الأربعاء، أغسطس 08، 2007

Break!

اصحو من النوم متأخره كالعاده
استغرب عدم ايقاظي من قبل امي ولا ابي
البيت يغرق في هدؤ قاتل
وظلام في الصالات الريئسيه استجابه للحملات الترشيد
انظر لهاتفي...معقوله ماحد سئل فيني؟
.
.
.
استمتع بالمشي حافيه على رخام البيت البارد
احضر لي قهوة مع بعض الجرائد وروايه لقماشه العلياان لاقضي بها الوقت الضائع
اشعر بوحشه،اين اهلي؟
لما انا فقط اتصل واسئل على الكل واطمن وماحد يطمن علي
!! وبعدين ليش ما اسافر اي مكان؟
وليش كل ما القى محرم تتعسر سالفه السفره؟
تعسرت ،اضع عيني بالروايه والف شغله في بالي
باختصار...انا ماحب اكون وحيده
احب الناس
احب الحس واليمعه
احب اكسر الروتين واسافر بين فتره وفتره
.
.
.
الساعه عشر صوت سياره ابي وامي راجعين من ايكيا وتروفاليو وشارين كل شئ لا نحتاجه كالعاده
!!
تبدأ امي بسيل من النصائح حول النوم والسهر والهالات السودا حول عيني ويستأنف ابي الحديث عن احساسه بالضيق مني ومن كسلي
هل شعرت يوما بانك عاله على المجتمع؟
صديت،حاولت انهاء الحوار ماكو فايده
استمرت النصائح والتوبيخ وفجأة
ا
فجأة
لالالالالالالااااااااااااااااااااااااااا...............................صوت ربابه باك راوند حق الفلم الهندي اللي سويته
دموع اربع اربع
وحجي ما ادري من وين يبته
ابوي منبهر
وامي ماسكة قوطي الكلنكس وقاعده يمي وساكته
ما بقى شي بخاطري ما قلته
طلعت عساره النوم والملل والفراغ واي شي بالي قلته
اعتقد طلعت ملفاتي وكل شي ضيق خلقي من ايام الروضه
واللي مضحكني بروحي لما سكت تلفت على امي:
لميني اشحقه قاعده تطالعيني؟
لمتني ابوي ضحك
رفعت راسي ووجهت كلامي حق ابوي:
واي يا قلبك
!!
انا ابجي وانته تضحك؟
صج انا احبك بس هذا ما يعطيك الحق تضحك علي،
بدل لا تفاجئني بشي يطيب الخاطر
:Pp~
.
.
.
بعد يوم اتصال صباحي من ابوي:
زهبي جنطتج بنروح لبنان باجر
جنطة حق اسبوع،الاسبوع خمس ايام بلبنان يوم رايح يوم راد
يا ويلج اذا يبتي الكبت كله،ما قل ودل يا بنيه
ولا ترا ماحد بيسحب جنطتج الا انتي
واذا تبين تقعدين عند عمج لي رمضان كيفج
!!
يااااااااااااااااااااااااااااااااااااااااااااااااااااااااي يا حبي لك انته
صج صج احب السفرات المفاجئه
ليش لي رمضان؟
اسبوع اسوي رفرش وراجعه
أمي كاتبه لي ورقه فيها كل شي احطه بجنطتي
تضحكني اوراق امي كل شي مرتب كل شي منظم
اعظم مشكله بحياتها فوضويه بنتها الكبيرة..احم احم
اهم شي انه امي كاتبه ملاحظة باخر الورقه:
بنيتي الحبيبه..ترا الدنيا مو دايما تصفا لج
ومو كل شي تبينه يصير
عودي نفسج تتأقلمين مع كل الظروف
هالمرة حصلت،مرة ثانيه يمكن ما تحصل
لا تكدرين خاطر ابوج اللي ما نام امس
ولا تتوقعين كل ريال مثل ابوج بيدللج
!!
شكرا يمه:**
استودعتكم الله الذي لا تضيع ودائعه
حللوني يا جماعه
على فكره
من سردااااااااااااااااااااااب قلبي:
أحبكم في الله

هناك 55 تعليقًا:

bin3li يقول...

