الأربعاء، أغسطس 29، 2007

الخميس...وماما عايشه

وداعا يا خميس الاجازه
وخميس العروس والزواره
وداعا يا ليله الخميس
ونومه ضحى الخميس
نحتاج وقت لنفك الارتباط مابين الخميس ومناسباتنا
استمتعو به..فهو اخر خميس اجازه
ولو انها مو فارقه معاي حاليا..فكل يوم هو يوم اجازه
:)
.
.
.
لها اتصال يومي ظريف
لا هدف له سوى الثرثره
تلك هي جدتي،ام امي وحبيبتي
تتصل في ذات الوقت كل يوم،واذا لم يرد احد على تليفون البيت دقت علي:
شخباركم؟وين امج؟وين ابوج؟شغداكم؟
البارحة ما نمت ،ريولي تشخص
وراسي عورني من امينو حارتني
تصدقين ثوووله ما تفتهم،اقولها:
لا صنقلت الشمس صوبني،ولا أده الضحى العود نزلي سوي الريووق
تهز لي راسها وتقولي ما فهمت،شقلت انا شقلت عشان ما تفهم!!
ضحكت حتى احسست انها توترت من ضحكتي:
يمة هذي هنديه وانتي حجيج نقوص اشلون تفهم؟
ما ياز لها الحجي كملت:
انا من اول يوم قلت حق خالج مابيها،خدامه كراعينها طوال ليش؟
البارحة رحت بشتري لها هدوم،اقول حق البياع ابي بجامه (مقاس هنديه )ما لقيت
علامهم الاوادم تخدو !!
:D~
.
.
.
.
تقارن غلاتها بغلاه ام ابوي وتزعل!!
ولجبر خاطر امي عايشه سيّرت عليها الضحى انا وقرص عقيلي تحبه
تبتسم بحب وتسولف:
الصبح ما يتني نومه،واطالع بالتلفزيون ولا خبيره تجميل حمره عطره
لبنانيه،تقول حق السواد حوالين عيونج حطي خيار،قصصيه طوال طوال
لحد هني انا ساكته واسمع
وتالي حق التجاعيد اسم الله علينا حطي كرفس وخبز على ويهج
وتغشي من الضحك
اقولها من صج يمه؟
تقولي اي والله سمعته باذوني،جود الكرفس عندهم غير اللي عندنا
!!
بعد فاصل الضحك على نصايح التجميل،سألتني:
انا قلت لج دقيت على التلفزيون؟
ابتسمت:
اي يمه قلتي لي
زمت الحلج:
لا ما قلت لج ،قلت حق فلانه بنت نوريه،
اقولج ذاك اليوم الصبح حاطين صباح الخير يا كويت،ولا اسم الله علينا وحوالينا حاطين ذيج الشيفه
،باااااصجة ما ظنتي غسلت ويهها
جنها بنت عاشور ان ما خاب ظني،ماهي معبره تفج عويناتها،ولا هي عارفه تقرا،وعليه ما شبعت نوم
حطو رقم البرنامج واقوم وادق:
السلاااااام عليكم،وين راعي البرنامج؟
ويكلمني ذاك الصبي شمحله مشالله
يمة شدراج شملحه؟
يبين يبين مالج شغل:)
قالت له:
اقول وليدي وينها نادين صيداني؟
ذيج الشاتره يالله من فضلك تونس
هذي تضيق الخلق ،حتى ويهه مو غاسلته،،انا اتابع برنامجكم ابيكلم الزين
قولها تقوم قومها تروح بيتهم ترا ما نبيها
طبعا اللي يكلمها غشى من االضحك:اان شاء الله حجيه
قالت له لا مو انشالله تسكتني،يالله اهووو الحين قومها
واعيز يا بنيتي ادق عليهم ما رد شاله مادري ليش؟
:D~
.
.
.
تسألني للمرة المليون:جم عمرج الحين؟
ثلاثه وعشرين سنه
لا اله الا الله الايام تركض،عاد يوم انا كبرج وراي سرا من اليهال
ابتسم ابتسامه من حفظت هذا الحوار وسمعته للمرة الميونتعش
تفضفض ببساطه وابتسامه:
تدرين انا كرفسوني عمري 13 سنه،مادري وين الله قاطني
لا ولدت استااااانس عشان بروح بيت اهلي،بلا طباخ بلا حموله
تسكت فجأة،شعرت فيها تحاور نفسها قبل ان تعترف:
تعرفين فلانه بنت اختي؟سألتني عنج بعرس بنت خالتج
عاد انا خفت تخطبج حق ولدها،قلت ماتبي تتزوج
ماحب ولدها،طول النهار يكركر ويضحك ويسولف ويا ليته خفيّف طينه وعليه
مخيريش..مع انه دكتور
ويه اشوة انه مو دكتوري
اكره ماعلي ريال ثجيل ويستخف دمه
:)
حبيت لها راسها وشكرتها على خدمتها الجليله
تمسح شفايفها بطرف ملفعها وكأن ذاك الحش ما طلع منها
تنصحني نصيحه اخيره:
شوفي اذا ربي كتب لج نصيب ذكريني،الريال ما يبي بنت حنانه شكايه
لو قالها ادني لي ورا راحت تركض حق اميمتها،لا...صكي حلجج وسكتي
لو يشيلج انتي،واغراضج وقشج ويقطج عن باب السكه
بسكاااات شيلي اغراضج ودشي من الباب الثاني
Looooooooooooooooooooooooooooooooooooooooool:)))
عندما وصلنا لهذه النوعيه من النصائح والحوارات،سحبت روحي ورديت البيت
واتفقنا على يوم في الاسبوع القادم،نروح سوق شرق نتريق انا معاها
حياكم الله
:D~

