الثلاثاء، أغسطس 21، 2007

شصاير؟؟

البداية كانت نظرات
تطورت النظرات الى نغزات
ومن بعد النغزات والتلميحات
!!بد.أت ست الحسن بالحركات
.
.
.
يطلب منها أخي بعض الاوراق ليوقع عليها،تأتيه بسرعه وبيدها الاوراق وتليفونها النقال
يقلب اخي بالاوراق
وتقف هي مبتسمه
يمد يده بالاوراق
فتمد يدها لتريه صوره بنت سفور في بدله سهره
@@
طارت عينه يا بعد عيني عينه انصدم
وبعد وهله صد بعينه وعصب:
شنو هذا؟
تبتسم بثقه:
هذي انا بعرس بنت خالي حلوة؟
ملاحظة:البنت محجبه بس حجاب الله بالخير
.
.
.
يكبرني اخي بسنوات قليله،وفقه رب العالمين بوظيفه جيده ومنصب ممتاز رغم صغر سنه
ولكن ربي ابتلاه بكثره الموظفات الخربوطيات في دوامه
!!
.
.
.
بعد موقف الصوره،شيّن النفس وتصدد عنها ،رغم انها سكرتيره وهو بحاجه لبعض اعماله لديها
الا انه سعى بأن يحصل على ما يريد من اوراق واشياء مهمه عن طريق زميلتها ..الاكبرالتزاما وتدينا
ست الحسن ما ياز لها هذا الصد شنو سوت؟
تخيلووووووووووووو
تتبعت طريقه من الدوااام الى البيت
حاول تضييعها بالطريق ولكن دون فائده البنت معزمه تدل البيت
!!دلته
.
.
.
من ثاني يوم اخوي بكل سنع ناداها،وهو منحرج ومتدوده وكلمها بكل ادب:
انتي بحسبه اختي،وما يصير اللي تسوينه،مو زين بحقج ولا بحق اهلج
وعطاها محاضره عن الدين والاخلاق
شنو سوت؟
دزت بوكيه ورد حق بيتنا تعتذر
انا يوم شفته طار قلبي عبالي حقي
بوكيه حلو ومتعوب عليه
hehehehehehehehe
.
.
.
البنت مرابطه ورا اخوي بكل مكان
كل الفريج ملاحظها من كثر ما تفتر
اخوي استنفذ كل الوسائل السلميه معاها
ما يبي يحرجها جدام الناس،بس اهي مو هامها الناس
اشتكى حق المدير بالدوام ونادى المدير البنت:
فلانه،انتي متعرضه حق فلان؟
اتعرض له؟انا ما سويت له شي انا معجبه فيه
شتبين يعني؟
ابيه يهتم لي شوي !!
المدير اقشر بكل صراحه قالها:
انتي جدامه وشايفج ويدري انتي من بنته ،لو هو باغيج خطبج
الولد ما يبيج عيب اللي تسوينه
انهارت من البجي:
انا احبه،ما راح اخليه
!!
انتهى الموضوع بان البنت كتبوها تعهد انها ما تتعرض له باي مكان
والتعهد مكتوب بخط ايدها من يومين
وثالث يوم لا تليفون البيت سكت،ولا المسجات في موبايله وقفت
:(
.
.
.
سولف لي اخوي ،وشفتها بعيني من يومين عند باب البيت
ابتسم واهمس لاخوي على الغدا:
اذا بنت ناس ومصليه ومسميه ليش ما تتقدم رسمي؟
تكلمني انا على الاقل؟
انا اقدر المشاعر ولا راح اكسر بقلبها
:Pp~
يخززززززني ويسكت،اكمل واطفره:
حلوة؟خزيت الصورة يوم شفتها؟
يتنرفز:
لا تغثيني ،كافي انها ملوعه جبدي
يا اخي حط روحك مكانها الحب وما يسوي
:pP~
رغم كل خططها..ما زال اخوي على موقفه الله يحفظه
واكتشفنا انه الموضوع صار له فتره وهو ساكت
وما تكلم الا لما طفح الكيل وبدعت
!!
.
.
.
يوم قريت التعهد بخط ايدها،ارتجفت خجلا
كيف تهون البنت على نفسها؟
انزرع فينا من طفولتنا انه البنت دايما معززه مكرمه،حلاتها بخجلها
بتمنعها
بعلو اخلاقها وروحها
شصاير ببناتنا؟
مابين فتره وفتره نسمع سوالف عن فلانه اشلون قدرت توصل لفلان
وفلانه اشلون رسمت على فلان لي خذته؟
معقووووله وصلنا هالمواصيل؟
سعي بنت لرجل نفسيا احسه شي منافي لفطره الانوثه في كل بنت
!!
مع هذا،كسرت خاطري البنت ،قلت حق اخوي بألم:
حرام لا تكسرون قلبها،واي واي تخيلت روحي مكانها
ما كملت جملتي الا اخوي بقق لي عينه:
تدرين لو تسوين جذي؟
ما يردج الا ساحة الصفاه اعلقج هناك اشنقج
:p~يا حسرتي
.
.
.
اهم شي توصيات امي كل يوم :
دير بالك
اقرا المعوذات
لا تشرب قهوة
لا تاخذ منها شي
اشرايك اداوم وياك؟
heheheheheheh
.
.
.
هذي مو اول سالفه اسمعها
هل فعلا صار الموضوع ظاهره؟
!!
اشفيهم البني باعوها؟
الله يحفظنا ويحفظ شبابنا وبناتنا
اللهم امين

هناك 75 تعليقًا:

غير معرف يقول...

i still blame your brother.. if she likes him that much why don't he talk to her... or is he too good to give a girl a chance?

And then if she didn't see any attraction from his side she wouldn't do all that.

esTeKaNa يقول...

ANON.
~~~~~
صباح الخير
:)
اعتقد انه مجامله الشخص بمشاعره ظلم
لما يكون اهو فعلا ماهو مقتنع بالعلاقات هذي ولا البنت يايزه له ليش يكلمها ويعطيهاامل بشنو؟
هل مشاعر الناس تجارب؟
هذا اولا
وثانيا:
انا متأكده من جانب اخوي اكثر من تأكدي من نفسي
يعاملها كما يعامل اي زميله
بحدود علاقه الرئيس بمرؤسه وبس
!!
يمكن ...في شخص بس يشوف صد من الشخص المقابل يتوقف عن اول خطوة
في ناس ما يهمها
الموضوع شخصي معتمد على الشخص ذاته
فلا تتوقعين انه استمرارها بكل هذا يعني وجود تجاوب منه
!!
ما تمنيت يكون النقاش عن مدى صحة موقفه
الموضوع فكرته ثانيه
بس مع هذا حياج الله او حياك الله يا صاحب اول تعليق
:)

loyalty يقول...

طارت عيوني وانا أقرا السالفة!!
ياربي لا تبلينا ..

مادري ليش اتذكرت شعر رابعة العدوية؟
تطاول هذا الليل واسـود جانبه وأرقني أن لا خليل أداعبه
فوالله لولا الله أني أراقبه لحرك من هذا السـرير جـوانبه

مراقبة الله في كل حركاتنا و سكناتنا و يقينا من داخلنا بأنه مطلع علينا شي مهم و نحتاج نذكر نفسنا فيه من وقت لاخر..

الله يصلحها و يصلح بالها :)

esTeKaNa يقول...

LOYATLY
~~~~~~~~~~
اللهم امين
وشعر رابعه يعور القلب
:)
انا معاج بس بالي سؤال:
ليش نتقبل فكره انه هالشي يصير من شاب
بس صعبه نتقبلها من بنت؟

loyalty يقول...