يوم أنا ييت بتروحين!!

يلا
have fun :)

Purgatory يقول...

الساعه عشر صوت سياره ابي وامي راجعين من ايكيا وتروفاليو وشارين كل شئ لا نحتاجه كالعاده

hahahahahahaha, حسبالي بس عندنا

ENJOY LEBANON

Mamloo7a Q8ia يقول...

تروحين وتردين بالسلامة والله يسهل دربج
وحطي بالج على نفسج واستانسي واستمتعي بهالاسبوع

الله يخلي لج الوالد والوالدة ويطول بعمرهم

ههههه
عجبتني سالفة الربابة والفلم الهندي وايد ماشيين مع بعض

salfa3ajeeba يقول...

min kangiyat galbi a7ibbich wi agolich hay9ee wi

istaaaaaaaaaansi:)

wi itro7en wi itrden bilsalamah:)

loyalty يقول...

أستودع الله أمانتك و خواتيم عملك

استااانسي بوقتج و انسي كل شي شاغلج بالكويت :)

اكتشفت انه مو بس أنا عندي وصفات سحرية للاقناع :P
شكلها عادة متأصلة عند البنات و خاصة البجر :>
الله يخليلج والدينج و يخليج لهم

عبدالرحمن يقول...

اشعلتي اقلوب ٍ بهاالشوق مثبوت
************* وحيّرتي اعقول ٍ ماهي تنتحيّر

فيك السحاب اللي بنا فوقك بيوت
************ كنه على معانق سماك امتطيّر

وفيك الخضار اللي كتم نبرة الصوت
************ اليا اصطفق جذع الشجر بالغديّر

وفيك الجمال اللي كسر سحر هاروت
************* اللي تشيب إله العيون وتطيّر

والله يـاامقابل غناديــر بيروت
************ ابرك من امقابل ضفاير نويّر :)




قصيدة كتبها صديق لي بعد ان زار بيروت وشاف الارض الخضراء والجمال البيروتي النادر على قولته :)


تروحين وتردين بالسلامه اتمنى ان تساعدج نسمات هواء بيروت على تجديد روحج وترتيب افكارج وتخفيف دموعج
لان الحياه حلوه :)

اذكرينا بالخير عند اهل بيروت تراهم غالين :)

تمشي على شاطئ العشاق شاطئ الروشه بس بعدي عن صخرة الروشه مو ناقصين ماسي :)

الله يخليلج اللي مانام ليلة عشانج وبوسيلي راسه وقوليله تم :)

اتمنالج سفره جميله تنسيج ماتبقى في ذاكرتج من الرحلات السابقه الجميله
حافظج ربي

Shaima'a Alkandari يقول...

ياعيييييييييييني عليج

زين جذي خليتي ابوج يسهر وكان بيغنيلج يامسهر عيني


لاتكدرينهم وتزعلينهم تراهم يحبونج

واتمنالج سفره ممتعه وسعيده


اول ماتردين غيري من الفوضه وصيري سنعه وطيبي خاطرهم

محـــــارة يقول...

ياحلوج والله .. أحبج وأنا أختج .. استودعتج الرحمن ولي ماتنام عينه تروحين وتردين بالسلامه وإن شاء الله تكون سعيده

الله يحفظج

charisma يقول...

مسااء الورد

استكاانه
لووووووووووووووووول
منتى هينه طلعتى
عفستى الوالد بعد عمرى لما سفرج
من حنتج والمناحه
والهليله الى اتسوينها بالبيت
ههههههههههههه

حبيبتى انتى يا شيخة البنات
اقل شى يتسوا لج
:)
تستاهلين كل خير
وعليج بالف عافيه
استانسى وكسرى روتينج وقسلى جبدج

وردى موظفه مؤقت عندى
عشان تفزعين الصبح ولا تسهرين
بجذى انحقق رغبة الوالده وما تصير هالات سود تحت عيونج من السهر
وتساعدينى اتحلين كلمات متقاطعه
ههههههههههههههههه

على ما اييج الفرج
قوليبها براسج وعطينى خبر
مكانج جاهز
مكتب رئيس القسم بكبره

charisma يقول...