هناك 48 تعليقًا:

عبدالرحمن يقول...

زمان جميل بسيط بدون تعقيد مليء بالحب سهل
اتو منه امثال الحجيه الله يطول بعمرها انشالله

بس اهم شي النصايح احفظيهم خصوصا الباب الثاني لما يقط قشج برا :)

للاسف مالحقت على جداتي
ربي يخليها لكم انشالله احب السوالف مع الشياب

سلميلي عليها لما تدق عليج باجر وقولي لها لما عبدالرحمن يستلم وزارة الاعلام راح يفصل بنت عاشور ويحطلج بنت صيداني حتى بنشره الاحوال الجويه شتبي بعد

b9mah يقول...

واي اسم الله عليها ياحلوووها يدتج الله يحفظها ويخليها لكم

يازين الحريم الكبار حجيم يونس ماينمل من مقعدهم

وعلى طاري قرص العقيلي

بقلدج بسويلها وحده واوديها حق يدتي الخميس ..
قصدي صارت اليمعه الحين حسافه

جان زين يدتي اهيا جارتنا
ودي اسير عليها كل يوم
تفرح باللي ييها
واطلع كل ماعندها فرحانه بييتنا

استكانه سلمي على يدتج وايد
والله يسلمها ويحفظها ويخليها لكم
: )

Mishari يقول...

الله يطول بعمرها يدتج والصراحة هذيل نور الدنيا الحين
الدنيا تغيرت وهالناس الطيبة لى الحين على معتقدات قبل

:) خليها تفضفض لان ترى ما يبون الا اللى يسمعهم بس ما يبون اكثر

عسى الله يكتبله الخير وطولة العمر

Sentir يقول...

انا بعد تمنيت لو احب لها راسها واشكرها على خدمتها الجليله, بس ياليت تسمعون كلامها وتطبقونا

lolllllllllllll

اتغشمر ترى

esTeKaNa يقول...

عبدالرحمن
~~~~~~~~~~
السؤال اللي يطرح نفسه:
اذا ما لقيت باب ثاني وين اروح؟
تهقه اشقح السور؟
:))
اللهم امين وماقصرت
وفعلا انا استمتع بحوارات الاطفال والشياب...الاثنين يتمتعون بعفويه عجيبه
!!
يوصل سلامك ان شاء الله
وخلك يم التليفون
ما راح تدق يدتي
بس يمكن تدق عليك الحكومه ويسلمونك الوزاره وتطيب خاطر يدتي عاجلا غير أجلا
ملاحظه:انا بانتظار صورة عروسكم الجديده
:)








b9mah
~~~~~~~
حيالله بصمة
ياهلا ويا مرحبا
اي والله يا حلو اليدات ويا حلو سوالفهم
:)
وزين تسوين،ترا اي شي لو بسيط يفرحهم والله
انا اعترف مقصره معاها
واحاول قد ما اقدر اوصلها
واسولف وياها واخذ مافي خاطرها
خلج احسن مني:)
يوصل سلامج ياالغاليه
وترا انا ناطرة نتيجة الاجتماع ان شاء الله
:)









mishari
~~~~~~~~~
بالضبط يا مشاري
ما تبي الا الفضفضه
يعني شنو اكثر من انها تسألني اذا مسولفه السالفه ولا لا
اقولها اي
تقولي لا ما قلت
:)
يعني تحس اهي تبي تسولف وبس
يا بعد قلبي قلبها

آميين ما قصرت

esTeKaNa يقول...

sentir
~~~~~~~~
LooooooooooooooooooooL:))
اي والله خدمه جليلله
انا كسرت خاطر روحي يوم قالت لي عنه جذي:(
بس اهم شي النصيحه
ترا شي نادر هالنصيحة
يمكن اسوي كتاب اسميه:
نصائح جدتي
بس اخاف الناس تروح فيها
:)

salfa3ajeeba يقول...

allah i7afithha lich w i'7alleha,

ibthimmitich ma irti7ti 3ogob ma ri7tee laha:)

esTeKaNa يقول...

