الثلاثاء، أبريل 24، 2007

مشكله

أحيانا...تكون هي أختك
من ذات البطن الذي ولدتي منه
من ذات البيت الذي تربيتي فيه
بذات الظروف التي عشتي فيها
!! ولكنها تختلف عنك اختلاف كبير
اختلاف مرده طبيعتنا البشريه وتفرد شخصياتنا
.
.
من اكبر اخطائنا التي نمارسها دون قصد تعميم صفه على اسره كامله
نستغرب من كون فلانه اخت فلانه؟
او معقوله فلان يكون ابن عم فلان؟
نحرج من أخطاء غيرنا،لمجرد انهم بطريقه ما مرتبطين فينا
في الصداقه،نحن لسنا مجبرين على المجامله،نختارهم بعنايه ونحافظ عليهم برغبتنا
في علاقه الاهل والاقارب،نحن لم نختارهم،قدر مفروض علينا ،والواجب يحتم المحافظه عليه
اعترف:هناك من هن صديقات ولكن هن أقرب لي قلبي من كثير من قريباتي
.
.
.
لما تلك المقدمه؟
ربما لامهد لما اريد ان اتكلم عنه؟
ربما لأأقنع نفسي بحقيقه ما
لأجرد الفكرة امام نفسي
لا أعلم
!!
.
.
هي
قريبتي من ناحيه أمي وأبي،وحيده والجعده بعد خمسه شباب
في الثالثه عشر من عمرها،في عنفوان مراهقتها
وفي عمر أختي الصغيره
!!
قبل فترة بسيطة كن هي وأخريات في زياره لبيتنا استمرت ثلاثه ايام
غرفه اختي تعج بالازعاج حتى ساعه متأخره من الليل
هي فقط لفتت نظري،.كانت تنزوي في مكان بعيد وهاتفها بيدها اربع وعشرين ساعه
شكلها ملفت للنظر،وصوتها مثير للشك،حاولت انا اتغافل عنها لكني لم استطع
ولأن الجميع لاحظها سألتها امي:فلانه منو تكلمين؟
ردت بثقه :صديقتي نورة ،لاني وحيده متعلقه فيها وايد وما اقدر مااكلمها وامي تدري
!!
هل صدقتم ما قالت؟
انا لم اصدق،بعد دقائق من رحيل أمي طلبت منها الاتصال على نورة
او ان تتفضل نوره بزياتنا اليوم
ارتبكت وردت بصوت قوي:نورة تستحي بليز لا تكلمينها
ولا تقولين حق أمي عشان ما تعصب علي
!!
كاشف احساسي يصرخ:كاذبه
.
.
.
في ذاك الصباح استيقظت باكرا وكل الجميع نيام
ذهبت لسرداب البيت لاني نسيت بعض الكتب هناك
واذا بي اسمع صوت همهمتها وهي تصف الحجي وتتكلم:
اي اهي تصير لي كذا كذا
اسمها استكانه
عمرها 22
لا طيبه طيبه
وايدأحبها
عمتي؟
لا عمتي بيتهم في المكان الفلاني،وخالي متزوج فلانه الفلاني
هل شعرت يوما بأن تغلي؟
أسرار بيتك وتفاصيل حياتك تنتقل لغرب من مراهقه صغيره
شعرت بأني مستعده لامزقها باسناني،كنت غاضبه لدرجه اني خفت عليها مني
فتحت الباب عليها ورمقتها بنظره مخيفه
خافت؟ارتبكت؟...لا!! وبعين قويه قالت اشفيج؟هذي نورة؟
ابتسمت بصعوبه وطلت منها انهاء تلك المكالمه
حاولت احتوائها بقدر المستطاع،لم ا كن اريدها ان تهرب مني،كل ما اردته ان اسمع الصدق من شفتيها
اسمع واحاول الصمود امام رغبتي في الصراخ:
ممم هذا واحد اعرفه بالانترنت،ضافني بالمسنجر،قلت له ان علاقه حب فاشله كنت امر فيها
قالي اهو بيعطيني حل بس اشلون يعطيني؟بالتليفون
وانا الحين اكلمه بس انا ما احبه لا اهو صديق،اللي احبه ما يحبني
ومنو اللي تحبينه؟
فلان بالمنتدى
ثم ترد بطريقه غريبه وبعين قويه:
شوفي فلانه قريبتنا تزوجت واحد كانت تكلمه
