الاثنين، أغسطس 06، 2007

بطاله

*1*
~~~~~
صباح مشرق وجريده تزف بشره جميله
قبول دفعه جديده من المحققين الجدد
!!شعور متضارب
فرحت لمن تم قبولهم بهذه السرعه وبعد شهرين فقط من التخرج
وشعرت بالخوف لأني لم اقدم في أي مكان
واحساس اخر ببعض الندم بأني لم اقدم رغم ان نسبه قبولي كبيرة
!!خيره
لم اقدم برغبتي فانا اساسا لم اكن راغبه بهذه الوظيفه
بعثت رسائل تهنئه لزميلات دراستي ورفيقات دربي
الله يوفقهم
:)
*2*
اشعر باحساس مزعج كلما فكرت بأني سأعرض والدي لموقف الواسطة
وان يسأل فلان وعلان ليتوسط لي في اي مكان
الموضوع ابسط جدا من ما اتصور،معارف الوالد كثيرين
وهو سعيد بي وفخور اكثر من ما اتخيل،هذا ما قاله قبل ذهابي معه الى احد الاماكن في صباح ذاك اليوم:
فدوة لج روحي وكل اللي تبينه
عين ابوج ما تشوف الا انتي زينه
**
*3*
المكان فخم لدرجة الابهار
والمبنى ساحر يسرق الانظار
كل شئ مرتب،جميل وراقي
اتخطى كل انبهاري وارسم على وجهي ابتسامة واثقه
في غرفه مطله على الشارع الرئيسي ،ومابين ابي ومدير ذاك المكان وعمي كنت جالسه
اتخطى احساسي بالتوتر بابتسامة وانصات لما يقال
فرحو لي بطريقه مرضيه،ومنحوني امل جميل
ولكن الشرط المهم،لا عمل الى حين ان يتم مقابلتي
ومقابلتي لن تتم قبل شهر 12 في احسن الاحوال
!!
*4*
هناك علاقه عكسيه بيني وبين الأجواء الفخمة
لم اشعر يوما بالانكسار الداخلي ولا بالتشفق المؤلم
تشعرني بالرضا الداخلي وتعطيني دفعه معنويه
واحساس بطموحي الذي سيوصلني يوما الى مكان ما يبهر غيري ويرضيني
*5*
فراغ ممل
وشوق مضر
واحساس غريب يدفعني لتغير امور كثيره
احتاج اعاده ترتيب اولويات
ومواجهه نفسي بكل ما فيها
لن اكبت احساس ولن اخمد شئ في داخلي
لابد من التفكير في كل امر وحسم الكثير من الأمور العالقه
!!
*6*
التقت به في طريقها
غريب قادم من مكان اخر راحلا الى محطة اخرى تختلف عن محطتها
تجلس بجانبه مرتبكه وبابتسامة حنونه يطمئنها
تسترق النظر لعينيه...ويديم فيها النظر
ترمش بخجل..فيبتسم وينتظر
يبتدأ بكلمه
وتكمل بكلمه
تريه بعض اوراقها التي كتبتها
ويدقق في كل كلمه وهمسه من شفتيها
يفضفض عن حياه عاشها
وتفضفض عن كل ما مر بها
تعلمه كيف يكون للاحساس جنون
ويعلمها كيف يكون للجنون فنون
تسأله بخجل ان كان يعرف لها اسم،يطمئنها بأن الاسامي ليست دائما الاهم
