الاثنين، سبتمبر 03، 2007

!!صدفة جمعيهِ

الساعه 12 ليلا،يخرج من الداونيه كل يوم في ذات التوقيت
...ولاجديد:نفس الروتين،نفس الكلام،وذات التفاصيل
اربع مكالمات لم يرد عليها والمتصل مشاعل
مشاعل ثجيله طينه ما راح يرد عليها
مشاعل تذكره بألطاف،وألطاف تشبه حنان
يشعر بسخافه نفسه!!

لا يحب ان يبقى وحيدا،قد تجرحه ذكرى،او تطري له فكره،
اشفيه اليوم؟ ما يدري!!
يتذكر بو محمد ويتصل:
شدعوة يا بو حمّود؟اسبوعين ما نشوفك وينك؟
يستهل بو حمود وينطلق:
هلا والله فواز،عاش من سمع هالحس
لويه و الله، حمودي ولدي مريض،والصغيره شايلين لوزها
وهذا احنا لويه من مستشفى لي مستشفى
يبتسم فواز:
بنتك هالدقمه عندها لوز؟هههه يا حلوها والله
ما تشوف شر ام عيالي ترا محجوزه شيوخهJ
يهمس عبدالله لفواز:
لايبه بنتنا مو للحجز،ماوراك زواج يا فواز خبز ايدي يا فواز:)
ينهي اتصاله مع عبدالله صديق عمره ووشريك جنونه،
شقصده ما يبيني اخذ شيوخه؟جنه قصد شي مو زين،يستدركه عقله:
تعوذ من ابليس يا فواز يضحك وياك العبد!!
يتذكر وجه عبدالله السمح وطيبة قلبه
ليالي السهر اللي جمعتهم،وسنين الغربه والدراسه،
تذكر مغامراتهم العاطفيه الكثيره،اخفاقات عبدالله ونجاحه
ومن ثم قرار عبدالله الجرئ برمي كل شئ ورائه الزواج من نورة،
نورة اخت يوسف،رآها مرة وسأل عنها الف مرة ليتربط فيها بزواج سعيد له من العمر 3 سنوات،حذره من الزواج:
عبدالله في واحديربط روحه بحبل؟خينا جذي مرتاحين
القى بكلام فواز عرض الحائط:
يا فواز انا مو مثلك، محتاج مره تداريني،تحس فيني،ارد البيت تجابلني
تعبت من هاللويه وليمتى؟
في عمر الريال لابد يستقر عاد ويشوف عياله،والبنت زينه مو ناقصها شي والتوافيج من رب العالمين
ابتسم ،عبدالله طيب وربي رزقه على قد هالنيه،زوجه وعيال يسعدونه،عبدالله ما تغير بس صار شكاي
ليش كل واحد من ربعه يتزوج يصير شكاي؟

.
.
.
يبحث في ادراج سيارته عن باكيت سجائر،معقوله خلص كله؟
يعشق منذ طفولته زياره الجمعيه ليلا،سجاير وكاكو
وفرصة تضييع الوقت عشان يرد البيت وينام،يتذكر ظلمه بيتهم،نوم والدته هالحزة وفاه ابوه وزواج اختيه
فراغ!!
يسافر دبي هاليومين؟ولا شرم تفي بالغرض؟ يريد كسره روتين؟

يقف يموقف قريب من باب الجمعية،يعرفة المحاسب وبعض العاملين كزائر ليلي مابين يوم وآخر
يمشي بين الادارج،في باله اكثر من فكرة وطاري،ومابين طاري وطاري يسأل نفسه:
اشفيني اليوم؟
بينما هو يمشي تائه الفكر،محمل بأكثر من فكره وطاري
يتسلل صوت لاذنه،صوت يسمعه بقلبه،يعرفه،يحسه:معقوله قام يهوجس؟
يتبع قلبه،
يوصله لنهاية ذاك الممر
ويراها.......ترتجف اطرافه وتتسارع دقات قلبه:
طفلة الامس وحبيبته،اصبحت أمرأه وزوجة لآاخر
.
.

تتكأ على عربانة الجمعيه،بيدها ورقه وقلم ،تقرأـ له ما تحتاج،ويزودها بكل ما تحتاج
هل هي فعلا سعيده وتملك كل ما تحتاج؟
يفقد السيطرة على حواسه،تصبح اللحظة عمر،والمسافه ايام وزمن
يحتضنها بعينيه،ويشعر بقلبه غائرا في صدره،يتأمل عينيها،تلك العين التي تزينت له يوما وعشقها،
تغيرت ام تغير هو؟
يضغط على مفاتيح سيارته في يديه،يحاول تشتيت تركيزه ولا يستطيع
.
.

ازداد وزنها،وتورمت مع حملها،وما زالت جميله:
ما زالت تلك الملامح تنبض براءه،وعينيها تشع نورا ورقه،
تسرح..فتعض دون قصد شفتيها،تدميها وتدمي قلب نسي نفسه من بعدها
تبتسم لآخريحمل بين يديه شيئا ويريها:
نور هذي القهوة الي تبينها؟
تتتفحص قهوتها وترد:
اي حبيبي بس باقي توست ونحاسب خلصنا
.
.

يسمعها ويخفي وجهه مابين الادراج،
يشعر برغبه عارمه بالبكاء،برمي راسه على صدرها حتى الصباح
هل هناك أقسى من احساس عاشق مشتاق يرى حبيبته ولا يستطيع ان يخطي نحوها خطوة؟
هل هناك احساس اكثر ايلاما من احساس الرجل بعجزه امام احساسه وقلبه؟
نور وحبيبها غيري،نور وزوج وطفل على الدنيا بيمر،سعيده يا نور؟
لا تكوني من غيري سعيده،يأن قلبه بألم:
بل كوني سعيده دوني ومن غيري
نور...
يا أجمل وأرق حبيبه،يا من علمتني مشاعرها الطيبه
يا القلب الي احتضن جنوني ويا احن روح على روحي
فقدتج وانا اللي من ايدي ضيعتج،يا قسا قلبي اللي بضيقتج ردج
خطيت في حقج كثير،وسامحتيني اكثر من الكثير
خياناتي مع اللي ما يسون ظفرج
عنادي لكل نصيحة صادقه من قلبج
هواشنا كل مرة اكون فيها غلطان وتعتذرين لي
:كلامج في داخلي رغم السنين
فواز.. ما راح تلقى قلب يحبك مثل قلبي،لا تخسرني بعنادك لنفسك!! ،لا تضيع عمرك وعمري!
فواز..الحب اني القاك يمي بضيقتي،انك توقف وقفه رجل عاشق يخطب ودي بدل المره عشر
الحب أكبر وأرقى من كل اللي فيني تسويه فيني
فواز..العمر يمرر
وبنتظر
واعذر
بس ليمتى الصبر؟
.
.