شخصياً ما أتقبلها من الاثنين

لكن المجتمع ممكن إنه يتقبلها من الشاب

و يرفضها من البنت

على اعتبار إنه رجل و رجولته تشفع له!

مثل أي شي ثاني نشوفه خطأ ، لكن إذا سواه رجل يصير عادي ...

هذي النظرة الذكورية موجودة و ان كنت و لله الحمد أجد أشخاص بيني يرفضونها و الأهم من ذلك إنه اسلامنا لم يفرق بين الرجل و المرأة .. الخطأ خطأ ،والصح صح

عاد اتصدقين ؟
على زمن الرسول عليه الصلاة و السلام كانت المرأة تعرض نفسها للزواج من أحد الرجال .. لكن طبعاً مو نفس طريقة هالبنت الله يحفظها ..

esTeKaNa يقول...

LOYATLY
~~~~~~~~~~
يا صباااح الهنا
حاطة لي جاي وحليب تبين؟
شربي حليبه وياي على الصبح بما انج موسعه صدري بتعليقاتج الحلوة
:)
الله يثبتج يارب ويزيدج عقل وسنع
ادري
بس نفسيا حسها صعبه
اكثر من شخص اعرفههم،تخيلي من حبه حق صاحبه وثقته فيه يعرض له اخته او بنته للزواج
دينيا مافيها شي
بس نفسيا
اجتماعيا
احسها صعبه
!!

loyalty يقول...

حبيبتي والله مشكورة ع العزيمة
الساعه 6 بالضبط كنت رايحة مطعم الجمعية بس لا تقولين حق أحد :P

____

هذا موضوع ثاني .. احنا وايد نفرض على نفسنا قيود احنا بغنا عنها..

ع العموم ، تسلمين على الدعوة الطيبة من الصبح .. و استمتعت بالحوار معاج

esTeKaNa يقول...

LOyatLy
~~~~~~~~~~
يا افتن عليج
يا اروح الحين الجمعيه
:))
استمتعت انااكثر
حياج الله

عيون الحب يقول...

بصراحة موقف صعب
ولو مكان اخوج مستحيل ارتبط فيها بصراحة
يعني هي بهالطريقة بينت عمرها رخيصة عند اخوج والرجل ما يرضى يتزوج انسانة في عينه رخيصة كيف في عين الناس من حوله؟

صحيح نحن في مجالات كثيرة نلقى شباب ماشاء الله عليهم
ادب واخلاق وتعامل وكل شي فيه يلفتج له
ويمكن في داخلج تشعرين بشعور حلو تجاهه
بس ما يعني اني اعرض نفسي لموقف مثلها

اخوج ماغلط في شي
الشاب المحترم يفرض احترامه عالكل
الكبير والصغير
والبنت حبت هالشي وكبر في عينها
ومب عيب الشعور اللي حست فيه

العيب التصرف اللي تصرفته
في النهاية هذي بنت
وسمعتها كل شي تملكه
تروح وتراكض ورا شاب من مكان لمكان؟

وانا مااشوف في فايدة ترجى من نقاشج معاها
انتي قلبج رهيّف وبتكسر خاطرج
وبتحنين على راس اخوج ياخذها
خليها في حالها هي بتتعب وبتروح
بتشوف مافي امل من اخوج
وبتبعد عنه

واذا تبين تكلمينها
لا تسمعين لها عشان ماينكسر قلبج عليها
بس فهميها ان اللي تسويه غلط وعيب في حقها كأنثى
وخل تصكر هالباب وتنساه

والله غمضني اخوج
:)

Purgatory يقول...

hahahahahahahaha,

مسكين، عــاد زين ان هل السوالف مــا تصير لي، يمكن لأني مـا أعطي أحد ويه، بس سوالف توم أند جيري و الملاحق و الورد ضحكتني

:)

غير معرف يقول...

اخاف ريكي مارتن وانا مادري


بسج ترفع في اخوج

عبدالرحمن يقول...

صبحج الله بالخير

الله لا يبلانا


مو كل البنات باخلاقج وبتربيتج عشان تستغربين لهدرجة

الله لا يكشف لنا عنده ستر

اساسا حتى لو تحبه شلون تحط في بالها انها بهل طريقه راح يحبها او يتقبلها وهي تثبتله انها مو متربيه !!

الله يستر على بنات الناس

lawyer يقول...

يا حسرتي !!

يماااااا بسم الله الرحيم

عندنا و عندكم خير

انا اخواني الاثنين جذي
بس واحد طخو البنات عنه عقب الزواج


و الثاني مسكين وحده مناشبته

بسسسسسس ماله شغل فيها لانه مناشبته باحترام

مالها حس و لا تكلمه بس توصله كل يوم المعلب



اطالع هالبنات و الله اتبهررررررر من سوالفهم !!!!!!!

hamdool يقول...

شالسالفه!!؟

آنا صايرتلي نفس السالفه
من 3 أسابيع

أخاف هذي نفس البنت
مفتره على كل شباب الكويت!؟

لا حول الله

يا معوده والله السالفه تخرع
الله يحفظ أخوج من كل شر





وآنا الحين بنزل اليوم يمعتنا
ولي رجعه مره ثانيه

عــــاشــــه يقول...

يالله بالستر
بسم الله علينا والله يستر علينا وعبناتنا
حشا شو هالقواه الي في بنات هالأيام

نعم مرينا بتجارب إنه الريال يلوعلنا بجبدنا يلحقنا ونحن نلبسه
بس الحرمه تلحق الريال

الأوليين قالوا بيي يوم السبع يلحقن حطبه
يعني يخلصون الرياييل والحريم يركضن ورا أي شي لو حطب

وسالفة الي تخطط وترسم على الشاب أنا سمعتها من وحده قبل وضحكت عليها
قلتلها شو يعني ترسمين عليه
قالت والله داخل مزاجي وهو يعاملني بطريقه مميزه
والريال فقير يحترمها مثلها مثل باقي الموظفين
بس البنات مخهم فاضي بس حق فلان وعلان

الله يستر علينا يارب

Mr_CHoCoLaTe يقول...

ههههههههههههههههههههه

ضحكتني سالفة اخوج

الله يخليه لج

مسكين ابتلش فيها ههههههههههه

شكلها فتره و تمل هالبنت

و البنت السنعه لازم تحترم نفسها و الناس تحبها باخلاقها مو قاطه عمرها

تصدقين مع ان مرت عليي بنت جذي بس والله ينخاف منهم اليوم احبك و بعد الزواج الله يعلم

يمكن ناقصها حنان ...

الله كريم

و الله يخلي الوالده هههههههه خل تروح وياه الدوام هههههههههه

وناسه جذي الوالده وياي بالدوام احس بالحنان يمي هي هي

مشكوره على الموضوع و الله يخليكم لبعض باي باي

محـــــارة يقول...

