الخميس، يوليو 12، 2007

تخطيطات

صوت ما يتسلل لمسامعي،ودون قصد ورغبه تنفتح عيني
انظر للساعه بقربي،الساعه تسع،
والساعه تنرفزني في تكتكتها
أقوم؟
ممممممممم
اتذكر ليالي طويله لم استلذ بنومه
وسنين طويله فزعت فيها من فير الله
اتذكر الصبح ،الحر،التعب،والزحمه وصوت المنبه القاسي
اتذكر ليالي الارق
وسهر التفكير
وايام التي افتقدت فيها راحة البال
الايام التي كنت ارتجي ساعه نوم مريحة
اتحسس نعمه ربي بأن رزقني سرير وثير
وسنترال بارد
وبيت هادئ
وراحة بال
الف الحمدلله
.
.
وبعد هذا الاسترخاء الذهني والتهيئه النفسيه
اغمض عيني واغط في نومه لذيذه
هاتف صباحي ،واهتزاز من تليفوني يوقظني،ارد على التليفون
اسمع
اكركر
واضحك
تالي....اغمض عيني وارجع من حيث اتيت
وكأن ذاك الاتصال فاصل اعلاني وعدت لما انا عليه
فاصل ونواصل النومه
لاشئ قادر على حرمااني من كسلي سوى تأنيب ضمييري على تأخير صلاه الظهر
يالله ياربي تهديني
.
.
.
وقت استيقاظي هو وقت الغداء،وأبوي هاب بالميد يوم وترك،أحبه بس مليت
ااستهلك وقتي في تنظيفه في الشوكه،وويستهلك ابي واخوي وقتهم في الضحك علي
مابين ميده وميده وقت،ووبذل للطاقه مالها سالفه ابدا
ممكن نستفيد من هذه الطاقه في امور اخرى
قمة التركيز في ميده بوالاخير لابد من شوكه تزرق في بلعومي:(
أحيانا يتكرم ابي باعطائي ميده بيضه ونظيفه واحيانا كثيرة يطنشني
واذا تحلطمت سيكون العقاب ان يكون الغدا ميد كل يوم
ليؤكد لي ابي على فكرة ان الحياه لا تسير كما تشتهين
تقبلي الواقع واكلي ميد كل يوم
!!
معقوله في انسان يقدر يفتح ريجة ويتريق ميد؟
قطوة انا؟
.
.
.
اكتشفت اني مشروع مشترك لعمامي،مشروع الكل يساهم ويشارك فيه
هل لأني افكر بصوت عالي؟
هل لأني اعتبر اكبر حفيده تربت في بيت العائله؟
ام لأني لا اعرف كيف اقضي حوائجي بالكتمان؟
شهر وايام قليله من تخرجت وفي كل زواره لابد من ذات الحوار:
عمي الاول يطلب اوراقي ليقدمها لديوان المحاسبه ،التأمينات
ويفصل في مزايا وعيوب كل مكان
كلام
بكلام
ويتبعه كلام
.
.
بعده ينطلق عمي الثاني ليشجعني على استكمال دراستي
الحياه الأن اصعب ولاشئ ينفعك الا شهاده تسندك
يا عمي يا حبيبي ما اقدر اسافر بروحي
يعرض خدماته
يشتط يفكر ويعطي حلول بديله،حرام عنده ضياع جهد وتفوق كل السنين الماضيه
.
.
يأتي عمي الثالث على البراد ويدعو بأن يرزقه ربه نسيب طيب
مصلي
مسمي
يروح معاه البروحرج ويبرد القلب
ينصب خيام
ويحدق
ويجابله بالدوانيه
وحافظ له جم زهيرريه
يريد ان يسلم حقيبه كامله فيها صور طفولتي ورسائلي الغبيه لعمامي ورسوماتي التي لا تمت للفن بأي صله
وعز الطلب وقمة السنع من ذاك النسيب ان يطلب من استكانه ان تعلق شهادتها في استقبال البيت وتكون ربه منزل
@@
متعدد المواهب فارس احلام عمي لي
:pP~
جدتي تؤيده وبكل ثقه تصرح: كافي دراسه، الرجل لا يفضل مثقفه
يفضل قطة مغمضه مخديه ما تدري وين الله قاطها
والبنت كل ما تعلمت وكبرت اصبحت(عرده)!! هل البنت دجاجه يا يمة؟
ومابين هذا وذاك
ومابين عمامي وخوالي
وجدتي وامي
وكل زواره واستقبال ويمعه
وصديقات ومعارف،الكل ينصح ويؤكد ويرسم لي خطة لحياتي
في الكويت:ربط صبعك وشوف المداوي
الجميع يعرف والجميع متأكد والجميع صايد الحركة
ويبقى السؤال..ماذا اريد أنا؟
.
.
.
أريد حاليا انا استمتع بلحظات الكسل،وان اهتم بنفسي وادللها
واحتاج دفعات دينيه كبيرة،الفتور متسرب لي بدرجة كبيرة
ابحث عن مركز دائم يعلمني ابجديات التجويد لأبدا بشكل جدي في حفظ القرأن ومراجعه حفظي المتفلت مني
اريد اخذ دورة في فقه الصلاة والصيام
ممممممممم
واسعى لاستغلال الوقت في اخد توفل في اللغه الانجليزيه
وابحث عن شي جديد اضيفه لحياتي
شئ ما ينعش روحي ويجدد املي وحياتي واضيفه لقائمه اهدافي
بعد حوار طويل حول بعض الروايات لبعض الكتاب الكويتين الشباب بعمري،اقترحت علي صديقتي انا افكر بشئ جميل استغل فيه قرقتي واستممتاعي بالكتابه اليوميه
كتابه شئ لطيف وجميل يعكس واقع وحياه المجتمع الكويتي بصورة جميله
استشفه من حياتي ومن تجارب من حولي،واستفيد من التجارب السابقه لي
احساسي اللحظي بأني اريد ذلك بقوة ،واحساسي في جانبه الآاخر يشكك في قدرتي على كتابه شئ من هذا النوع
التفكير جاري،والتخطيط مستمر،والله اعلم بما سيحصل بالغيب؟
:)
شهيتي مفتوحه للكتابه...ان لم تكن يوميه فيوم وترك
الله يعينكم