S.3JEEBA
~~~~~~~~~~~
امييييييين
:)
اي والله حسيت براحة مصدرها رضاي عن نفسي انها فرحت فيني مسكينه
تخيلي احساس مرة كان بيتها مليان
ببنات وريل وعيال وفجأة صخة
!!
ما تنلام تحط حرتها بالخدم ويضيق خلقها
:(

DiLLi O MiLLi يقول...

الله الله على القعدة مع يديداتنا .. أنا أكون في قمة سعادتي لما اسمع منهم سوالفهم أول ونصايحهم لنا ألحين .. انا كنت وايد ملتصقه في يدتي أم أبوي الله يرحمها .. وبيتها لزيج بيتنا فأنا كله عندها .. وايد تأثرت بطريقة حجيها ومفرداتها القديمه .. فطلعت أمــــقط الحجي ومعظم مفرداتي قديمه .. صديقاتي ما حجوتهم ألا :"أشعند يدتي!؟"هههههههه
واحد من عيال عمي من كثر ما أمـــقط الكلمه .. كله يقولي :"وييييييه كلمتج طولها أســــبوع"!!هههههههه

بس عجيبه سالفة يقطج أنتي وقشج بالسكه وترجعين تدخلين من الباب الثاني هههههههه .. جان قلتيلها الزمن ألحين تغير أذا قطني أنا وقشي من الباب أدخله من الباب الثاني وأيمع قشه وأحذفه من نفس الباب أهوو وقشه وأقفل الباب .. أما الباب الثاني أردمه بكونكريت صبه عشان لالا يهوب من البيت ههههههههه
:)

تذكرت موقف مع يدتي .. أقول أستكانه جني طولتها عسى ما وراج شي ؟ وأنا قعدت اهذر وأخرتج ؟ قوليلي عادي أكمل سوالقي عقب .. ها؟ أكمل ؟ خوش
:)

كنت قاعده معاها وكان في مباراة كرة قدم بالتليفزيون .. جان تسمع الحربان يقول :"واحد من اللاعبين الأحتياط بره الملعب قاعد يسخن".. جان تلتفت علي يدتي وتقول : هووو شيسخن !؟ معاهم أجول !؟ هههههههههههههه ... غشششيييت عليها من الضحك
:)


الله يخليلج يديداتج ويطول بعمرهم .. ولا يحرمج من قعدتهم وسوالفهم


:)

esTeKaNa يقول...

dilli o milli
~~~~~~~~~~~~~~~~
ياهلا ويا مرحبا
يا زين هالصبح والله
عندي وعندج خير
والله يا دلي صرت جني عيوز سمول من مجابل يداتي ومشالله شخصيات مختلفه
ام ابوي ..مثقفه خاتمه القرآان
قليله الكلام وحكيمه
واهتماماتها اخرى
يدتي ام امي...قمة البساطة وسوالفها عماد حمدي وشاديه واطمر
لوووووول
واي غشيت من الضحك على سالفه انا وقشي
واي دلي كسرت خاطر روحي
اهي تقولي تدشين من الباب الثاني وانا ارد عليها:
يا رخصك يا الغالي
!!
سولفي سولفي
وسعي صدري عسى الله يوسع صدرج دنيا وأخره
عيل معاهم اجول ها؟
لوووووووووووووووووووووول
واي خف طينه يا حلوهم
انزين الحين عطيني حل شسوي بروحي؟
راحت موضه العيايز يبون من طقه حليمه
واستكانه صايره يده صغيره شسوي؟
:)))

Q8i_Blogger يقول...

صراحه ضيقتي خلقي ... ذكرتيني بيوم الخميس

انا مشكلتي مو مع الخميس
إشلون أودّع يوم الأربعااا ... كان من أحلى ايام الاسبوع ويوم زوارة أهل ابوي
والخميس حق الصوب الثاني
كل شي راح يتغير الحييين ...
كنت متوقع راح أودّع كلشي بس مو يوم الاربعا عاد ولا يوم الخميس .. للأسف والله

ويدتج الله يطول عمرها من واجبج عليها تسمعين كلامها ونصايحها بما أنها أكبر منج بالعمر وعندها خبره أكثر
وخصوصا نصيحتها الأخيره الي تقول فيها: شوفي اذا ربي كتب لج نصيب ذكريني،الريال ما يبي بنت حنانه شكايه
نصيحه من ذهب
يعني لو طراقات .. قولي مشكور ويعطيك العافيه

