الجمعة، أغسطس 03، 2007

الجو ربيع


قدرنا ونصيبنا هالسنه نتمتع في صيف الكويت الساحر

الشمس تخترق وجوهونا

والهواء الحار يكفخ فينا

ننكن في البيت الى وقت الغروب حفاظا على ما تبقى من لون لبشرتنا

ونحمد ربنا على هالبيوت البارده ،ولا جان الحين بالسطوح نايمين ونرشرش بالماي يبرد علينا

.

.

.

يسافرون بحثا عن جو آخر،ومع اول نسمة هواء بارد تلامسهم وبعد يوم من مفارقتهم لديرتهم يسألونك:

هاااا اشلون جو الكويت؟

@@

يعني اشلون جو الكويت يا بعد قلبي قلبها !!

المسج اللي جاوبت فيه على صديقتي هو:

اليوم الجو عجيب،مطر الصبح وما صار العصر الا نازل علينا بردي

بس خايفين من النضله ما قلنا لاحد ومسوين تعتيم اعلامي


hehehehehe

.

.

.

موؤشر الحراره في سياره أبي دقيق جدا،يعطيك الحراره بالضبط

قبل يومين وتحديدا الساعه 2 الظهر استخف !!

درجة الحراره 45

46

ثم توقف ورجع ليكمل

50

50

وبعدها افحمنا

ـ10

ـ20

ice ice

hahahahahahahahaha

بعد قلبي افتر راسه ، وصلنا اخر شي 37 تحت الصفر

يا ليتني مصورته توثيقا للحدث

:D~

...

حفاظا على جمالك:

لا يكفي وضع السن بلوك في صباحك الباكر قبل الدوام وبس

لابد ان يكون معك دائما لتجدد حمايه بشرتك كل ساعتين او ثلاث بالكثير بوضع كميه اخرى على ماهو ظاهر من وجهك ويديك وكل ما تلغمطت بالسن بلوك كان افضل وأأمن

.

.

.

معلومه على الهامش:

بشره النساء أكثر تأثرا بالعوامل الجويه،والنفسيه

الجو

الفرح

الحزن

وكل ما تمر فيه له أُثر على بشرتها

بينما نادر جداا من الرجال من يكون للجو والنفسيه تأثير على بشرته

معلومه من دكتور الجلديه الانصاري

:)

ومعلومه أخرى:

يعاني الكثير من مشكله الشراهه النفسيه

كلما كان متوترا ،او يشعر بضيق اتجة دايركت للاكل

وتكثر هذه الحاله في النساء،لذا تجد المرأه التي تعاني من جفاف وفراغ عاطفي تتجة الى الحلويات والكاكو كبديل لاحساسها بالنقص

!!

معلومه قرأتها من دكتورة فوزيه دريع

hehehehehehe

.

.

.

مع ذكريات الخميس والغزو التي استذكرناها في زواره امس

ومع الاحساس بالضياع وفقد الأمن الذي حل في ديرتنا انذاك

لابد ان نختم هذا البوست بحمد الله على نعمته

حر

غبار

لاهوب

ايا كان الجو

الحمدلله على كل حال

لا فيضان مغرقنا ولا زلزال عافسنا

ولا غزو يشتتنا

هذي الكويت صل على النبي
اهي ديرتنا وفيها اللي نبي
:)

هناك 31 تعليقًا:

mtfa2el يقول...

بلاهوبها
بحرها
بزحمتها
تبقى أحلى ديرة و ما نبي غيرها

Mr_CHoCoLaTe يقول...

اي انا ترد الاكزيما لي اذا تضايقت

و مرات آكل

الحمدلله رب العالمين على كل حال

Mishari يقول...

متنا من البرد

مشاري خرف من الحرارة

خسرتني للأبد يقول...

الســ عليكم ــلام
هذا اهو الكفاح و النظال
الحياة صعبة و اصعب شي فيها انك اتعيش في الكويت بالصيف
انا انقهر من هالناس الي يموتون من الحرارة و تكوت درجة حرارتهم 45
عيل احنا شنو انسوي
على كل هالاجواء
الكويت حلوة
و اعشقها

MANAF يقول...