هل من اقتراحات أخرى؟

هناك 30 تعليقًا:

Mishari يقول...

مع احترامي لجدتج الشديد
ولكن افضلها مثقفة

وعمج خل اييب صبى بنغالي احسن :))

Mishari يقول...

انا اول واحد :D

esTeKaNa يقول...

mishari
~~~~~~~~~~~
hahahahahaha:))
في بنغالي حافظ زهيريات؟
واي صج ضحكتني
عاد تصدق مشاري يدتي ام ابوي مرة كبيره بس دارسه لي رابعه ثانوي
خاتمة القرآان
وتقرا وايد وبشكل مو طبيعي
تبارك الرحمن مشالله
تقدر تناقشك بكل شي تبيه
دين
سياسه
شعر
تاريخ
بس مادري اشفيها هاليومين المفاهيم منقلبه عندها
!!
وحيالله اول واحد
تبارك البوست كله

عبدالرحمن يقول...

مليت وانا امدح فيج بس المشكله ماكو شي تكتبينه مايعجبني :) اتغشمر

الله يخليلج راحة البال وهل عائله الحلوه اللي تخاف عليج شي حلو يكون للانسان ناس يخافون عليه يوفكرون عنه بس انا ضد ان يفرضون عليه تفكيرهم القصد الاهتمام بس :)

مؤيد وبشدة لفكرة كتابتج انتي انسانه مبدعه وانا متأكد انج راح تنجحين وانا اقولج من الحين رابع نسخه من الكتاب او الروايه راح تكون لي مابي احرجج خلي اول ثلاث روايات حق الغالين :)

Breeze يقول...

لوووووول يا زين يدتج .. جنها عمتي العودة .. خو أنا عماتي يدات .. أبوي أصغر واحد فيهم .. فكلهم يالله من فضلك ..

تخيلي أول ما تخرجت .. دار حوار مماثل للحوار اللي دار معاج .. جان عمتي تقولي هــاو هـــاو يا حافظ تشتغليييييين ؟؟؟

مع رياايييييل ؟؟؟؟

و أنا عرفتي اللي ساكته ما أدري شأرد .. يعني مره عودة حتى ماراح تقدرين تقنعينها أو تحاولين مجرد محاولة أولية إنج تغيرين قناعاتها و مبادئها .. لوول

المهم إنها إشخلتني خوش شخله .. و أنا مثل الأطرش بالزفة على قولتهم .. لوول

اللي عقبها كل اللي كانوا مشتطين إخمــروا فجأة :\

هيهيهي .. وليه يومج بتزوجني ولدها و تبيني أقعد بالبيت @@؟؟؟

مو ما يدروووون شنو التعب اللي تعبناه !!؟ و أنا الصراحة مو مع البنت اللي ما تكمل .. سواء بالدراسة أو العمل ..

الله يوفقج وين ما رحتي .. بس أنا أقولج من ألحين .. لا تحطين ببالج مكان معين عشان لا تتحبطين و تنصدمين و يحوشج اللي حاشنا .. اللي وصلت مرحلة آخر شي قدمت أي مكان و رحت وكاني مبتلشة .. لاني شايفة مكاني فيه ولاني مرتاحة ..

لا تتسرعين .. و تركي الأمور تاخذ مجراها .. بييج يوم و بتحسين إنج عبء ثقيل على الوالد لأن خلاص تحسين صار الوقت اللي تعتمدين فيه على روحج .. و هذا شي طبيعي .. بس لا تتسرعين + لا تتأملين بمكان معين ..

أقولج ياها من ألحين عشان أهيئج نفسياً .. التوظيف مو شي هين .. خصوصا تخصصنا :\

الله يوفقج و يسهل عليج ..

و لا تديرين بال .. الحال من بعضوا .. صايرة هالجم يوم بس أكتب لوول