نست في اي مكان تقع محطتها
وتناسى هو اين تكون محطته
ولأنها رحله...لابد ان نتتهي
لقيا بنيه فراق
وفراق ارق من اي فراق
*7*
هل تؤمن باحساس اللحظة؟
احساس لا داعي لتفسيره ولا داعي للتفكير في مستقبله
اساسه الجنون مستقبله مجهول
له حلاوة النوير اذا ازهر في ربيع الكويت
*8*
اللي تبينا عييت النفس تبغيه
واللي نبيه عيا البخت لا يجيبه
!!
شهالعساره يا البخت ؟
*9*
...النوري
رفيقه الجنون ،والعقل
افتقدت حوار كل ليله
وسوالف كل صباح
افتقدت وجودك المهم في حياتي
اشتاق لك...
واحساسي بانك سعيده يشفع لك غيابك
*10*
شكرا ...لانك وصلت لرقم عشره
:)
بوست طويل يكفي اسبوع

هناك 37 تعليقًا:

Purgatory يقول...

لحظةَ!! ويــن هل المغازل الجوي و منــو هذا؟؟

:)

loyalty يقول...

ما بين الرقم 1 إلى 10
لم تفارقني الابتسامة :)

وفقكِ الله و حقق لك ما تصبو نفسك إليه
;)

بالمناسبة ، هناك بطالة
و بطالة مقنعة
و بطالة مفيدة
و أظن أن بطالتك مفيدة طالما أنها أتاحت لكِ الفرصة لمزيد من التفكير و التخطيط ..

Mr_CHoCoLaTe يقول...

كلمات جميله و ممتعه

تلفت الأنظار و تنير الأذهان

بالتوفيق

Fahad Al Askr يقول...

احساس اللحظة
اساسه الجنون مستقبله مجهول

اسأل مجرب ولا تسأل فاهم

Maximelian يقول...

هنيالج على معارف والدج .. شخصيا ما احب كلش السيد الوالد نفس الشي اكره اني اجر والدي معاي اماكن عساس يتوسط ., احس فيها مذلة :/

محـــــارة يقول...

بالنسبة للوظيفه وترتيب الأولويات أخذي وقتج ولا تتوترين كل شيء ربي كاتبه طبعاً بدون ماطولين النومه وأنا أختج :) والله يكتب لج الوظيفه الي تتمنينها


بالنسبة للواسطه أنا ما أحبها كلش لأن تخافين الي مرتز يروح يتوسطلج يرد بحجي مصفصف بدون فائدة بس شنسوي نقص على عمرنا بأوقات نحتاجها حيل

حلوه محطة القطار الأهم هايمين حتى لو ضايعين مصيرهم يرجعون

بوست قمة وموضيع مختلفه مثل الماكنتوش وسامحيني هذا الي أسعفتني ذاكرتي فيه

esTeKaNa يقول...

purg.
~~~~~~~~
LoOoOoOoOoOoOoOL:)))
هذا اللي لفت نظرك بس؟
لا لا مو مغازل جوي
هذي كنيه
فكرة باالي
شبهت بهالفكره الاثنين اللي يلتقون صدفه ويدرون انه هالصدفه بتنتهي وعلاقتهم مؤقته بالاثنين في رحله يدرون انه لها نهايه
:)
بس جنك مستانس تبي تعرف وين
:P~