وانتي ما تزوجتي
!!
وبعدين اهو مو ياهل اهو كبير تخيلي شكبره؟كبييييييييييييييييييييييييييييييير كبرج
!!
حاولت ابتلاع سخافه تفاصيل قصتها،وقتل الغضب في داخلي
حاولت ان افهمها بأن انقلاب المفاهيم لا يعني ان ننقلب نحن ايضا
كلنا لنا أخطاء مراهقه غبيه،ولكن الفرق بأننا كنا نخاف،نخجل،نرتبك رغم بساطة هفواتنا
لم يكن كل شئ متاح ولم نكن بهذه الجرأ ابدا
كنا مهما شطحت بنا المراهقه هناك دائما خوف
بعكسها هي والكثيرات من جيلها ..عين قويه ورد واثق
!!هذا الدلال اللي افسدها،لم يغضب عليها ابيها يوما ولم تقرصها امها فيما سبق
ساعتين وان اذكرها بحب والدها،بطيبه امها
بخبث بعض الشباب،بالطريق الذي ان بدأ لن يتوقف
بالألم الذي يتبعه ألم
بروحها التي سيجرح فيها الكثير
بوعد الله بأن الطيبون لهم الطيبات
ضميتها لقلبي،وشعور يغلب روحي ويرقق دمعه في عيني
خائفه انا عليها ،ليست في عمر التميز ،ولا تعرف حتى عاقبه الأمور
ترى بأن الدنيا هكذا،وبأن الأمر ابسط من ما أتصور
رحلت لبيتها وكانت قد وعدتني بأنها ستنهي هذي السخافه
.
.
.
.
في تلك الليله حبست أختي في غرقتي،تحقيق مستمر وأختي لا رد لها سوى:
!! ما ادري عنها
بالنهايه عندما علمت أختي بأني علمت بكل الموضوع ابتسمت:
هذا السر مو لي لها،حتى لو كنتي أختي السر سر
وببرود قاتل تستطرد:
انا شكو فيها عشان انصحها،اذا نصحتها بتسوي اللي تبيه وبتجذب علينا
يعني اهي ما تدري انه غلط؟
اصلا اهي مينونه،سألته اذا كبرت تتزوجني قالها لا
وتضيع اختي في ضحكة طويله وتكمل:
يعني اذا اهي الحين كلمته،ويييه متى يتزوجون؟
لو كبيرة يمكن بس صغيره شكثر بتنطرسنه ،سنتين مليون..هذا اذا بيتزوجها
وما تاكل ولا تدري وبس تبجي،يا الله على الملاقه،اصلا انا ما احبها وايد
بس انتو غصب تخلونها تزورني وتقولون حرام اهي اختج من قال انا ابي خوات؟
!!
هل قلت لك يوما أن أختي سلبيه ؟وهل تكلمت عن تلك الدبدوبه الجميله التي لا تعرف ماهي المجامله؟
هل قلت لكم يوما بأن لي اخت قياديه ولكن بصمت
تصغرني بعشر سنوات،افرط في تدليلها وحبها
.
.
.
.
نعود لتلك
.بعدها في الزواره الاسبوعيه قالت لي انها انهت تلك العلاقه،اختي تؤكد كاذبه
قبل أيام كنت في زياره خاطفه لبيتهم،والدها يرحب فيني بحراره،والدتها تقطع لي تلك الكيكة اللذيذه
اخوتها الشباب يسألوني عن دراستي واخباري،لا يخرج احدهم امامي الا سألني:
تامرين على شي؟
يحيطوني بحب مميز ودلال لا مثيل له،سألت والدتها وين فلانه بنتج؟
ابتسمت بطيبه وببراءه:
اليوم من الصبح ما كلت شي ومتضايقه،توها فزت وراحت ويا السايق الجمعيه
قلنا تروح يمكن تشتري شي ولا توسع صدرها
!!
نزلت حرارة ذاك الشاي في قلبي
طيبتهم لا مثيل لها ولكن من نوع الناس الذين اذا وصل الموضوع ليمس احدا فيهم فأنهم ربما ينقلبون لأسود
هل اصارح والدتها؟ام اختار احد اعقل اخوانها؟
او اغض الطرف عنها علها تكبر ورب العالمين يحفظها ويهديها؟

هناك 31 تعليقًا:

Expatriate يقول...