:\

إي و صج ترى يتني هالحالة إني أبي أكتب رواية أو قصة أنشرها .. و فعلاً تخيلي لدرجة إني ما أنام أقعد بس أكتب .. و أقوم من صباح الله خير أقعد بالمركز العلمي أشرب قهوة و أكتب .. تعرفين اللي محد حولي هامني .. أكتب و من أخلص أمشي .. بس للأسف فجأة قلت الطاقة المينونة اللي كانت فيني .. و ركنت القصة لدرجة إن ألحين لو تسئليني عن شنو أقولج ما أدري ..

هبـــّه و راحت بس إنشاء الله يكون مجرد استئناف لن يأخذ وقتاً طويلاً فأنا بحاجة لتفريغ طاقاتي الذهنية بشيء مفيد ..

و بارك الله فيج .. و سامحيني على الإطالة ..

:\

bin3li يقول...

إذا بتشاورينا ، ترى كل واحد بيقولج إللي يحبه

إنتي شو تشوفين نفسج بعد 5 سنوات؟
إلغي فكرة الزواج ألحين

و تخيلي إنج عزوبية لمدة 5 سنوات
شو ممكن تسوين فيها؟

هل راح تكملين دراستج؟
هل تبغين تتوظفين و تسعين إنج تترقين في وظيفتج؟
هل تفضلين تقعدين في البيت ؟
هل تتمنين تكونين صاحبة عمل خاص إنتي تديرينه؟

إنتي ذكرتي أمور روحانية ما راح تعيقج
لكن قرار شغلج أو دراستج راح يظل معاج يمكن لآخر عمرج إذا ما صار شي يغير هذا الوضع

ألحين الفرصة مناسبة، و تطوير الانجليزي مهم سواء قدمتي على دراسات عليا أو لا

عندنا في الإمارات وايد هابين بماجستير الإدارة
MBA
التخصص هذا متوفر في أكثر من جامعة و part time
لان الغالبية العظمي موظفين و الدراسة تبدأ من بعد المغرب

و بعدين البرنامج هذا معترف في جامعات في الخارج فسهل حق إللي يبغي يكمل الدكتوراه

ما أقدر أفيدج وايد لأني ما أعرف شو في بالج بالضبط
:)

MANAF يقول...

يا حلاتج

يا استكانه

العايله فاصله

نفس اللي عندي

تخيلتج بنتي لين

اسمالله عليها
هم عندها عمام فصله اللي اهم اخواني

شكله التاريخ راح يعيد نفسه

:)

الله يستر

Shaima'a Alkandari يقول...

عايلتج تونس الله يخليكم حق بعض ويحفظكم يارب

بس ليش المرأه حلاتها مثقفه وعارفه وعالمه الزمن تغير الحين شهادتج تفيدج

وافكارج حلوه لو تكملين وتااخذين دروس عن الدين بعد يصير شي حلو ومنه فايده

استغلي وقت فراغج والله بشي مفيد

وكتبي حتى لو لو حطيتي في بالج انج ماتقدرين تكتبين ولاتخلين اي عائق يوقف كتاباتج

وحيلج بالميد

esTeKaNa يقول...

عبدالرحمن
~~~~~~~~~~
المشكله:ماكو شي تكتبينه ما يعجبني
!!
يا زين هالمشكله والله
والفال حق كل من يقرا لي
:))
يزاك الله خير على الدعوة الحلوه
الحلو فيهم عرض ارائهم والتعصب لها دون فرض لاي شئ
يعني المشهد انهم يتكلمون كلهم وانا اشرب جاي،اقصص كيك
استمتع بصمتي وهو ينطلقون:))
تأكدك من ابداعي دفعه معنويه كبيرة واطراء خجلني،لكن تهقه الحلم ممكن يصير واقع؟؟