LoyaLty
~~~~~~~~~~
يا بخت عيني جان هالحجي خلاج مبتسمه
عسى دوم مرتاحة ومبتسمة يارب
ويجبر بخاطرج رب العالمين دامج جبرتي بخاطري وقلتي لي انه بطالتي مفيده وانتي اول من قالي هالتصريح القوي
:))




mr_chocolate
~~~~~~~~~~~~~~~
اجمعيييييييييين
:))









فهد العسكر
~~~~~~~~~~~~~
أنته ادرا
:pP~








maximeliane
~~~~~~~~~~~~~
ما تحب السيد الوالد؟
اها فهمت
اي فعلا ما احب احساس المذله بالفكره
:(









محاره
~~~~~~
هايمين
بس الاهم يرجعون
بالضبط...الاهم يرجعون
شكرا لمرورج الرقيق والقريب لقلبي دائما
:)

Ace يقول...

ـ"واحساس بطموحي الذي سيوصلني يوما الى مكان ما يبهر غيري ويرضيني"ـ


ياحلو الطموح وكل الأفكار اللي ينتجها هالطموح. طموح شباب، طموح صـــــــافي تدعمه النية الصافية، خـــــــــــال ٍ من شوائب الانكسار. الانكسار يا استكانة اللي إذا استمر يولد الانحدار بجميع أشكاله: حقد، كره، حسد، سلبية وتشاؤم - بداية مشوار الموت البطيء
الله يحفظكم من شر الحساد
الله يحفظكم

هزتني كلماتك بشكل كبير وماني عارفة أعبر
اسم الله عليكم

مشرقة يا استكانة كعادتك
ربي يثبتك انشالله

esTeKaNa يقول...

ace
~~~~~
يا صباح الاشراق ويا صباح الهنا
يا صباح الطموح بلا انكسار
:)
اللهم امين واجمعين
شكرا لكلماتك الجميله والرقيقه التي اشرقت لها روحي
واعطتني دافع جميل واحساس لذيذ بالامل
:)
الله لا يحرمني منج يارب

uTMoST يقول...

estkanna allag eywfgich enshalla !:)
a7es forrasss elmo7ameen wayed! ya3ne 3ndich katha ekhtyaar mn maktab lai baladeya lai fatwa o tashre3 lai entayy adraa!
btw wedee a7dher mo7akamat a7wal shakhseya etwadene?:P

o raqam 9 , chena a7ad a3rfa lol! alla eywfghhha enshallah :)

6mashah يقول...

شهالعساره يا البخت
صاجه ياوخيتي ان قام حظك باعلك واشترالك وان نام حظك واعزتي لحالك><

وانشالله عقب ترتيب الاوليات تتوظفين بمكان تبينه ...

وعن البطاله اختي قعدت بطاله 11 شهر مادري ليش مانطرت شهر وكملتها سنه :p
وهاذا مع والواسطات والروحات والجيات.

منزمان متابعه لبلوقج بس مادري ليش ماحط ردود كنت خلف الكواليس بس اليوم جا شي على مودي وقلت ماصارت لازم احط لج ردود :)

5roofa يقول...

el post 6weel bs madam menej 6waltaa 3asaaal
looool :D

الموضوع وايد حلو مشالله و سالفة الوظيفه ويييع لا تذكريني انا لاعت جبدي علما توظفت ولمه توظفت ندمت اني توظفت لانه كل الدنيه واصطه بواصطه و اضطريت احط واصطه بس عشان تمشي اموري
:/
مادري ليش الدنيه صارت جذي

احساس اللحظة وااااي لا تكملين الصراحه احلى احساس هالاحساس

loool emdemajt wayed

post waw
:)

salamz..

charisma يقول...

صبااحج عسل

ناادر جدا ما اقرى بوستات طويله اتعرفينى زين انتى
ههههههههههه

بس جده غير ياختى
هههههههه
وانت خير

احلى بوست

وخيره يا شيخة البنات
نصيبج بالوظيفه مخشوش
وانت ما تحتاجين واسطه طال عمرج
اتشرفينهمم
يحمدون ربهم ان وحده مثلج بتوظف عندهم

وارتااحااى لاحقا على الشقاا استكانه
تعالى بس عندى وسعى صدرج
قعدى بمكتب رئيس القسم ارتزى
واذا اسالونى هذى منو
اقولهم خبير قانونى

:))

:**

charisma يقول...

صبااحج عسل

ناادر جدا ما اقرى بوستات طويله اتعرفينى زين انتى
ههههههههههه

بس جده غير ياختى
هههههههه
وانت خير

احلى بوست

وخيره يا شيخة البنات
نصيبج بالوظيفه مخشوش
وانت ما تحتاجين واسطه طال عمرج
اتشرفينهمم
يحمدون ربهم ان وحده مثلج بتوظف عندهم

وارتااحااى لاحقا على الشقاا استكانه
تعالى بس عندى وسعى صدرج
قعدى بمكتب رئيس القسم ارتزى
واذا اسالونى هذى منو
اقولهم خبير قانونى

:))

:**

charisma يقول...

غلطه مطبعيه

جده غير وانت غيير

ههههههههههه

Purgatory يقول...

