الخميس، يوليو 26، 2007

!!فرصة أخرى

فرصه أخرى لبرك،وباب جنه ينفتح تحت قدميك

!!قدميك

قدماك اللتان تتلمعان كل ليله مع الوازلين

ويديك التي تشهد عروقهما اليابسه على سنين من الصبر

من الحب

من الألم

.

.

.

سافر من سافر وبقيتي لبضع ليالي وحيده

تركت بيتي ووالديّ لاندس في سريرك كل ليله

اتلذذ بالدلال واستمتع بمنحك الامل

اشم في غرفتك روحك

وفي اشيائك انتي

وازلين...كلونياا أم بنت ..وابو فاس

مرقدوش

ومرة

تلك اشيائك الوفيه رغم مرور الزمن

بقت هي وبقيتي انتي

.

.

.

لك موعد مابين كل صباح وآخر

تذهبين بملئ اراداتك وبكل تسليم بقدرك

تستلقين بجانب ذاك الجهاز الكبير،وتتلقفيك تلك الابر لتنغرس في جسمك الضيعف

وتبدأ غسيل كلتيك لمده اربع ساعات

اربع ساعات مابين غمضه وشهقه ألم

تنامين أحيانا وأحيانا اخرى تغمضين عينيك وتهمسين بقرآان حفظته عن ظهر قلب

تنحرمين من شرب الماء

ففط بضع قطرات تبلل ريقك لتبقين بخير

تشدين على يدي وتريني كيف تكون الكلى بحجم قبضه اليد ولكن

عملها اكبر من حجمها بكثير

اسألك وقلبي ينفرط من الألم:

تعبتي؟

تبتسمين:

ووين راح اجري

لا تنبريني وتخليني اشكي

.

.

.

اخذت منك بعض صفاتي

وبعض آاخر يؤسفني بأني لا أملكه

للا أملك الصبر

ودمعتي أقرب لروحي مني

!!لست قويه يا جدتي

.

.

.

توقظيني في احد صباحاتك الباكره

ترسليني لشراء بعض ما تحتاجينه لشاي الضحى

توبخيني امام ضيوفك على ملعقه الاستكانه المخالفه لطقم الاستكانات

وابلع فشلتي مبتسمه رغم احساسي بأني اريد الاختفاء

لا تتقنين مدحي أمامي وامام الاخريات

ولكن..ان غبت عن عينيك ابدعيت بالحب وفي استرسال الكلمات

.

.

.

تباركين سيارتي كلما ركبتيها

وتزيد ضحكاتي كلها رأيتك تمسكين بكل قوه بكل ما فيها

تؤشرين بيديك لغيري،وكأن سيارتي بدون اشاره

تخفضين صوت الراديو حتى لا يزعجني اثناء قيادتي

وتظلين منتبه،متابعه لكل شئ حولك

استمتع ببرك

بحبك

وبرضاك عني

.

.

.

ذات مساء امتلأا بيتك بضيوفك

حولك الكثير ،وهناك اكثر من حديث

وحدي كنت صامته رغم الازعاج

بعيده رغم قربي من الجميع

تهمسين في اذني :

اشفيج؟

ابتسم وابحث في داخلي عن كلمه تقنعني وتقعنك:

!! ما فيني شي

.

.

.

لم تنامي ذاك المساء،دفنت راسي في حضنك

وسألتيني:

منو مزعلج؟

منو من حبابيج كسر بخاطرج؟

خنقتني دمعه وابتسمت:

انا مزعله نفسي

!!

ابتسمتي واسترسلت:

لو احد بهالدنيا يزعلني ببتعد عنه واجفا

لكن لو كنت انا اللي مزعله نفسي وين اروح

مافيني شي ،وفيني كل شي

في حاله خصام مع نفسي

خجوله امام قلبي

محرجة من مبادئي واحساسي


ضممتيني بحب

مسحتي على راسي:

شوي شوي على نفسج

لا تعذبينها وتقسين عليها

تعوذي من ابليس يمه

صلي لج ركعتين بكل مسا

وفضفضي لرب السما

مافيج الا العافيه

الله يجبر بخاطرج ويرضيج مثل ما انا راضيه عليج

.

.

.

.

:***

جدتي

أمي ،حبيبتي وصديقتي

الله يحفظج لعين كل من يحبج

ويشافيج ويمد بعمرج

يا أغلى من لي

وقطعه من روحي




هناك 28 تعليقًا:

loyalty يقول...

إحساس صادق تدفق لقلوبنا و اسشعرناه معكِ

و كأني بأيام الطفولة حين كنت أقول لوالديّ إذا أردت المبيت عند جدتي ..