استكانه أضحك وأنا منصدمه ومو قادره أتكلم ... ابيه بقول الكلمه الي طلعت من قلبي واعذريني

يخسي .. وماعاش منو أنا ألحقه ..لاااا قويه قويه

وصلوا لهالحد أنا بعدي مصدومه ترى

أجمل وأحلى مابالأنثه حيائها وتغلفه بدلع الخجل والله تصير كيكه .. بنت وفاصخه الحيه تطلع كيكه مكشوفه لها شهر تخيلي شنو راح يصير شكلها وشنو يدور حواليها

الاعتراف بالحب شيء رائع لكن بحدود الأدب والمعقول يعني وحده حبت واحد يقرب لها بجنون تهتم شوي بس بدون ماتفصخ الحيا وتفضح عمرها .. على أن حتى لو يقرب لها قويه بنت أتذوب على صبي لاااا ماتنفع كلش

أحلى مابالحب الولد أهوه الي يطلب البنت والزواج قمته أن الولد أيي شاري البنت مو البنت أهي الي طابه عليه

مالوم أخوج بصراحه حاول يحترمها بس اهي ماحترمت نفسها وصلت السالفة لمديرها وعقبه ماكفاها بعد انطرت لما وقعت تعهد ابيه وعلى شنو على ماتتعرض لموظف عندهم !!! الله يستر عليها وعلينا

أنا بمدونة وباسم مجهول أعبر عن مشاعري وأحس بأوقات وااايده أني صايره ما استحتي هالمره وجهاً لوجهه ملوعه جبد الريال

فعلا الله يستر عليها ويعافيها ولا يبلانا .. وخل أخوي يقرأ على عمره وصج يبعد عنها

esTeKaNa يقول...

عيون الحب
~~~~~~~~~~
هلا بعيون الحب والله
انا اوافقج الراي
دايما في حقيقه في بالي اذكرها باكثر من موقف:
ان الانسان يقدر يمنع نفسه من التصرف الخطأ بس ما يقدر يمنع مشاعره انها تحس وتحب
!!
الله يهديها يارب حق نفسها
انا وايد كاسره خاطري
شكرا على مرورج الجميل دائما
:)













purg.
~~~~~~~~~
!!عشتو
ما يعطي احد ويه
سنع سنع منو مثلك انته
:)
حرام اهو قليل الكلام بالدوام مو نوعه يسولف ويكركر ويا الكل
بس مادري اشفيها
عاد انا من قالي وانا مجابلته :
مافيك زين زياده؟
يعني شنو الشي الجذاب فيك؟
hehehehehe
استغليت الفرصه لانه وايد يطفرني
:)












عبدالرحمن
~~~~~~~~~~
يا هلا ومرحبا بو بدر
صبحك الله بالنوروالسرور
اللهم امين ويزاك على خير على مجاملتك الرقيقه على الصبح
:)
انا فعلا ما ادري شنو طريفه تفكير هذي النوعيه من البنات
موبس اهيا
اكثر من مرة اسمع سوالف من نفس النوعيه
هل بالنهايه في ريال راح يحب يقدر يرتبط في بنت اهي اللي سعت له بهالطريقه؟
صراحه مادري
احس هاليومين الدنيا معكوسه
:)
الله يستر على الجميع










Lawyer
~~~~~~~~~~
هلا بالطش والرش
فعلا ننبهر
ويحروني اللي يقولون ترا عادي
من قال عادي؟
لا مو عادي
بنات الناس ما تسوي جذي
!!
باحترام ميخالف اشوة دامها مو فاضحته
المشكله بللي تعلن وتصرح على الملأ
اذا اهي مو خايفه على نفسها تخاف على سمعه ولد الناس ما يصير جذي
!!

محـــــارة يقول...

استكانه تصحيح لغوي بعد إذنج .. أخوج بدل أخوي على أنج أختي معناتها يصير بلاخر أخوج أخوي

:) صارت جنها شرينا شرشف

سلام وبحفظ الرحمن

esTeKaNa يقول...

hamdool
~~~~~~~~~
LooooooooooooooooooooooL:D~
لا لو سمحت
انا ابي تفاصيل اكثر
مو على ابو زواره تروح وتخلينا
!!
ما اعتقد نفس البنت لانها مشغوله ويا اخوي،يمكن بنت ثانيه والسالفه صارت ظاهره؟
:))
يعني صج السالفه تخرع ولا تونس؟
:Pp~







عاشه
~~~~~~~
!!السبع يحلقن حطبه
وي يا حسرتنا هذا اخر الزمان يا عاشه
:(
في بنات يستنبطوون شي من موقف او كلمه من شخص معين
في بنات اكثر من جذي
تخيلي في بنت درت انه فللان الفلاني يبي يتزوج وامه تدور له وبشروط معينه شنو سوت؟
تمت شهر رمضان كله تصلي يمها جتف بجتف
وتلبق روحها وترز ويها ورايحة راده
وتحوس على الصبي لي انخطبت له
والكل يدري انها سوت جذي واكثر بس عشان توصل له ويقولون فلانه خذت فلان الفلاني
:)
يارخصك يا الغالي
!!











mr_chocolate
~~~~~~~~~~~~~~~
امين وشكرا على مرورك الحلو
وييي ما شفت الوالده
تقوله الا لازم تتريق بالدوام ليش ما تاخذ معاك جنطة صغيره انا احط لك فيها كل شي
تخيل
@@
شوف امي شتقول حق اخوي وهو ريال اطول مني ومنها
الله يحفظه يارب ويحفظك
ماقصرت
:))

esTeKaNa يقول...

محاره
~~~~~~~~
ايوااااا
عاشت عاشت بنت ابوها
واي ضحكني تعليقج من قلب
hehehehehehe:))
في بيت دايما كنت اردده:
هي دانة ما جابها كل غواص
ومن يجهل الدانه يرخص ثمنها

يعني البنت دانه الغواص يتعب لي يوصل لها ومو اي غواص بعد راح يوصل لانها دانه مو اي لولوه
:))

يعني البنت مرات تلقى اللي ذايب فيها وبيطير فيها ومع هذا تتمنع ويردها حيا
هالمرة لاهو صوبج ولا حواليج وتسعين له بيدج وريولج؟
انتحر الحيا وانا اختج
:)
واخوي اهو اخوج
مافيها اي خطا
نورتي يا المحاره

bin3li يقول...

هذا مسلسل درس خصوصي!!
تحملوا من خطط أرض أرض و البواريك الشقر
:P

بصراحة أنا متعاطف مع كل الأطراف
البنت و أخوج و الوالدة

و يالله أنتي بالمرة -و لو أنه مالج شغل بالسالفة
بس حشر مع الناس عيد
:P

b9mah يقول...

اهم شي توصيات امي كل يوم :
دير بالك
اقرا المعوذات
لا تشرب قهوة
لا تاخذ منها شي
اشرايك اداوم وياك؟
heheheheheheh
-------

يحليلها اميمتج الله يخليها لكم ان شالله

استكانه انا اقرى موضوع وانا في قمه الانبهار

بس تدرين ليش ؟
هذا الاختلاط ومايسوي ..