:)

ترى والله هالجم سنه اللي طافو

بكل مكان تلاقين حر

مو بس بالكويت

لندن

فرنسا

ايطاليا

اسبانيا

::::

اذكر العام كنت بلندن هالحزه

والله انزل من الباص ميّت

وعندي ناس كانو بفرنسا هم نفس الشي

موجة الحر ماليه العالم

قولي الحمدلله

:)

بعدين انتي استكانه

يعني لا زم تتحملين

لوووووووووول

5roofa يقول...

انتي تحجين عن اي ديره لا لا الكويت مشالله برررررررررد و خاصة على 2 و 3 الظهر ياربي قعدي بره الجو ربيعي

looooooooooooooool:P

el bent tehabel smela 3alehaa alah e5alleha lekom ya rab o tshofonha 3aroosaa

nice post i hac fun reading it
:D
salamz....

بنت الكويت يقول...

الله يعينكم الصراحه

بس تدرين من كثر ما شفت البرد والثلج بالغربة ولهت على جو الكويت الحار

يعني الحين بالصيف ما ودي يخلص واييه الشتا

Maximelian يقول...

كان الله في عونكم اختاااااااااااااااه

بس يا اختي للحر فوائد ..كثيره ..منها انك تبطل المكيف وتنام بلا قعده

Shaima'a Alkandari يقول...

الكويت بحرها ورطوبتها حلوه

الحمدلله احسن من الدول الثانيه اللى فيها فيضانات وعواصف وغيرها

تعودنا على جونا وصار جنه بلسم على قلوبنا صج نموت من الحر بس هذي الكويت وصلوا على النبي


عاد استخدموا كريم حمايه لي طلعتوا واللى بيصير اسمر حيله بالتان

ومعلوماتج ميه ميه كلها صح

قواج الله ويعطيج الف عافيه

salfa3ajeeba يقول...

ee wallah il7amdolillah 3la kuwaitna,

in7bha bkil 7alatha allah i7afithha lina:)

7osen يقول...

وكل ما تلغمطت بالسن بلوك كان افضل وأأمن


والله ضحكتيني على هالجمله

حدي فصلت عليها ضحك

بس والله هالجو ماينفع معاه أي شي

الله يعين البشره

ههههههه

:)

esTeKaNa يقول...

mtfa2eL
~~~~~~~~~
اي والله صدقت
:)







mr_chocolate
~~~~~~~~~~~~~~~
اجر وعافيه ان شاء الله
ما عليك الا العافيه يارب
:)








mishari
~~~~~~~~~
وي وي اسم اله عليك الرحمن الرحيم
لا مشاري لا لا تقول خرفت
لا تخلي العواذل يتشمتون فينا ويقولون حر
!!
انته بس يمكن حايشك برد وارتفعت حرارتك شوي
:))





خسرتني للأبد
~~~~~~~~~~~~~
ايوااااااااا هذا اهو
الكفاح والنضال
احنا عشان جذي مو مسافرين
قاعدين نكافح ونناضل يالله من فضلك
:)
واللي يتموتون من الحر مساكين هذا من الترف وانا اخيتك










manaf
~~~~~~~
ألف الحمدلله
انا بعد العام هالحزة كنت بلندن
!!
صاج اول االايام كان حر بعدين تعدل الجو

عيل لازم اتحمل؟
لوووووووووول
ما سوت علي استكانه
انا هني استكانه
بالحياه العمليه بنت ومخلوق طبيعي جداا يتأثر بالعوامل الجويه
:)))








5roofa
~~~~~~~~~~~
اصلا ما تحلى الطلعه الا 2 الظهر
هذا احلى وقت حق المشي على البحر
وذاك االلاهوب اللي يكفخ
قصدي الهوا البارد
وتمشين وتغنين نسم علينا الهوا
يا سلاااام
:)استكانه تتحلم