كنت أدور تتسارع

;p

ZoZOta يقول...

دائما عندك القدرة على رسم الإبتسامه على شفاهي وانا اقرأ ما تكتبينه
كلامج خفيف وبارد ويسرسح على القلب

غير معرف يقول...

ألغاز ودي أفهم مو قادر ...

esTeKaNa يقول...

uTmost
~~~~~~~~
ياهلا ويا مرحبا
!عاش من شافج
امييين واجمعين يارب
افا عليج،بس تستقر اموري راح اقولج تيين وياي من عيني هذي قبل هذي
بس عاد كان ودي اعزمج على شي سنع
!!يعني معقوله اعزمج محكمه
:))








6masha
~~~~~~~~
ياهلا ويا مرحبا
تو ما نور البلوق،هذي الساعه المباركة اللي شفنا فيها تعليقج
:)
ههههه ضحكتيني على اخيتج
يعني تهقين بيدور علي الحول وانا قاعده؟
يارب انا ما عمري قعدت فاضيه بس بحاول اتمتع بالبطاله قد ما اقدر
!!
لا طاب لج البوست
عاودي
:)













5Roofa
~~~~~~~~~~
هلا وغلا بخروفتنا
ليش احس الخروف مخلوق طيب؟
:)
الواسطة واقع لابد منه شئنا أو ابينا
!!
ويا زين اللي اندمجت والله
نورت البلوق كله والله
:)







charissma
~~~~~~~~~~~~
صباحج خير وورد ونوير
يا بختي يا بختي
جده غير وانا الخير

hehehehehehe:Pp~

اي اي ناويه بسير عليكم ومعاي مجلااااات تسالي كلها كلمات متقاطعه وتونس عشان يعني اسولف وياكم شوي بعدين بروح عندي شغل ويا الاخ الدين اللي يحل كلمات متقاطعه
:PpP~

الله لا يحرمني منج
يا ليت كل من يشوفني بعيونج انتي
:**







purg.
~~~~~~~~
لالا نسيييييييييييت؟
نتسابق
ماكو نتسارع
:pP~













zozota
~~~~~~~~
هلا بالزين كله
يا بختي والله دام كلامي يسرسح على قليبج الطيب هذا انجازي اللي اعتز فيه
:)







