الأربعاء، يونيو 20، 2007

الداده بتاعتنا:pP~

قد تكون أحيانا....سي سيد البيت
تأمر
وتنهي
وتغضب
وتستنكر
!!
وأحيانا أخرى تتقمص دور الأم
فتحرص
وتبكي
وتتصل
وتنصح
!!
عندما تشتط،تلغي دور كل من في البيت
وتبقى هي الآامر الناهي
بعد سته عشر سته،طالت وتشمخت ووصلت لتهديد السلطات العليا في البيت
.
.
.
تسأل أمي في نهايه كل نهار:
ماما شنو سوي باجر غدا؟
تمرر أمي السؤال لأبي
بعد مشاوره سريعه:
سوي مجبوس لحم
تصمت لدقائق،تتخصر ثم تعطي قرارها النهائي:
اليوم غداكم لحم ستيك باجر مجبوس لحم؟كل يوم لحم ماكو زين
باجر دياي
ان شاء الله عمتي اللي تامرين عليه بعداشوله سائلتنا؟.
.
.
.
فجأة صراخها يقطع سكون هذا البيت
تنزل من فوق غاضبه
تركض الى أمي بحماس:
مااما فلان ماكو روح مسجد نايم
قعدته قعدته ماكو قوم
!!والله انا قلبي عورني
ترد أمي بحكمه:
اهو صلى ونام ..لو ربي يفكج من اللقافه شوي
تتسع عينيها:
ماما انا ملقوفه؟
وبعد هذا الحوار تاخذ لها ثلاثه ايام زعل
!!
.
.
.
.
يسميها اخي الرقيب العتيد
وتسميها اختي ماما زينب
واسميها انا زيزي الداده بتاعتنا
.
.
.
لها معي مغامرات اخرى معي،كانت البادي غارد الشخص لي عندما اذهب لاي مكان في مراهقتي
لا انسى شكلي واهي تأمرني ان امشي اممامها،ويا ويله يا سواد ليله من يقرب مني ولو بالخطأ او يرفع عينه فيني
عندما ترد على مكالمات البيت تسأل صديقاتي:
منو انتي؟
اذا عرفت المتصله طقت سالفه معاها وقالت لها الاكو والماكو
واذا ما عرفتها ساألتها بكل ثقه:منو انتي انا ماعرف انتي نيم؟
!!
في بدايه قيادتي للسياره كانت تتصل بي في كل صباح عندما اصل للجامعه:
وصلتي جامعه؟ما سوق حيل حيل
واذا تأخرت خمس دقائق اتصلت:
وينج انتي؟وين روووح؟
!!
تسألني في أثناء دراستي للامتحانات الاخيره:
انتي ماكو واحد زين حبي؟
ابتسم واجاوبها:
لا
!!
ليش جامعه مافي واحد زين؟
اطول بالي:
لا ..كله ولد صغير صغير
تصمت :
زين صغير صغير،واجد كبير مو زين حق انتي
احقرها
تستمر
ياربي انا بنتي متى زواج؟
احقرها
انتي عرف هذا ولد مال ماما نوريه؟
اي اعرفه
اهوا امس يجي بيت انا سوي كيكة وايد زين حق اهوا انا حبي هذا ولد انتي ليش ماكو كلام بابا كلام هذا ولد سوي زواج
اطول بالي أكثر:
ما يصير بابا مال انا كلام عيب عيب
اقتراح اخر غبي:
انزين هذا حمد مال ماما بدريه،اهو زواره كلام انتي انا كله شوف انا اعرف انا بعد حبي هذا ولد
اكفخها باكبر كوشيه يمي يالله افتك منها
يكون صاديه الحركة وقاعده تلبق لي ويا هالكيك
!!
.
.
.
.
حبيبه،طيبه وحريصه واصبحت جزء من افراد اسره هذا البيت
لكن مع الوقت والميانه اللي طاحت اصبحت مزعجه
ترفض وجود اي خادمه تلغي دورها،اي خادمه لابد تكون بمنزله دونها
تغار...من اي اهتمام بغيرها
تزعل،اذا ما دارينا خاطرها ولا سألنها عنها
!!هابه تحاربنا
والأكثر من كل هذا انها ضمنت انه وجودها في البيت مهم
فطغت
وتعدت
وبدعت
تسألها أمي:
وين حطيتي تي شيرتات فلان؟
بغضب وعصبيه:
والله فوق راسي
وتمشي تاركة أمي مندهشه
!!
.
.
.
صحيت اليوم على تنهوصها ،وحقيبتها بجانبها :
انا خلاص روح ،عشان مافي يحترم حق انا وكلكم مع ماما ما يصير
اغمضت عيني وقد مللت هذه المناوشات اليوميه:
مع السلامة ،حبي عيالج واحد واحد
ترقع الباب وترحل
افتح عيني في ساعه متأخره من النهار لاجدها في المطبخ:
انا ما رحت عشان انا عرف انتي بعدين وايد قلبي عور وايد صيّح
بيت وايد مشكله اناماكو موجود
بعدين حبيت راس ماما الحين ماكو مشاكل الحمدلله
.
.
.
نعتبرهم جزء من اسرتنا،نحترم ونحبهم
ولكن مع مرور الوقت يبدعون
!!
هل مر عليكم خادمه مثل الداده بتاعتنا؟