عاندتج وعاندت احساسي وقلبي،هجرتج وجرحتج وقلت بدل البنت في عشر
وهقيت مثل كل مرة..بتردين
تعذريني
وتحبيني
!!وما هقيت انها نهاية اصدق واجمل حكايه
وما صدقت انج من بعدها رحلتي:
فواز بتم طووول عمرك ضايع ما تدري شلي تبيه؟
بتم تستمتع باحساس اللحظة وتغمض عينك لي تفتحها وتلقى نفسك وحيد
.
.
.
ليش ما نحس بقيمة الاحساس الا اذا فقدناه؟
وليش انا أصلا فقدتج؟
تخنقني عبرتي واقتلها ببسمتي واسأل نفسي:
هو ولد ولا بنت في بطنج؟
يشبهني ولا يشبهك؟له عينج وبسمتج؟
..
يا ليتج معاي انا يا نور
حسيت باليتم من بعدج،وما بقى في هالدنيا نور
.
.
.
!!تفضل أخوي
اصحى من فوضة مشاعري على صوته،على صوت الي خذا من حياتي النور
واتقدم خطوة،وتفصلني عنك خطوة:
اتحاشى النظر لعينيك واقف جامد الحركه متشبث بالقوة
!!اربع دنانير ونص
.
.
.
يدفع
يأخذتلك السجائر التي نصحته بتركها مرار،
واغراض اشتراها دون حاجه اليها
يخطي سريعا بعيدا عنها،عن نفسه واحساسه
يشعل بحركة سريعه سيجارته
ِتباغته دمعه،يشعر بحرارتها في روحه
:تليفونه يرن ويرد
هلا مشاعل آسف،توني اشوف التليفون
.
.
ويعود لضياعه

هناك 77 تعليقًا:

سعود يقول...
أزال أحد مشرفي المدونة هذا التعليق.
7osen يقول...

جميله رغم الألم إللى فيها

أحساسه جداً مؤلم

لا أصعب من الأحساس بالفقد والضياع

:
أحيانا مثل ماحس فواز تمشي حياتنا

نلقى الإنسان إللى يكون قدرنا وفرحتنا وعمرنا كله معاه لكنا نفرط فيه بكل بلاهة

وبعدين نضيع في مشاعر حاجتنا له

:
هالمشهد أو القصة أو الصورة إللى نقلتيها من وجهة نظرج يمكن تكون معكوسه في هالزمن هذا

للأسف إن سنة الحياة صارت في هالوقت
(أحياناً )
صراعات بس

:

تحياتي لج

غير معرف يقول...

من ساعة و أنا هني أقرا من تحت لي فوق

و بالآخير وصلت عند فواز

و وقفت
!!

magnoonah يقول...

فعلا

ما ينفع الندم

على قولة الشاعر ايليا ابي ماضي

فات الاوان ولا مفر قد ينفع الاصلاح والتهذيب في عهد الصغر


فواز ما يتغير لانه ما حس بالندم بس لا لانه فقد الامل بعد

للاسف هذا نتيجة قلة الايمان

وهذا نموذج موجود بحياتنا

ييتي على الجرح ستكونه

((حبيت اشكرج على كلامج الراقي وايد اسعدني مشكوره))

عبدالرحمن يقول...

وفواز يلوم نفسه تذكرت ام كلثوم وهي تقول قووووووووول للزمان ارجع يازماااان


ابداع ابداع ابداع

لازلت مصر على الروايه انتظر روايتك
هذا الابداع يجب ان لا ينحصر في بلوق خلف لقب مستعار يجب ان يوثق

دمتي مبدعه

SolaimaN يقول...

ماشالله عليج يا استكانه
تبارك الرحمن على هالحوار اللي اكثر من شيق

وقفتني هالجمله

ليش ما نحس بقيمة الاحساس الا اذا فقدناه؟

الله لا ايوريج انشالله

تسلمين يا اخيتي

esTeKaNa يقول...

7osen
~~~~~~~
ياهلا ويا مرحبا حسين
ماقصدت ايلام احد والله
آسفه
:)
وفعلا..أحيانا نفرط فيه بكل بلاهه
وبعد فوات الآوان نكتشف ذلك
ونضيع في صراعنا مع انفسنا وفي البحث عن آخر يسد فراغ في روحنا
!!
الكويت صغيره،وهذا المشهد يتكرر
قد يكون الجارح هو
وقد تكون هي
ويبقى الاحساس ذاته
شكرا لمرورك

esTeKaNa يقول...

aNoN.
~~~~~~
السؤال اللي يطرح نفسه
قدرت تفهم شي من تحت لي فوق؟
وليش وقفتو عند فواز؟








Magnoonah
~~~~~~~~~~~~
هلا وغلا
تدرين شنو قاسي الاحساس بالتسليم بفوات الاوان؟
والاقنتاع بالواقع وفقد الامل؟
هذا احساسه
!!
تهقين ما راح يتغير؟
اوافقج الراي هذي نتيجة قله ايمان
ولا تشكريني على احساس قلبي فيج
:))

esTeKaNa يقول...

عبدالرحمن
~~~~~~~~~
ياهلا يا بو بدر
تدري..احس ما ضيع العشاق الا ام كلثوم الله يرحمها
:))
شكرا على التشجيع
محاوله اولى وكلماتك شجعتني اكثر من ما تتصور
شكرا لك