anon.
~~~~~~~~
الغاز؟
غريبه والله
!!
المرة اليايه بكون واضحه قد ما اقدر او راح احط ترجمة
:)

بوغازي يقول...

صباح الفل
.
آسف على تأخري بالتعليق... ولكن أن أأتي متأخرا خير من ألا أأتي
.
أولا: في موضوع الواسطة أقول: أنه من نكد الزمان وكدره أننا بتنا نعرض أنفسنا لمواقف محرجة من أجل أن نأخذ حقنا.. وأحياننا من أجل أن نأخذ ما هو أقل من حقنا وقدرنا... وما يزيد الأمر نكدا على نكده وكدرا على كدره هو الشعور العميق والخفي المنبعث من داخلنا والذي يستنهض الضمير وآلامه بالقول: أن ما تقوم به وتفعله تناقض بين الشعار والممارسة... فكيف تدعي احترام القانون وتدعو الجميع لاحترامه وتعيب على من يخالفه ثم تسعى بقدمك للواسطة؟!... وكيف تسمح لنفسك باتهام الناس كلما طرقوا هذا الباب ثم لا تجد في نفسك حرج أن تطرقه؟!... لماذا تستسيغ لنفسك ما لا تستسيغه لغيرك؟!...ثم ألا تخشى أن تتسبب في حرمان من هو أولى منك بهذا المكان بفعلتك هذه؟؟!... ثم تعود لتقول لنفسك ردا على هذه التساؤلات: شسوي يعني؟؟.. الشكوة لله.. وما باليد حيلة... هم من دفعنا لذلك... وهم من يتحمل وزنا... ولو كان هناك طريق آخر غير هذا الطريق لما ترددت في ولوجه... وفي النهاية ورغم هذه التبريرات الموضوعية والمنطقية لا تكون مرتاحا لخيار الواسطة على الآخر ولا مستقر الضمير تماما... لأنه لا بد أن يوخزك بين الفترة والأخرى... بس على قولة المثل: قال شحادك يالمسمار، قال المطرقة... وهذا أيضا من كدر الزمان ونكده
.
شكلج كنتي مقدمة على ديوان المحاسبة... صح؟؟
.
طموحي الذي سيوصلني يوما إلى مكان ما يبهر غيري ويرضيني... يا سلام... يا كيداهم... بس عاد ذاك الوقت لا يكبر راسج علينا... ولا تنسين أخوج بوغازي
:)
.
إحساس اللحظة حلو... بس مشكلته إن حلاته زايدة... علشان جذيه أنصح بعدم الإكثار منه علشان ما يقثج ولا يثقل على جبدج
:)
.
آخر التعليق
أرجو بأن يرق قلب (البخت) ويستجيب لكي فيجمعك بمن (تبينه)... وإنشاء الله يكون هذا الذي (تبينه) يستحقك مثلما تستحقينه... وفي ذلك الوقت سوف تكون تمنياتي القلبية لكي بأن يكمل هذا الذي (تبينة) الأغنية التي بدأها الوالد في بداية البوست... ليردد على مسامعك:
أنا ودي أقضي عمري وأنا حولج
وإن بعدتي بقضي وقتي ويا زولج
هاج عمري إخذي أيامه بديج
أنا عمري عمره ما يغلى عليج
بس إنتي قولي آآمين
:)
على فكرة من وجهة نظري هذه من أجمل وأرق الكلمات والأغاني الكويتية... ذوقي عتيج.. صح؟
.
تمنياتي لكي بالتوفيق في كل شيء وبكل ما تستحقين... وآآسف على الإطالة
:)

esTeKaNa يقول...

بوغازي
~~~~~~~~~
...يا صباح الخير والورد والنوير
يا هلا ويا مرحبا
تصل متأخر،مبكر
حياك الله في اي وقت هذا بلوقك ومكانك
:)
صدقت بموضوع الواسطة واختصرت ما كان في داخلي والله،تصدق يا بو غازي قريب ل قالي كلمه تمت في بالي:
ان تكونين متميزة بأمور كثيره ومتفوقه ستكون الواسطة وسيله للمطالبه بحق وليس وسيله ظلم وستشجعين من امامك ان يسعى لك لأانك تستحقين ذلك
المشكله اذا كانت واسطتك وسيله للمطالبه باكثر من حقك ووسيله لتخطي غيرك ممن يستحق وبهذا تكون واسطتك قمة الظلم والتعدي
!!
قالها بمناسبه تشجيعي على التفوق ايام الدراسه يزاه الله خير:))

اما موضوع يكبر راسي مستبعد تماما
لاني ببساطة ماعرف اشلون يكبر راسي
:)


شكرا على نصيحة احساس اللحظة
فعلا نصيحة قيمه،اهم شي ما يثقل على جبدي hehehehehehe



اما دعوتك ان يرق قلب البخت فهي من اجمل الدعوات امييييين يا بو غازي
وعلى فكره
قرأت اللي تبينه وابتسمت
اللي ابيه حلم
ويمكن تصدق الاحلام
والبخت اللي يعيي مو بس بالحب
بأشيا وايد وانا اخيتك
:)
وفدوة لج هذي اغنيتي
عفويتها
بساطة الكلمه واللهجه
تحسسني باحساس غريب
فعلا احبها مع انها اكبر مني بوايد
:)
مرات احس دارت اله الزمن وقطتني هني
مو هذا جيلي
!!
لووووووووووول
اشفيني؟
يالله صباج خير

بوغازي يقول...

إنزين ديوان المحاسبة.. صح ولا غلط؟؟... أشوف ما يبتيله طاري؟!... ولا حسبالج بطوفينها علي وبنسى الموضوع؟
.
قولي الصج
:)

esTeKaNa يقول...