لي جدة أحن علي من أمي
=) قصيدة حفظناها في المدرسة .. فكنت أرددها بشقاوة الطفولة ..

شكراً لك على إحياء مشاعرنا الدفينة :)

Vancouver يقول...

ليش جذيه استكانه
اتبجيني بنص اليوم
:(((
الله يحفظلج يدتج ويرزقج برها
وطاعتها ورضاها قولي امين


انتي تتكلمين عن يدتج
وانا اتذكر امي الله يحفظها
:((
ما شفتها صار لي 5 شهور


واتذكر
بالذات حركة التاشير من السيارة والترقب
والتلفت ما جنه صارلي 12 سنة
اسوق هههههه

كلامج استكانه من قلبج
والكلام اللي من القلب يوصل
القلب على طووووووووول


:))))

ReLaaaX يقول...

اول شي داشه سيييييييييده على بلووووقج :)))


--

وابي اول شي اقول الله يخليلكم عيال عمامج وعماتج وعيال خوالج وخالاتج ... لأن بوست اليهال مت عليه من الضحك وحبيتهم خصوصا وهابي

عسى الله يحفظهم ويخليهم

--

بوست اليوم دمعت عيني والله
وقلت عسى الله لايحرمها من اميمتها ولا يحرم اميمتها منها

ياحلوهم وياحلو قعدتهم .. استمتعي بكل لحظه وياها .. واستشعري كل دعوة لج لأنها طالعة من قلبها

عسى الله يطول بعمرها بطاعته ويعينكم على برها :)))))


--

ولهت عليج يااستكانه قلت اسلم واقرى آخر شي كتبتيه

بنت الشامية يقول...

استكانه عصرنى قلبى عصار

الله يشفيها ويعافيها ويخليها لكم ويخليكم لها......الاحساس بالجدات مختلف

مهما كانت محبة الام محبة الجده لها طعم واحساس مختلف....ماادرى هل هو الامن والامان......تمتعى فيها ولا تتركينها لحظه وحدة.....الله ياجرج وياجرها

تراهم نعمة من نعم الله

ودمتى

esTeKaNa يقول...

loyalty
~~~~~~~~~~~
يا زين هالقصيده
اتذكر اني احببتها بصدق
:)
وشكرا لوجودك العذب





vancouver
~~~~~~~~~~
يا بعد قلبي قلبج
والله ما تنلامين اذا بجيتي
بس بدل البجي انا اقول قومي دقي عليها وقولي لها انتي شكثر ولهانه عليها
:)
انا سالفه السياره فانا يدتي فعلا تبدع،ما تخليني امشي الا قاريه دعاء الركوب بصوت عالي شوي
وما نوصل الا مشالله ما بقى دعاء ولا آايه،وهذا وانا سواقتي راكده

امييين واجمعين يارب
وعسى الله يقر عين اميمتج فيج
:**







reLaaax
~~~~~~~~~
هلا هلا ..هلا بالطش والرش
واي ولهانه عليج من قلب
حيالله اللي يايه سيده ومجبله على بلوقي



الله يسلمج ما قصرتي
وصج وهابي جيكر بس يختج ينحب
:))



يا بعد قلبي انتي اللهم امين وما قصرتي
انا اللي فرحت من قلبي بمرورج
وجودج له طعم ثاني الله اعلم
:***
















بنت الشاميه
~~~~~~~~~~~~~~
هلا وغلا بشيخة الشاميه كلها
اسم اله على قلبج يا بعد قلبي انتي
اللهم آمييين ويزاج الله كل خير

اي واله صاجة
الميمه حبيبه وما تقصر
بس اليده غير سبحان الله
:)
حياج الله

عبدالرحمن يقول...

يخليها لج يارب

عندج احد تدسين راسج بحظنه ويلمج ويسئلج شفيج

عندج عين جريئه مستعدة تدمع وتخفف من هل احساس

عندج عقل

انتي في نعمه

لو شفتي حال المحروم من هل ثلاث اشياء شراح تقولين

الله يرحم حاله

لا احد يهزله كتفه يقول شفيك ولا حظن يخفف عنه التنهيد ولا عينه تدمع على كثر مافيها من دموع
ولا عقل يقدر يقنع احاسيسه

كنتى وتبقين على القمة

5roofa يقول...

الله يشافيها يارب و يخليها لكم امين يا رب العالمين

الصراحه مادري شقول والله كلامج اكثر من رائع و يخلي الشخص عاجز عن المديح مشالله مشالله

و صج موقف السياره ذكرني بيدتي لوول الضاهر كلهم يسون جذي

الله يخليها لج و يخلي كل يده حق احفادها يارب

salamz...

محـــــارة يقول...