باك

استكانه
نسيت لا اقولج
تروحين وترجعين بالسلامه
والله يسهل دربكم
:**

Fahad Al Askr يقول...

بالسلامة

hamdool يقول...

يا حلوكم والله

بس إيكـــيا شالوه اللي يم
ترو فــــــــــــــــاليو

;p

شكل ماما مصممه إذا رحت
الأول يعني لازم أروح الثاني

زلقه بطيـــــــــــحه

hehehehehehehehe

أبوج ورده مثل أبوي

سيري لبنان ونحن من ورائك

وإذا بغيتي اي محل أو مكان في
بيروت أو برات بيروت فيكي
تسالي ياللي بدك

جد والله ما أتغشمر

اي شي يخطر في بالج
محل إكسسوارات
ألماسات
بضايع تقليد درجه أولى
تكاسي
كحلات تأجير سيارات
قهاوي
مطاعم
سهرات

اللي تبينه وما يردج إلا لسانج


توصلين وترجعين بالسلامه
وهالله هالله بالحلاب وسي سويت
ورح نشتألك

بنت الكويت يقول...

تروحين وتردين بالسلامة

:)

Shather يقول...

نفس قصصنا.. الظاهر كل بيت في من هالسيناريو :P


عاد بتخلينا و تروحين :(

ما عليه بنهونها دام فيها كسر لروتينج و فشه خلئ

;)


تروحين و ترجعين بالسلامه ان شاء الله

عيون الحب يقول...

حبيبتي والله
تروحين وترجعين بالسلامة يارب

مسموحة دنيا واخره

esTeKaNa يقول...

bin3Li
~~~~~~~~~
حمدلله على سلامتك
اي انا تطمنت انك وصلت
قلت اعطيك المفاتيح ودير بالك على المكان
لاحد يكسر استكانات لو سمحت
ترا غالين
:))










purg.
~~~~~~~
hahahahaha:)
هوايتهم التجول في هذي المحلات
وطبعا تأبى المرؤة يطلعون من غير جياس
:))
ترا البوست مافيه تتسابق ها
thank you






mamloo7a q8ia
~~~~~~~~~~~~~~~~
الله يسملج ما قصرتي
لاحظتي صوت الربابه؟
هذا دلاله على حجم المأاساه اللي سويتها على غير سنع
:)







saLfa3jeeba
~~~~~~~~~~~~~~~
Waaaaaaaaaaaaaaaaaaaaay
mt
mt
mn a'67k 3La Kangiyat gLbi
3baLy bs a7na ngolha:pP~
aLLa ysLmCh thanks 7bibty aNty:**







LoyatLy
~~~~~~~~~~~
امين ويزاج الله خير
افا عليج اعجبج بوسائل الاقناع
في تطور وتجدد مستمر
لازم نسوي تعاون مشترك بهالمجال
:)

esTeKaNa يقول...

عبدالرحمن
~~~~~~~~~~
صح لسانه
ولو اني ما رضيت على نوّير!!
هقوتك مهما شاف الشخص من جمال ميسا وشاهيناز يغنون عن جمال بنت ديرته؟
:pP~
أكيد الحياه بتكون حلوة اذا بغيناها تكون حلوة،واكيد بتحلى طول ما احنا تعبنا عشان نخليها احلى
شكرا على نصايحك الذهبيه
وتم :)
واصل سلامك
وحافظك الرحمن












shaima
~~~~~~~~~
هلا وغلا يا شيما
اهم شي انه ابوي يغني يا مسهر عيني
هههههههههههه
ما يلوق :)
واي ضميري أنبني
لا ان شاء الله ارجع وبصير خوووووش بنيه
:)
شكرا شيما








محاره
~~~~~~~
أحبك الذي احببتني فيه
ماقصرتي حبيبتي
:**