بوغازي
~~~~~~~~
!!اسم الله عليك الرحمن الرحيم
فطين فطين
:))
انا عبالي طافت
اثاريها ما طافت؟
انزين اشمعنى الديوان
هل يا ترى لأنك موظف هناك؟
:Pp~

ابو شملان يقول...

بوست جميل جدا



والله يوفقج وتحصلين الوظيفه الزينه


بس عادى ترا لو طولين

فى واحد من الاصدقاء معدله مرتفع قعد سنتين

:) :) يعنى الله يعينج

esTeKaNa يقول...

بو شملان
~~~~~~~~~
يا هلا ويا مرحبا
زارتنا البركة يا بو شملان
امين ويزاك الله خير
بس مو بشاره خبر رفيجك اللي قعد سنتين
:(
بس عاد عسى ربي رزقه بوظيفه زينه بالنهايه؟

حياك الله

vancouver يقول...

استكانة سمعييييني عدل

انا لما اتخرجت حطيت هدف
وين باشتغل قعدت سنة بالبيت
اعتبرتها استجمام عقب عناء التفوق

نطر المقابلة وعقبها مقابلتين ولووووية وواسطات
مع اني اعلى وحدة كنت بنتيجة المقابلات
الوكيل بلسانه قالي
بس الوواسطات لابد منها
بهالديرة

المهم صبرررت لما حصلت الوظيفة
بالمكان اللي يعجبني
والحمدلله الحين مرتااااحة
فلا يهمج ولا تستعيلين
اعتبري هالفترة راااااحة
لاحقة عالشغل

الله يوفقج يا رب وتحصلين
اللي تتمنينه
:)))))))





:((
والله يعينكم عالحررررر

hamdool يقول...

والله لو أكو 20 كنت كملتهم بعد
إحنا جم إستكانه عندنا
وجم بياله وجم قوطي بيبسي

:)))


ألف مبروك مقدما عالوظيفه
وإنشالله تكون مريحه نفس المكان يا رب

Mishari يقول...

اولا كلمة بشرى تنكتب بهالشكل مو بشرة :(
انا اغلط وايد املائيا بس ما ادري ليش اتنرفز من اشوفهم:))

انشاء الله تشتغلين بسرعه لان القعدة ملل
لكن انصحج بدخول دورات لان احسن وقت الحين

احساس اللحظة لذيييييييييذ ولكن مرات يوقعنا بالخطأ

كليت اليوم الفير جباتى :))

بوغازي يقول...

هم ما جاوبتي... والرد على السؤال بسؤال لا تعتبر إجابة... ولكني سأعتبرها إقرار منكي بما استنتجته
:)
يعني طحنا عليج... صح؟
.
وعلى أي حال... وحتى لا أترك سؤالك دون إجابة... فأنا أجاوب عليه بالنفي: فأنا لستو من موظفي الديوان
:)

بوغازي يقول...

كتبت التعليق الأخير قبل لا أقر تعليقج بمدونتي... وبعد ما قريت تعليقج المشار له قررت العودة للإجابة على السؤال الذي طرحتيه عندي .. هو: شلون عرفت المكان؟
.
والإجابة سهلة وبسيطة... ما هي الوظائف الحكومية التي ترغب بها خريجات الحقوق وتقبل عليها أكثر من غيرها... (التحقيقات، البلدية، الفتوى، الديوان، التأمينات)... وبما أنك لم تقدمي على التحقيقات.. وبما أن الفتوى والبلدية لم يفتحوا باب القبول... فانحص التفكير في الأماكن الباقية وهي (الديوان والتأمينات)... ومن خلال وصفك للمكان استنتجت أنه الديوان
.
على أي حال بالتوفيق... وإنشاله نشوفج في أعلى المراكز وأحسنها يا رب.. قولي آآآمين
:)

esTeKaNa يقول...