solaiman
~~~~~~~~~~~
اجمعييين يارب
يسعدني اعجابك بالحوار
حاولت بقدر المستطاع ان اقربه من واقعنا وما نسمعه كل يوم
اتمنى اني وفقت
:)

محـــــارة يقول...

شنو هالبوست أستكانه خفي علينا

تضايقت وعشت مع فواز حييل .. ماكرهته كثر ما أني تضايقت عليه .. لأنه ظلم قلبه ونفسه قبل ما يظلمها

حبها بس ما سمع لنبض روحه وتركها وبلأخر باع حياته لقصص فاضيه وراح يرد يأكله الحزن دام قلبه ما نشغل بحب صادق

أصعب اللحظات بهالدنيا حبيب مو لك

زعلت وحزنت واايد .. وصدقة السالفة :) الله يحفظج حبي

PearL يقول...

عورتي قلبي استكانة

ليش خسرها .. اهوه اللي بيده خسرها

احساسه حده يعور
و حدي تأثرت معاه
كسر خاطري

بس هذا اللي سواه بيده

Very.Q8ya يقول...

wayyyyyyy estekaanaa:(((( gableey gam ye3awrni o edma3at 3aineey, kisar khaa6ir wayyyid .. adry enha qissa, bs ana mit'akda enha waqi3 ye3eshona nas

ambaih sijsijsij ilqissa tyanin o il7ewar m3a nafsah eyanin oo ilbedaya o ilnehaya malat ilqissa rawwwwww3a

bs tekfaaaain la aa6oofffich oo anaaaaaa faj`a indimajt bil qisa loooooool o ta3ammaqt ib shakhseyyat nour o sirt ana nour lol..

kisar kha6ryyyyyyy fawaz ;// ya rab ytzawaj ooo yrtaaa7 inshallah, 3ad kitbay il jozo' ilthany LOL plz:P

thank u 3al qisa ilraw3a elli mithlich raw3a :*

shakshaka يقول...

way estekana! el7ewar ele mawjod bain elshakh9 nafsah 7asasneee ene mawjoda weyah w hatha dalel 3la ena ketabtich 7ag hal qesssa tosal 7ag ele ga3id yegra ele laih darajat atkhayal noooor weya 3arabanat;haa wo makhtha el toast hehehehe lil asaf ena telgain fawaz lama kan weyaha kan ekaber 7ata bainah wo bain 3omra maye3teref ena sej ehya el ensasna elwa7eda ele 9a7 eb 7ayata ... mayadree sheno kan yabee .. wo lama faqad;haa bida y7is ib hal e7sas wo lama ra7at mn eedah maat!

Purplecious يقول...

واااااااااااااي
استكانه
أنا شيايبني عندج هالحزة؟؟

أحد يشرب شاي الساعه 12 باللييييييييل
!!!!!!!!!!!!!

لالالالا أرجوووووووج قفلي بلوقج هالحزة
و غسلي مطاطيرج
أنا الحين شي ينومني عقب
هالشاي اللي شربته
و الحجي اللي قريته
و البجي اللي بجيته
؟؟
!!!

حراااام ليش يسوي بروحه جذي؟؟

بس تدرين اتوقع ان هالنوع مستعد عشان حريته و سعادته اللحظيه يضحي بكل شي
و بنفس الوقت ما عنده الشجاعة لتحمل المسؤولية

يا ربي أكثر صفه رجوليه هي تحمل المسؤوليه
شلون لما المرأه تتحمل المسؤوليه نقول عنها "ريّاله" هههههه

اذا انعدمت هالصفه بالرجل انا برأيي انعدمت رجوليته

ابداع يا استكانه
حوار و لا أحلى
ترابط و تسلسل فظيييييييييع
مشاءالله مشاءالله
و فعلا واقعيه النهايه
صج انها دراميه بس في ناس جذي يحبون يخلون حياتهم دراما و فيلم

و يعيشون روحهم بقصه وهميه ينسجها لهم خيالهم من تصرفات هم بس اللي يفسرونها على حسب هواهم

بس لما اتيبين شخص من برا مو عايش هالفيلم راح يلاحظ ان التفسير اللي قاعدين يقنعون نفسهم فيه هو خطأ

جني شطحت شوي
عادي أمون
هههههههههههه

غير معرف يقول...

من تحت لي فوق على مستوى البوستات و تواريخ
إدراجها
:)

أكيد مو على مستوى البوست الواحد
مو لي هالدرجة ماخذ الدنيا قري
:p

فواز جزء كبير منه يشبهني

جانب من البوست كان أشبه بالمرايا
اللي تظهر أمامي وين ما رحت

مهما حاولت أتوارى عنها و عن واقع

الحمدلله على كل حال
:)

تصبحين على خير

esTeKaNa يقول...

محاره
PearL
VERY_q8ya
shakshka
purp.
~~~~~~~~
صديقااااااااتي

واااااااااي حسستوني بتأنيب الضمير تالي هالليل
:(
علامها قلوبكم صايره رهيّفه؟
الدنيا تحتاج قلب قوي
>>>>قولي حق روحج استكانه:Pp~

وفواز ينعطى فرصه
اثنين
وعشر
بس ما اعتقد ينعطى كل العمر
ولا شرايكم؟
يالله يبت قهوتي وبسكوت
بجابلكم برد على واحده واحده
نفر نفر
:))

esTeKaNa يقول...

محارة
~~~~~~~
هلا بمحاره والله
اخف عليكم؟
اول مرة اكتب شي من هالنوع
ان شاء الله المرة اليايه افكر بشي يكون اجمل ولا يضيق خلقكم
:)
في مقوله نه ما ينسي المرة الا مرة
بس انا اقول يا محاره مو اي مره
مشكله اذا الانسان بدا من القمه
يتعب كثير في ايجاد بديل لحبه الصادق
لانه بعد هالقمة شنو يقدر يرضيه؟
عاد ابتسمي
لا تخلين ضميري يأبني
:)

esTeKaNa يقول...

pearL
~~~~~~~
هلا باللولو هلا
اسم الله عليج الرحمن الرحيم
لا ترا مابي اعور قلبج
انتي لو خامطه لنا من اللي شفتيه بباريس بو ورده ،جان ما عورت قلبج ولا عورتي قلبي
:))
عدل كلامج
واللي ذابحة اكثر
انه هذا الي سواه بيده
عرفتي ااحساس الانسان لما يغلط ويحس انه مافي امل يصلج غلطته
يظل طول عمره يلوم نفسه
الله يبعدنا عن هالاحساس يارب
:)

esTeKaNa يقول...