يعني هالبنت يعني نقول انها بتنعجب في اخوج نقول يمكن مال قلبها ونعذرها
بس انه والله الحقه لي بيته و اتضايقه اتقولها صريحه جذي "ابيه" يعني اللي
ماينسكت عنه


خليه يقول كل يوم بويهها
(اللهم اكفنيها بما شئت )

بس من غير لاتسمع يعني

- مادري ليش تذكرت قصه سيدنا يوسف -

bin3li يقول...

انزين ما عرجبتله في الدوام؟
:P

لا صج
أخوج ليش حسسها أنه متضايق لما راوته الصورة
كان المفروض ياخذ الأمور بطريقة أكثر حكمة
و بالمرة يطنش حركاتها و يحسسها أنه لو تحرشت ما تحرشت واحد

ألحين لما هو كلمها حسسها أنه هو منتبه لحركاتها
و يمكن هذا معطيها أمل

المشكلة أن البنت ما تعرف كيف تتصرف
يعني حابه الولد، مب غلط
بس اعرفي كيف تكسبينه و تكسبين أهله

ما علموها بنات شربت
:P

بوغازي يقول...

هذا الموضوع صار أكثر من ظاهرة... ووصل إلى أنه أصبح من الأمور الشائعة والتي نسمع عنها يوميا حتى لم نعد نندهش لسماعها وهذا مما يؤسف له
.
وقت يخرع الله يكافينا وياكم الشر.. ويبعد عنا وعنكم السوء

بوغازي يقول...

أحب أن أضيف على ما تقدم... أنني من الناس الذين يؤمنون بأنه كما للرجل الحق في اختيار البنت التي تناسبه (كزوجه طبعا)... فإن من حق البنت أن تختار الرجل الذي يناسبها... وتراثنا الإسلامي مليء بحوادث ووقائع من هذا القبيل... ولعل أبرزها قصة السيدة خديجة أم المؤمنين وحبيبة الصادق الأمين وعرضها لنفسها على الرسول صلى الله عليه وسلم
.
ولكن ما أقصده وأعنيه يجب أن يكون في حدود وإطار الأدب... وبطريقة محترمة وغير مبتذلة حتى يحفظ للبنت مكانتها وكرامتها وكبرياءها... وبما يصون لها حياءها والنظرة الإيجابية عنها
.
طبعا هذا الأمر غير مقبول إجتماعيا... ولكن العادات شيء والدين شيء آخر... وفي تقديري أن تقييم المقوف وتقديره يتوقف بشكل كبير وأساسي على الطريقة التي تم فيها العرض... لأن طريقة العرض المحترمة تفرض إحترامها حتى لو لم تجد القبول لدى المتلقي... أما طريقة العرض الغير محترمة (مثل حال صاحبتنا السكرتيرة) فإنها تبعث الغثيان والإشمئزاز
.
وفي النهاية يجب على من يتقدم بالعرض أن يتوقع كل الاحتمالات... بمعنى أن عرضه قد يقبل وقد يرفض... وهو في حال رفض طلبه يجب أن يتقبل ذلك بصدر رحب لأن ذلك من حق الطرف الآخر... وليس أمامه إلا أن يكتم حبه في قلبه ويمسح على جرحه.. ويحتسب الأجر على ما يكابده من محبة (وهي بلا شك معانات عظيمة يصعب التغلب عليها إلا بعون من الله)... ويدعو الله أن يمنحه الصبر وأن يعوضه خيرا مما فاته
.
هذا باختصار... والموضو طويل وذو شجون وفيه الكثير من التفصيل... وما أقول إلا الله يعين أخوج على سكرتيرته ويخلفه خيرا منها
:)

78o8eYa يقول...

منوره البلوق والحمدالله على السلامه حياتي
:*

"أرقع حق عمري - حدي متأخره أدري"
:$

_________


طول ما آنا أقرا قاعده أقول
:-

أمبيه .. من صجها
وي وي
بعد موهينه
الله يستر علينا و عليها
!

الحمدالله
ما أقول غير ربي يثبت أخوج ويعينه
ويهدي البنت و يعقلها

:/


البنت حلاتها بثقلها
حتى تحلى بعين الريال
واهي نظرتها وكلمتها محسوية

والريال بطبعه يحب البنت اللي ترَكضه وراها
مو اللي تركض وراه
..
..

الوالده -الله يحفظها و يخليها
ردة فعلها عجيبه
:)

ولا تستغربين وايد يا وخيتي، لأن هالدنيا ما بقى فيها شي على حاله
الله يستر من الياي
..

عيون الحب يقول...

استكانة

اي صح محد يقدر يمنع نفسه من الشعور
والاحاسيس
بس يقدر يمنع نفسه من التصرف بالخطأ ويمنع انه مشاعره تقوده

::
::

بن علي

افااااااا فاتح بلوج ومب عازم الا ناس وناس؟
وان اللي دايما أسألك عن بلوقك واقولك ليش سكرته
جي تسوي فيني؟

صدق زعلتني
:(

بنت الكويت يقول...

كنت اسمع عن سوالف البنات في الايام هذي بس اقول معقوله وصلوا ليه هالدرجه ان اهمه الي يركضون ورى الشباب
بس عقب قصة اخوج طلعت السالفه صج

وكلام الوالده صح خل يحط باله اخوج منها ما تدرين شنو راح تسوي عشان توصله

الله يحفظ اخوج وخليه
ويبعد هالنوعية عنه

Pink Lady يقول...

مساء الخير ..

شكله أخوي حلو من جي تلاحقه ^_* ..

وحليله كسر خاطري ..

الله يعينه ويهدي هالبنت أن شالله

Shaima'a Alkandari يقول...

موحلوه بحقها

امبيه مااستحت ولافيها ذرة حيا

شدعوه لو متحطمه فيه وقال لها مابيج وكله يردها المفروض تنسحب وخلاص

مايسوى عليها هالتعهد الخطي وينحط بالملف

يعني لها سوابق فشله قصت ويه اصلا

شلون تقدر تجابل باجي الموظفين بهالحاله

الله يعين اخوج ويصبره على هالبنت وحبها له

Mishari يقول...

ضحكت وايد:))))

اول شى علشان نصايحج التالفة حق اخوج:))

ثاني توصيات الوالدة الله يطول بعمرها

اخوج مبين عليه انسان محترم و يحترم نفسه
بس الله يعينه

خلوه يتزوج ونص البنات راح ينحاشون منه
والنص الثاني راح يزيدون الجيلة عليه

:))

الله يحفظ لكم اخوكم وتشوفون عياله
:)

حسام بن ضرار يقول...

راح الحيا و راح المستحى

قدص رسول الله صلى الله عليه و آله و صحبه و سلم: الحياء شعبة من الايمان


بس من يقرأ مثل هالقصه يقول الله يخلف على بعض بنات هالزمن

حسام بن ضرار يقول...

تصحيح


صدق رسول الله صلى الله عليه و آله و صحبه و سلم: الحياء شعبة من الايمان

Shather يقول...