هناك 31 تعليقًا:

بوغازي يقول...

فعلا مع الزمن يصبحون جزء من حياتنا.. جزء من البيت.. بل وحتى جزء من الأهل... ويكون لهم بحكم الزمن والتعايش اليومي وطول العشرة ما ليس لغيرهم من حقوق
.
طولو بالكم عليها... والله ياجركم... ويبلغ (الداده بتاعتكم) فيج وبزواجك وبعيالج.. قولي آآآآمين
:)))

lawyer يقول...

واااااااااااااااي

هسترررررررررررت ضحك

غشيييييييييييت غشيييييييت

حسبي الله عليج

الساعه 4 يوم الاربعااااا

الدار ظلمه مسكره الليتات بناااااااااام


غشيييييتي ضضضضضحك

طارت النومه

موتيني ضضضضضضضضضضضحك

لووووووووووووووووووووووول



يكون مظبببببببططتج بالكيييييييييييك

و تختااااااااار لج ريل بعد


مال ماما نويه

مال ماما حصصصصصه

و طايحه على الريال خزززززز بعد

هههههههههههههه


هذي خداااااامه خالتي جذي

سسسسسسسسسسسسكتي


خداااامه بيت عمي
يووووووم تزوجت بنت عمي


جان تقووووووول باخذ دارها
انا كبرت ريلي تعبت من الدري


و خدم وااااااااااااااايد

ههههههههههههههه
ههههههههههههههه


لا عجييييييييييبه


نككككككككككككككككته

حدااااااهاااااااا
هههههههههههههههههههههه



واي استكاااااااااااانه
اتخيلهااااااااااااا


حسبي الله عليييييييييييج


كانت خدامتنا جذي

بس كبرت و راحت
اذا سووووووولفت بالتلفون تحط ريدااااااايل

وراي
تشوووووووووفني من اكلم


!!!!!!!!!!

estekana يقول...

بو غازي
~~~~~~~~~
صاج والله صارت جزء من الاهل
اقولك تتشره على الناس
ووينكم وشخباركم وليش ما تزورونا؟
:)
مطولين بالنا عليها
والله يا بو غازي اني صايره استحي اطرشها ، وبعد بيني وبينك اهي عادي اذا طرشتها تزفني
وان حصل وتطرشت تعال شوفني تالي الليل اجابلها واهمزها
!!
الله ياجرني انا اللي صايره مكتب الخدمه الاجتماعيه بالبيت ويهديها قول آمين
:))








Lawyer
~~~~~~~~~~
ههههههههههههههههههههه
ملاحظة؟
واحد من عيال خالتي بارته كيك ووحلو ومجابيس طول النهار
وتحبه يا بعد قلبي
تزوج رفيجتي
اهي تحطمت
lOoOooOoOOoOOoOooOoOool:))
وأهم شي تطق ردايل بدعت
hahahahahahahahahahaha
عجايب
:)

bin3li يقول...

هيههيييهي

وحليلج، شايله همج

قوليلها أنا بصير راهبه
:P

و الله نحن عندنا خادمة تشتغل ألحين من 20 سنة، و لا ألحين هي مخالفة الإقامة بس الحمدلله صاير فيه فترة عفو هالثلاث شهور ، تسافر عقب ترجع

سالفة التحكم ،متحكمين عدل، يمشونا على العجين ما نخلبطوهوش

شوفي استكانة، عندي كلمة بقولج إياها خارج الموضوع

نحن عذرناج بالأول عشان الدراسة
ألحين مالج عذر
نبغي بوست جديد كل ست ساعات
و إذا ما قدرتي كل ست ساعات و نص
:)

a7La eNG يقول...