esTeKaNa يقول...

breeze
~~~~~~~~
ياهلا ويا مرحبا بصديقتي
يا زين عمتج والله عندها خوش عرض
:)
وصاجة لازم تخمرين وتسكتين ،وتستغلين وقتج بشاي ولا قهوة ولا كيكة على الماشي

بريز ليش حبطتيني؟
انا امس قررت انه ما اربط احلامي بمكان واحد معين عشان ما انصدم
والروايه استغلال للشطاره بالعربي بشوف للحين موجودهالشطارة ولا لا


احنا نسعى وندعي وربج بيده التوفيق
الله كريم:)

esTeKaNa يقول...

bin3Li
~~~~~~~~~
حيالله أخوي بن علي
انا فاتحة المجال اسمع ارائكم انتو اخواني وخواتي
:)
انا عندي خطة زمنيه
ابديها بتوفل الانجيلزي
بعدين راح اقدم على وظيفه
واول الكورس بقدم طلب للقبول في الماجستير في نظام الدراسه الجزئي
يكون نصف نهار ومحاضرتين بالاسبوع
بس اجلت موضوع تقديم الاوراق للقبول لعلي اجد فرصه افضل وجامعه اخرى غير جامعه الكويت
:)
يا ليت تعطيني معلومات اكثر عن هذاالماجستير
انا ودي اسأل بالامارات او مصر على الاقل ديرة قريبه وما احس بغربه
اروح وارجع بسهوله

esTeKaNa يقول...

manaf
~~~~~~~~~~
حلت دنياك قول أمين
واي حسيت روحي بيبي عمرها 23 سنه
:))
يا بختك اذا التاريخ عاد نفسه
شرايك بالثقه؟
عسى ربي يبلغك بلين متخرجة من الجامعه وعروس وباحسن المراتب ومبيضه ويهك ومفرحتك بكل شي







شيما
~~~~~~
أمين يزاج الله خير
والله يحفظ لج اهلج وكل احبابج
شكرا على المرور الجميل
والله يعيني على الميد
:))

عيون الحب يقول...