very_q8tya
~~~~~~~~~~~~
يممممممممممممه اسم الله عليج وعلى قليبج!!
واي ترا ماحب اعور قلوبكم
بس هذا واقع
الكويت صغيره
شوفي جم اثنين بعد فراقهم بسنين تلاقو صدفه، وكل شي فيهم تغير
شنو تتخيلين احساسهم؟
ايا كان سبب فراقهم
!!
وي طافني الويه المنمدج والله
اثاريج انتي نور؟
لوووول
تدرين ..يا ليت كل بنت تشوف هالنور:
عاشت وحملت وحياتها مشت
عمر الدنيا ما توقف عند تجربه واحده غير ناجحه
كافي الاحساس بحلاتها وذكرياتها وتمشي
وربي يعوضها خير
شكراااا على التشجيع
انا ضاق خلقي الكل يقول تعسر عقب القصه انتي شجعتيني شوي رفعتي معنوياتي
:))
لا خلا ولا عدم

esTeKaNa يقول...

shakshka
~~~~~~~~~
واااااااااااااااي
ونستيني
وينه راسج؟
ابي احب راسج
:*
الله يجبر بخاطرج كنت احاتي يكون هالبوست طويل وماحد يتشجع يقراه
يعني انج توصلين مرحله تتخيلين االعربانه والتوست هذا قمة الانجاز
:)
بالضبط ...اهو ما درا انها اصدق حب بحياته الا لما فقدها ومات من داخله
ترا احساسه مؤلم لانه يدري انه فقده لها غلطه اهو بيده غلطها
!!

esTeKaNa يقول...

purplecious
~~~~~~~~~~~~~~~
وي وي يا حسرتنا
اثاري صار بجي ودموع؟
وشيلي مطاطيرج يا استكانه
يمة اسم الله على صديقتي
تعالي تعالي
تبين فيمتو؟
انزين ...ممممم بيبسي وثلج؟
ممممم فرابتشينو؟
شرباااات؟
اي شي بارد بس تدللي انتي ولا تتعسرين
خلج رياله
:))
بالضبط..ما عنده شجاعه يتحمل المسؤليه
وهذا اعتراف قاسي على نفسه
كلامج عدل
ويمكن حزتها ما حس فيها لانه طرف بالموضوع،لكن اي شخص بعيد يشوف الموضوع بحياديه وتجرد راح يستوعب انه
غلط بحق نفسه وحقها
الله يبرد قلبه ويهديه ان شاء الله
:)

esTeKaNa يقول...

anon.
~~~~~~
ّههههههه
واي استحيت من نفسي
انا هالحزة يصير استيعابي بطئ
استر على ما وايهت
واخزياه اسئل بعد
:)
اتمنى انك استمتعت بالمشي قري بمدونتي
واتمنى من كل قلبي انه يكون حالك افضل من فوازبكثير

وانته من اهل الخير يا رب
حياك الله

Sowhat يقول...

قصة رائعة و تلزمنا بان نتصفح مدونتك بحثا عن مزيد من الأبداع وانا متأكد باني سأجد الكثير والكثير منه

خوف الشباب من الزواج والأرتباط و خوف فقدان الحرية امر واقع و مرحلة مر فيها كل شاب و لكن في النهاية هي مرحلة يجب ان يتخطاها عندما يجد المرأة الي يحس انها راح تكون شريكة حياته

ربما اكون متفائل .. ولكن احس ان مكالمتة لمشاعل اليوم راح تكون غر مكالماته السابقة و راح يكون صعب عليه ان يكذب و يقول احبك

تسلم ايدك

SolaimaN يقول...

طبعا ،،وبكل مقدره
عيني عليج بارده

lawyer يقول...

قصه ضياع فواز

فواز يمثل فئه لاباس فيها من شباب الكويتين

يحطمه الروتين

روتين ممل

يبحث في البنات على وحده بقياسه وحده تصبر عليه

او وحده يفز قلبه لها
ليستطيح حبها تخير مجرى حياته


فواز نموذج لشبابنا الي ما يقدرون يتخذون قرار بخصوص حياتهم

هو يحسد كل ربعه على قوتهم في الارتباط

و اتخاذ هذا القرار

ترا فواز اهو الي هزني موقفه


سامحيني استكانه يمكن تنطرين مني اتعاطف مع نور

نور بنت الله عطاها واحد يحبها

ما عرف قيمتها
خسرها و خسر نفسه

ولكن هي الحمدلله ربي وفقها في زوج
و عيال انشاء الله


و فواز بروحه تايهه في حياته

ادمعت عيوني مع دموع فواز

حسيت قلبه انفطر

ماكان يدري
انه يحبها

ولكن يدري اشكثر اهي مهمه

اصلا اهو قالها

ياما كانت تروح و تردلي

ماهقيت انه هالمرا ماهي راده!

كان يزعلها و اهي تراضيه

فجأه راحت
هزت كيانه
انفس ميزانه

تغيرت كل اللوان بحياته


كان فواز في حياه نور نقطه بدايه

و كانت نهايه فواز بيد نور


فواز ماراح ينسى
و راح يظل بضياع

حتى يفكر بعقل
و يروح يرسم لحياته
خط استقرار فعلي



لكل شاب اقول هالكلمه رحموا حالكم
رحموا قلوبكم

مو كل مرا تعرفون شنو تبون
او الي تبونه صح

nena يقول...

عورتي قلبي :( لان القصة جزء من حياتي فعلا..
رجعتي شريط ذكرياتي يا استكانه وبالفعل صارتلي هالقصة
:(
اهو اختار ضياعة وانا اجبرت اني اختار مستقبلي

فعلا استكانه انتي كاتبة رائعة وراقية اهنيج على هالموهبة

خليتي ادموعي تهل واتصب جنج فاتحة حنفية رغم انها جفت من سنين طويلة

New Bride يقول...

wooow mashalah 3aleeech raw3aa

estkaana waayed mn fawaaz mawjdeen 3ndnaa bl kuwait

o zeen sawat noor el wa7ed le meta yan6er o ysame7 o yrathee o yn9a7

waayed waayed 3ajeeba

charisma يقول...

صباح الورد

انا ليش داشه هالحزه

هذا وقت الى وايد انا اكون فيه بزىىىىىىىىى

وانا قتلج بوستاتج تحتاج وقت عشان لا اهظم حقها

بس تنحت
:/

قريت اول سطر وشدتنى القصه

ما قدرت افج الا وانا خالصتها

:(

ااااااااااااااااخ يا قلبى

تدرين شالى يعور القلب؟؟

الانسان الى دخلتيه قلبج وكان اقرب انسان بحياتج

بيوم وليله يصير غريب عنج

ولالالا يكلمج بكل رسميه

ولا تقدرين حتى اتسلمين علييه

ترى مو هينه على الحبيبه بعد ما كانت حبيبه وقريبه تصير من عامة الناس اتعامل

سبحان الله بهالناس

ابدعتى يا شيخة البنات ابدعتى

وكل شى نصيب

bin3li يقول...