لووووووووول

صج البنت تكسر الخاطر شكلها متولعه عدل

بس هم طريقتها غلط الله يهداها :\

يعني مهما يكون ما احط على نفسي

بس في شي مستغربه منه .. اهي شلون تجرات و ورته صورتها بهالشكل .. يعني ما خافت تطيح من عينه ؟

MANAF يقول...

estekana

:p

حبيت الوالده

الله يحميها

ويحميج ويحمي اخوج

من كل شر

__________

قوليله خل يدير باله

البنات اللي من هالنوع

ممكن يسوون اي شي

حتى لو تتبلى عليه

وانشالله ماكو الا العافيه

:)

bin3li يقول...

عيون الحب
---------
البلوج هذا محد يدشه غيري حق التجارب
ما فيه شي

و بعدين خلاص ما نبغي نكتب شي بعد سالفة صاحب منتدى مجان
نسكت وايد أحسن و لا بنخيس في السجن

5roofa يقول...

يماااااااااا
لوووول يالبارده هذا و انتي استكانه لوول انا لو مكانج اموت من الخرعه

بس امبي دربالكم يا معوده لا تكب ماي على البيت ولا تسوي شي تره السحوره و الدبوره على افا من يشيل بالكويت

استغفر الله الله يستر عليها لووول بس ضحكتني الصراحه استغفر الله استغفر الله
الله لا يبلينا

و ربي يحفظ اخوج من كل شر حطي بالج علي تره السالفه مو هينيه و انا وخيتج لووول

T.C sweetee...

salamz...

hamdool يقول...

hehehehehehehehe

لا تضحكين علي
والله السالفه صجيّه
وودي أقول كل تفاصيلها
بس بعد شوي يمعة بيت يدّتي
ولازم ألحق عالغدا هناك

;p LOOOOOOOOOOOOOOOOL

تبين الصج السالفه كلش ما تونّس
جد جد اللّه يحفظ أخوج منها
ومن نصايحج بعد

;P

salfa3ajeeba يقول...

gowwa estekana,

how r u today

ok let me tell u my analysis to the whole situation:

i guess that she is blinded with love and thats why she has no control on her actions toward ur brother,

she has no experience in how to show her passionate feelings in a very high class way,

the solution from my point of view is in ur brothers' hand,

coz "kol mamno3 mar'3ob"
as long as he is avoiding her she will be attracted more to him so;

he should ask her to come to his office and talk to her in a reasonable sense and show her that he has zero intrest in her and maybe he can say that he already have someone in his life.

hope this will help:)

U_SF يقول...

@@

قويه السالفه @@

الله يهديها مع انها اكسرت خاطري :\

الله يهديها ويهدي اللي مثلها

ما كنت متوقّع ان في بنات جذي .. شغله أحسها يديده علي .. الله يستر من هالأوادم

مشالله عليه اخوج زين يسوي والا توريه صورتها .. شي مؤسف والله جذي تطيح من عينه

الله يحفظ أخوج انشالله .. وقولي له يدير باله على نفسه ولا يطيح بييد هالبنات

Madee7a يقول...

Nice Post Wallah ... How come we Accept Such Act From Male ... While we Condemn Female for Doing it !! Laish Elbent Kella Madgoora ??!! If She Was Decent Enough , Why Dont She Use That Way ... Gust to Impress??

esTeKaNa يقول...

bin3Li
~~~~~~~~
lOOOOOOOOOOOOOOOOOOOOL:)))
واي مت من الضحك على خطط درس خصوصي
تهقه اختها مرايم؟
:pP~
بن علي ..احا نشوف الموضوع من بعيد بس حزتها اهوانصدم وصدمته بينت عليه يوم شاف الصورة وثقتها وهي وتوريه
ترا عيب
:)
الله يهديها يارب
وشكرا اني كسرت خاطرك وياهم
ولو اني مالي شغل بس مع الجماعه
:Pp~











B9mah
~~~~~~~~~
ياهلا ويا مرحبا
يالله يكون لج في مكان وفي كل خطوة بصمه
:)
الله يسلمج وما قصرتي
وفعلا..الاختلاط ووقت طويل ومجابل
مو كل مرة الانسان يقدر يحفظ نفسه
الله يهدييها يارب ويحفظ الجميع
وقصة سيدنا يوسف بكل العبر اللي فيها والقيم المفروض تدرس وتحفظ حق الجميع ويستشعرها كل شاب بمثل هالمواقف
يزاج الله كل خير








بو غازي
~~~~~~~~~
اي والله الله يكافينا الشر
مشكله يا بو غازي لما العين والنفس تألف كل خطأ ويصير عندنا عادي
!!
ايمانك بأحقية المرأه بالاختيار ايمان وقناعه راقيه مستنبطه من تاريخ ودين شاهد عليها ولم يحرمها
ولكن كبنت اشعر بأن الموضوع يحتاج جرأة اكبر من ما تتخيل
:))
شكرا لمرورك الجميل دائما











7808eya
~~~~~~~~~~
هلااااااااااا وغلااا
البلوقات كلها منورة بوجودج حبيبتي
تعالي تعالي المج:***
ولهانه عليج كثر ممممم
مممممم
كثر ماكو بعد
:))
شخبارج؟
~~~~~~~~~~
اي والله انتي ما شفتي ويهي واخوي يسولف
كل ما فيني يتعبر
!!
ما صدقت الا يوم شفت بعيني
وسمعت امي
وانتي ادرا بالوالده
اقترحت عليه ياخذ جنطه فيها اكل
وهو اطول مني ومنها
:))

esTeKaNa يقول...

ّّعيون الحب
~~~~~~~~~~
بالضبط هذا قصدي
واترك الرد لبن علي
:)







بنت الكويت
~~~~~~~~~~~~
اللهم امييين ما قصرتي
والله يا اخيتي حالي حالج ما صدقت
بس شفت بيعيني
الله يحفظنا ويهدينا جميعا يارب
:)









pink lady
~~~~~~~~~~~~
hehehehe
اخوي هذا
اكيد بيطلع مزيون على اخته
:Pp~








Shaima
~~~~~~~~~
والله يا شيما انا اسمع السالفه واحس بغطي ويهي من الفشله
الموضوع نسبي
اللي نشوفه عيب يمكن اهم يشوفونه عادي
الله يهديها يارب والمشكله ماهي ياهل ولا مراهقه
!!

esTeKaNa يقول...

mishari
~~~~~~~~~
وي يا عسى هالضحكة دوم يا مشاري
يا بتاع التصريحات والقرنال
:Pp~
اشفيها نصايحي؟
هذا يزاي اخوي وفازعه له
انا اقوله اهي تتقدم دامها دلت البيت
:)
وامي يا مشاري متحلفه بشيين
جنطة اكل بدزها الدوام كل يوم
وانها بتروح تقرص البنت على ايدها
:Pp~
يعني يتزوج؟
اكييييد؟
مضمونه الطريقه ؟
ماحد يتعرض له تالي
:)))
امين ويزاك الله خير















حسام بن ضرار
~~~~~~~~~~~~~~~
صدق الرسول صلى لله عليه وسلم
!!
اول يدتي تقول الحيا نقطه
اذا راحت راح كل شي
توني افهم اشلون الحيا نقطه
:)











Shather
~~~~~~~~~~
مممممم
اهي ما هقت انها بهالطريقه بتطيح من عينه
اهي هقت والله اعلم انها بينبهر من جمالها
!!
الله يهديها بدعت
انا مابي اقول شي
الله يحفظنا ويستر علينا
ما ندري باجر شنو يصيربزمن عيالنا
:))

esTeKaNa يقول...