ليش مو قاعدة تجهزين
!!!

قلتي الساعة 6

الحين الساعة 6 الا نص

;pPp

اي اشووه طلعتي الحين شفتج

يا ربي الظلم ظلمات يوم القيامة
مي سووري

:*


زوووقة زي زي زوووقة

وينهاما ضبطت من زمان يا حظي

ياااايه على التلش
@@

انا كل ما تشيله لازم اقول لها
زينب تحبيني
؟؟
منو اكثر انا و الا نورة الثانية ؟؟

ههههههههه

يا حلووها

78o8eYa يقول...

ياختشي عليها الداده زيزي
:D

أهم شي إنها توكلكم على مزاجها ، شلون عيل مو إهي اللي بتطبخ
;P

وبعدين الله يهداج المره شاطه عمرها تطبخ بهالكيك
وتراقب لج الوضع
وانتي محّد
;Pp~ LoOoL

يحليلها والله ^__^

PearL يقول...

looooooooooool

موتيني من الضحك


حدها تينن

حدي حبيتها

اذكر كان عندنا خادمة جذي
بس شوي اهون من خدامتكم

كانت تحاسبنا عالطلعة والدخلة اكثر من الاهل


بس حدي حبيتها خدامتكم

دمها خفيف

ReLaaaX يقول...

looooooool


يحليلها بتأمن مستقبلج
وعاااااادي اكو منها وايد


أذكر وحده يبناها مع دانه وخلصت سنتينها وراحت سوي زواج على قولتها وعقب ردت وهم مادري شسالفتها المرااااااد إن عقب فترة يوم كبرت دانه شرفتنا :)))

لا وتنادينا بعد بأسامي الدلع رجالا ونساءً اللهم امي وابوي ماتدلعهم

;p

لا ومرات اكون داشه المطبخ احم احم يعني تدرين تخصص سويت فبتساعدني ونص المقادير ببطنها

لا صراحه كانت نادرة بس راحت عقب

--

قولي لما يكونون قدّم ممكن تتحملينهم بس مثل حالتنا حالياً !؟ الوضع مأساوي .. توها يديدة وملقوووووووووووووووووووووووووفة بشكل فظيييييييع

اخر موقف امس يايتني رفيجتي بنتماشى عشان نروح استقبال وحده من البنات المهم قلت لها تنزل لأن ماكنت جاهزة .. نزلتها بالسرداب وعطتها ماي لحد الحين تمام

نزلت الا اهيا بويهي تبون جاي قهوه شي ؟ قلت لها لا مشكوره خلاص روحي

لووول رحت مادري شبي الا اهيا واقفه ورا البارتشن !!!!!؟
قلت لها روحي دارج وانصدمت!!!؟

شي مهووول

salfa3ajeeba يقول...

a7la shy feha inha tirtha wi tiz3al bro7ha:)

alla i'7leeha likom ildada znooba:)

حسام بن ضرار يقول...

انا سمعت عن قصص شبيه للداد دي

هذا غير اللي يعينون زوجة السائق كخادمه منزلية و تبدي القصص عاد
الاخ السايق مقزرها تمشي و شوبتج مع زوجته الخدامه و صاير لي مكتب خدمات عامه لباقي خدم العايله و الفريج


طبعاً انا من رأيي الشخصي ان الخدم ما لازم ينعطون ويه كلش

لأنهم مو كفو رزه ولا كفو نعمه

مسرع ما يقلبون على المعزب بأقرب فرصه تسنح لهم

عبدالرحمن يقول...

تسلفونا دادتكم جم سنه احس تسوي اكشن بالبيت

لما كنا صغار ونزعل الخدم بشطانتنا كانو يشتكون للوالده اللي كانت توقف بصفهم دايما وكنت احس ان الخدامات عيالها مو احنا بس لما كبرنا وهم مرات تبط جبدي الخدامه بشغله وازعلها تروح حق الوالده تتبجبج والمشكله الاقي امي ترد عليها ببجية خخخخخخخخخخخخخخ هنيه قمنا نتوهق يعني زعل الخدامه من زعل الوالده ابتلشنا الحين مابقا الا احنا اللي نخدم الخدامات عشان مايزعلون وتزعل الوالده :)

Mishari يقول...