اذا نفسج صدق مفتوح للكتابه ..
فأنا رايي من راي صديقتج ..

اما عن شو تسوين ..
والله احيانا انا نفسي اعجز عن تخطيط حياتي .. فـ صعب اعطيج اقتراحات ..

شوفي انتي شو في خاطرج ودام الوقت الحين يسعفج سويه ..

بس عيلتج كثير كوول حبيتهم من قلب والله ..

بس لو مكانج راسي بيفتر كل احد فيهم يقول شغله .. لول ..

الله يخليهم لج ويخليج لهم :)

bin3li يقول...

امممم

أنتي تبغين نظام البحث و تروحين بين فترة و الثانية للجامعة تناقشين رسالة الماجستير

ما أعتقد عندنا هذا النظام
النظام إللي أعرفه بالجامعات عندنا نظام فصول و تاخذين مواد و لازم حضور حصتين بالأسبوع

إذا تبغين هالنظام أنصحج تروحين بريطانيا إذا لقيتي الجامعة المناسبة

بس إذا عندج استعداد تقعدين سنتين إلى 3 سنوات في الإمارات و بتخصص في مجال الإدارة هذه الجامعات إللي انصحج فيهم

النظام الامريكي 3 سنوات

أمريكية الشارقة
AUS


أمريكية دبي

href="http://www.aud.edu/Academic_Programs/graduate.asp">AUD


النظام الأوروبي سنتين
ولونغونغ

هذه فرع لجامعة استرالية في دبي

عندنا بعد فر جامعة السوربون في أبوظبي بس بعدها ما بدت الدراسة فيها، فما عرف شو الوضع وياها
جامعة السوربون

مصر ما عندي أدنى فكرة عنها

محـــــارة يقول...

مع احترامي لجدتج .. اكثر ما يعجبني بالبنت ثقافتها مع جمال وأنوثه تصير كيكه .. يمكن برأيي مادري عن الخواشن :)

أقترح عليج :)

1. لا تقطعين عن الكتابة والبوستات لأن هالشيء مو بكيفج مع احترامي لج أحنا مانقدر نستغني يصير فينا كسل وخمول مع قل الكافيين .. فاهتمي فينا وغرقينا بالبوستات

2. عجبتني اقتراحاتج واااايد استغلي وقتج خاصه بعد تخرج بشيء أنت تستمتعين فيه .. يمكن فكرة الدراسات العليا حلوه وااايد بس إذا مستصعبتها خليها عنج وفكرة تكتبين رواية او كتاب بمجال معين حلوه حيل وصدقيني أنت قادره تبارك الله عندج أسلوب قمة والجيل اليديد يبي يقرأ قلم بعمرهم .. شوفي رواية بنات الرياض أنجحت لأن الأسلوب بسيط وسلسل وأنتي قادره بإذن الله تكتبين افضل منه بس بلشي

أشوف أن لا تعبين نفسج بالتفكير سوي الي يعجبج وبهدوء ولا تستعيلين .. إحساس التخرج قمة ونصيحه شيل المنبه عنج أنا لي يومج ما استخدم الساعه العاديه عقب الثنويه صرت أكرهها واستخدم بالدوام ولصلاة منبه الموبايل بس إحساس أنج عصفور طاير حر عجيب تلذذي فيه

الدوام تركلسي لما تحصلين على شيء حلو دام حاسه نفسج تبين تدرسين توفل ودوراة مختلفه سويها قبل وعقبها أشتغلي ومعاها أستغلي موهبتج بتأليف كتاب

أتمنالج كل الخير لأنج تستاهلينه والله يوفقج وسامحيني على الإطاله حبيبتي

7osen يقول...

