الاثنين، يونيو 04، 2007

فراشه

كفراشه تطير برقه
تحلق عاليا
تحملها فرحتها
ويتراقص الشوق في عينيها
ينطق احساسها قبل كلماتها
ويرسم الحب فرحة تنعكس في عينيها
.
.
.
افتقدته...افتقدت جنونه وهدؤه
افتقدت ملاح الطفوله في رجولته
افتقدت ازعاجه
مباغته ابتساماته في لحظات غضبه
افتقدت مناوشات الحب معه
كره وفره..رضاءه وزعله
افتقدت اللحظات التي يميزها وجوده
حسه
ونوره
.
.
.
.
يعود
.
.
وترتمي في حضن الفرح
تستقبله بشوق ومرح
وتستحث الكلام منه والبوح
يفضحها احساسها بكلمات اخجلت رقه وحياء الأنثى فيها:
!!تدري؟
هالكوووووون يظلم من دونك بعييني
تدري؟
انا شوقي قتل صبري
واحس كل هالدنيا هي عينك
تدري؟
انا فرحتي يوم انك تلّون بوجودك ايامي
واحس الفرحة ما تكمل،الا بوجودك جدامي
!!
.
.
.
يسمع دون اهتمام
وينظر لشئ ما وراء عينيها
صمت يتخلله الصمت،وكلمات خاويه من الاحساس يفاجئها فيها
يبتسم ببرود ويشكرها على كلماتها ويرحل
ببرود يقتل اللهفه ،وتدمع معه الكلمة
.
.
يحترق فتيل الشوق فيها
ويتطاير رماد من الاحساس حولها
ركود وملل يتسرب للمكان
ونسيم من هواء بارد يأن فيها
ترتجف دمعه في اطراف رمش عينها
وتختلط مع كسرة احساسها سواد كحل زينت به عينها
.
.
.
هو...ينام قرير العين
ووهي....تنام محتضنه شفقتها على نفسها
تلوم الحب الذي انطق احساسها له
وتحارب النفس التي..لا تهفو شوقا الا له
!!كبرياءها يعاتبها واحساسها كطفل يناظر بوسع عينيه موقفها
.
.
.
حبه لها يقين تؤمن فيه كما تؤمن بضرورة وجوده
ولكن..هناك سؤال يعجز احساسها عن ترتيب صيغته؟
لما لا يستغل لحظات الصفاء والاستقرار مابينهم ليفرحها ؟
ولما يطلب اهتمامها الدائم ولا يقدره
لما يريدها ان تتقلب كتقلبات مزاجه المجنون
؟؟
ولما ينظر تلك اللحظات الحديه
التي يكون جرحه لها عظيم
وانتفاضه الغضب فيها كبيرة؟
لما ينتظر انفجارها الحتمي
وبعدها الذي يكون وشيكا
لترتجف كلماته ويبوح بصدق:
بضياعه دون عينيها
وبقوته المستمده من حنان قلبها
وبأنه مهما غاب ورحل عنها ،يظل قلبها هو الوطن الذي يحن ويهفو اليه
.
.
.
.
قد يعود الاحساس فيه في لحظة مسروقه من الزمن
يعود في الوقت الضايع ،يحتضنها بشوق
ولكن...
حينها
قد تكون فقدت الطفله في داخلها
وتسلل الشيب لمشاعرها
قد تبهت الألوان في عينيها،ويتساوى نور النهار بظلمه ليلها
قد تكون في لحظتها فقدت حاسه التذوق لكلماته
وفقدت بريق الفرحة بوجوده.
.
.
.
حينها..تكون قد تراضت مع نفسها
تصالحت مع مشاعرها
هجرت انتظاره
وفكت الارتباط مابين فرحتها ووجوده
تتعلم منه اعتياد الحب
ووأد الاهتمام
وبرود الاحساس
ويطيب كل ما في خاطرها منه
يتسلل لها البرود
وتعامله كما يعاملها هو
.
.
وبعدها يسألها بخوف:
اشفيج متغيره؟
.
.
.
طاب الخاطر
!!
ويعاود حينها هو الكره
:)

هناك 25 تعليقًا:

عيون الحب يقول...