هههههههههههه والله مسكينة اشتغلت كل شى هذا

بس انا اقولج اذكر قبل عندنا خدامة وصبى جذى بس بعدين بعد وفاة جدتى خلاص انتهى دورهم مساكين وحدة من الخدم خذاها واحد من اهلى وكل ما تشوفينى وانا الحين شطولى تقولى مشارى انا يتذكر انت باجا صغير

يعنى عادى والمشكلة اذا سافروا ما يقدرون يقعدون بديرتهم تعودوا علينا اهنى


وحركات بعد حتى الزواج تبى تلبقج فيه :))

Fahad Al Askr يقول...

سايقنا، يدل كل مكان بس مشكلته لازم أوصف له من أقرب نقطة يعرفها، يعني المارينا من سينما السالمية (مع العلم إنها تهدمت) شرق من مواقف باصات برج التحرير، وأخذ يمين بعد اثنين اشارة ويسار بعد هذا دوار

في الآونة الأخيرة لاحظت إن السوالف معاه خلتني أتكلم كويتي هندي، يعني عادي نقاش سياسي هذا بابا علي جراح سوي جنجال كبير داخل مجلس أمة لأنه يقول إنه مستشار مال هوه بابا علي الخليفة

جربنا نعيش بدونه الصيف اللي طاف بصراحة وبدون زعل، كلينا تبن، ولا تستغربين إذا قلت لك إني في أول أسبوعين كنت أدق عليه بالهند يوميا أسئله عن بعض المواقع المهمة في الكويت مثل فرع التموين والغاز وفي بيتنا أيضا مثل القصدير والفحم لأني أشيش بالبيت طبعا

أما الخدامة، طال عمرها فأشوه البلدية ما كبست على بيتنا واهي مسافرة

بوست ممتع

Q80MINI يقول...

اهم شي انه "صغير صغير" :)



لا احنا ماعندنا خدامة جذي
خدامتنا يديدة كل ما تشوفني تطالعني وتضحك
شكيت بعمري قلت فيني شي غلط:)

وماتعرف لا عربي ولا انجليزي
اكلمها بالإشارة

3ateeja يقول...

عندناااااااااااااااااااا وعندج خيييييييييييييييييييير

مره يتني نزله معويه كتبت عنها بلبلوق يابتلي معدات النزله وبطلعتها من الدار جان تقولي ...ماكو يروح بره بنزره شوي وتلتني راشدي
قلت حاظر عمتي
راسج بس ابوسه
عسى راضيه عنا
ههههههههههههههههههه
بدددددددددددعه في كل بيت فاطمه

salfa3ajeeba يقول...

tithakkart
kan 3indina '7addama thallat tgreeban 6 years wi lithorofha mishat bs raddat ba3ad cham sina tishtigil fe beet thani wi daggat wi zaratni, ili athkirah inha kant chnha wa7da min ilbeet biilithafah ila thlik inha kant it7ib o'3niyat "mashkora" 7ag foad salim wi 7ita lamma safart '7athat ilsharee6 ma3aha:)

عــــاشــــه يقول...

وحليلها

مسويتلكم حس في البيت

نحن كانت عندنا مصريه دايه من نحن صغار لين الثانويه وبعدين خلاص خرفت وراحت بلادها وتوفت
بس بعد معاها كنا مثل العايله
والحين حق بنتي أريدلها نفس الشي
كانت فلبينيه عشر سنين
بس مثل ماقلتي كل مايبطون كل مايتعنترون

بتروح عنا هالإسبوع

وبييب وحده ثانيه وكان ودي بعربيه لكن القوانين ماتسمح

بس والله كانت دايتنا وايد تراعينا وبالذات في فتره المراهقه
ماشي ريلها على ريلنا ماكنا نقدر نشم هوا
ههههههههههههه
الله يرحمها ويغمد روحها الجنه علمتنا الصلاه والمذهب والسنع

تسلمين على هالبوست الحلو

esTeKaNa يقول...

