الثلاثاء، مايو 29، 2007

:)

كلما عاندني الملل
وأبت نفسي الرضوخ لخطر ضياع الوقت
اقتربت من مساحة بوحي هنا...لأجد بين الحين والآخر دعاء صادق من قلوب طاهره
اسماء اعرفها منذ زمن ،واسماء لم اعرفها الا من وقت قصير
وولكل تحيه حب من أعماق روح قدرت كل كلمة جميله في هذا المكان
.
.
.
.
استنفذت طاقتي في الايام الماضيه،اشعر بان ايام هذه الشهر تعاندني بقسوة
لا تريد ان تمر ولا تريد ان تسرع من خطاها
امتحنت في خمسه امتحنات وباقي 3 ليتكمل العدد بثمن مواد
أحيانا اشعر باني مصابه بتخمة دراسيه كبيرة تجعلني اشبه بالشبعان الغير قادر حتى على شم رائحة للاكل
وانا غير قادره على الدراسه اكثر واكثر
!!
.
.
.
.
هي...المحبط الاساسي في حياتي وعامل تهديم متعب جداا
هذه هي الحقيقه التي توصلت اليها بقوة وبحتها لها بكل رقه
اعرف الكثير من هذه النوعيه ولكنها بجداره اخذت المركز الاول
بعد اداء امتحان طويل اخرج مبتسمه رغم التعب:الحمدلله هم وانزاح
ترد:ويييه هم وانزاح انتي شوفي شنو باقي؟هذا اذا ما عندج اساسا اغلاط عليها درجات خياليه
!!
ارجع البيت اسئلها:دكتور سامي ما قال شنو مهم؟
ترد:ساااامي سم يسمه قولي امين هذا يققول شي مهم
ابلع الحجوة واسكت
!!
تبعث لي رساله:شنو باقي لج؟
وبكل اسى فلا وقت لدي ارد:
باقي لي كل الطعون تخيلي
ترد:
الله يطعنهم بقلوبهم ويحرهم مثل ما حرونا قولي امين
ياالله سترك ....
في ساعات الصباح الاولى قبل الامتحان افقد قدرتي على قياده السياره واستمتع بتوصيل ابي لي لي باب الكليه واحساسي باني طفله صغيره
بخطوات سريعه اهرب من الكل لاجلس في احد الزوايا مع بعض الاوراق
اراها قادمه من بعيد متجهه لي بكل قوة وتنطلق:
تصدقين ما نمت،ولا حاسه درست هذي حاله و بلابلبابلباابلبابلابلبابلابلا
ومرت اخوي امس سوت وحطت وقالت
وفلانه تعرفينها؟قلبها مو نظيف تصدقين ...امس سوت وحطت وقالت
!!!
فجأة شعرت برغبه ان اخفيها ببلوك وديليت
طيبه وحبوبه بس متعبه متعبه متعبه ولا شئ غير التعب
وضعت يدي على يدها وابتسمت:
اشرايج تتتعوذين من ابليس بس بس
عشانج عشان حياتج حق مستقبلج وريلج وعيالج بسج تحلطم يا حلطووومه
شوفي الجوانب المشرقه بالدنيا ،انسي فكرة المؤامرة وكل الناس حاطين عليج وما يحبونج
افترضي حسن النيه وبسطي امور هالدنيا
!!
بعثت لي مسج :
ليش مالج خلقي؟انتي متضايقه؟
ما رديت ولا راح ارد عليها حاليا
معطيتها فرصه تراجع روحها وتحن على روحها
.
.
.
.
شي طبيعي الانسان من التعب يشكي،يبكي ماينام
شي طبيعي تبوحين بتعب روحج بس حق اقرب الناس
شي طبيعي تتضايقين من شخص شخصين بس مو كل الناس
وشي مو طبيعي حتى لو تدعمين الطوفه تتهاوشين معاها
!!



مسج:
ابيك تدري صوتك العذب لي غاب
أحس نفسي تنكسر من غيابه
كذا غيابك للحزن يفتح ابواب
غصب علي البس شقاه وثيابه
ادمنت هواك وان تثقلت كذاب
من يعشقك لا غبت يفقد صوابه
!!

الثلاثاء، مايو 08، 2007

FAInALS EXAmS!!

...ألم يتبعه لذه
خير من لذه يتبعها ألم
.
.
.
ادعو لي
:)

الأربعاء، مايو 02، 2007

درع الأسره:)