واي شفتيها ؟
شوفي الخشم والحلج
نتفه نتفه...مشروع ما خلص للحين هالبنيه:))
امين والله يسلمج ما قصرتي







بنت الكويت
ّ~~~~~~~~~~~~~
ثلج وبرد؟
تبادلين وازيدج
:)))
من غير شر عسى ربي لا يحرمج من ديرتج ويردج سالمة وغانمه






maxiemlien
~~~~~~~~~~~~~~
وفي عونك يا اخي العزيز

اخييييييه يالمكيف اللي كسر ظلوعنا وخلانا شياب وعيايز في مقتبل العمر وكله نايمين
:(







shaima
~~~~~~~~~
الله يعافيج وحياج الله
:)










SaLfa3jeeba
~~~~~~~~~~~~~~~
امييييييييييين يا الغاليه
كافي انه على كثر ما نتحلطم عليها
ما نقدر نفارقها
الله لا يغير علينا الا للأحسن
:)












7osen
~~~~~~~~
hahahahaha:))
انفع اعطي نصايح؟
لازم ادش بحجوة كويتيه بعرض البوست
صايره عيوز سمول من مجابل يدتي

بس ما اوصيك تلغمط تلغمط قدر ما تقدر حفاظا على جمالك وبشرتك
:)

Fahad Al Askr يقول...

عجبتني تعتيم إعلامي

esTeKaNa يقول...

fahd al_3skr
~~~~~~~~~~~~~~~
يا هلا ويا مرحبا بفهد
عجبتك تعتيم اعلامي؟
افا عليك بس
بقلقصها بكل بوست
:))

عثماني يقول...

مساج الله بالخير اخيتي الغالية استكانة

عذريني والله يا وخيتي ..صارلي جم يوم مقاطع النت بسبة هاللوية اللي انا فيها

بس ما نستغني عن مدونة اخيتي استكانة

تدرين استكانة !!؟ المشكلة مو بالحر بس ...المشكلة بالناس اللي تشتغل بهالحر

خبرج انا معظم شغلي برة ..بهاللواهيب ...مادري منو اللي قص علي و خلاني اصير مهندس !!؟ يكون زين يعني

المهم ...خن اقولج هالسالفة ..مرة قاعد في مكتبي بالموقع ..الا و تدش علي السكرتيرة : الحق يا باشمهندس ..الحداد أطع اصبيعه
شوي الا داخلين علي العمال و واحد منهم شايل 3 اصابع مقطوعة

حطيناهم بالثلج و وديناهم المستشفى

خبرج من الحر الحداد و هو يقطع الحديد دار راسة و قطع اصابيعة...حرنا سفاح

ناهيك عن الروائح الزكية النابعة الاخوة العمال

حاااالة

hamdool يقول...

وآآآآآآنا أقول
منو اللي وصل المؤشر الإستهلاكي
مال الكهربا للون الأحمرررر!؟

أثاري إنتوا وبيتكم
قاعدين داخل و ماتتطلعون بره البييييت

LOOOOOOOOOOOOOL

لندن هالسنه مطر وبراااااد
مالج شغل بكلام العذال وأولهم
MANAAAAAAAAAAF

;p

يا حلو جو الكويت





في كبر

;)

SHAHAD يقول...

عن نفسي تعودت على هالحر والشمس الحارقة صارت صديقتي لوووول
كورس صيفي ومن قاعة لي قاعة شلون ما اتعود لوووول
.
.
الحمدلله ع النعمة
بـ حرها بـ زحمتها بـ كل شي نحبها .. يكفي إنها كويتنا

esTeKaNa يقول...

عثماني
~~~~~~~~
ياهلا ويا مرحبا
هذي الساعه المباركة
فقدناك من غير شر

من قص عليك؟
لا اسم الله عليك ماحد قاص عليك مهندس اد الدنيا كلنا بنتشيحط فيك:)