bin3Li
~~~~~~~~
hahahahahaha:))
اي والله راهبه
والبس الابيض اللي يلبسونه
وافتح لي دريشه صغيرونه
ويطلون علي اصحاب الاعترافات الخطيره
:pP~
ما شااااااء الله عشرين سنه؟
لازم يعطونها جنسيه صراحة مو بس عفو
الله يخليها ذخر لكم ولا يحرمكم منها
!!
اوخ ست ساعات ونصف؟
من وين ايب الحجي من وين؟
:))







a7La_eNg
~~~~~~~~~~
هههههههههههههههههههه
اي والله على التلش
!!
اشوة انج معاصرتها من عمر
وتعرفينها عدل
:))
ترا تسلم ايد اللي مسوي الملفوف امس
لي بليل وانا اتنطع فيه ياز لي
مرة ثانيه لا تسون لي اكل لذيذ
مابي اكل وايد كلش مو وقته
:pP~







حقوقيه
~~~~~~~~~
hahahahahahahaha:))
لاحظتي انها تراقب لي الوضع؟
يعني عادي جدااا جدااا اذا بالزواره احد يسولف وياي اهي تغمز لي جدام ل الناس
يعني ترا موجوده انا ومسيطرة على الوضع...ويه الويه فشلتني
:pP~






pearL
~~~~~~~
حيالله اللولو
حبتج العافيه ما قصرتي
والله ودي اتنقص لج واحده مثلها
بس اظنتي اللي مثلها انقرضو خلاص
:)))






ReLaaax
~~~~~~~~~
وي ذكرتني على سالفه الحلو
تخيلي لما ادش الطبخ تحوس وراي:
مسكين هذا هازبند مال انتي بس ياكل حلو لما يطن مال اهو يعوره
!!
مشكله حرمة كبير ماعرف وين شكر وين طحين!!
لا تفتحين الجوله بعد حرق انتي ايد انتي بنت صغير
وتخيلي..تكرف تكرف قلبي لما احذف كل شي واطلع:(

بس ترا هذي اللي واقفه وراالبارتشن عجبه،عطيها خزة ام صخر ختخاف منج ولا تعودها بعد
!!






saLfa3jeeba
~~~~~~~~~~~~~
اي وعليه عليها حبيبتي
قلبها طيب طالعه علي انا صدقيني
:pP~






حسام بن ضرار
~~~~~~~~~~~~~~~
حيالله حسام..تو ما نور المكان
لا عاد حرام مو كلهم
خدامتنا يشفع لها حرصها على البيت واحساسها بالمسؤليه عن كل شي
يعني بعضهم يبين فيهم الطيب
وبعضهم يقلبون اللهم يا كافي
!!





عبدالرحمن
~~~~~~~~
نسلفها جم سنه؟
لا لا ما نستغني عنها اسبوع
اشلونب عدين يصير البيت هادي
:pP~
اييي يا زين ام عبدالرحمن
ذكرتني بيدتي الله يحفظها
والله يا عبدالرحمن اذا نادينا الخدامه بنطرشها زفتنا:
بنات صغار تطرشون مرة شكبرها
!!
ما تستحون على ويوهكم؟
غير انه السايق تقص خام دشداشه نفس خالي،وتلفزيون وفيديو
على قوله ولد خالي الواحد مرات وده يصير سايق عند ماما عايشه
:)))





مشاري
~~~~~~~~~
ياهلا ويا مرحبا
اهو بس زواج؟
لو عليها تبي تلبق لي كل شي يا بعد قلبي قلبها
!!
وترا احنا قايلين بنخيلها عندنا تربي عيالنا بعد،شيردها ديرتها بس
اهي ما تعبر تروح
:))
ويا كره الخدم وانته داش كاشخ ومتشط يتذكرون لك اشيا تفشل في الماضي السحيق
:pP~











فهد العسكر
~~~~~~~~~~~~~
حيالله فهد العسكر والله
هذي الساعه المباركة

hahahahahahahaha:)))
والله هذا سايقكم شي عجيب مشالله
نحتاج تحط رقمة بالبلوق يعني سبحان الله واحدة منا تضيع تتصل عليه
بس مادري ليش عنده نقطة بدايه لازم يدل منها
!!
لا كنز ديرو بالكم عليه
وصج ترا ما نحس بقيمتهم الا اذا راحو واعتفسنا من غير شر
:)