يستاهلون كلهم
محد قالهم يحبون

عــــاشــــه يقول...

حتى أنا دخلت وقريت في وقت ابد مش مناسب

طالعه من إجتماعين وأعصابي مشدوده

وقريت هالحوار الرائع الي دخلني في دوامه أريد انساها....

ماقدرت أغلق الشاشه

شدتني عبرته
شدني حواره مع نفسه
شدني ضياعه
وفقدانه للحبيبه

جدا مؤلم هذا النص
وجدا مبدعه في نقلج لمشاعر خافيه أو نتعمد إخفاءها

عزيزتي إستكانه

نسيتيني الشغل ويوم الشغل... وحسيت بالوقت توقف.. وبقيت أنا وفواز ونور


هههههههههههههههه

تسلمين عزيزتي على النص الي أكثر من رائع


www.7rouf.com

Ealaf يقول...

: )الانسان دائمًا لا يشعر بقيمة الأشياء التي بين يديه ,
عندما تصل لغيره , تصبح غالية !

اعجبتني جدًا

Joli يقول...

إنتي شنو؟؟؟؟؟؟؟؟؟؟؟؟؟؟


عورني قلبي
عليه و عليها


تعبت وأنا أقرى
القصة جنها صج
حسيت إنني قاعدة أشوف الموقف جدامي

حسيت بشعورة و حسيت بشعورها


المشكلة لما الحياة تلهي الإنسان حتى عن نفسه
ما يدري أهو شيبي
و لما تييله الصحوة تيي على شكل طراااااق
و بوقتها ما ينفع لا صوت و لا ندم


اسمالله عليج كتاباتج روعة
:***

5roofa يقول...

واااااااي بجيتيني يالخااايس القصه صج تعور القلب الشعور بالحرماااان عذااااب

مشكورة على الكلمات الروعه

salamz sweetee....

AseeL يقول...

اللي مثله وايد بالديرة

كلمة وحدة تنطبق عليهم: كويتيين

ZoZOta يقول...

oh my god

oh my god

استكانه بدعتي

بدعتي

عجبتني القصه

قمة بالواقعية

وهذا ما اعشقه بكتاباتج

يازينج ويازين كتاباتج

امتعتيني

Q8DOLL يقول...

شنو هالروعه استكانه
جك فواز شفنا ومر علينا؟ وسمعنا عنه
أغلب الشباب الحين مثل فواز
يحبون يوقفون الزمن
لكن الزمان يمر
وشاااطره نور
عرفت ان محد بينفعها اذا الوقت مر وصارت اهيا بروحها بعدين
حتى فواز كان راح يخليها بيوم اذا ما خلته

روعه مادري شقولج
بس يعطيج ألف عافيه

Mishari يقول...
أزال المؤلف هذا التعليق.
Mishari يقول...

قرار الزواج قرار صعب ويتخذه اى رجل يحس ان لقى شريكة العمر
الفكرة بوجود من يطابقنى 100% هي فكرة خطأ سواء من المرأة او الرجل
فهذا
لا بالعكس بعد لو فعلا وحصلت سيكون الوضع ممل
حتي بالفيزياء قالوا الاضداد تتجاذب
وتأكدي نورة وزوجها تلقينهم مستانسين لان العشرة تكسر مع الوقت كل قوالب الثلج وتخلي الحب موجود فعلا حب وليس مجرد زوج وزوجة
ام الحالمين فهم يعيشون فى فراغ منتظر من تاتيه بعربة سندريلا او هي تكون منتظرة من يأتيها على حصان ابيض
فهي ايضا حالمة

Яeema يقول...

قلعته
كلش ما زعلت عله

أناني و ما فكر إلا بنفسه


عبالج بعد كل هذا راح يتعظون؟؟؟

بتصير مثل هالقصه ألف مرة و مرة





الحريه لها ثمن

إنج تفقدين من إتحبين

vancouver يقول...

واااااااااااااااااااااااااااااااااااااااااااااااااااااااايد حسيت باللي كتبتيه

.
.
.

مريت فيها وطلعت شارية نفسي
واللي ضاع... ضيع سعادته بايده
ولا عاد يهمني بشيئ



فاهمتني استكانة
:)

2 u ALL يقول...

قصه حزينه..!! ولكنها رائعه وجميله بحروفك التي تناسقت على صفحات الورق ..!! أبداع جميل لتوصيل مفهمو ومعنى عظيم ..!!؟

أختي العزيزه ..!!؟

من لا يحسن أختيارته ..!! ويحاول أرضاء نفسه وذاته ..!! على حساب علاقته مع حبيبه ..!! والوصول الى التفريط فيها ..!! مقابل أستمتاعه بخياناته وخيالاته ..!! فهذاالشخص يستحق هذه النهايه ..!!؟

الأيام في هذه الحياة تمر على الأنسان بسرعه رهيبه ..!! هناك الكثير من الخيارات المتاحه والطرق المتعدده ..!! وهذه الخيارات أذا مرت على الأنسان فهي لا ترجع ..!! و في بعض الأحيان النادره جداً ترجع ..!! ومن لا يستطيع حسم خياراته بسرعه ..!! والسير في احدى هذه الخيارات بسرعه ..!! ينتهي لنفس مصير "فواز" ..!!؟

Barrak يقول...

مشكله لما اللي تحبه تحسه مو لك



طريقة سردك للحوار رائعه

اتمنى ان يستفيدوا منك كتاب الحلقات التلفزيونيه التي ستعرض علينا برمضان

Kuw_Son يقول...

تحمست للزواج
:P

الله ياهي قصة .. والله انها مؤثرة .. فعلا تحكي واقع الكثير من العزوبية و اللي ما وراه إلا إضاعة الوقت ..

و فعلا صعب على الرجل انه يشوف المرأة حبها مع إنسان ثاني .. شعوووور قاتل والله !

أبدعت أختي الكريمة

بـركـــــان يقول...

مقاله مؤثره !