واااي عثماني
ليش سالفه الرعب هذي؟
احس قلبي انقرف وعليه كسر خاطري
مو صبع،مو ثنين،ثلاث؟
وااااااي الله ياجره
انا صج يكسرون خاطري هالمساكين
انا اعرف واحده يزاها الله خير من تحتر الشمس وبعز الظهر تفتر ولا يبقى رقي بارد واكل ما تعطيهم
:)

esTeKaNa يقول...

hamdooL
~~~~~~~~
hahahahahahahahah:)))
اهو بالضبط عشان اكون دقيقه معاك اكثر،زياده الاحمال كلها من غرفتي
انا منكنه الى اشعار آخر
بس يا اخوي الناس مو مخليني بحالي
كل يوم يبون يطلعوني وانا مابي مابي
:Pp~


مو حر؟
واي ليش تبون تحروني؟
مناف قصده يهون الامر علي خلني انا ابي اصدقه:)))







ShaHaD
~~~~~~~~
وااااااي يا بعد قلبي قلبج
انتي لازم عاد نعطيج جائزة
الصيفي كفااح
والجامعه تعب
الله يبلغج يا ربي وتفتكين ونفرح فيج:)

سالفة قلب يقول...

الحمدلله على كل شي يااستكانه

وانا بعد اقول وياج
اهيا ديرتنا وفيها اللي نبي
:)

hamdool يقول...

آنا أموت عالحر وكنت مصدقه
ولما رحت لندن طلع عندهم
مطر وبراااد ضاق خلقي

;p

وقلت بعد ما راح أصدق مناف

ليش يقول لي حررر
وآخر شي يطلع برااااااد

hehehehehehehe

عالعموم خلج بدارج
شكلج ما تحبين أحبابج

وبتقطعين عنا الكهربا

:)

محـــــارة يقول...

هلا وغلى أستكانه مشكلة الحر مار على أغلب دول العالم مو بس بالكويت .. والكويت والحمد لله مهيئه للحر التكييف بكل مكان أرحم من حر وخيسه وعبالهم بردي

بس مثل أكو جمله قالها الدكتور العجيري حبيتها واااايد وهي : أهلكم قبل ماعندهم سالفه ولا يفهمون شيء قعدوا بالبقعه الحاره وعقب طلع منها النفط إذا شايفين ماعندهم سالفه روحوا دوروا ديره ابرد وعيشوا فيها :) .. سكتنا وأنا أختج يعني تبون العز والفلوس تحملوا الحر

مشكلة الحر يذوبج ويكسر مياديفج وبربع ساعه تمشينها حتى بتكييف وتروحين مشوار ماتدرين إلا نفسج قام يرتفع وهمتج قامت تقل والدورين الباب عشان تردين البيت وتقطين روحج جنج راكضه كيلوات

مرسي على البوست الخفيف والطيف خيتو

عـائـشـة يقول...

صدقت يا إستكانه

وذكرتيني ببنت عمي تطرشلي مسج تقولي عندا الجو بارد وغائم
أقولها وعندا حار ورطوبه
احمدالله

مهما درت وسرت ولفيت تشرد عن الحر مردك له... فالأفضل إنك تتحمل وتتعود على معايشة هالأجواء

وتسلمين

charisma يقول...

صباااح الورد
لوووووووووووووووووووول
هههههههههههههههههههههه
عاد جان عشتاى الجو اشوى بالماينس
هههههههههههههههههه
واى مت مت ضحك
:)))
اتينن السياره
كله سوقيها استكانه اتحسين بالتجمد بعز الصيف
ههههههههههه

مسكينه اخرفت يا عوينتى
لووول


ومعلومااتج جدا قيمه وانت الصااجه
عاد هاليومين حايشنى جفاف عاطفى ومستنه على الكاكاو
الحين فهمت امممممم


يا عينى عينج يالكويت
الحمدالله على كل حال

عجيب البوست
:*

imbratoor يقول...

اقول الله يستر على جهنم

والناس اللي بيشرفونها ههههه

اذا الكويت جذي حاره!!