q80mini
~~~~~~~~~~
لاحظت صغير صغير؟
اقولها كلمات متقاطعه
عشان تفهم مالي خلق اتكلم
ومع هذا تسأل وتستمر
!!
تطالعك وتبتسم؟
مممممممممم
عسى مو معجبه فيك
دير بالك:)
ياربي ليش ايبون لنا خدم ما يفهمون ولا لغه؟وتعال شوف الاشارات عشان نفهمهم:
مااااي..وتأشر انك قاعد تشرب
بيض...وتقلد صوت الديايه وشكل البيضه
وبعدين؟
والله اشكالنا تضحك :)))









3ateeja
~~~~~~~~~~
لوووووووووووووووووووووووووووول
:)))
اييييي اهم شي النزرة
البارحة تأخرت شوي وانا راده من بيت احلى انجنير
وصلت البيت فجت الباب عطتني خزه:
عيب عيب بنيه صغير يجي بيت الحين
انا مابي كلام الحين بعدين بعدين
!!!
يعني مهددتني بعد
hehehehehe







saLfa3jeeba
~~~~~~~~~~~~~~
hahahahahahahaha:)))
يا حيللها بعد منقيه اغنيه
:pP~
لا احنا خدامتنا تحب رويشد وراشد الماجد
تقولي ذاك اليوم راشد صار كبيييير
وشعره وايد خفيف
ليش ما يحط حل ناريل
زيت زيتون

يعني تتطنز
looooooooooooooooooooool






عاشه
~~~~~~~
اللهم أمييين
قبل سنوات كان وايد في عربيات في بيوتنا
بس الحين احنا بعد مو مسموح عندنا
مع انه عربيه ومسلمة اضمن حق بيتج وعيالج
الله يرزقج بواحده زينه تبرد قلبج وتعينج على بيتج يا عاشه
وحياج الله
:))

loyalty يقول...

هههههههههههههههه !!
الله يخليها لكم و يخليكم لها ، بس إذا عندها أخت نفس نمونتها طرشيها علي ;)

charisma يقول...

هههههههههههههههههه
لووووووووووووووووووول
عجييبه عجيبه الداداه بتعتكم
:)))))
اهم شى اضبطج تبى ازوجج استكانه لووووووووووول

لا ست بيت ممتازه هذى
:)))

وازف بعد
اتينن وايد حبيتها
اكيد هنديه ؟؟

قاعدا انطر الصلاة واطق رووس فينى النووووم
من قريت بوستج شترت
لول
ما قصرتاى
ههههههههه

ray يقول...

:P funny

Mamloo7a Q8ia يقول...

ههههههههههههه
عجيبة هالدادة

بنت عمتي عندهم وحدة مثلها
هي المعزبة والقرارات بإيدها

بس تصدقين وجودهم حلو وايد بالبيت

ZoZOta يقول...

لووووول

والله يا استكانه مارحتى بعيد عن ميري اللي عندنا
رايحه راده تقول لي
جين وتقصد فيها الزين
انت ليش ما ياكل
كلش مو هلو
لازم سير موتين
مشان زوج يجي سورأه
جنى طايحه بجبدها
غير التزغط اللي ماله والي

واذا كنت سهرانه
جين انت ليش مافي نوم
بكره وش مال انت مو حلو

يعني تحاتيني اكثر من امي
بس تدرين
هذا من زود محبتهم لنا
وبهالزمن ماتلقين مثلهم
ترا خلصوا

mtfa2el يقول...

لا لا هذي ابدااع
و الله فلم هذي
لا بس اذكر غعند خالي وحدة سيلانية نفس نوعية هذي
كانت تزفني اذا شربت حليب مرتين
و اذا خذيت ككاو قبل الغدا خطر تقوم القيامة عندها
و اذا لعبنا كرة ياويلي اقرب يم البيت الا مغسل ريولي
و من هالحنة و الحوسة !!!

Яeema يقول...

عندنا بالبيت لأ

بس عند خالتي إللي عايشه وياها إ‘يييي

لاحقه عليها من يوم عمري 9 سنين

إذا تهاوشت وياها و عصبت تقوللي
أقووول حق بابا ما إنتي

هاهاهاهاهاها

إتحب أبوي

أشونه عندي واسطه

بس صكت الستين و إستغنوا عن خدماتها

إهيا ما تبي مرضا وايد

مرة رافعه السجينه علي الطباخ إللي بالبيت

هاهاهاها
وااااااااي مواقف وايد أصلا

Nescafé يقول...