بوست ممتع كالعاده

أحلى شيء هالوقت أو هالإجازة
واحسن شي انج تستمتعين فيها لأخر درجه

سوي اللى تبينه
وتفكيرج انج تحفظين القرأن وتجودينه أحييج عليه من أعماقي

وبالفعل المستقبل يحتاج تخطيط وتفكير عميق وقرار واحد فقط


أنا عجبتني الفقرة الأخيرة إنج تكتبين شيء عن واقع الحياة الصراحه أنا أأيد هالشي امية بالأمية

لأن اسلوبج وايد ممتع وااايد يشد اللى يقرا

بس أهم شيء تطلعينا على كتاباتج على شان نستمتع

واذا حبيتي تنزلين كتاب انا اول واحد راح اشتريه

:))


وبالتوفيق إن شاء الله

esTeKaNa يقول...

عيون الحب
~~~~~~~~~~
هلا بالحب كله
وفعلا انا مفتر راسي وياهم
:)
حبتج العافيه وانتي اختي فاهلي اهلج
تعالي الكويت وحياج الله يوم واحد ويفتر راسج وياي
:pP~







bin3Li
~~~~~~~~~~
نظام البحث اللي اقدر فيه اروح وارجع موجود في مصر بعد
بس انته الحين اوحيتي لي بفكرة ثانيه
كافي شكرا؟
ما اظن يكفيك الشكر
الله يوفقك يا بن علي بكل شي
:)









ّّّّّّّّّّّّّمحاااااره
~~~~~~~~~~
هلا بأخيتي اللي
خلتني طول اليل افكر في البوست اللي كاتبته
:)
وتصدقين صديقتي ضربت لي مثال ببنات الرياض،ما يندرا والله كل شي جايز
ولا توصيني بالاهتمام
الله يعينكم على شهيتي المفتوحة للكتابه



وعجبتني الكيكة المثقفه
راح يكون طموحي اكون هذي الكيكة
:))






















7osen
~~~~~~~~~~~
اهم شي انه الكتاب مجرد فكره
واول نسخة والثالثه انحجزو
قول امين
عساني ما انحرم منكم يا اغلى اخوان
يعني فعلا دعم نفسي ومعنوي
واذا ربي كتب وحقق حلمي
انتو النسخ هديه لكم
وااااااااااي حسين
ليش تخلوني اعيش احلامي الورديه؟
:)))

عبدالرحمن يقول...

اختي العزيزة

تهقه الحلم ممكن يصير واقع؟؟

لا تحلمين لان الاحلام غالبا ماتكون امنيات وخيالات وامور صعبه التحقيق وحتى النفس لا تفقد الهمه لتحقيقها

حطي اهداف مو احلام الهدف كلمه اقرب للتحقيق وتركزين اكثر فيها من حلم

الامكانات موجوده قلم ومجموعه من الاوراق وخيال استكانه الجميل المبدع

يعني مو محتاجه غير فكره وتحديد اهداف المشروع وكتابتج لكلمه بسم الله في الصفحه الاولى توكلي على الله ولا تنسين نسختي :)

محـــــارة يقول...

هلا وغلى فيج .. يا حظنا أحنا محضرين الشوكة والسجين وقاعدين مع الأطباق ننتظر شنو راح تقدمين بس إن طولتي لا تلومينا شراح نسوي

وحبيبتي ماتفكرين بشيء يزعجج إن شاء الله :) ماكو إلا كل الخير الحمد لله ربي وهبنا شغلات ماتنوصف وهالسالفة سحابة صيف ولو مامرت علينا جان دورنا عليها

وسوري على الإطاله بس شسوي فيج أحبج وأنا ماعرفت منج إلا هالكلمات شلون لو بقابلج مادري شفيني عليج يا إستكانه الله يعينج

الحارث بن همّام يقول...

اقترح تفتحين مطعم جباتي وقِيمة .. لأنه هبّه هاليومين .. تركي عنج الدراسة والخرابيط :) ..

تعلمت من واحد حكمة غالية جداً .. يقول : ثلاث قرارات في حياتك محد يتدخل فيهم ..حتى امك وابوك ...!!
الكلية .. والزواج .. والوظيفة ..