ما اصدق انا اول رد ؟؟
بصراحة كلمات خلتني اتخيل الموقف واعيشه ..
واتصور حالة هالمكسينه ..
::
::
صدقتي كثير من تصبهم هالحاله هذه الايام ..
الله لا يبليني ولا يبليج فيها ..
وهالشي مشكلة خاصة للناس الرومانسية شراتي ..
عادي اروح فيها والله :(
::
::
كتبتي فأبدعتي :)

ReLaaaX يقول...

ان شالله مايطول هالجفا اللي بينهم ويردون حلوين أمامير



:)

esTeKaNa يقول...

عيون الحب
~~~~~~~~~~~
يا زين اول رد وصاحبته
:)
فعلا...هالاحساس ما يصيب اي شخص
فقط من يرى ان لاحساسه قيمة
وان كل كلماته نابعه من تفكير مسبق وعميق


شكرا لمرورك الجميل






reLaaax
~~~~~~~~~~
هذي لعبه وانا اخيتج
كر وفر
!!
اذا جفت صار اهو رومانسي وطيب
واذا صارت رومانسيه تعسر عليها
شالحل بوجهه نظرج اللي اثق فيها واحبها بكل بوست؟

bin3li يقول...

يا بنت الناس سيري ذاكري

تراج لاعبه باعصابنا و يالسين نعد كم يوم باقي عشان عقبها نعرف نسولف على راحتنا بدون تأنيب ضمير

:)

بس بوست رومانسي ، صار لنا زمن ما قرينا من هالنوعية
;)

شوفي ، أنا ياي شكاي

قمت أتحجا كويتي من دون ما أحس
فااا، البوست الياي يا ريت تكتبنه باللهجة الإماراتية
:P

تقدرين تستعينين بمعجم اشحفان أو بصديق

bin3li يقول...

أنتي و أحلي و انجير اشفيكم على الكر و الفر؟


امممم، هذا كله من لوير

هذا تأثير بوست السلم و الثعبان لا محالة

:P

بوغازي يقول...

إن كان يريد لنفسه الاستمتاع باهتمام الآخر، ولا يعنيه أن يُمَتعَ الآخر باهتمامه... فهذه أنانية، ولا أعرف كيف يمكن للأنانية أن تجتمع مع الحب
.
وقد يكون محبا فعلا... ولكنه لا يحسن التعبير عن مشاعره... وهو يغطي ضعف قدرته على التعبير بالتعالي على هذه المشاعر الجميلة... وهذا النوع من الرجال مسكين ومحروم... مسكين لأن مشاعره ظلت حبيسه في نفسه لم تتحرر من قيد كبرياء الرجل الشرقي وغروره، ومحروم لأنه حُرمَ لذة التعبير عن هذه المشاعر، ولذة إمتاع الحبيب بها... وهو من قبل ومن بعد لا يدرك بأنه يمارس عملية اغتيال لأحاسيس الطرف الآخر من حيث لا يعلم
.
الحل في تقديري إجراء عملية مكاشفة وحوار سريعة وعاجلة بين الطرفين لإستعراض المشكلة وكشف أسبابها وبيان مخاطرها على المدى القريب والبعيد.. ووضع الحلو المناسبة لإنهائها
.
خخخخخخخخخخخخخخوش بوست... معبر ومؤثر ويجسد واقع الكثير من الحالات
.
بس الله يرضى عليج خلي عنج هالحجي الحين.. وديري بالج على دراستك وامتحاناتج... ولاحقة على الهذرة والسوالف (مع إني أدري إن السوالف والهذرة ما تحلى إلا وقت الامتحانات)ا
:)
موفقة بإذن الله

Ace يقول...

ياقلبي عليها
:(

أهو غلطان يسوي فيها جذيه
الله يهديه، بعد الواحد شيقول

وياما ناس صبروا صبروا ونالوا. الحياة تغير، يمكن تغير من هالجفا اللي فيه

ReLaaaX يقول...