صباح الخير...
هذا انا من جديد
افزع من صباح الله خير ،واتفنن في تضيع الوقت الثمين
يعني فازعه من ذاك الفجرليش؟
عشان ادش المطبخ واسوي لي ريوق؟
البس فوطة على راسي واطلع اخذ الجريده واقراها بكل تفاصيها
افتح البلوق واقرر اكتب وتالي اهون
وخلال هالوقت راح تقعد يدتي،طبعا اشلون اخليها تتريق بروحها؟
ابدا وكلا،تأبى المروؤه
اجابلها وما يبقى شي بخاطرها ما انبره نسولف عنه عشان توسع صدرها من الصبح
وبعدين اقرر ستوب اللعب يالله دراسه
،ينزل هذاك المزيون
وي يا زين ذيج الشيبات بلحيته،ويا زين ويهه الصبوحي لا نزل
يا الله هالريال توه شباب ،شاب من حنتي ومواهب اخواني
اجابل ابوي،حتى حليبته احوسها أنا،اشرح له شنو بسوي وماني مسويه واحساسي في هذا الصباح الجميل
يعطني دفعه نفسيه بكلام حلو وبروح الدوام
تالي تقوم امي،اللي اهي يا حياتي نومها قطاعي من الفير تقعدنا صلاه
وتنام
تقعد حق الدوام اختي الصغيره وتنام
ترد تقعد حق دوام اخوي العود وتنام
عاد خلال كل بريك اطل انا بويهها لي تقوم وتشتغل حنتي:
يمه بخاطري اشتري كذا،وبسوي كذا،وشعري بسويه فيه كذا
ترا بسوي حفله لي تخرجت
ترا ان تخرجت بسافر نفس اليوم
يمة انا احس ما راح اتخرج
ثم تبدأ نومه البجي
!!
فترفع يدها للرحمن وتدعو:
يالله ياربي توفقها وترزقها اكثر من كل اللي تبي
ويالله ياربي ترزقها زوج صالح يكمل فرحتي فيها
وما ان نصل لنقطة الزوج الصالح حتى تشتط يدتي:
آميييييييييييييييين يارب العالمين
انظر لهم بغضب:
ليش ما تقومون الليل بعد ادعولي؟
سجدي يمة بالارض بسرعه بسرعه ياالله ولبج
ثم ادخل في نوبه بكاء ثانيه:
تبون تفتكون مني
ليش الزواج كان موضوع عليه تعتيم اعلامي وفجأة صار موضوع كل يوم عندكم؟
.
.
.
.
قلت لكم اني صايره ام دميعه؟
قد يكون هناك شئ ما يضايقني،طبيعه الشئ ربما او تفاهته أحيانا تجعلني اكتمه
اكتم واقتله في داخلي
الى ان يأتي شئ تافه
بسيط
اتفه مما تتصورون
كلمة بسيطة تجلعني ادخل في نوبه بكاء
.
.
.
اتمنى لو ابدل هذا القلب الحار القلق بقلب اقل وسواسيه وحراره
واذا ربي بلغني بسوي درع وبوكيه ورد حق اسرتي الكريمه وراح اكرمهم نفرا نفر في ساحة العلم
:)
.
.
.
.
سألني المدرس بأسى:
مش معقوله عايزة تدرسي 500 صفحة في نفس الاهتمام
في مهم وفي اقل اهميه
في حاجة ننديها من روحنا وفي حاجة نمر عليها مرور الكرام
فين الشفافيه في تقدير الاهميه؟
يا بنتي الحياه عايزة منك ترتبي الحاجات المهمة والاقل اهميه
في حياتك
في مشاعرك
في علاقاتك
مش كل حاجة متساويه
ريحي قلبك يا بنتي
.
.
..
البارحة رحت اصور
يا يالله من فضلك اكتشفت اني افشل انسانه ممكن تصور
مليون فلاش في ثانيه ،ولكي كامل الحريه في الابتسامة التي تريدينها
عشر لقطات استكانه شاقه الضحكة من هني لي هني
!!
تعبت وانا اعيد القطة وبنت خالتي تفرط بالضحك:
ليش تكركرين؟هذي صورة رسميه؟
كتبي تحتها يا سعادتي يا فرحتي
ابتسامه خفيفه وبس!!
بعد معاناه التصوير سأتني المصورة عن جرح في حاجبي ان كنت احتاج ظهوره بالصوره
بنت خالتي صممت على اخفائه وانا صممت على وجوده:اخاف اضيع اذا ما شفته
التصوير..التقاط ابتسامة كاذبه في لحظة تمثلييه،لا اجيدهاابدا
.
.
.
جلست في احد العيادات في انتظار دوري وكانت هي بجانبي،شئ ما فيها غير طبيعي
رقيقه،جميله وذات ابتسامة طيبه،لم تتعب في محاوله فتح حوار معي
لكن هناك شئ ما فيها يجعلني استنكر ملامحها
ساعه وربع اعتقد انها قالت كل ما في خاطرها وعرفت كل ما تريد ان تعرفه عني
مابين السوالف سولفت لي عن قصه تخرجها من الجامعه بتفوق وتقدم 3 اشخاص في آان واحد لها فتزوجت ارداهم
!!اردااااهم
وتقوم فيني الحميه واشتط شطة العالمين:لا تقولين عنه ارداهم
هذا ريلج
هذا ابو عيالج
حتى لو كان ارداهم ،بلعيها يعني لا تقولين لا تقولين
سألتني:تعرفينه؟،طبعا لا اشلون اعرفه
قالت تعرفيني؟ لا منو انتي
انا دكتورة فلانه الفلانيه في كليه ....وبنتي فلانه الفلاني
طلعت المرة كبيرة وبنتها اكبرمني بوايد مشالله
وموعدها تفخ خدود،لانها اساسا خلصت جلسات الشد
!!سبحان الله التجميل صاير مثل قصه القذله
بعد السوالف سألتني انتي مواليد اي شهر؟وايد احس بتقارب معاج
قلت لها عيدميلادي 30 اربعه سكتت مده ثم انتفضت:
ثووووورة؟
انتي ثوووورة؟
بققت عيوني:انا ثوووورة؟
ترد باصرار:انا حسيت انج ثورة تصدقين
ما راح اشرح لكم احساسي
احس النفس وقف وانا اطالعها وعيوني خذت كل اتساع الدهشه اللي فيني:
من صجج؟
قالت اي:انتي من برج الثور
عزت على نفسي لما قالت انا ثوره
قلت لها قولي المرأه الثور على الاقل ،وحتى المرأه الثور ما يازت لي
اييييييييييييه لا طبنا ولا غدا الشر،جان كل هالتعب اللي تعبو اهلي علي اطلع ثورة
hahahaha
ستوب اللعب
بروح ادرس