موضوع جميل ومرّي على مدونتي تراج كسبتي هديه

esTeKaNa يقول...

q8i_blogger
~~~~~~~~~~~~~~
لا لا
لا تختلط عليك الامور
مو انا اللي قلبت العطله وخليتها يوم السبت
صدقني انا نفس حالتك اعشق يوم الاربعا
وزوارتنا ،الحين راح نظطر نغيرها
:(
يالله باجر نتعود ويصير احلى يوم يوم الخميس

اهم شي طراقات
واقوله مشكور يعطيك العافيه
!!
يا سلاااااااام
بعد بس ناقص اقوله :
تسلم ايدك ماقصرت
لا خلا ولا عدم
:D~

ray يقول...
أزال المؤلف هذا التعليق.
ray يقول...

يحليلها الله يحفظها

أحب اليدات :) .. يدتي توها راجعة من لبنان ... وااي اتينن الله يحفظها تقعد بالساعات تسولف عن حديقتها هناك و سوالف الخدم

و اهم شي اناه تلعب هاند أحسن منا :P

esTeKaNa يقول...

ray
~~~~~
مشالله يا حلوها
حمدلله على سلامتها وقرت عينكم
واي ترا الخدم مسوين لهم شي بحياتهم
اكشن
يعني من غير الخدم ما عندهم سوالف يمكن
:pP~
اهم شي هاند
!!
لووووووول
يا حلوها مشالله
يدتج مو هينه،خليها تسوي لنا دورات
:Pp~

qesat_5ayal يقول...

الله يطول في عمرها

عجبني الحوار وايد
البارت الأخير من الحوار يضحك :)

والخميس
آه يا أحلى خميس
وأخر خميس

5roofa يقول...

ياااا قلبيييييييييي
واااي تهبل تهبل الله يحقظها و يحفظ كل غالي عليييج
لوووووول

يحليلها والله تصدقين نصايح العروسات هذي عند الكل الظاهر يروحون دوره
لوول خو انا يدتي مسكينه عيزت و اهي تيب خطاطيب و انا اردهم ليما مره سفلت فيني الله يطول بعمرها و دعت ذيج الدعوه
لوووووووول
قالتلي يارب بجاه النبي ما تطلعين الا يعربج واحد و تحبين و ترضين تزوجين عما بعين العدو بنت راسها يابس
لووووووووووووووووووووووول

ياقلبي على اليدات عسل عسل

7abet ur post waayed
salamz swete...

bin3li يقول...

أنا صاير مثل هندية يدتج
شو يعني: لا صنقلت الشمس صوبني ؟

و حلو استاندر المقاسات مالها
مقاس هندية
عجيييب! :D

و على طاري الأكل
أبغي شرح مفصل عن القرص عقيلي

و محروق صبعه

يالله ، اليوم حصة ثقافة كويتية :)

loyalty يقول...

LooooooooooooooooooooooooooL!!

كنت بعلّق على نقطة نقطة .. بس النقطة الأخيرة صكّت ع الكل :P

ماحسيت باختلاف أبداً و انا اقرا كلام ماما عايشة .. سبحان الله الحريم الكبار ماني قايله العيايز يتشابهون حتى بكلامهم .. يعني ماما عايشه حسيتها نفس ماماعوده تبعنا :P

بس ليش انسحبتي من الحوار ؟؟
اتوقع انه توه كان يبدي :)

magnoonah يقول...

واي يام الجاي

ستكونه

(اسم الدلع وانا اخترته لج)

:))

يدتج تهبل ما شاء الله ياربي يا حبيبي يطول بعمرها وتشوفج عروس

اللهم امين


استانست على مدوناتج خصوصا على سوالف لبنان الله يغربل بليسج


اما اليدات فاحب اقول بكل فخر اني تربيت يدتي الله يرحمها لعمر 11 سنه

اذكر جمعتها مع اليدات الضحى لما تاخذني معاها وتييب وحده من بنات اليد المستضيفتهم صينيه كلها استكانات جاي
(لا تخافين ما استنسخناج )
وبالنص كوب كبير حاطين فيه عصير عشان العيوز الصغيره مجنونه


الله يا استكانه جمعه حلوه وبساطه فاقدينها بزمن المظاهر



وسمعي نصايحها ولا تطبقينهم بزمنا لانه اذا قط قشج بيرد يجمعه ويقولج تفضلي داخل بيتج ويعتذر لج

:))

ايه مو كيفه.......

الدائرة الخامسة يقول...