مرات نضطر ان احنا نتنازل شوي .. بس مو دااااااايماً يكون التنازل من طرفنا



يعني يكون مشترك هذي نقطة مهمه



بالاضافة إلى التغاظي عشان تستمر الحياة



--



النقطة الثانية



جلسة صراحـــة .. موشرط يوم كامل .. بس ساعة او ساعتين كافية إن كل واحد يفضفض حق الثاني باللي يحس فيه





مع استغلال الوقت المناسب للحوار او جلسة الصراحه


--


نقطة أخيرة



التركيز على الايجااااااابياااااااات والمحااااااااسن




وقلت في النقطة الاولى التغاظي




وبالنسبة للسلبيات حلها بيكون بالنقطة الثانية




--



فيه قصيدة حلوة اذكر من كلماتها




ومن ذا الذي ترضى سجاياه كلها

كفى المرء نبلا أن تعد معايبه




أكيد مافيه أحد خالي من العيوب .. ويقول حبيبي صلى الله عليه وسلم بما معنى الحديث


وهم ماكو شخص متروس عيوب ومافيه ولا ميزه !؟




فيبيلنا شوي نركز على المحاسن .. ونحسب حساب ان مافيه شخص كامل ولأننا بشر معرضين للنقص


وماني مكلفه إني اعد مساوئ غيري .. الاولى أشوف مساوئي لأن بتحاسب عليها :)




جنج قرقتج ;p

ReLaaaX يقول...

وي الحمدلله والشكر نسيت معنى الحديث




ان الواحد ان شاف شي يبغضه من مرته المفروض يشوف محاسنها



(إن كره منها خلقاً رضي منها خلقاً آخر)



:)

QiYaDiYa يقول...

اكره شي بالعالم ..

لما الانسان يكون ولهان على شخص و يدقره !!

احس تتبخر المشاعر كلها !!

و بعدين انا بتحيز للمرا و اقول انه الريال غلطان المفروض ما يجرح مشاعرها جذي !

و اهي المره الثانية صدته الا و هي ردة فعل على حركته .. اهو الي بدا ;p

بالنهاية .. يبقى الحب مهما صار ;)


----------------

قلوبنا معاج موفقه ياا رب ;*

Ace يقول...

سوري يااستكانة جاني ثقلت عليك بالفريكونت فيزيتس، بس أنا أتساءل: هل الكلام بصراحة معه فعلا بيحل المشكلة؟ إيتروالي أهو عارف إن البرود اللي فيه يجرحها، يعني هالمصارحة ممكن ماتفيد مثل مانحن نظن

أســــــــاساً لازم هو يكون عنده عزيمة إنه يغير من هالطبع، وطبعا هالشي يعتمد على طبيعة هالإنسان وماإذا كان يتقبل النقد أولا، وثانيا يعتمد على نظرته واستيعابه لأهمية تحسين سلوكه (يعني سؤاله "شفيك متغيرة؟" يدل على إنه مو مستوعب اشكثر سلوكه مؤثر على هالمسكينة!!!)ـ

3teej يقول...

"وهي...تنام محتضنه شفقتها على نفسها"

ماشاءالله تعبير جدا جميل. بشري خلصتي امتحانات؟

TReSTeN يقول...

في مثل يقول القط يحب خناقه

وهذا المثل واقعي امية بالامية

وصراحج كلامج رائع ومعبر عن بشكل دقييق

عن تفاصيل حياة الكثير

فعلا هذا الواقع الي يعيشه الكثير من الناس

نقلتييه بصوورة رائعة اهنييج علييها


بس عجبني تقلبات مزاجه المجنون

لاني بصراحة اعاني من هالشي بشدة

وفعلا كلامج راائع

bin3li يقول...