charissma
~~~~~~~~~~~~~
يا مسا الورد والجمال كله
وينج اليوم من غير شر
كنت ابي اسولف وياج بقولج ماهو غير قابل للنشر هني
:pP~
اي والله عفستهم
ترا على فكره العفيسه ما يبيها شي
دمعتين وشهقه
وحجوتين تكسرين خاطرهم
وبس اللي تامرين فيه يصير
اقدر اعطي كورسات دلع وعياره
:pP~
وشكرا شكرا على هذا التشريف والمنصب الكبير،اتمنى اكون عند حسن ظنج وافيد الكويت والامة العربيه والاسلاميه
واقوم كل يوم من صباح اله خير واييج اركض عشان تختفي الهلات السود وعشان اساعد الاخ نحل كلمات متقاطعه
:)) الله يسلمج يا الغاليه



فهد
~~~~
الله يسلمك
:)






hamdooL
~~~~~~~~~~
وييي افا عليك
اظنتي امي تدري قبل لا يشيلونه
اهو ترتيبهم تروفاليو
A2Z
واخر شي ايكيا الافنيوز
وطبعا ما نبي شي
:)
والابهات..انا اشهد انهم ورد عسى ربي يحفظهم يارب ويعينا على برهم

تهقه أمان؟
انا من صباح الله خير وانا مجابله كل شوي اشوف مقتل جندين في النهر البارد
يا حسره قلبي
!!

وما تقصر اخوي يزاك اله كل خير
انا صار لي ساعه احوس على سياره ابوي يبي يأجر من المطار
وغيره ..عادي بنفتر مع هالناس ونشوف
:))
واي صج صج من قلبي مشكور وما قصرت

esTeKaNa يقول...

بنت الكويت
~~~~~~~~~~~~
الله يسلمج من كل شر ما قصرتي
:)






Shather
~~~~~~~~~
هلا بالشذري والله
اي لازم هالسيناريو موزعينا على اهل الكويت الظاهر
:)
الله يسلمج يا الغاليه من الشر
اسبوع ابريك من قرقتي وبرجع والله يعينكم عقب شيسكتني
:))

















عيون الحب
~~~~~~~~~~
يزاج الله خير يا الغاليه
ماقصرتي
:)

qesat_5ayal يقول...

بالسـلامـة

vancouver يقول...

واااااااازينهم اللي يتبجبجون ويدلعون
والله
:)

دا دا اغو
استكانه انتي??
هاهاهاها
الله يوسع صدرج وتتهنين

ما عليه ادري الواحد من الضغط ينفجر والدموع تخر بعد

الله يطول بعمر الوالد
والله كسر خاطرييييييي
مسكين.. بالذمة مو حاسة انج
شريرة عقب ما امج قالتلج
انه ما نام البارح ??? حراااااااام
خنت حيلي






بس الوالدة ترى حكيييييييمة
ما شاءالله عليها
الكلمتين اللي اكتبتهم لج حطيهم
ترجية باذانج
صاجة الوالدة



الله يرزقج ريل مثل ابوج
ادري قلتي امين قبل لا اكتبها
;))))))))
هاهاهاهاها
اميييييييييين


بالسلامة
وسلميلنا عالسوليدير والنجمة والروشة والنزاااكة


يا حلو لبنان

5roofa يقول...

looooool

have fun sweetee

o alah e5ale ur dad o ur mam enshala

:) 9ij mako methel dala3 el ahal looool

:D

salamz girl...

MANAF يقول...

استكانه انتي شيطانه

دموعج ودتج لبنان

يا ريت تاخذين ام عبدالله معاج

قاعده تحن علي امس

بلييز وبلييز

بروح 3 ايام وارجع

زين لقيتلها عايله الحين

لوول

ترجعون بالسلامه

:)

2 u ALL يقول...

يقولون "جزا الوالدين الجنه" ...!! وأنشاء الله تروحين وتردين بالسلامه ..!! ولا تنسين تجيبين لنا"الصوغه"...هاهاها رحله سعيده ...!!؟

lawyer يقول...