الله يطول بعمرها المره الكبيره واليده بالتحديد مدرسه والي خلقني مدرسه بابتسامتها بهمسها بغمزتها حتى بقرصتها بطرف الثوب

الله يردها لج ويخليها دوم معطره بيتكم بوجودها والله يرحم يدتي رديت شريط ذكرياتي بين عيوني ربتنا بدون صوت بكل هدوء تعطي نصائح وحكم

الله يعين قلبتها تراجيديه :)

واصلي نبضج وخلينا نعيش بأحساساج

DiLLi O MiLLi يقول...

:"(

ذكرتيني بيدتي الله يرحمهااااا ... كنت أحط راسي بحضنها وتلعب بشعري وتسولف لي عن اول .. بساطة عيشتهم .. قلوبهم الطيبه .. سذاجتهم

الله يحفظ يدتج ويشافيها ويطول بعمرهااا ياااارب



:)

عيون الحب يقول...

شعور رائع سطرتيه بكلماتك
شعور لامسنا فغبطناك على تلك الجدة

وغبطناها على وجودج بجانبها
الله يخليكم لبعض يارب :)

سالفة قلب يقول...
أزال المؤلف هذا التعليق.
سالفة قلب يقول...

الله يااستكانه على وصفج وتعبيرج اللي يوصل اقصى القلب
الله يحفظ لج يدتج ويطول بعمرها ولايحرمج منها
اعرف هالشعور ..وحب الجده غير حبها كله حنان وطيبه
كنت لما انام عندها تكحلني بمكحلتها واتطيبني واتدهني بنيفيا تنقط ايدي بهالكريم بعدين اتدهني
ياحلوهم وياحلو ريحتهم الخنينه
الله لايحرمنا

salfa3ajeeba يقول...

allah ishafeeha wi i'7leeha lich wi i7afithha ya ra7man ya r7eem

Breeze يقول...

شرح معبر .. و تفاصيل مبكية .. :(

آلمني كثيراً وصفك .. أحسست و كأنني أعيش الجو معك ..

:(((

الله يخليلج أحبابج .. و يطول بأعمارهم .. و عسى الله يشافي يدتج و يردها بسلامتها و عافيتها .. اللهم آميــــن

--

hamdool يقول...

جعلتيني أطلق تنهييييييييده
طوييييييييييييييييييييييله
لم أنتهي منها لغاية الآن

إندمجت مع القصه حتى خلت
أنك تتحدثين عن أحد أفراد أسرتي


الله يعطيها طولة العمر
ولا تفقدون أحد من حبايبكم

وانشالله إحنا مانفقد
إبداعاتك اللي تعودنا عليها

Shaima'a Alkandari يقول...

الله يحفظهايارب ويخليها دوم راضيه عليج

مادري شقول بس الله يخليكم لبعض ويديم البسمه لكم

فراغات يقول...

سلامتها
والله يعطيها الصحه والعافيه
هي فهلا اغلى الحبايب

خسرتني للأبد يقول...

الســ عليكم ــلام
ما اتشوف شر ان شاء الله
و الله يعطيها الصحة و العافية
بصراحة يدتج و الله العظيم حكيمة
بصراحة الكلمة الي قالتها لج غيرت مفاهيم كثيره لي و بصراحة كانت غايبه عن بالي
الله يشافيها ويجازيها كل خير ان شاء الله
الحكمة الي قالتها و كانت غايبه عني
صلي لج ركعتين بكل مسا
وفضفضي لرب السما

esTeKaNa يقول...

عبدالرحمن
~~~~~~~~~~
بيعنا بالسوق يا بو بدر
الحمدلله على كل حال
دام انك بصحة وعافيه كل شي يهون
واحنا كلنا تحت امرك
بس انته هونها وبتهون
:)















5roofa
~~~~~~~~
اللهم امين ويزاج الله كل خير
وصاجة الظاهر هذي حركاتهم كلهم بالسياير فضحونا
:))








محارة
~~~~~~~
هلا بالمحاره والله
اي والله صاجة
التربيه كلها بنظرة وقرصه بطرف الثوب تعلمج الادب طول عمرج ولا تنسينها

طالما اني محاطة بصدقكن
الاكيد اني ساواصل
الله لا يرحمني
:))






dilli o milli
~~~~~~~~~~~~~~~~~
عسى ربي يرحم جدتج وعساها بجنات النعيم
:)








عيون الحب
~~~~~~~~~~
هلا بالحب كله
اللهم امييين
وجزاج الله خير
:)








سالفة قلب
~~~~~~~~~~~~
يا بعد قلبي انتي
الاطراء منج له معنى ثاني
اللهم امين وما قصرتي
ويا زين ذيج المكحله والله والنيفيا
:))








salfa3jeeba
~~~~~~~~~~~~~
اللهم اميييييين
ويزاج الله كل خير يا احلى سالفه
:)








breeze
~~~~~~~~~~
اللهم امين يارب العالمين
ويحفظ لك احبابك يارب