أنا الصراحة أحتج

ليش كل هالتحامل على الريال من قبل البعض؟

إللي كتبتيه وجه نظر البنت
ما سمعنا من الطرف الآخر

يمكن يكون خوش آدامي و حساس و شحليله
و له أسبابه إللي تخليه يتصرف بهالطريقة

مثل ما كتبتي موقف البنت
تقمصي شخصية الريال و شوفي شو راح يطلع معاج
يمكن تطلع حنانة و ناكرة جميل

يمكن وحدة تتشرط و تتكلف

يمكن على أدنات الدون تعايره بالذي مضى، و اصله و فصله و مستواه المعيشي
:P

يمكن أخوها شافهم مرة و متحلف يقطعه ستين قطعة لو عرف أنه ما زال على علاقة فيها

يمكن أبوه حالف يتبرى منه و يحرمه من الميراث إذا تزوج هالبنت

يمكن أمه هددت تشرب تتن إذا لزم ياخذها

يمكن سايق البيت قال لو تزوجها مرته طالق

ما تدرين كيف الظروف
و الظروف لها أحكام

يمكن مجلس الأمة ينحل و الدستور يتغير إذا خذوا بعض

اممم، هذه قوية شوي

من الآخر، للقصة خيوط كثيرة و متشابكه و لازم نطلع عليها عشان نحكم بعدالة

و رفعت الجلسة
:)

lawyer يقول...

انتي تدرين اشصار فيني صح؟؟


بس كيفج من غير ما انطر اذنج و سامحيني اني ما نطرت

بوستي اليووووم بكون لنك على مدونتج


تعبت

Common_Sense يقول...

"افتقدت ازعاجه"

ماعتقد :P وقتها كل شي يبين

lawyer يقول...

يعود في الوقت الضايع ،يحتضنها بشوق
ولكن...
حينها
قد تكون فقدت الطفله في داخلها
وتسلل الشيب لمشاعرها
قد تبهت الألوان في عينيها،ويتساوى نور النهار بظلمه ليلها
قد تكون في لحظتها فقدت حاسه التذوق لكلماته
وفقدت بريق الفرحة بوجوده.
.
.
.
حينها..تكون قد تراضت مع نفسها
تصالحت مع مشاعرها
هجرت انتظاره
وفكت الارتباط مابين فرحتها ووجوده
تتعلم منه اعتياد الحب
ووأد الاهتمام
وبرود الاحساس
ويطيب كل ما في خاطرها منه
====
====



مووووووو قد يكوووون

كاااااان خلاص

طاااااااااب الخاطر يا استكاااانه
طااااااااااااب


احساس بالغثياااان عند مجرد التفكير فيه

Kuw_Son يقول...

Thank you for condolences ..

موضوع جميل و كلمات حلوة ..

لكني مللت القراءة قحبيت أشكرج ..

bin3li يقول...

قبل الزحمة و قبل الناس و قبل ما يجينا إعصار جونو ( الله يبعده عنا)
أقولج مبروك عليج انتهاء الإمتحانات و عقبال التخرج بتقدير إمتياز مع مرتبة الشرف

:)

دعواتكم لأهل عمان و أهل الإمارات بالسلامة من تداعيات هذا الإعصار

لمتابعة آخر التطورات و الأخبار و التنبؤات و الإشاعات

كلك هير


الله يستر

:(((

lawyer يقول...

مبرووووووووووووووووووووووووووووووووووووووووووووووووووووووووووووووووووووووووووووووووووووك


مبروووووووووووووووووووووووووووك


بن علي انا قبلك

انا من جم يوووووووووووووووووم مباررررررررررركه

اصلا

الف مبرووووووووووووووووووووووووووووووووووووووووووووووووووووووووووووووووووووووووووووووووووووووووووووك

bin3li يقول...

لوير

مثل ما قال راع الوصف الأول
كلام الليل يمحوه النهاري



تبريكة الأمس ما تنفع اليوم
:P

تحديث من كلباء -الساحل الشرقي

كلك هير

Nescafé يقول...

وعليه عورت قلبي.. واخر شي طاااااب الخااطر

اندمجت ولاشعوريا توقعت النهايه المكتوبه
بوست حلو


ومبروك :>

bin3li يقول...