بس هل من مدكر؟؟


بركان ثائر

سويلفاتي يقول...

وايد حلوة القصة وعورني قلبي على فواز
بس تصدقين اكو وايد مثله
امتعتينا في هالقصة الحلوة

AuThoress يقول...

يا اخيّة

الضياع ليس يضيع


كم فوّاز بيننا؟
أكثر من كثير ، على "تردّدهم يتكئون" بفشل كبير


جميل ما مرّرت به هنا/ رغم الألــم

Shaima'a Alkandari يقول...

حزن


فراق


الم


وبالاخير امنيه لشخص نحبه بالعيش الهني والسعاده الدائمه



وصف جميل جدا وقصه مميزه حملت الكثير

وسيعيش هو بعالم الوهم وسيستمر بالضياع

ReLaaaX يقول...

شوفي استكانه آنه ماني قايلتلج ليش دشيت عندج هالحزة ... بس شسوي كل ماادش اكون بطلع فمايمديني اندمج بالقصه الا الحين ;p
--

الحيييييييييين عرفت شسالفة الجمعية .. لااااااخلااااص رمضان الياي انترقب قصتج بمسلسل ;))
--

شنسوي بعد هذي الدنيا !!!؟
وموشرط كل شي نبيه نحصله
--

يظـــــــــــــل قدر الله عز وجل فوق كل شي :) وما الله كاتبها من نصيبه ولا كاتبه من نصيبها

esTeKaNa يقول...

sowhat
~~~~~~~
ياهلا ويا مرحبا
زارتنا البركة اخوي
انا ومدونتي تحت امرك،تصفحها مع استكانه جاي مخدره واتمنى لك الاستمتاع فيها:)
احترمت التفاؤل بردك
انا كذلك اتمنى ذلك
ربما اصبح بعد تلك الليله وتوجه لأمه:
يمة خطبي لي
:)

esTeKaNa يقول...

soLaiman
~~~~~~~~~
ربنا يجبر بخاطرك يا سي سليمان
:)





Lawyer
~~~~~~~~~
هلا فطامي
عسى الحين حفظتي البوست؟
امتحنج فيه؟
:)
كلامج عدل فطومه
بس في فكره ثانيه بجانب اللي قلتيه
ياما بنت حبت
وبجت
وتعبت
ووقفت برغبتها الدنيا
!!والدنيا ما توقف عند تجربه واحده فاشله
شوفي نور...راحت وردت له وايد
بس في وقت لازم تاخذ قرار وتبتعد
عطته فرصه وهو استنفذ كل الفرض
لازم تبدي تفكر بنفسها
:)
صج اتخاذ البنت هالقرار صعب
بس اذا الشخص مثل فواز لازم تاخذ هالقرار...تبدي تحب نفسها وتعزها
وربي بيعوضها


شكرا يا فطومه
يا من شجعني على هالبوست
:)

esTeKaNa يقول...

nena
~~~~~~
اسم الله على قلبج
والله ما قصدت اقلب اي مواجع
!!
يا ليت روعتي مثل ما ذكرتي ترسم ابتاسمة مو دموع تهل
:(
تحسفتي على هالقرار؟
انتي قلتي اختار ضياعه،وحتى لو اجبرتي
ما وصلتي مرحله بحياتج حسيتي اللي سوييته اهو الصح؟
يا عساج دوم مرتاحة البال وسعيده
:))










new bride
~~~~~~~~~~~
نور بنت سنعه
تربت بيت طيب
عملت معاه باصلها
بس في وقت لازم تحب نفسها وتفكر فيها
:))
وايد استانست انه هالبوست عجبج
ان شاء الله دوم تحبين كل بوست مكتوب عندي
:)

esTeKaNa يقول...

charissma
~~~~~~~~~~~~
حيالله المارون قلاسيه والله
:)
يا بختي والله جان هالقصه يازت لج
ولو انه مو القصد اعور قلبج
!!
انتي اللي عورتي قلبي لما قلتي شي احسه
بس ما عرفت اكتبه
احساس الانسان لما اقرب شخص له يكون غريب
وينجبر يعامله بطريقه رسميه
ويكونب النسبه له من عامه الناس
وشخص غريب
واااااي
الله يبعدنا عن هالاحساس لانه صج يعور حييييييييييييل
:(

esTeKaNa يقول...

bin3Li
~~~~~~~~
LOOOOOOOOOOOOOOOOOOOOOOOOOL:D~
صراحة
موتني من الضحك
ههههههههههههههههه










عاشه
~~~~~~
ياهلا ويا مرحبا بعواشه
يعطيج العافيه يارب
:)
ويا هنيي ويا بخت عيني
بقرائتج هالبوست واعجابج فيه
عسى رديتي الشغل من بعده
وما تميتي مع نور وفواز؟
:))









eLaf
~~~~~~~
يشرفني ان تعجبك كلمه من كلماتي
:)
دمتي بحب

esTeKaNa يقول...

joli
~~~~~
انا استكانه
:Pp~
عدل كلامج
وصح الصحوة تيي مثل الطراق
مثل اللي يمسكه ويهز جتوفه
يخليخ يحس شكثر العمر يمر وكل شي يتغير وهو واقف
جولي جم مرة تكررت مثل هذه القصه
القصه اكيد حقيقه بس انا حاولت اصيغ بعض المشاعر فيها
:)
الله يوفق الجميع يارب
وشكرا على مرورج الحلو








5Roofa
~~~~~~~~~
الاروع مرور خروفه عندنا
وهذا شي مما عندكم
حياج الله
بس من غير بجي
:)









aseeL
~~~~~~~
الزين زينج والله
:)
بعد صدفتج لازم يكون حال الزين مثل نور،متفخة من الحمل
مع زوج يحبها
يداريها ويدور رضاها
:)

esTeKaNa يقول...