manaf
~~~~~~
يا زين تعليقك
مرتب وقمه النزاكه
:)
حبتك العافيه ما قصرت
واهي اكيد تحبك:)
وامييين ويحفظ لك عيالك انشاله
اي والله يخرعون
يعني اذا ما استحت منه ما ااستحت من ابوي
امي
انا بجلاله قدري:))






بن علي
~~~~~~~~
عيون الحب
سألت السؤال اللي في بالي
وكنت ناطره الرد عليها وعلي
:)









5roofa
~~~~~~~~
loooooooooooooool:)))
ليش اموت من الخرعه؟
بنيه مو ينيه
!!
اي والله الله يستر
شكلي بحط شمسيه وبقعد عند الباب
:Pp~










Hamdool
~~~~~~~~~~
وااااااااااااي
اسم الله عليك الرحمن الرحيم
ادري واصل
ادري سنع
ادري كل شي ولا الزواره
بس عاد لا تعلقنا بتقول لو سمحت
:))
امييين يحفظه ويحفظك من كل شر
ونصايحي ولا فوزيه دريع
هذا يزاي والله؟
اقدر مشاعر الناس واحترم المحبين
:Pp~

esTeKaNa يقول...

SaLfa3jeeba
~~~~~~~~~~~~~~
تحليل ذكي ومنطقي
صج ما طرا بالي جذي
!!
شكرا ما قصرتي والله
اشهد انج سالفه عجيبه منتي هينه
:)
عموما اهو بيسافر هاليومين مو راد الا بعد فتره،عساها تعقل انشالله








u_sf
~~~~~~~
نفس احساسي
!!
قويه السالفه وكاسره خاطري البنت
اتمنى ما نوصل هالمواصيل ويظلون بناتنا فيهم الخير
الله يحفظ الجميع يارب
وهذي الساعه المباركة يا بو يعقوب
اذا طاب لك البلوق عاود
:))












madee7a
~~~~~~~~~~
يا هلا ويا مرحبا بمديحه
كنت احب بنت اسمها مديحه وذكرتيني فيها اله يذكرها بالخير
:)
منو يقول البنت كله مدقورة؟
البنت لي تمكنت شوفي منو ييدقرها؟
وبالعكس..هذي فكرة مو دايما تكون صح
البنت ماخذه حقها وزياده

بالنسبه لقبولنا التصرف من الريال وما نقبله من البنت:
شي غلط!!
الغلط غلط سواء كان من بنت و ولد
ولكن يمكم مجتمعنا الذكوري خلانا نتقبل هالفكره من الولد اكثر بحكم اشيا كثيره
مثلا:
بحال الزواج الريال اهو اللي بيخطب
ولا تبين البنت عقب ما دلت البيت وتطمنت تتقدم رسميي وتخطب؟:))


اقري رد اختي loytly
بو غازي
رد جميل جداا وراح يوصل الفكرة اكثر
:)
حياج الله

bin3li يقول...

صايدين ناس بالفيديو بنفس السالفة و حاطينهم على اليوتيوب

كلك هير

:P

78o8eYa يقول...

حبيبة قلبي انتي
البلوقات منوره بأهلها
^_^
توله عليج العافيه
و
الجنة الدافية

يا بختي يوم تلميني
خلااص من باجر بتلقيني عند باب بيتكم
:)))


آنا طيبه
طاب حالج يا الغاليه
:**

2 u ALL يقول...

لاحول ولاقوة ألابالله ..!! أذا كان هذا الذي يحدث في الدوام وامام أعين الناس ..!! فما بالك أذا كان الوضع شئ أخر ..!! وأذا نزع الحياء من وجوه النساء فقل على الدنيا السلام ..!! الله يعين أخوك ويصبره على فعايلها ..!! وصحيح حين قال الأولون "أذا لم تستحي فأفعل ما شئت"...!!؟

vancouver يقول...

هههههههههههههههههههه
لووووووووووووول
اول شيء باضحك ضحك على ااخوج
خنت حيلي واللي صار فيه


وبعدين اسمحيلي استكانة بابجي
:((((((((((
اي ..اي.. بابجي على الاخلاق اللي
راحت والحيا اللي مات


من متى احنا بالكويت يصير جذيه
تلاحقه بلعتها ، اتطرش ورد هم
مارة علينا هالسوالف
تتصل فيه اتحرش اوكيييييه

بس اشكرة جليلة الحيا تقول حق
مسؤولها... ابيييييه
واحبه وخل يلتفتلي شوية

!!!!!!!!!!!!!
لا لا هذي ماساة الماسي المتماسة
على قولة مملوحة


يعني ما تتخيل هالمسؤول شبيقول عليها بقلبة
، امبييييية قلة ادب
وماكو تربية ابداااااا


خل تحب بس ليش تمسح ويها بالتراب
??


بس جد استكانة جد خل يدير باله منها
ترى يمكن مريضة نفسيا لانه اكو
حالات اذا حطت ببالها شيء تسويه تسويه
لو حتى تدمر سمعة او تتبلى



خل يدير باله وااااايد
الله يحفظ ولدكم



اهم شيء لا يثير غيرتها بشيء

وهي متولعة ترى هذي مينونة
ولا يمكن التنبؤ بتصرفاتها

:+

shakshaka يقول...

el7emdela wesheker allahoma lashamata yaraby et3afeeha wala teblana enshalla!

hatha marath tara 7ata lo intay mo3jaba eb shakh9 ok tenbele3 enich tlam7en mara wo ham fashlaa lo ana msawyat;haa chan 6oool elwagt agari9 3umre atwaqa3 mn elfashla LOL:P el7emdela wesheker ambaih la at6anaz bacher amshee wala7eg 3yall khalg allaah hehehe estaghfarallla

Fahad Al Askr يقول...

الحب جايد، لا تلومينه ولا تلومينه، مشكلة لا صار من صوب واحد

charisma يقول...

مساء الخير

فى وحده تحن على الالالا ادشين بوست استكانه تقرين قصتها

دشيت وقريت وقلت لالازم اعلق اتعرفين الواجب انتى
:)

مو غريبه الى صار
من ايام الجامعه وزمانا بذاك الوقت هذا حال البنات
ترى اعرف 5 يمكن
نيشنو
وارسموا
وارداهو قتيلا
:)
يعنى تزوجنه

يمكن انتى ما سمعتى بس موجوده هالحركات من زمان

بس ياربى الشعور من داخل
شتسوى عليها بهوشه من الهوشات
ولا قشمره يقولها انت الى راكض وراى

وى وى وى

جان انتحر

:*

esTeKaNa يقول...

2u all
~~~~~~~~~~
اي والله اذا لم تستح فافعل ما شئت
الله يهدي الجميع يارب
وشكرا على المرور
:)










vancouver
~~~~~~~~~~~
يا هلا ويا مرحبا
ترا صج الموضوع مضحك مبكي
مرات اكركر من قلبي
وساعه اخاف من الضحكة...تكسر خاطري
الله يهديها ويحفظ لي اخيي
مير انا غرت
انا شكو اغار
LOOOOOOOOOOOOOOOOOL:))

اهم شي لا يمكن التنبؤ
صاجة لا يمكن لا يمكن
واشوة انه مديره يموت عليه ويعرفه عدل ولا جان انقلبت السالفه عليه بعد اهو بعد قلبي
اهم شي انه اخوي شال شلايله وبيسافر
وحاجز روحه من غير رده
الله يستر
:))









Shakshaka
~~~~~~~~~~~~~
Looooooooooooooooooool:))
ياربي لا تعاجبنا
طفا طفا
اسم الله علينا الرحمن الرحيم
انا كل ما يتني الضحكة اسكت روحي
ششششششش
يا حسره قلي عسى ما اييني ينوني على كبر ولا ببناتي ما تدرين الزمن شنو يسوي اللهم يا كافي
بس لا تخافين
اذا بتلاحقين خلق الله اوصي اخوي يعلقج يمي بساحة الصفاه عشان نكون عبره لمن لا يعتبر
:pP~