اللي يجيني ويفتيلي بهالشغلات الثلاثة .. أقوله يعطيك العافية وكثرالله خيرك .. والقرار بالنهاية لي ..

على أي حال ..
اغبطج على الروح الجميلة بين عائلتج الكريمة ..
شي جميل ان يكون لج هدف سامي مثل تعلم الفقه ومراجعة القرآن .. تبقى العزيمة والهمّة العالية هي اللي تحقق هذي الأهداف .. بالتوفيق

What Will Be , Will Be .. يقول...

مممممم

كل اللي مشتطين لج
لازم يعطونج راس مال محترم
تسوين فيه مشروع صغير
وتكونين نفسج
فيه

شراااااااايج

;)

esTeKaNa يقول...

عبدالرحمن
ّ~~~~~~~~~
تحويل الحلم الى هدف
ورسم الخطوات للوصول اليه وتحقيقه
امر يحتاج قوة وارده وايمان وتوكل
شكرا من قلبي على كل كلمه كتبتها
اعتبرني انا النسخة الاصليه وها انا اكتب لكم في يوم وترك كل تفاصيلي
:)








محاره
~~~~~~~~
أحبك الذي أحببتيني فيه
وجمعنا الرحمن تحت عرشه وظللنا بظله برقي اخوتتنا قولي آمييين
:))
محضره شوكة وسجين؟
انتي ناطرة كيكة ولا ستيك
:pP~
افا عليج يا الغاليه
لا تتعذرين على شي
ربج اعلم شكثر انا اقدر واجب وجودج واتحرى كل كلمة منج
:))






الحارث بن همام
~~~~~~~~~~~~~~~~~~
حيالله الجارث بن همام
وشنو هالاقتراح القيم الجدير بالدراسه والاهتمام؟
قيمة عاد الله يزيد النعمه
!!
يعني اتوكل على الله؟
:))
الزواج
والوظيفه والكليه
اهم ثلاث قرارات
نحتاج المشورة ويبقى القرار شخصي

شكرا لمرورك اخي الكريم







what will be....
~~~~~~~~~~~~~~~~~~~~~

راي من رايج
اهم ما قصرو وياي بالهدايا
بس هذا ما يمنع من راس مال حق مشروعي
اي شيشتيني حق الزواره اليايه
"))

charisma يقول...

يا عوينتى
وانت تتفرجين ههههههه
على خططج المستقبليه
والله شى جميل

على الاقل يعطونج افكار
:))

ما عليج من احد وانا اختج
انتى شتبين
الى تبينه انتى سويه
ولاحقه على الشقا والشغل
هالفتره اذكر انا قضيتها بدورات
وايد استفدت
على ما يا قبولى
اذكر قعدت 8 اشهر بعد التخرج يالله توظفت

:))

الله يوفقج يا احلى استكانه
:*

خسرتني للأبد يقول...

الســـ عليكم ـــلام
هههههههههههههه
الموضوع كله بصوب وسالفة الميد بصوب
الي فهمته من كلامج ان مالج امل ادقين على المطعم ايب لج غدا :)))
فكره حلوة انج تكتبين كتاب عن الكويت
و انصحج انج تكتبين عن مرحلة الثمانينات لان هذه مرحلة انتقالية بالكويت و قليل من كتب عن هذه المرحلة
الله يوفقج

بوغازي يقول...

معظم الاقتراحات والأفكار (الجادة) التي وردت في البوست والتعليقات جيدة وبعضها ممتاز... ولكن المشكلة ليست فيما تختارين منها... لأنك في تقدريري (عارفة بالضبط شنو تبين)... ولا أنا غلطان؟؟
.
ولذلك فأنا أرى أن المشكلة الحالية التي تعانين منها هي في التخلص من فترة (الفتور الإيماني) و (الكسل الجسدي) في أسرع وقت ممكن حتى يتسنى لك أن تبدئي من جديد
.
قلناها سابقا ونكررها مرة أخرى: انتهت مرحة وهذه بداية مرحلة جديدة... ومن كانت بدايته محرقة كانت نهايته مشرقة... فحذاري من تمادي فترة الفتور والكسل... لأنها إذا تمادت امتدت إلى ما لا نهاية... وأنت تستحقين افضل من ذلك بكثير
.
سلميلي على يدتج وبوسي راسها... ولكن إعلمي إن سحر الأنثى المثقفة دائما طاغي ولا يقاوم خاصة إن كانت صاحبة طموح بشرط أن تعرف حق زوجها وواجبها تجاه أولادها
.
تمنياتي لك بكل التوفيق
:)

esTeKaNa يقول...

كريزما
~~~~~~~~
اي والله
اشوف خطط لحياتي
وانا ساكته اقصص كيك واصب جاي
تصدقني انا كلش مو مستعيله
مو حابه الفراغه اللي انا فيها
بس احاول استمتع واهم شي عندي رمضان الياي اكون بالبيت
:))