تروووووووووووووووحين و تردين بالسلامه

اعجبتني من سردااااااااااااااب قلبي احبكم


يالله تعالي تعالي بسرررررعه لاني رديييييييييييت وولهانه عليج

Ace يقول...

ياقلــــــــــــــــــــــبي هالبابا والماما والله
ياقلــــــــــــــــبي هالطيبة
ياعمري هالعين اللي ماتنام ليه شافت العزيز زعلان، والاهتمام اللي يظهر من الأفعال مو الكلام

تصدقين؟ دايما جذيه: يشوفون ويفكرون ويخشون بقلبهم، مايبين عليهم، بس من باكر شوفي القرارات اللي تطلع من بعد هالخش والدس هههههههههه

شيسكتني أنا ألحين؟ هههههههه

ماشالله حكمة ورزانة وصبر وصلابة، والقلب يظل رهيّف

الله يخليكم لبعض
وعسى ربي يونسكم بالعافية
بالسلامة ياقلبي :))

7osen يقول...

الله يخليلج الوالد ويسعدج دائماً

تروحين وتردين بالسلامه



استمتعي

:)

DiLLi O MiLLi يقول...

هههههههه ... هذا الحر وما يسويه يخلي الواحد ينفجر .. بس عسى حبيتي راس الوالد ؟ وعلللليه ماااا نااام من الفلم اللي سويتيه ... بس الموسيقه التصويريه لنهاية الفلم مفروض أغنية راشد الماجد "والله وتحقق منايا" هههههههه


وما شاءالله ملاحظة الوالده عيين العقل الله يحفظها .. مووو كلشي تبينه يصير .. وأكييييد أن الريل ما راح يدللج مثل الوالد الله يحفظه .. تذكرت حجوه كله تقولها عمتي لما تسمع أن فلانه مخطوبه .. سيييده تقول : "ياك الشقى يا مدلل" ههههههههه .. وفعلا ماراح أتحصلين عند الريل الدلال اللي تلاقينه عند أهلج .. دعوى مني وعسى تكون مستجابه : يارب يا أستكانه يا بنت ؟؟؟؟؟؟ تلاقيييين كل دلالالالال عند الزوج "ويسويلج يااا دهينه لا تنكتين" آآآمييين يارب العالمين


تروحين وتردين بالسلامه

:)

3AJEL يقول...

قود باي

هاف أ نايس فيكيشن

اي سنك سو

Raed يقول...

صدقت الوالدة ...
لا تتوقعين..

مودتي.

بوغازي يقول...

:)
بالسلامة... ونحن بالإنتظار دائما

6mashah يقول...

عجبتني سالفه تلفين على اميمتج وتقولينها ليش ماتلميني

الله يخليهم لج ويخليج لهم

وروحي غيري جو وسوي لج ريفرش

ولاتنسين الصوغه :p

بالتوفيق

hamdool يقول...

Aman cz Nagr el bared b3eed 3ankom bs mo wanasa nafs mn 3 aw 4 sneen kharreboha Allah ykharrebhom
kanat eshzeeenha al7een aghlab el amaken 9akha w mayta!

anyway as i told U if U need anything ask me 3ala my blog
w ana adez lech kel shay tabeena

ZoZOta يقول...

استكانه

واااااااااااي
توني ادري انج مسافره
وبيروت بعد من غير ما تاخذيني معاج

ابي ابي
:(

بفقدج يالشيخه
والنوبه اليايه قولي لي اروح وياج

:*

New Bride يقول...

waaaay ya 7loo omnaa o oboona :)

estansay 7abeebte makoo methel el ahal : )enshalah ttzawjeen o ta3rfeen :)

any way nice blog waayed 7abeeta

Alather يقول...

تروحين وتردين بالسلامة

Mishari يقول...

بالسسسسسسسسسسسسلامة
وصج لا تعودين نفسج على الدلع :)
باجر الزواج يبيله مسؤولية ومو كل ريال نفس ابوج عسى الله يطولكم بعمره

وتروحين بالسلامة يا فوضوية /:)

Very.Q8ya يقول...