vancouver
~~~~~~~~~~~~~~
ترا والله والله سمعتج عدل
ويازت لي استجمام عقب التفوق
:))
وصاجة،دام المكان زين ومريح يسوا النطره ويستاهل اخليه هدف وانطره
امين واجمعين ما قصرتي يا الغاليه
:**








hamdooL
~~~~~~~~~~~
hehehehehehe:))
جنك قاعد تتطنز على الاستكانه؟
لا دير بالك،ترا الاستكانه غيييير قواطي البيبسي
:pP~
واي كلمه مبروك عطتني دفعه معنويه عجيبه،عقبال ما يقبلوني وتقولونها لي صج
:)
















mishari
~~~~~~~~~~
واي من اول ما كتبت البوست وحطيته وانا ادري انها غلط وكل يوم اقول بصلحها واتعيز
!!
انا نفسك اتنرفز من التاء المربوطة اذا انفتحت ومن المربوطه اذا صارت مفتوحة ومن االألف المقصورى اذا صارت تاء وهالسوالف
:))
توني خالصه دورة انجليزي
وبريح الحر ما يساعد وبعدين بستأنف نشاطي...وهني هني الجباتي يا مشاري
يا حافظ ولا تنقصت لنا؟







بو غازي
~~~~~~~~~~
في فتره معينه في حياه هذا البلوق كنت اكتب كل وادق التفاصيل بطريقه جعلت عدد لا بأس به يعرفوني او على الاقل يعرفون تفاصيل حياتي بصورة يوميه
!!
لما كتبت استنتاجك خفت
هل وقعت في لساني مرة ثانيه؟
:))
آمين يا بو غازي
بس ما قلت لي انته شنوتنصحني فيه؟
وهل يستحق المكان كل هذا الانتظار؟
وهل هناك امل في فتح باب القبول بالفتوى؟
!!
اتمنى ان تفيد اخيتك بنصاءئحك بحكم خبرتك
فانا فعلا اثق برأيك ورجاحه عقلك
:)

خسرتني للأبد يقول...

الســ عليكم ـــلام
ما شاء الله عليج كل هذا موضوع
تعبت من القراية
ارد عليج باجر

Shather يقول...

الله يخليلج الوالد ان شاء الله :}


امتعتيني طول فتره قرائتي للوقفات ال10

عبدالرحمن يقول...

اتمنى لزملائج التوفيق في التحقيقات

ولج كل التوفيق وانشالله يكون هل مكان اللي تكلمتي عنه يستحق انسانه مميزة مثلج
والصبر زين

الفقرة السادسه رائعه مثل كاتبييها

فقرة جميله جدا تستحق ان توثق كروايه او على الاقل مشهد من روايه
اتمنى ذلك

تحية بقدر ماكتبتي من احساس

esTeKaNa يقول...

خسرتني للأبد
~~~~~~~~~~~~~~
hahahahahaha:))
اسفه اسفه
تعبت من القرايه؟
مادري اني ممله جذي
اسوي خصم بالبوستات اليايه انشاله










shather
~~~~~~~~~~~
قلت لج من قبل اني احب نكج؟
عجيب
:)
امين واجمعين يارب









عبداالرحمن
~~~~~~~~~~~~
صباح الاحساس والجمال
:)
سعيده جدا ان هناك من انتبه للفقره السادسه،كتبتها باحساسي روحي ويشرفني انها اعجبتك

شكرا لمرورك الجميل دائما
:)

Shather يقول...

لا ما قلتيلي...
حبتج العافيه حبيبتي..
انتي و سوالفج اللي تنحبون
*^-^*

كلك زوووووء ;)

خسرتني للأبد يقول...

الســ عليكم ــلام
لا بالعكس و الله دمج خفيف و اسلوبج بالكتابة وايد شيق ويعجبني
والي يعجبني في اسلوبج
ان الموضوع يبتي صغير بعدين يكبر او غامض بعدين ينفهم
لاكن العيب فيني ما عندي لياقة
ولاكن خايف اقولج شي وتزعلين
نسيت الي كتبتية راح ارد اقراه مره ثانية
:)))