالايمان وطاعة الرحمن













5roofa
~~~~~~~~~
تصدقين خروفه؟
هاليومين على ادنات الدون
كل سالفه وترك يدعون بذات الدعاء
ملوعه جبودهم
لوووول
:)
وزيره عاد؟
لا لا اسم الله علي الرحمن الرحيم
واي مادري ليش تذكرت عاليه شعيب
LoL!!

esTeKaNa يقول...

عبدالرحمن
~~~~~~~~~~
اجمعيييين يارب
السحاب يا عبدالرحمن
تحس انك مرتقي وبعيد عن كل شي
:)







شيما
~~~~~~~
حلت دنياج قولي أمين يا شيخة بنات الكندري
:)
والاسئله شي خطير يبلها بوست بروحها

esTeKaNa يقول...

angeL_Baby
~~~~~~~~~~~~~
يا صباح ويا مسا الهنا والخير كله
:)
انا الاي سي دي ال ماني خايفه منه كثر ما انا مستثقلته مافيني دوام شهرين!!
والتوفل انا اشهد انه مو خوش ولد
!!
وي عسى الله يجبر بخاطرك قول امين
طيبت خاطري على كامله مكمله
وقائده مستقبليه
:)
نورت البلوق حياك الله

esTeKaNa يقول...

q8iblogger
~~~~~~~~~~~~~
اهي كانت فتره حلوة برمضان
بس بعد رمضان بديت احس بالفراغ
:(
التوفل ...تخيل اخر قطعتين قراءة مو قاريتهم وحاله الاسئله بكل ثقه
Lol!!
الله يسهل يارب
يبيلي 50 درجة زود
:(








بو غازي
~~~~~~~~~
لا بو غازي لا...ماني فوق النخل
انا فووووق
فووووق
فووووق السحاب
:)))
شكرا على مرورك والنصائح الطيبه

bin3li يقول...

كيف من بينهم أسبوعين؟

أنتي امتحانج محلي؟
لان إللي أعرفه الامتحان الدولي تاخذينه مرة في الشهر

و إذا انتي ناوية تدرسين في جامعة بره الكويت ما راح يعترفون بنتيجة المحلي ، لازم دولي

اما إذا أنتي بتقدمين في جامعة محلية ،اول شي تأكدي من اعتراف الجامعة من نتائج المعهد إللي تقدمين فيه الاختبار

و أتوقع إذا في الجامعة الكويت ما راح يطلبون سكور عالي
أعتقد 500 كحد ادني و أي يمكن أقل
فهذا مقدور عليه و سهل

أما لو بتقدمين مثلاً في جامعة امريكية
أعتقد الحد الادني 550 إذا ما كان أكثر

any way
goooooood luck :)

Q8DOLL يقول...

ياعمري استكانه
انتي فوووق النخل لأن نفسيتج حلوه
اهم شي روحج الرياضايه واهم اهم شي لا يطوفج قعدة العصر مع امج وابج
وتكسر المياديف هذا فيتامين عائلي لازم الواحد ياخذه
شوفي اهما شغلتين
يا اما اهل يتفخون فيييييج وودج تصدقين بس تخافين من الواقع
"هذي حالتنا"
او تكسير مياديف
وهم هذي حالتنا
الحمدالله عايلتي تجمع الاثنين
الابو ينفخ والام شوي تضبط الوضع

الشغل ياي باذن الله
انتي نفس حالت اخوي
والله شي يضيق الخلق
بس الحلو فيج انج ادشين دورات
دشي دورات حرفيه ترى راح تسليج أكثر واكثر
:)
موفقه حبوبه
ولاتنزلين من النخل

esTeKaNa يقول...

بن علي
~~~~~~~~
ما شاء الله تبارك الرحمن
صج حسيت عندك اطلاع على الموضوع
:)
فعلا قاعده اقدم توفل محلي لاني بقدم بجامعه الكويت،والتوفل المعتمد يؤخذ من جامعة الكويت ومن معهد معين انا مسجله فيه
الله يسهل يارب
وشكرا على الاهتمام والرد













q8doll
~~~~~~~~~
هلا بالطش والرش
:))
صاجة واله ،عندي وعندج خير
لازم عقب مدح مرة مرتين
ايبونج قاع بحجوة تعيد التوزان
:)
انا فووووق السحاب
لاني انا ابي اكون فوق السحاب
عرفتي هالاحساس؟
انه قاعده تعاندين كل احساس فيج عشان تبقين انتي مرتاحة وشاريه وساعه صدرج
الله يحفظج ويوفق اخيج ولا يحرمني من صدقج
:)

Expatriate يقول...

توفل ؟ شطاري عليج ؟

الله يوفقج ويوفق الجميع

الاي سي دي ال سمعت انها جيدة لكنها مو قوية حيل .. بس شدي حيلج يالله