الله يخلي لك يدتك
ولو علي والامر بيدي
كان اشيل بنت عاشور وبنت الصيداني
واخلى جدتك مقدمه برامج صباح الخير ومساء الخير ... والله بالخير
حتى نشره الاخبار هي تقدمها
راح نرد امجاد تلفزيون الكويت مع يدتك الله يحفظها
وازيدك من الشعر بيت ,,, برامج جدتنا العزيزة .. ليف على الهواء مباشره .. حق الدقاااات
بصراحه موضوع رائع وشكل طيبه القلب وجمال الروح وروعه الكلمات شغله وراثية في عائلتكم الكريمهه
واكرر الله يخلي لكم باب الجنة الاوسط فقد ورد في الاثر أن بر الوالدين ...باب الجنة الاوسط

ZoZOta يقول...

والله يا استكانه صار عندي عاده

استفتح ببلوقج

سولفج حلوه

تمسح على القلب وتنسى الهم

يازينج زيناه

:*****

lawyer يقول...

LOOOOOOOOOOOOOOOOOOOOOL

ههههههههههههههههههههههههه
اهم شي ردي من الباب الثاني

هاااااااااااااااااو طاردني

شرررررررررد
ههههههههههههههههههه

وين لو نص حريم الكويت سوها جان مالقيتاي مطلقات في البلد

ياحوووووووها على سجيتها؟

طيييييييييييييبه

هههههههههههههههههه

ذكرتني في ماما لولوه الله يرحمها



لا ازيدج من الشعر بيت
ما تدق تقووووووووووول قاعده بريحاتي ماعندي احد ضايق خلقي

و اهي الدار متروووووووسه عندها بعد قلبي


مساكيييييين بعد قلبي يستاحشووووووووون لي كبرو

2 u ALL يقول...

هذه هي البساطه التى عاش عليها أهلنا ..!! وهذه هي الصراحه والوضوح في التعامل مع الناس ..!! الله يخلي لك جدتك ويحفظها ويطول عمرها .. أنشاء الله ..!!؟

محـــــارة يقول...

روعة أنتي .. عيوني طبت داخل الشاشة وحلجي مبطل يأكل كلماتج

يازينيج يا أستكانه ويازين كتاباتج .. الله يخليها لكم ويطول بعمرها

الكبار بكل زمان ومكان لهم نفس الروح ونفس الكلمات وبنفس البساطة

لذيذين فوق الوصف أعشقهم وأعشق سوالفهم وسيرتهم وبطولاتهم .. عسى الله يخليها لكم وتفرح فيكم جميعاً

حبيها لي على راسها .. وبالعافيه مقدماً

charisma يقول...

الله احلى بوست قريته بعد المجبوس
بس ليش اروح شوكليت بار
انا حليت فى بوستج وخلصت
ههههههههههه

الله يخليهم لج ذخر ويعطيهم الصحه والعافيه ويطول بعمارهم امين امين

يحلوهم ويا حلو القعده معاهم
تسوى الدنيا وما فيها يا استكانه

ذكرتينى بيدتى نفس يدتج
وانا حملت الرايه من بعدهم
لووووووووول

ضرورى ضرورى
اسال شنو غداكم اليوم
ههههههههههه
حتى مع صديقاتى بدون ما احس تلاقينى اسال ها شنو غداكم اليوم شكليتو
ههههههههه

وسالفه الخدم مع اليدات لووووووووول
الله يرحمج يا يما حصه
كانت نفس يدتج اتشكى من خدامتها انها ما تفهم كلامها
لووووووووووول
اذا احنا ما نفهم النقوص الى تقطها تبين هالخدم يفهمون
هههههههههه

كله تقول هذى ساهره مدمغه ومخديه ولا تفهم
واتخزنى وااااى ما احب احد يخزنى
وما ابيها انا استاحش منها
لوووووووووول

لو ما انى استحى جان قتلج يدتى شلون اتحلطم على خدمها والدعاوى الى تدعى عليهم
بس اغلبها عييب وحفاظا على مشاعر الناس والحدود المسموحه لنا جان كتبت

لووووووووووول
شى شى يا ستكانه ما مر عليج ولا سمعته اذنج
لووووووووووووووووووووووووول

انا يدتى تغار من مرت حماها
لووووووووووووول
وااى اتينن
لى رحنا الشاليه
يدتى كبرت ولا فيها شدت بحر
هذيج مرت الحما تطب تسبح انشط من يدتى
يدتى تحط كرسى بالصاله اجابلنا واحنا نسبح
وتلجح مرت حماها اتقلب على اليال بعباتها تسبح وتستخف
لوووووووووووووووووول

تكم على جنب تقو ل وييه فلانه كبيره مع الكبار وصغيره مع الصغار
لوووووووووووووووووول
من الواهى