Bil saalaama inshallah .. lol tha7akteeni ilsara7a, o HAM bachaiteeny ib hal maQ6a3 بنيتي الحبيبه..ترا الدنيا مو دايما تصفا لج
ومو كل شي تبينه يصير
عودي نفسج تتأقلمين مع كل الظروف
هالمرة حصلت،مرة ثانيه يمكن ما تحصل
لا تكدرين خاطر ابوج اللي ما نام امس
ولا تتوقعين كل ريال مثل ابوج بيدللج
---
sijsijsij nasee7at il um o 7anaanha oo galb il obow il 6ayyeb .. e3awir galby hal shayyain =~~/

Q8i_Blogger يقول...

ضحكتيني بموضوعج ... يمكن فيني مثل طبع ابوج .. اسمع بجي بس اضحك مادري ليش !!!

بالسلامه تردين

وخوش بوست يعطيج الف عافيه

kuwaitya_7saweya يقول...

لوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووول
بالسلامه انشالله
اعجبتني قصتج


اشوه انا عبالي بس امي ابوي اللي يروحون هالاماكن ويشترون اشياء مامنها فايده الحمدلله اهلي مو
aliens

Q80MINI يقول...

تردين بالسلامة انشالله
هتوحشينا اوي

barrak يقول...

وانا اقول خشيم الفار من وين جايب دوابيره

عثماني يقول...

اول شي محللة

و اتوقع انج بتردين هاليومين
:)

الله يحفظ اميمتج و ابيج

و شكلج استكانة تبين الشارة... مسرع ما انفجرتي

يلا ردي بسرعة ناطرينج

سالفة قلب يقول...

اي والله اصدقت الوالده
مو كل الرياييل مثل ابوج
الله لايخليج منهم ياااارب

esTeKaNa يقول...

qesat_5ayaL
~~~~~~~~~~~~~
الله يسلمج من الشر ما قصرتي
:)









Vancouver
~~~~~~~~~~~
hahahahahahaha:))
واي والله انتي وتعليقج زوقه ضحكتيني
تبين الصج؟
اي والله حسيت روحي شريره:(

واي جنج تدرين اقرا واقول اميييين
بس تهقين في مثل ابوي؟
:))
الله يسلمج من الشر
صاجة ,,,يا زينها لبنان والله















5roofa
~~~~~~~~~~
امييييييييين
والله يسلمج حبيبتي ما قصرتي
:))









manaf
~~~~~~~
hehehehe:))
اشرايك فيني؟
هذا سلاح المرأه وانا اخيتك
افاااا يا بو عبدالله
ام عبدالله طالبتك وما توديها؟
ما تسوا فرحتها وناستها ولبنان كافي عليها جم يوم
!!
اخخخ لو ادري
جان يت وياي وحطيتها بعيوني
:)











2 u all
~~~~~~~~~~
اي والله جزا الوالدين الجنه
الله يسلمك من الشر وما قصرت
:))








Lawyer
~~~~~~~~
هلااااااااااااا وغلا
هلا باللي اختفت فجأة وراحت عني
من غير حتى لا تسلم علي
:((
واي يا زينها من بشاره ردتج
:**











ace
~~~~~~~
ياهلا ويا مرحبا بهالاسم وصاحبته
الله يشهد علي اني احب كل كلمة تكتبينها
:)
اي والله يا قلبي عليهم،الله يعينا على برهم ويرزقنا طاعتهم يارب العالمين

وصاجة كله بالخش والدش تطلع قراراتهم ،بس انا ما اعطيهم فرصه،امي دايما تقولي تطلع المفاجأه من عينا اسم الله عليج نطري شوي
ما انطر
:))
الله يسلمج من كل شر وحياج الله












7osen
~~~~~~~~
اميييييييييين ويزاك اللله كل خير
الله يسلمك من الشر
فعلا...استمتعت
:)












dilli o milli
~~~~~~~~~~~~~~~~
هههههههههههههههههههههههه
واي واي مت من الضحك على نهايه الفلم
لا انا خاشه هالاغنيه حق فلم ثاني راح اعرضه عليكم اذا ربي بلغكم فيني
وتحققت هالدعوة الحلوة اللي دعيتيها لي
:pP~
وي يا بعد قلبي قلبج
الله يسلمج من كل شر
:)












3ajel
~~~~~~~
حياك الله ما قصرت
:))











raed
~~~~~~~~
صراحة...ما اتوقع
ولكن
أتمنى وادعو
!!
:)












بو غازي
~~~~~~~~~~
الله يسلمك من كل شر
:)