نورتي هالمكان يا الغاليه
:**






hamdool
~~~~~~~~~~
وي اسم الله على قلبك من تنهيدته
وعساك ما تفقد عزيز ولا غالي يارب
:)



شيما الكندري
~~~~~~~~~~~~~
حيالله شيماااا
امييييييين واجمعين يارب
:)











فراغات
~~~~~~~~~
اي والله أغلى الحبايب
حياك اله
:))






خسرتني للأبد
~~~~~~~~~~~~
وعليكم السلام ورحمه الله وبركاته
يا هلا ويا مرحبا
يزاك الله كل خير وفعلا هالكلمتين تمو في بالي وعسى الله يعينا ونطبقها
:)
~

3AJEL يقول...

يارب


هذولي

بركة

Fahad Al Askr يقول...

الله يكون بالعون

غير معرف يقول...

عسى ربي يرزق يدتج ويرزقج عمر ويمده وتعيشين يا رب بالهل احساس وهالمحبه ويناولج راحه البال والحظ الكبييير وتسولفيلي استكانه عقب ما نكبر تدريين
تونا بعمر الزهور:)!!!
انج باحسن حاال
اختجd.m

Mishari يقول...

اللى كاتبته طبيعي وطالع من القلب

واللى يعافيج ما نبى حزن :)

مشكورة على البوست اللطيف بس بدون بوز و حزن مرة ثانيه :)

بوغازي يقول...

ترا أنا ما فيني قلب على هالسوالف... بسرعة أطقها بجوة الحين
:(
.
على أي حال الله يطول بعمرها وخليها لكم ويحفظها إنشاله
.
وبعدين شالسالفة وعسى ماشر ليش زعلانة من عمرج؟؟
:)

7osen يقول...

الله يخليها لج
ويطول بعمرها

إستكانه

كلماتج المحمله بالصدق توصل بعيد

والله صج

بس عندج لما تكتبين بهذا الأسلوب

أحس بحنين كبير كبير جداً
لكل الناس اللى أحبها

:

فعلا إي إنسان يحمل قلبه مشاعر
لما يقرا هالكلام تمتليء عيونه بالدموع

لأن الصدق يوصل
بكل سهوله يوصل
:

ألمني جداً جداً موضوع الغسيل
لأني أعرف هذي الحالة وهذي التجربه بشكل كبير جداً

الصراحه الناس اللى تمر بهذي التجربه
لها أجر كبير عند رب العالمين
لأنه بالفعل عذاب

الله يعينها ويشافيها إن شاء الله

حسام بن ضرار يقول...

سبحان الله : كبار السن يتعلقون بالقلب و يصير الانسان حساس تجاههم

الله يخلي لج يدتج

Mamloo7a Q8ia يقول...

الله يطول لكم بعمرها ويشافيها
والله يعينج على برها وطاعتها

esTeKaNa يقول...

عاجل
~~~~~~
وأنا اشهد
:)




فهد العسكر
~~~~~~~~~~~~
اي والله
:)







D.h
~~~~~
ياربي اتفائل كل ما شفت كومنت منج
منورة بلوقي وحياتي
عسى ري لا يحرمني منج ومن وجودج
وامييييييييييييييين
راحة البال وانا اخيتج هذا اهم شي
:**





مشاري
~~~~~~~~
لا تلومونه مفارق احبابه
يبان بعيونه شوقه وعذابه
:(
العفو ولو
حياك اله






بو غازي
~~~~~~~~~~
لا الله يعافيك كل شي ولا دمعتك
ترا انا صايرة بالايحاء احد تخنقه العبره اسبقه بالبجوة وتاليتها شنو يسكتني
:)
امييين ويزاك الله خير
تسألني ليش مزعله نفسي؟
امممم ازعلها اذا سويت شي ما يرضي ضميرها واستمريت فيه
مممم يبيله بوست
الله يعينكم :)








7osen
~~~~~~~~
اللهم آمين ويزاك الله كل كل خير
والحنين لمن تحبهم وهم موجودين حولك حنين جميل
رقيق
وروعته تتجلى في تواصلك معهم
وتعبيرك عن حبك لهم ومدى امتنانك لوجودهم معك


تمنيت ان ارسم ابتسامة على وجه الجميع وليس دمعه في عين كل من قرأ
نورت المكان
:)








حسام بن ضرار
~~~~~~~~~~~~~~~
امين ويزاك الله خير
:)










مملوحه كويتيه
~~~~~~~~~~~~~~
آمييين ويزاج الله خير:)