ولالالا تسمع انها راحت العمره
ولا صايمه اثنين وخميس
يدتى ما فيها شده على الصيام ووايد عندها ادويه
ما نخليها تصوم

من تستخبر تقول

مو كل من صام وراح العمره فلح
الواحد يقول يالله القبول

لووووووووووووووووووووول

ولالا تستخبر ان وحده انخطبت من احفاد حماها واحنا حفيداتها قاعدين

تلاقين تقولها امى يماا فلانه انخطبت

جان تقول هااو ليش عميان ما شافاو بناتى

لووووووووووول

امى ترد هاو يما نصيب هذا
الله يوفقها ان شاءالله
ترد تسال بعد صمت
تقول من بيتا
من له انخطبت
تقولها امى

ترد تقول ويييييه عليهم بالعافيه

شيطلعون هذول اش نبجهم

لووووووووووووووووول

من الواهى


احنا ما نعطى هالعوايل
ههههههههههههههه

الله يرحمها
كانت تحفه ما تتكرر

وكانا حاملين الرايه من بعدها

امى وخالاتى من كثر ما تحلطموا على امهم قاعد يتبعون خطاها
وعسارتها



واحنا وراهم

انعيب وانتحلطم عليهم وانسوى مثلهم

لوووووووول

الله يرحمهم
ويطول بعمار الموجودين ويعطيهم الصحه والعافيه


ديللى :

ههههههههههههههههه
ههههههههههههههههههه

موتينى ضحك
عجيبه يدتج

ترا حتى انا ديللى ما يفهمون لى صديقاتى
كلا يقولون لى انتى مغبره
ههههههههههههه
ولا يعرفون حق كلامى

اعرف وحده من صديقاتى مسويتلى قاموس اتيمع كلامى
انت تعرفينها زين

هههههههههههههههههههههه
هههههههههههههههه

:**


السموحه استكانه فصلت فى بلوقج
بس لو ما ادرى انى امون ما خذيت راحتى
:**

PearL يقول...

يا حلو حجي العيايز

اينن

بس ضحكتني نصيحة انج تدخلين من الباب الثاني
لووول

:):):)

الله يخليها لج ويخليج لها يارب

SolaimaN يقول...

الله لا ايحرمكم منها انشالله ويلبسها الصحه والعافيه

اقرى واحك اذاني ،،جني قاعد اسمعها سوالفكم

:)

حسام بن ضرار يقول...

للحين سالفة ان الخميس الياي دوام ما تنبلع




الله يطول بعمر يدتج و يخليها لكم

سويلفاتي يقول...

الله يحفظها لج انشالله
اي والله يننون هالعيايز عليهم سوالف توسع الصدر
انا اذا ضايق خلقي اجابل يدتي واخليها تقص لي قصص بيتهم العود اللي كل العيال وحريمهم فيه
واخذي ضحك ووناسة
الله يطول في اعمارهم يا رب

Very.Q8ya يقول...

3assssssssaaa allah yekhalleellich yaditich golay ameeeeeeen .. LOOOOOOOOOOOOOOOOOOL tha7aakteeeeeeneeey 3ala Sowalefhaaa .. ityaannnnnnnnnnin LOL zooQa ;******** a7la shay inha daagga 3al barnamaj LOOOL wallah zin tsawey, ili ib galb'ha 6alli3tah :P
thanks 3al post 7adda zooQa mithlch:*
take caaree

بنت الكويت يقول...

يا حلاتها يدتج

الله يخليها لكم يارب ويطولكم بعمرها انشاءالله

واايد احب اسمع سوالف اليدات
تحسينهم طيبين وعلى نياتهم

وترى خوش نصيحه عطتج لا تنسينها

الله يخليها انشاءالله

esTeKaNa يقول...

qesat_5ayal
~~~~~~~~~~~~~
آميييين ..يزاج الله خير
اي مو هذا اهم بارت
:))
وانا لوداعك يا الخميس لمحزونون










5roofa
~~~~~~~~
لووووووووووووووووووووووووووووووووول
واي مت مت من الضحك
بدعت يدتج
هاا خروفه
جنه الله استجاب دعائها
:Pp~
زين تسوي فيج اشحقه تردين الناس؟
يعني لازم تحبين؟الحب مذله وانا اختج
:)))
واي خروفه تتخيلين نصير يدات؟
واي احس بصير حنانه
بس طيبه
لوووول