فهد العسكر
~~~~~~~~~~~~~
@@
اييييييه
الحب جايد يا فهد
بس عاد جذي؟
هذا حب خفاف وانا اخيتك
:)
انا متعاطفه وياها ويا مشاعرها
بس مو متعاطفه ابدااا ويا تصرفاتها واخزياه
!!

OutOfReach يقول...

ya rabi la tblana :)
allah y3een o5och 3la hal dawam . o0 yahdi hal bent '67ktni wallah :)
bas ana ma3a n9ee7at o5i mishari zawjo0h o enshallah yftak men hal athya

esTeKaNa يقول...

charissma
~~~~~~~~~~~
وي اسم اله على اخوي الرحمن الرحيم
!!
واي لا تخرعيني
ترا بسوي نقطة تفتيش عند اول الفريج
بحط لي شمسيه ملونه
وبلبس نظارتي وبقعد
ماحد يدش صوب بيتنا الا بمعرفتي
واخوي وبيسافر الله يحفظه
:)))
واااااااااي على قولتج ما تسوا الحجوة انتي اللي راكضه وراي
والله يا كريزما اذا ما ياج من الباب
ومر بكل اختبارات اهلج
ومباحث خوالج
والامن عند عمامج
ومليونتعش استخاره
ورحتي معززة مكرمه
ما يصير زواج
اشلون تهون عليهم نفسهم ياربي؟


ومنهي اللي تقولج دشي اقري؟
افا عليها بس البلوق كله لها
قولي لها اهي ختدش وتقول كل شي بخاطرها
بلوقكم ومكانكم
:))

انتي يا ست الحسن يا كريزما خليتني على اعصابي من قريت البوست لا تدشين ولا اتسألين خليتيني ادوده ريما بعد قلبي
اشلونج الحين؟

esTeKaNa يقول...

out of reach
~~~~~~~~~~~~~~
ياهلا ويا مرحبا
واي وانا اكتب اسمج اقول اي هذيله البنات
out of raechيالله من فضلك
:))
اللهم امين يارب
وهذا زواج مو شي سهل
وهو ما ييبي شنسوي فيه
بعد انا مابي الحين
تدرين انا رغبتي مهمه بالموضوع
:pP~

Purplecious يقول...

احم احم

نحن هنا

:)))

صارلي جم يوم أمر على البوست أخذ لي فرّه على التعليقات أضحك و أطلع

يتروالي حفظت البوست
ههههههههه


ودي أعلق و ما ودي
أخاف أخوره استكانه
تدرين بعد سهيل و دلق
ماني مسؤوله عن اي كلمه تطلع مني

هههههههههههههه

أول شي مبين و واضح وضوح الشمس ان البنية منجبره بأخوج الله يحفظه

لا تلومينها استكانه ترى الحب و ما يسوي
يجنن العاقل يا وخيتي
يلعب بحسبه الواحد و يخلي الثقيل ريييييييييشه في مهب الريح

لوووووووووووووول

استغفر الله مابي أعيب أخاف أبتلي بعد

بس أخوج ليييييييييش سكت لها من الاول
اكو ريال يعووووووف وحده تعجب فيه؟؟
ههههههههههههههههه
ما عليج كان مستانس على الوضع بس يوم خارته ابتلش الفقير
لوووووووووووول


كان المفروض ما يعطيها ويه بتاتا البته
اكيد كان يعاملها باحترام و حسبالها حبهااو اعجب فيها فقيره

في بنات يفسرون التعامل على كيفهم
الله يهديها و يهبطها باسمه

كثروا من التكبير استكانه و الاستغفار


و جعلنا من بين ايديهم سداً و من خلفهم سداً فأغشيناهم فهم لا يبصرون

بنت الشامية يقول...

السالفه وايد قويه

من وجهة نظري من حق البنت ان تختار اللى تبيه....وتتقدم له

بس الاهم .....ان تتقبل النتيجه بروح رياضيه ....لان هذا القرار صعب وما يتحمله حتى الجبل

مو تلحقه الى البيت وتدز ورد وتوريه صورها....هذا يسمى قلة حيا

لو هى ماشيه بالاصول....محد درى عنها الا اخوك وبس ....وستر عليها

وما وصلت الى هذه المرحله من المهانة

بس صج : الحب بلى والعشق سما قاتلا

بس اهم شيئ نصيحة امج ..والله خليه يطبقها بحذافيرها...الواحد صار يخاف من كل شيئ هالايام

رحـّــال يقول...

كنت في إحدى مراكز التسوق يرافقني شعور بأني مراقب.. كنت أمام محل الحلويات التي هي سبب مجيئي للمركز إلا أني سلكت طريق إذن جحا للمحل فقط لأتأكد بأن عيناها بل خطواتها تراقبني وكأنها تهم بالانقضاض على الفريسة! أزعجني ذاك الشعور.. دخلت المحل قاذفاً بكل هذه الأفكار خلفي.. إلا أنني وفور دخولي تبعتني هي واقتربت وقالت بنعومة مصطنعة صوتاً ورمشاً وهزُ رأسٍ: ممكن أسألك سؤال لو سمحت؟ قلت بحدةٍ مصطنعةٍ ووسع عينٍ صارمة: تفضلي.. نعم؟ عادت هي بتكرار مشهد اصطناعها بجرعةٍ مضاعفة: تعرف مقهى غاوي؟ (الغاوي في اللهجة الإماراتية هو الجميل أو الممتاز) كادت ملالمح الاصطناع في وجهي أن تسقط لتحل محلها ملامحٌ صادقةً تفجرها صدمتي بما قالت! بلعت ريقي ووسعت عيني على اتساعها وكررت مشهد اصطناعي الأول بأضعافٍ مضاعفة: آسف أختي ما أسير قهاوي! .. هدمت جملتي تلك كل اصطناعها وحلت محلها نظرات كسيرة وكيان امرأة في الذل أسيرة.. خرجت هي.. اختفت.. شعرت بالذنب، بالقسوة.. وددت لو أن أعتذرت لها من لهجتي القاسية ومن كذبي.. أذهب إلى مقاهي عدة وأعرف الزين منها والشين.. وقد أكون قد أسأت الظن في مقصدها.. ولكن فقط التفكير في أن وحدة تنزل من كبريائها لهذه الدرجة لا أستطيع أن أتحمله..والله يا جماعة إنها لين اليوم كاسرة خاطري.. صدقتي يا استكانة : شصاير؟

ray يقول...

الناس مينن

يعني في وحدة تقط نفسها على ريال جذي ؟ حتى لو عاجبها و مادري شنو

وين عزة نفسها ؟ ماكو حيا هالايام كلش فشلونا

Яeema يقول...

إستكانه
إتهقين باجر بشوف ورق في بيتنا؟؟
هاهاهاهاهاها

أي بنت تبي واسطه عشان توصل حق ولدي تساحلني

هاهاهاهاهاها



p.c ( i am back to work :( )

entay awal ta3leeg a3alig today

Яeema يقول...

ورق= ورد

esTeKaNa يقول...

Purplecious
~~~~~~~~~~~~~
ههههههههههههه
اهم شي فره واطلع
يا سلام يا سلام
اشوف بلوقي والبوست صاير فيه تفرفر ها
@@
حياج الله
دامه دلق سهيل تفرفري قد ما تبين
:))
تهقين كان مستانس؟
لوووووووووووول
برد اجابله
تصدقين انا اللي مختبه كل شوي اطل
من يقول كاني ياي طليت وراه
looooool:))
الله يهديها يارب ولا يبلانا