6masha
~~~~~~~~
امييين ويزاج الله خير
واي لاحظتي؟
صج ما حلاتي اصير دعله
:)
افا عليج البرازق والبقلاوة كاني بوزع بالبلوق
:))















hamdooL
~~~~~~~~~
ياهلا ويا مرحبا اخوي
واي في واحد معانا بالطياره قاعد يمي عيونه ملونه طول الطريج وانا اقول هذا انته لا تقولي ليش
:)
يمكن لانه ماسك كتاب عن مسرحيات تاريخيه مادري شنو
!!
انا قصه ويا النهر البارد،لوعت جبدهم كل ما باعدنا انشب ببلاعيمهم عسى ما قربنا يم النهر البارد؟
وصاج انا فرقت علي ،في كويتين ووناسه بس مو مثل كل سنه
!!
الله يحفظ لهم ديرتهم يعورون القلب وطيبين ما يستاهلون
ويزاك الله خير ما قصرت اخوي
خيرك سابج
:)


















zozota
~~~~~~~~~~~
وي يا ليتج يا الزين وياي
جان شنو يسكر حلوجنا انا وانتي؟
نغني
ونشعر
ونكتب
انا الجو الحلو يفتح شهيتي حق الكتابه وحق الحب وكل كل شي حلو
خطر الجو الحلو علي
:))











new bride
~~~~~~~~~~~~
ياهلا يا هلا
الساعه المباركة والله
خطوة مباركة يا عروس
:)
حيتج العافيه وحياج الله











aL_ather
~~~~~~~~~~~
الله يسلمج من الشر
:)












mishari
~~~~~~~~~
امين عسى ربي يطول بعمره ويحفظه
مامثله
بس ماكو شي مستحيل على ربك
انا بيدي دعائي وما تدري شنو ري يكتب لي
:))
الله يسلمك
احم احم من الفوضويه
منو يقول؟
:pP~












very_q8tya
~~~~~~~~~~~~~~
اي والله يعور القلب
تدرين انا كل ما افكر بهالشي قلبي يعورني صججججج
عسى ربي لا يحرمني منهم ولا يحرمج من كل من تحبينه
اشوة انج ضحكتي
لاني ما اسامح نفسي اذا تسببت ببجوة احد
:))










q8i_blogger
~~~~~~~~~~~~~
الله يعافيك ماقصرت
الحين الطبع اللي ياز لك انك لما تشوف البجي تضحك؟
اي اخذ طبع ثاني
مثلا:اذا شفت احد تحبه يبجي تلبي طلبه على طول وتدلل
هذا خووووووش طبع
انصحك فيه
:)))









kuwaitya_7sawya
~~~~~~~~~~~~~~~~~~~~
اشوة انها عجبتج وضحكتج
:)
لا لا تحاتين اهلج في منهم وايد
واذا اكشخو وبيقلدونا اشربو قهوة في كافيه في تروفاليو
:Pp~










q8mini
~~~~~~~~~
الله يسلمك من الشر
وما يوحشك غالي
:))












barrak
~~~~~~~~~~~
اقولك انا ويا متفاهمين يالله من فضلك
:)
الله يحفظه لك يارب









عثماني
~~~~~~~~
اي والله ابي الشاره حمدلله والشكر
الله يسلمك ما قصرت توني راده
:)