كل هذا تمتحنين!!!

صرنا عشر بالليل

طمنينا أخاف تصير عندنا عواصف و يتأثر النت

esTeKaNa يقول...

bin3Li
~~~~~~~~
ياهلااااااااااا
ويا مرحباااااااااا
افا عليك سولف
وناقش
واحتج
وتشكى
من غير تأنيب ضمير لأني بديت حياه ثانيه
من اليوم ما عندي شغل
:pP~
الله يبارك بحياتك يا بن علي
للحين احس اني حلمانه
:)
الله يحفظكم يارب من كل شر
ويسعدك دوم مثل ما اسعدتني كل كلماتك وتعليقاتك
وبوست التخرج بالطريج بس عطني شوي وبكتبه الحين:)




بو غازي
~~~~~~~~~~~
ياهلا ويا مرحبا بو غازي
استمتعت فعلا وأنا أقرأ تعقيبك
لانه واقعي فعلا
باختصار اقدر اقول انته الشخص الوحيد تقريبا اللي وصلت له فكرتي في هذا البوست
:)
تعتقد انه لا يحسن التعبير عن مشاعره؟
اذا كان لا يحسن ذلك فلما في الوقت الذي يكون بعدها وشيك وانفجارها حتمي يعبر عن مشاعره باحلى الكلمات؟
اعتقد انه اناني
:))
وفعلا السوالف ما تحلى الا حزة الامتحانات..الله يذكرها بالخير
بما اني خلصت
:))







ace
~~~~~
نورتي المكان وكل تعليق منج يفرحني
انا اعتقد لابد من تلميح
ثم تصريح
ثم مكاشفه بتلك المشاعر السلبيه
لعله يعلم بأن بروده يزعجها ولكنه لا يعلم بمدى اثره السلبي العميق في روحها
:)




reLaaax
~~~~~~~~~~~
يا ربي يا زين كلامج وعقلج وتعقيبج
:)
صح لسانج يا شيخة البنات






قياديه
~~~~~~~~
اي قياديه بالضبط بالضبط هذا المقصود
وهالشي مو شرط يكون بين رجل وامرأه
هالموقف يتكرر في كثير من العلاقات ..لما تكونين يايه بكل احساس ووله وتشوفين اللي جدامج مو مهتم
!!الدقره هذي تعور
عسى ربي لا يحرمني من قلوبكم الطيبه
:)






3ateej
~~~~~~~~
يسعدني انه اعجبك
والبشاره في البوست الي راح اكتبه بعد دقايق
:)






trestan
~~~~~~~~~~
ياهلا بصحاب المزاج المتقلب
كل كلمة منك اسعدت قلبي
حياك الله اخوي
:)





Lawyer
~~~~~~~~~
انتي ما تحتاجين اذن
البوست
والبلوق
وصاحبته تحت امرج بكل وقت
:)





Common_Sense
~~~~~~~~~~~~~~~
hehehehe:)
تهقين؟




Kuw_Son
~~~~~~~~~~~
ما تنلام على الملل
وانته اخوي لا تشكرني على شي واجب علي حياك الله
:)


nescafe
~~~~~~~~~~
انا ما توقعت النهايه وانا اكتب
بس طلعتي احسن مني
:)
حياج الله نورتي





بن علي ولوير
~~~~~~~~~~~~~~~~
الله يبااااااااااااااااااارك بحياتكم
واي الله لا يحرمني وين احصل اخت واخو طيبين مثلكم؟

محـــــارة يقول...

أستكانه أجرمتي فيني على هالإبداااع .. بهمسلج قربي يا خيتي تدرين أن كلماتج دمعة عيني .. لأنها كتبت بصدق ولمست ألم وأمل نتمناه أن ننسى ونسلى

ابدعتي ابدعتي بكل ماتعنيه هالكلمه وخفي علينا شوي ولا أقولج زيدي الجيله أكثر يمكن يفج سحر الغرام وأنا أختج

تسلم أيدج دوم مبدعه مو يديد