q8doLL
~~~~~~~~
يا هنا عيني يوم انج باركتي البلوق والله
نورتي المكان
اي والله جم فواز مر علينا
وايد
بس قولي لي جم نور مرت علينا؟
قله
البنت على ما توصل مرحله يطيب خاطرها وتروح حق حياتها تلقينها استهلكت كل مشاعرها وضيعت احلى سنين عمرها
بس مثل ما قلتي نور شاطرة
:))
حياج الله








MIShari
~~~~~~~~~~
صح لسانك يا مشاري
كلامك عين العقل
اعجبتني كثيرا كلمه الاضداد تتقارب
ومافي احد نلاقيه اميه بالاميه
:)
على فكرة اسمها نور مو نورة
وعسى الله يبلغني بنورة عروس
:pP~








reeeema
~~~~~~~~~~
هلا وغلا
قلعته؟
واي كسر خاطري من كلمه قلعته
:)
وفعلا كل شي له ثمن
مو بس الحريه

esTeKaNa يقول...

vancouver
~~~~~~~~~~~
فااااااااهمتج
وابي كل بنت تفهمج
هل تحسفت نور على شي؟
ما اعتقد
!!
عزت روحها وشرت ريال حبها بالحلال
:))
الله يهنيج ويبارك لج بحياتج ويسعدج
:**


















2uaLL
~~~~~~~
قصه حزينه ولكنها واقعيه
مكرره مليون مرة في ديرتنا للاسف
اعجبتني نظرتك للامور وتحليلك المنطقي
شكرا من القلب لمرورك الجميل
:)











barrak
~~~~~~~~
اي والله
:)
اعجابك بطريقه السرد وسام من شخص مميز يزين بلوقي
شكرا اخوي براك
وتهقه اخرتها اكتب حق مسلسلات؟
:)

esTeKaNa يقول...

kuw_son
~~~~~~~~
يالله خلنا نفرح فيك
ونسوي لك عرس بالبلوقات
بس لا تصير شكاي
:)
واقع كثير من العزوبيه انته ادرا فيه
وكون هالبوست اعدبك وحسيته مؤثر شي يسعدني فعلا
شكرا لمرورك وحياك الله











بركان
~~~~~~~~
اي والله
هل من مدكر؟
شكرا للمرور
:))











سويليفاتي
~~~~~~~~~~~~
اي والله اكو وايد مثله
عسى الله يهديهم ويصلح بالهم يارب
:)









authoress
~~~~~~~~~~
اتمنى ان يكون مرورك القادم بلا الم
وفعلا
ومن قلب:
يا اخيييييييييه
:)








shaima
~~~~~~~~~
ربما...يعيش بعالم الوهم
وربما
يضحى من غفلته بعد ذاك اليوم
شكرا لمرورك الجميا دائما
:)













reLaaax
~~~~~~~~~~
هلاااااااااااااااا وغلا
من قلبي هلا
انتي وينج؟
سافرتي معذوره
بس وبعدين؟
نبي كل يوم بوست وتعليق لو سمحتي
تراج تنفقدين
:))
وفعلا النصيب قبل كل شي
حياج الله

khaled يقول...

الشعور بالحرمان واضح
سأكمل الباقي
:)

حمودي يقول...

nice

6mashah يقول...

ماتعرف قديري الا لما تجرب غيري ..

ضيع عمره بايده...

مادري ليش احب اربط حاضر ومتسقبل اي شخص بطفولته

فواز ماوصل لهالوضع الا نتيجه شي صارله يبي ينتقم مايبي يتحمل مسؤوليه وووإلخ..

لكن تدرين فيه الخير دام ياله احساس الندم يمكن ما يوعى الا عقب مايروح عمره لكن فيه الخير...

والله يهدي عيالنا
حرام اللي يسوونه باعمارهم

استكانه بدعتي
بوست يعووور واحساس يبجي
ماسويتي فيني خير ><

keep going

Expatriate يقول...

فواز كبر . وبدا يكتشف انه كان فاهم السالفة غلط

فواز كان مستهتر .. ومغتر بشبابه حزتها ومعتقد ان كل ما يتمناه يصير وكل ما طق بمزاجه يسويه .. يسويه

فواز ما هزته شوفة نور .. فواز هزه ادراكه لحاله وحقيقته .. اكتشافه لخطأه و الوضع اللي وصل له

فواز متحسر انه الى الآن يروح نفس الجمعية في الليل ويشتري نفس باكيت الزقاير .. متحسف انه في محله يمشي طول هالوقت

bin3li يقول...

أنا كنت جاد في ردي
ما كنت اتغشمر
ليش الناس تحب و هي مب قد مسؤولية هالمشاعر

يستاهل و تستاهل كل اثنين مب جادين في حياتهم كل مشاعر الكسر إللي يخلفه استهتارهم و ما يخذون حياتهم على محمل الجد

الواحد إذا مال قلبه لوحده يعني يبغيها شريكة حياته
إذا مب قادر يدخل البيت من بابه
يشيل فكرة الحب من راسه لين ما يكون مؤهل إنه يشرف نفسه و أهله جدام أهلها و جدامها

ليش يكذب على روحه و عليها و يعيشون حياة وهمية قابله للإنهيار في أي لحظة و بمنتهى السهولة على عكس الزواج إللي تقدم فيه التنازلات عشان يستمر

و الإنهيار هذه يخلف مشاعر الكسر و الندم و التحسر

يا بابا ناس تزوجوا و تطلقوا و تزوجوا مرة ثانية

إللي يحبون و ما صار نصيب ما بيلقون غيرهم؟
الحياة تمشي و تتجد
بس في ناس ترفض تعطي فرصة لنفسها أنها تعيش

Nescafé يقول...

يااااربي شلون انااام الليله
الحين اقعد افكر في فواز ونور

استكانه القصه حلوه واسلوبج اينن
وتدرين اني حدي اندمج بالقصص اللي تكتبينهم لي اخر حرف
بس مااادري شفيني صايره لي قريت قصه وايد تشغلني بشكل موطبيعي.. لالا شكلي صج ماراح انام
واللي زادني اني قريت الردود.. فجأه خرت دموعي بروحي وانا اقرا القصه على طريف الحين لا ادور الكلنكس ياااربي شهالحاله

عور قلبي فواز احس ان شوي صحى بس عقب رد لنفس الدوامه بعيد عن الواقع المؤلم.. وبنفس الوقت فرحت حق نور بس مادري
شفيني حدي اندمجت ... خلاص لازم احوس ادور قصة ثانيه تنسيني ;P

الحارث بن همّام يقول...

قصة تحكي مشاهد واقعية نشاهدها يومياً ..
قصة جميلة ..

تحياتي

عيون الحب يقول...

رائعة انتي استكانة
سردج للقصة وايد حلو

بس كلام بن علي صح
اذا مب قادرين يتوجون حبهم
او ياخذونه بمحمل الجد

ليش يحبون؟
عشان يتعذبون؟

ClOuDs يقول...