خسرتني للأبد
~~~~~~~~~~~~~
حيالله من يانا
هذي الساعه المباركة
ايييييييييييييه فهمت الغمنده بمشكلتي ويا الميد
:)
الثمانينات انا كنت ياهل ام عناقيص
ما مداني اوعى واكتب
:))







بو غازي
~~~~~~~~~~~
حيالله بو غازي
كنت اتحرة جيتك وتعليقك
انا يا بو غازي حاطة في بالي شي
بس الصج
احس اني خايفه
!!
خايفه أجدم على شي
واقدم على مكان
او اتخذ اي خطوة واتحسف
قاعده استخير وافكر ،وكثر ما اسمع حولي اكيد انا اللي بالنهايه راح اقرر
الفتور الايماني..تأجيل حله مصيبه
قاعده احاول اتدارك الموضوع والله المستعان،والكسل شي جميل
انا مستمتعه فيه
:)
وواصل السلام ليدتي ماقصرت
وعلى فكره..أأيدك وبقوة
بالنسبه لسحر المثقفه

Broke يقول...

استكانة

انا بس ودي أعلق على النقطة الأخيرة
بما انها تخصصي

;)

اذا كانت في داخلك طاقة كتابية في أي مجال من المجالات ( شعر نثر رواية قصص ).. لا تكبتيــنها
أو تأجلينها
أو تخجلين منها
لأي سبب كان

دوني كل ما يطرأ على بالك و خاطرك

مو شرط تنشرين .. فقط
اكتبي اكتبي اكتبي

حتى لو كانت كلمة ..أو جملة

عن تجربة .. الكتابة بتدفق النهر الجارف .. تفتح لك أبواباً مغلقة .. تطل على عوالم أخرى

ZoZOta يقول...

ضحكتيني يا استكانه
سالفه كل من يبي يخطط لج على هواه
من زود المعزه
يحبونج يا استكانه
انتى محظوظه
استمتعي بهالحب
بهالمداراة
هالإحتواء

اهو مو تدخل كثر ماهو حب
والله لا يغير عليج

SolaimaN يقول...

قوه استكانه

اقترح عليج تحطين الميد بالخلاط

وتشربينه بعود

:P

****
ماشالله عليج وصفتيلي البيت جني قاعدمعاكم،بيت كويتي بحت

:)

بس لاتنسين تهتمين بنفسج وصحتج تكفين

esTeKaNa يقول...

broke
~~~~~~~~
صديقتي الجميله
شكرا على نصيحتك الرائعه
اثق بكلماتك دائما ونصائحك الذهبيه
:)







zozota
~~~~~~~~~
أمين ويزاج الله خير
عسى دوم هالضحكة نورتي المكان
:))





soLaiman
~~~~~~~~~~~
looooooooooooooooooooooool:)))
اي تطنز علي
عود ها؟
يا فرحة ابوي واخواني
شخص يديد يطنز علي وياهم
:(
لا توصي حريص
وشكرا لمرورك الحلو