BIN3li
~~~~~~~~
لا صنقلت الشمس=يعني اذا كانت الشمس في كبد السما وحااااره
صوبني=غسلي الملابس بالصابون
قرص العقيلي=كيكة عباره عن طحين وزعفران وبيض ينخلطون وتحطهم بالفرن وتطلع لك كيكة لذيذه
محروق صبعه=عباره عن مرق وخبز
ماحبه:(
عسى وفقت في الشرح؟
يدتي تضحك
تخيل تروح وياي السوق تقول حق الي يبيع ابي بلوزه حق يوسف ولد عبدالرحمن
!!
انزين يوسف جم مقاسه؟
تقول مادري ياهل اهو يركض بالسكه
لووووووووول
شنو استفدنا؟

esTeKaNa يقول...

Loyalty
~~~~~~~~
يمكن ماما عوده مالتكم
اهي يدتي
ونطلع بنات خاله
:Pp~
لوووووووووول
اي النقطة الاخيره اهي الغمنده
ترا هذي نصيحة موجهه لكل الانسات
اي كان توه بادي بس الياي اكثر
وبالاخير راح تقولي يا ام راس يابس
البنت لها زهوه وتروح
لا ترديييييييين عيال الناس
:))









Magnoonah
~~~~~~~~~~~
واي استااااانيت يوم قريت الاسم
حسيت روحي مسويه عناقيص
:D~
وعساج دوم مستانسه ،نورتي البلوق
واااي يا زين االعيوزه الصغيره المرتزه
ما يسون لج جاي العروسه؟
يحطون نقطة جاي والباجي ماي
ويصير الجاي ماي مايوه بس المهم لونه احمر ،احطة واقعد بالنص اشرب جنه صج
:)))
اميييييييين
وما قصرتي على هالزياره الحلوة
اي هذا الحجي
يعتذر لي اعتذار رسمي بالصفحة الاولى باكثر الجرايد مبيعها بالكويت
:)))










الدائرة الخامسه
~~~~~~~~~~~~~~~~
hahahahahahaha
تخيل يدتي ويا ملفعها
وتغطي ويها بطرف عباتها
وتقدم برامج بالتلفزيون
ولايف
يدقون عليها وترد:
طفا طفا من هاللي داق علينا
من انته من ولده؟
منهو امك
على الهواء مباشره
واذا ما ياز لها الحجي لوت البوز
لوووووووووووول
الله يجبر بخاطرك كان نيتك تجبر بخاطرها:)
رائع جدا مرورك ،والله يرزقنا برهم وجنه تحت اقدامهم

esTeKaNa يقول...

zozota
~~~~~~~~~
هلا يا الزين كله
يا زينج ويا زينها من عاده
عسى الهم بعيد عن قلبج الطيب
قولي امين
:))












lawyer
~~~~~~~~~~
شفتي شفتي؟
اناقلت اذا انطردت بدق عليج تليفون
ارقع الموضوع
ولا ارد من باب ثاني
انزين واذا مافي باب ثاني؟
اشقح؟
!!
يا بعد قلبي والله ماما لول
الله يرحمها وعساهاب جنات النعيم

















2uall
~~~~~~~
عدل كلامك
واللهم امين
:)



















محاره
~~~~~
ياااااااااااي
يا زينها الي مبطله عيونها
وحلجها ياكل كلماتي
عسى لذيذه كلماتي؟
:))
يا بعد قلبي قلبج
واصل سلامج ان شاء الله
ويعافيج الرحمن يارب
:**

esTeKaNa يقول...

charissma
~~~~~~~~~~~~
قريت اسمج ابتسمت
كلمتين ضحكت
تالي لا لا قمت اكركر على كبر الدار
لووووووووووووووووووووووووول
واي موتيني من الضحك
اول شي راح اسوي جمعيه العيايز الصغار
واهم عضواتها انتي ودلي وانا
ثانيا يدتج موتتني من الضحك
واي جنها يدتي ويا مرت يدي شريجتها
شي شي
يدي تحلل بقبره ويدتي للحين ما تقول اسمها
ما تقول الا القابها اللي ما تنقال
لووووووووول
واي صاجة صاحة كل شي اتحلكم عليه صرت مثلهم،كافي الحراره واللبحه
صايره ابد جني يده
:(
سموحه؟
اشحقه
انا بدعت وانا اضحك ماني معبره اكتب لج رد،الوعد بعدين انا وياج مو مال بوست وكومنت
لووووووووووووول







pearL
~~~~~~~~
هلا يا اللولو
هلا بالباريسيه والله
هذي اهم نصيحة ترا
:)))











Solaiman
~~~~~~~~~~~~
يا هلا ويا مرحبا
عسى صوتنا مو عالي؟
:)
امين







حسام بن ضرار
~~~~~~~~~~~~~~~
اي واله ما تنبلع
الله يعين انشالله
:)







سويلفاتي
~~~~~~~~~
وي يا زين الاسم والله
يا هلا ويا مرحبا
الساعه المباركة يا ام السوليفيات
اي والله يوسعون الصدر
الله يحفظهم لنا ذخر
:)













very_q8ya
~~~~~~~~~~~~~~
امييييييييييييييييييين
اي تينن سوالفها
تجبابلينها مو ودج تسكت
:)
اي داقه يدتي عندها رئيه اعلاميه عشتو
لووووووووول