:)

قصة واقعية جدا

للأسف الكثير من شباب "هاليومين" يشبهون فواز في تفكيرهم.. الزواج بالنسبة لهم كابوس أو وحش كاسر عليهم تجنبه بكل الطرق للابتعاد عن المسئوليات و " عوار الراس" و " الدوخه" خاصة و انهم يشاهدون أصدقاءهم المتزوجون يتذمرون طيلة الوقت مما ينفرهم أكثر و أكثر من الزواج
.
.
شكرا استكانة على الأسلوب الرائع و بانتظار جديدك دوما ;)

ray يقول...

يا كره هالاشكال

يلعبون بايدهم و ريولهم طوول عمرهم و لي يات الصجية يتحسفون

يبا يستاهل كل شي يصير فيه
اهوا اللي يابه حق نفسه

Hamoora يقول...

تسلم ايدج

قصة روووووووووعه

Shather يقول...

احححححح يا قلبي ..

هالموقف يسبب نزيف بالقلب مو بس ألم :(((

القصه درااما .. دموع اربع اربع
و تأليفها روعه..
استكانه تسلمين ..

Q8i_Blogger يقول...

قصه جميله جدا جدا

بس الي مو فاهمه منو أحلى نور ولا مشاعل ... ادري ماله شغل بس مجرد استفسار :P

واشلون كتبتيها هل قصه ؟؟؟؟؟
ما اتوقع خيال لأنها صج تأثر ههههههههه

يعطيج العافيه على البوست الحلو

esTeKaNa يقول...

khaLeD
~~~~~~~
ذكرتي بمقوله:
الحرمان منبع الابداع
:Pp~
بس وين الحرمان الواضح؟














حمودي
~~~~~~
Thank u :)













6masha
~~~~~~~~
صح لسانج والله
اتفق وياج بالراي
وانا اكتب قلت هل فواز انسان مو زين؟
مادري
بس حسيت انه فيه خير
وفيه بذره زينه بترده
ويتغير
ووايد اشيا بحياته بتتغير بس محتاج صحوة
واراده وقوة
:)
شكرا على التشجيع
واسفه اذا ضيقت صدرج
حياج الله

esTeKaNa يقول...

expat.
~~~~~~~
تفسير منطقي جدااا
:)
شكرا للمرور









BIN3lI
~~~~~~~~
يعني اذا كنت جاد انا ما يصير ابتسم؟
:)
اوافقك الراي
بس الحب يا بن علي مشاعر ما تخضع للعقل ولا المنطق،يوم حبها ما اختار احساسه،حبها وما فكر بالمستقبل
بس نور صحت وفكرت بعقلها وخذت برايك
واتجهت لزواج ممكن تقدم في تضحيات بس يبقى أأمن لها واكثر استقرار لحياتها



الله يحفظك يا بن علي
رد قمة بالعقل والسنع
يا ليت الكل يفكر مثلك بالحب
:)















NESCAFE
~~~~~~~~~~
يا هلا بالنسكافيه
يا زين هالريحة اللي هفت علينا مع هالنسكافيه الحلو
:)
لا تفكرين فيهم
الكل بيعيش
والحياه ما توقف عند احد
ومن غير شر يا نسكافيه
عسى دموعج ما تنزل الا بالفرح يارب








الحارث بن همام
~~~~~~~~~~~~~~
ِشكرا للمرور
نورت المكان
:)

esTeKaNa يقول...

عيون الحب
~~~~~~~~~~
الاروع مرورج يا عيون
ووجه نظر بن علي
عاقله
منطقيه
بس هل الحب اختيار؟
:)
عسى بس تعرفين تتكوكسين الحين
:pP~









CLouds
~~~~~~~~
تدرين دمعت عيني يوم شفت اسمج؟
عاش من شافج
سنه
سنتين؟
من متى ما شفتج في بلوقي من غير شر

شكرا لتعليقج الواقعي جدا
وحياج الله نورتي المكان
فرحتيني من قلب
:)














ray
~~~~~
وانتي ليش معصبه؟
:)
يا عل فالج فال نور
مرتاحه
ومستقره نفسيتها
مع ريل يحبها
طاير فيها
ويتحرى الرضا بعيونها
قولي آمين
ولا تدرين
قولي اجمعين
:Pp~









hamoora
~~~~~~~~~
حيالله الهوامير
:)
الله يسلمج








shather
~~~~~~~~
اسسسسسسسسم الله على قلبج يا الشذري
شسوي اذا كان هذا واقع
نشوفه
ونحسه
ونعيشه كل يوم؟
تسلمين على المرور
:)










q8i_bLoGger
~~~~~~~~~~~~~
ياهلا ويا مرحبا
منو احلى نور ولا مشاعل؟
ممممممممم
احس الحين كل البنات يتشابهون
احساسنا اهو اللي يزين شخص ويشينه بعينا،بس انا ابي نور تكون احلى
عشان يحتر فواز ويتحسف
:pP~
توقعك مو خيال..توقع صحيح
كتبتها بعد ما هزني اكثر من موقف
اكثر من احساس
وحاولت اصيغ افكاري بكلمات اوصل فيها احساسي
عسى وصل الاحساس بالسلامه؟
:))

bin3li يقول...

يصير تبتسمين :)

و معاج في إللي قلتيه
:)

Sn3a يقول...

البوست روعه
مشكله البعض
لما يلقى شخص بيرفكت
يتوقع في غيره احسن منه
يضيعه
وعقب مايضيعه اهو يضيع
لكن عقب التفكير عقب التحسف
ماراح يلقى ذاك الشخص ناطره

طمع بني ادم مايتغير
لابالفلوس
ولا بالمنصب
ولا حتى براحه القلب

SHAHAD يقول...

آنا كتبت شعور المرأة عقب رحيله
وإنتي كتبتي شصار بالرجل بعد فترة من الرحيل
وما خاب ظني ، طلع هو الخسران :))
.
.
جد اندمجت بحروفج
وغرقت بالتفكير
جد خسارة كبيرة .. بس يستاهل
دامه باعها يتحمل :))
.
.
أسلوبج شيق
ومدونتج روعة
يعطيج الف عافية

OutOfReach يقول...

a5eeeeeeeeh 3la haldnya
jmeela ya estkana