هههههه
!!لالا شي موطبيعي

ياكرههم لي صارو ملاقيف
تخيلي يا استكانه عندنا وحده الحين لقافتها موطبيعيه تغثني ومنرفزه الكل بالبيت بهاللقافه والاسئله اللي مالها داعي.. كللللل شي تعرفه حتى اللي نتساسر فيه علشان ما تسمعنا تعرفه بعدين ماادري شلون
!!

والله يا ان كلامها ولقافتها واسألتها تبهرني ساعات.. تلقيني مبطله حلجي ومجابلتها مو مستوعبه انها تتحجى بشغلات تخصنا حيللللل وعاده نفسها وحده من العايله

شي موطبيعي

Nescafé يقول...

اي في موقف ظروري اقوله .. بنيه متقدم لها واحد وياي بيتهم مع اهله يشوفها ... المهم الاخ اول مادش
الا اهي طايره حق البنت .. تقولها فلانه لالالا اهوا مايصلح لج الولد قصير عليج
!!!!!!!!!
hehehe

وانتي شكو !! شاللقافه رايحه طاله من الدريشه قبل لايدش الريال لييييششششش

بس الحمدلله ياااربي انها موخدامتنا ولاجان زنطتها ;P

The Voice Within يقول...

zain ashwa ya3ni 6la3at el salfa '6ahira 9i7iya :p

3ala salfat el '3ada a9lan mino ygol ina itshawir a7ad bil'3ada ?

'7o twakilna 3ala kaifha, la oo kil wa7id etsawila el shai ili yakla ykon mra3ya sh3orna :s


o salfat et'6b6 wetdilil mako a7san minhom :S wala eyozon

la izaf yinfa3 wala il tinizr :P

wala lo 3alai chan 3ala awal 6ayara ray7a silan :s

ishakwa lallaaaaaaaah !



el post shagagi

yislamo ;)



ps

@@

nescafe @@

ana sam3a hal salfa bs ween allaho a3lam :P

SolaimaN يقول...

طبعا مامر علي مثلها...!؟

يا دافع البلا يا رب

اللي معاها بالبيت لازم تمشيلهم

علاوة خطر

;)

esTeKaNa يقول...

loyatly
~~~~~~~~~
hahahaha:)
جربنا نيب حق خالتي واحده تصير لها
تصدقين طلعت مومثلها
نادرة اسم الله عليها
:)






charissma
~~~~~~~~~~~~
اي مو بس داده
تقدر تصير خطابه
اسم الله عليها متعدده الأغراض
:pP~
اي والله هنديه من قوا
:)





ray
~~~~~~
حياج الله
:)







مملوحه كويتيه
~~~~~~~~~~~~~~~~
هلا بالملح والسنع كله
:)
صج في مثلها؟
اهم فصيه نادره بس موجوده للحين
وجودها حلو بالبيت بس مرات
يعفس البيت
:pP~






zozota
~~~~~~~~~
hehehehe:))
اهم شي فيهم انه غير الخدمات المنزليه
تقدر تصير لج خبيرة تجميل وتعرف كل شي
!!
الله يخليهم ذخر بس
:pP~








متفائل
~~~~~~~~~
LOOOOOOOOOOOOOOOOOOOOOOOL:))
يا حلوها
اهم شي القوانين
جنها اللي عندي يا حليلهم
:)
نورت المكان وحليته بالتفائل
حياك الله







Reeeema
~~~~~~~~~~
hehehehehe:))
يا حليلها
!!
جنه وام عيال وتبي تفتحن عليج عند ابوج؟
صج ضحكتني:)
بس شكلها شرسه سجينه مرة واحده
!!







nescafe
~~~~~~~~~~
لا هذي خدامتكم بلقو عليها العين الحمرة
حتى ريلاكس بعد روحي متضايقه منها
!!
بس صراحة الموقف عجيب
لوووووووووووووووووووووول
بدعت بدعت
!!
احنا اللي عندنا تصي بوضع مو طبيعي
يختج تفشلني
جني طايحة بجبدها اهي
:p~







The voice within
~~~~~~~~~~~~~~~~~~
اهي على النزرة ودج تذبحينها
بس يختج يشفع لها اشيا اخرى
:))
حياج الله






سليمان
~~~~~~~~~~~
hahahahahahaha:))
يازت لي علاوة الخطر هذي
!!
لا حرام ترا حبيّبه وطيبه
وطايرة فينا
ولو انها تخورة مرات

غير معرف يقول...

بوست جميل :)