سالفة قلب
~~~~~~~~~~~
اميييين يزاااج الله خير
:)

vancouver يقول...

الحمدلله عالسلامة ،
:)))


عسى ما تثرمتي بالشحن
هاهاهاهاها


نبي بوست باللبناني

قرت عين البلوغرز برجعتج
اهم شيء ان شاءالله استانستي
??

mtfa2el يقول...

تروحين و تردين بالسلامة
هالله هالله بحلويات شويطر
ولا ذاك بالبحرين ...
المهم الحلويات اللي تقعد سنة محزرة محد ياكلها
هالله هالله يبيلنا

mtfa2el يقول...

اي بعد خل اقول شي
صج جزا الوالدين على الله
محد يدري بتعبهم

mtfa2el يقول...

اي بعد باقول شي












ولا بس ماني قايل

esTeKaNa يقول...

vancouver
~~~~~~~~~~~~
الحمدلله
وايد وايد استانست
ما هقيت باستانس جذي
بوست لبناني؟
واي طل بعيني
عيزت احاول ماكو فايده
اذا اشتطيت تكلمت مصري
:)
ولا ما مداني اجيل بالشحن والله
:(
الله يسلمج يا شيخة البلوقرز انتي

esTeKaNa يقول...

mtfa2el
~~~~~~~~~~
لوووووووووووووول
:))
واي صج صج ضحكتني على شويطر
ذاك البحرين
لبنان الحلاب وربعه
لا يبيلك فورمات مرة ثانيه


ترا صج ابي اعرف شنو كنت بتقول؟

غير معرف يقول...

بين فترة والثانية أتصفح بعض المدونات وأقرى المكتوب فيها وآخذ المفيد منها.. أول مرة أقرى شي لج.. بس أو بديت أتصفح مدونتج واجهت صعوبة في أن أخرج منها.. استمتعت، استفدت، حسيت، إلخ إلخ.. كل هذي المشاعر وأكثر انتابتني في هالمرة اليتيمة اللي دخلت فيها مدونتج.. حبيتج وحسيت اني لو جفتج كنتي بتكونين من الناس اللي أحبهم من أو نظرة (وتراهم قلييييييلو ;p

عندج صداقات وثيقة من الإمارات؟ عشان أعرف إذا في أمل لي أو لأ ;p

esTeKaNa يقول...

anon
~~~~~~~
ياهلا ويا مرحبا يا صديقتي المجهوله
تعليقج وان كان في بوست قديم الا انه فرحني كثير كثير اكثر من ما تتصورين
حسيته صادق بدرجة كبيرة
:)
حياج الله وجودج يسعدني
واتشرف باهل الامارات ويشهد ربي انه لهم معزة ومكانه خاصه في قلبي
:)

غير معرف يقول...

صحيح انه قديم بس قعدت أقرى في آخر بوست لج ومن ثم بديت أتنقل إلى بوستات أخرى.. وصلت هذا البوست وحسيت اني ما أقدر أطلع منه بدون ما أعلق :) أكيد أول ما جفتي تعليقي قلتي منو حج المصباح السحري؟ ;p

esTeKaNa يقول...

anon.
~~~~~~~
اي والله منو حك المصباح السحري
:)
ياهلا ويا مرحبا
!!
بوست قديم كانودي اعرف اللي شدك فيه؟
:)
حياك الله من اول بوست لي اخر بوست

غير معرف يقول...

الله يحييج :)
قتلج.. ما كان هذا البوست وبس
كان كله على بعضه
وصلت هذا البوست وقبل ما أطلع من النت ما قدرت ما أترك تعليقي
لإنسانة حسستني انها قاعدة يمي وهي تتكلم..
كلماتج دلت طريجها للأعماق
وهم تعليقاتج.. أقعد أضحك وأنا أقراها
أحسج مبدعة حتى فتعليقاتج..
مش الإبداع هو الخروج عن المألوف!
انتي كنتي كل مرة تصدميني بنكتة :p

أكيد ما زدت شي على اللي غيري قالوه
بس لأني أنا قلته صار غير عن اللي قالوه :p

قد الفشخره انتي بس؟ :p بس حرام فشخره بريئة مو :p