بنت الشاميه
~~~~~~~~~~~~~
اي والله السالفه قويه
عاد وانا اكتب البوست تذكرتج يوم كتبتي بوست عن الحق بالاختيار للبنت
بس لازم يكون باسلوب صحيح
:)
اي والله الحب بلا
وامي يا بعد قلبي مشتطه
كل يوم تدق عليه مليونتعش مره
الله يعينه
:)








رحال
~~~~~~
معقوله؟
خذيت لي وقت وانا استوعب زيارتك الجميله
الرقيقه
الراقيه كرقي كلماتك
شخبارك؟
اتمنى انك تكون باحسن حال يارب
سالفه الاخت الباحثه عن غاوي قويه
غريبه
اذن تفشى الوضع ووصلنا لمرحله الظاهره؟
لم تكن قاسي!!
كنت بوضع طبيعي تتبع فطرتك السليمه
الله يهدي الجميع يارب
ونورتني زيارتك يا رحال

esTeKaNa يقول...

ray
~~~~~
اي والله مينن فشلونا
:(











reema
~~~~~~~~
ياااا هلا ويا مرحبا
تبارك بلوقي بردتج
فقدت تعليقاتج والله
:**
صباح الورد والهنا
الله يشرح صدرج ويكون يوم حلو من بدايته لي نهايته انشالله

واااااااااااااي
زوقه زوقه
تذكرت ويه حمودي
واي يا زينه واله
الله يعينج على المعجبات
بس انا اقدر افضي روحي اخذ الطلبات ونسوي تصفيه ونستقبل ورود وهداييا ما عندنا مشكله
:)))
اهم شي اني داشه بالسالفه وياج
لووووول
حياج الله

@li@ يقول...

والله البنات بدعوا و ابدعوا بطرق القنص و الحداق

استغفر الله استغفر الله

ربي لا تبلينا بس انا ما احب اشوووف اي بنت تنزل من كرامتها لاي شخص مهما كانت الاسباب

فما بالكم قاطه روحها عليه!!!ليش


واهم شيء بالسالفه صورتها بالعرس؟؟؟

زين ما حطتها بسجل البريد و دزته حق اخوج

عشان تقول بالغلط الصورة طاحت داخل السجل

اشكال الله لايبلينا ويحفظنا وياكم من هالاشكال

شبكة الحوار الليبرالي يقول...

This comment has been removed because it linked to malicious content. Learn more.

SolaimaN يقول...

طق طق طق

قوه استكانه

:)

من زمااااااااااااان عنج

ــــــــــــــــ


الواحد الحين ما يستغرب من هالسالفه بهالزمن لان في اغرب منها

واجرأ من هالبنت بعد ،، الحب على بذره وانا اخيج

الله يحفظنا وياكم ويحفظ بناتنا

ياحلاتها امج والله ،،الله يبلغها انشالله فيكم

esTeKaNa يقول...

alia
~~~~~
هههههه
اي والله قنص وحداق
احس دون المستوى
!!
الله يهدي الجميييع يارب
خلينا على مواقف عمادة القبول بس
:Pp~















SLaiman
~~~~~~~~~
يه يه
هذي الساعه المباركة
حيالله ما يانا
من غير شر,,فقدناااااك
عاش من شافك
:)
امييين ويزاك الله خير
صج فرحت يوم دريت عن ردتك
اللي مثلك اخو
خسارته كبيرة
وردته فرحة الله اعلم فيها

shakshaka يقول...

laa laa khalee e3algich brooo7ich wana a3teber menech:P el7emdela 3ende okhoo shoofay 3ad wain be3alegneee lazem eb mokanain may9eer athnainatna eb mukan wa7id:P

esTeKaNa يقول...

shakshaka
~~~~~~~~~~~~
loooooooooooooooooool:))
الحين انتي ما راح تعتبرين الا اذا شفتيني معلقه
يممممممممممه يا قلبج يمه
:))
اهم شي مكانين مختلفين
يعني صج صج احترمت فيج النوايا الطيبه
مشالله عليج
:))

DUBAI يقول...

مرحبا استكانه

ما الومها ..نحن في زمن العنوسة خخخخ

تبى تضمن مستقبلها ..بس اخوج طلع ريال ..زين حقرها ..عيل ادز ورد ..وين استوت ؟

اللهم لا تبلينا : )

Q8i_Blogger يقول...

تبين الصراحه ... اول مره أسمع بسوالف جذي

يا الي اقعد معاهم جياكر ومو مال واحد يتحطم فيهم .. أو دواماتنا مو شي

خوش دوام هذا الي يصير فيه هل فلم الهندي

موضوع جميل ... وادري التعليق المتأخر :)

mocha يقول...

صراحه البنات قاموا ينزلون من قيمتهم
شلون بنت تلمح لريال وتقوله بصراحه انها معجبه فيه واااااي قويه


على فكرة صارلي نفس الموقف معى اخوي الصغير تقريبا كان عمره 17 سنه وهي اكبر من عنده بوايد ومتزوجه وعندها عيال كانت ادق عليه وتشتكيله عن زوجها الشايب وتحلطم واخوي مسكين مو عارف شلون يوزعها جان يقولي كلميها وقوليها اني مابي اكلمها
المهم كلمتها صراحه عمري ماشفت ناس بالاسلوب الوضيع هذا
اقولها انه صغير عليها وحرام تقص عليه وانه ومايبي يكلمها ومستحي يوزعها؟
ترد علي: لا هو يحبني مايستغنى عني ابي اسمع الكلام منه ؟؟
المهم خليت اخوي يتشجع ويقولها يابنت الحلال عيب الي تسوينه

من بعد هالموقف حسيت الدنيا تغيرت وايد وانه في بعض البنات قاموا ينزلون بالحظيظ

الله يستر عليناو عليه

ويعطيج العافيه عزيزتي استكانه
على طرحج هذا الموضوع
الغريب والجديد بمجتمعنا