بنت الكويت
~~~~~~~~~~~~
حلت دنياج قولي امين
اي والله طيبين وعلى نياتهم
خوش نصيحة بس تسمعينها
بس تهقين نطبقها؟
يارب مقطوطه انا وقشي عند باب السكه
ارد من الباب الثاني؟
وهوووونه
على قوله يدتي
:))
ّّّّ

Fahad Al Askr يقول...

ممتع البوست، سوالف فلة، متى الوعد؟

EmmaJohnson يقول...
أزال أحد مشرفي المدونة هذا التعليق.
DiLLi O MiLLi يقول...

شوفي حبيبتي

اللي يبي وحده أتنهوص مثل حليمه .. قطيعه تقطه .. أنتي أشتبين فيه!؟

المثل يقول : عتيج الكلام ولا يديد التنهوص هههههه هذا المثل من تأليفي .. لا تكشخين عند الأوادم وتقولينه ههههههههه
:)
وبعدين نص حجي حليمه مااا ينفهم آخر كل كلمه لازم حلجها مشرع !! ما تسكر حلجها !! كل كلمه عندها تنتهي بالألف ااا و ااا .. !! بذمتج شنووو هالموديل !!؟؟؟؟

خليييج مثل ماااا أنتي أفاااا علييج ... أيهبل موديل اليده المودرن .. ههههههههه

:)

tweety يقول...

ولنا بالعادة انتلاقى كل خميس

عاد انا عكس الناس مستانسة بإجازة السبت لأن أول أكره اليمعة وما اواطن السبت اللي جنه صمون فرنسي ما يمر جود الاحد يطلع احسن انجرب

استكانة كيفج يدتج حبيتها ماشالله عليها سوالفها اتينن وهي صاجة منيرة عاشور حاطينها من صباح الله خير اهي العصر ما تنبغى هالدور من فير الله ويا مكياجها الشاحب اتخرع الاوادم
لا نبي المزيد من يوميات يدتج الله يحفظها لكم
سلمي عليها ضروري

حمودي يقول...

انا مادري ليش مستانس على العطلة اليديدة مع انه مو فارقه معاي
:)

esTeKaNa يقول...
أزال المؤلف هذا التعليق.
esTeKaNa يقول...

fahad al_asker
~~~~~~~~~~~~~~~
ويا يا بختنا جان هالبوست ياز حق فهد
:)
للحين ما اتفقنا على الوقت
بخاطرها سوق شرق تبي تشوف البحر مادري وين!!
وانابخاطري اوديها مكان حلو
اقترح علينا
:)

















dilli o milli
~~~~~~~~~~~~~~~
looooooooooooooooooooooool:D~
واي توني توني بكشخ بالمثل طلع من تأليفج!!
اي والله شبي فيه
تصدقين هذا اللي يبي شبيهه حليمه اهو اللي بيقطني من باب البيت وادش من الباب الثاني
هههههههههههه
عيل يده مودرن ها
عسى الله يجبر بخاطرج ولا يحرمني من نصايحج يا مرايم
وي وي اي مرايم
قصدي يا دلي
:)))

esTeKaNa يقول...

tweety
~~~~~~~
هلا بالطيب الغالي
عزيز وشوفتك منوه
:)
حبتج العافيه يا تويتي
يدتي لها رؤيه اعلاميه بعد قلبي
مسؤل بالاعلام يصير لها وكشخت عبالها اهي الامر الناهي من تدق تقولهم ترا انا عمه فلان
واخزياااه فشلته
:))
افا عليج،طول ماهي موجوده عسى ربي يطول بعمرها لابد اكتب شي عنها بين فتره وفتره









حمودي
~~~~~
هلا وغلا
اي نفس حالتي مو فارقه وياي
بس مع هذا مو حابتها
:)

DUBAI يقول...

هاي "البركة" الله يحفظها لكم يا استكانة

esTeKaNa يقول...

دبي
~~~~~
امين
وجزاك الله خير يا مسك ختام هذا البوست
:)

عــــاشــــه يقول...

الله يبارك فيها ... هاي نوارتكم


وعن السبت
بتتعودون

نحن كنا مثلكم أول ماطبقوا النظام عندنا

الحين أشوفه أحلى

وأحس عندنا 3 ايام إجازه

الخميس سهر
والجمعه تجمع الأهل... والمسا سينمات وطلعات وعشا برع

والسبت ريوق وزيارات

New Bride يقول...

mahsalaah :) God blees her tyanin tyanin