يمعوده يازين امريكا مطر شهر 7:) وبراد

اي والله ومن غير جبال

الهوا حلو حلو تحس انك آدمي

اما بالنسبه للبشره

معلون والد والدين منصلخ

ههههههه لا بس مو بالدرجه اللي ابالج

بس وايد بشرتي حساسه حيييييل

ووايد مبتلش من الجو ومن النفسيه

النفسيه تلعب دور ابشرتي

مشكور يا احلى استكانه

imbratoor يقول...

ادري في بدليات

بس مو مني معصب على الكيبورد

وديته حولي عشان يسويلي الحروف ليزر

وماخذ مني الفلوس على هالاساس

وقالي ليزر واكدلي هالشي

صارلي 3 ايام اجيك ولا لزقات

:(

صج نصب بروح بعد شوي

بلعن والده والديه

والله العظيم الناس ........

الله يصلحهم بس اعلمه :(

ابي ابجي

عيون الحب يقول...

شو نقول؟
الحال من بعضه والله

صرت اكره بس مجرد فكرة اني بطلع من البيت
وهو طبيعي انا ماحب اطلع من البيت لوول

الله يستر علينا الواحد اذا كان يتسبح مرة وحدة في اليوم
على هالحر 3 مرات ويلا يسدّن لول

esTeKaNa يقول...

سالفة قلب
~~~~~~~~~~~
تدرين؟
يتبارك البوست والبلوق كله بطلتج
:)
حياج الله







hamdool
~~~~~~~~~~
hahahahahahahahahaha:))
خلاص خلاص
رحمه بالكويت
وباحباب الكويت
وبالمواطنين والمقيمين راح احاول اخفف
:))
وهل العبره المستفاده من قصتك المذكورة انه ما نصدق مناف اذا تكلم عن الاحوال الجويه؟
:))









محاره
~~~~~~~
يا هلا ويا مرحبا
يختج هالعجيري حكيم والله
افحمني
:))







عاشه
~~~~~~
وهذا ما نحاول القيام به
معايشه مع الاوضاع والله المستعان
حياج الله
:)










charissma
~~~~~~~~~~~~
ههههههههههههه
لا لا مالي شغل فيج
الساعه 2 الظهر بمرج ونتمشى فيها عشان تعيشين صج اجواء التجمد
:))
عاد انا كله مستنه على الكاكو
تهقين حالتي خطرة؟
:))








immbrator
~~~~~~~~~~~~~
ياهلا ويا مرحبا
خطوة عزيزه يا سي امبراطور
نورت المكان
:)
اي والله ،الله يحرم ويوهنا على النار
ويزرقنا جنته اجمعين يارب


وي اسم الله عليك الرحمن الرحيم
افا عليك بس
نرفع لك قضيه كل شي ولا كيبوردك
:))









عيون الحب
~~~~~~~~~~
ياهلا وغلا
عاد صار لي جم يوم احن ابي اسافر دبي
وابوي يقول دبي بالصيف مستحيل نروح
نروح من حر لي حر
:))
يالله الله كريم انشالله

Expatriate يقول...

لا بصراحة الحر بهالديرة يخرب المزاج
حاولت ادور الجانب المشرق من الموضوع ما لقيت .. بس هم على الأقل أهون من الثلج


اخ لو اقدر اخذ اجازة
الحمدالله

AuThoress يقول...

مادري ، أول صيف يمر علينا/عليكم؟؟

بلد صحراوي، حااااار جاف صيفاً، بااارد قارس شتاءً ، رطب بقة شهري تسعة وعشرة ، رائع ومجنون منذ ديسمبر حتى نهايات مارس، ونقول من الاول :)

الكويت لها رائحة خاصة لا تشبهها بلد

Q8i_Blogger يقول...

الكويت حلوه بحرها وبردها

بس احلى شي قلتيه ... اشلون الجو بالكويت
صج صج هذا السؤال وايد دارج
كل مادق علي واحد مسافر يقولي اشلون الجو بالكويت ... جنه مو طول عمره بالكويت ... يعني شهر 8 شنو تبي .. سنوو ؟

يعطيج العافيه