الله يعينج

سالفة مو بسيطة .. اذا لج خلق وعندج وقت حاولي تحتوين البنت وتكلمينها اكثر من مرة وتتقربين منها اكثر خصوصا ان المجال مفتوح لأنها تحبج ومستعدة تتقبل منج مثل ما سمعتيها تقول بالتلفون

اذا مو متأكدة او محتارة شلون ممكن تقنعينها او ما عندج وقت لازم تتصرفين وتكلمين امها .. اما انج تتركين الموضوع جذيه وتتأملين ان البنت تكبر وتعقل وتفهم فأنا اختلف معاج .. لأن ما تدرين شيصير .. ومو كل مرة تسلم الجرّة .. بعدين البنت ياهل عمرها 13 سنة تكلم واحد عمره 22 .. هذا مو بس وراه شر ..


نقطة ثانية : ديري بالج على اختج الصغيرة . ذكريها بأن مبدأ ان البنت تكلم ولد بالتلفون بحد ذاته غلط .. بغض النظر اذا قالها بيتزوجها ولا لأ .. فهميها ان مو كل من تكلموا بالتلفون قالوا حب خلاص يعني حب ..
عاد انتي قعدي معاها وكلميها .. وتذكري ان اختج اولى من قريبتج


نقطة أخيرة: الحين قريبتج عمرها 13 سنة و لما صارحتج بقصتها كان سببها الرئيسي الزواج .. خصوصا لما قالت كا فلانة كلمت واحد وآخر شي تزوجوا
معقولة بنت عمرها 13 سنة من احين شايلة هم الزواج ؟ ليش ؟ شهالافكار اللي منتشرة بين المراهقات ؟

esTeKaNa يقول...

expat.
~~~~~~~
سبحان الله ..اول ما خلصت هالبوست قاعده افكر اقرا بلوقك وانطر تعليقك
:)
انا معاك السالفه مو بسيطة ابدا
البنت تتقبل مني بس مهما كان ماهي تحت عيوني ونظري مهما حاولت اكلمها بشكل مستمر
!!
أختي الصغيره انا وايد فاتحة مجال للحوار معاها،واثق انها فاهمه هالنقطه عدل،وحتى لما قالت لي رايها قالته بطريقه القياس على فكره انه البنت اللي نتكلم عنها تفكر انه يتزوجها

النقطه الثالثه:
البنت عايشه في علاقتين وهميتين
علاقه حب من طرف واحد تتمنة فيها انه يتزوجها،وعلاقه مع اخر معتبر نفسه صديق بس اهي تعتقد كأنها مع الكلام ارتاحت له
البنت ياهل بمعنى ياهل
ما حسيتها تفكر بالزواج والمستقبل
صارحتني لاني انا حطيتها بموقف المصارحة
!! انا بعد استغربت من فكرة انها شايله هم الزواج
استغربت انها خاطرة مراحل كبيرة بحياتها؟
كل بنت تتمنى بس ما يكون هم
خاصه بالهالعمر ولا تقارن نفسها باللي اكبر منها
!!
البنت لانها وحيده تعامل بالبيت بطريقه خاطئه وعايشه اكبر من عمرها للاسف
يعني الحين تنصحني اكلم والدتها؟

Expatriate يقول...

Estekana
--------
انا اشوف اي كلمي امها .. على الاقل تبرئين ذمتج .. وحرصي ان بس امها تدري ابوها واخوانها لا يدرون

سؤال: شصار على مواضيع مدونتج القديمة ؟ ضاعوا ولا مخشوشين ؟

esTeKaNa يقول...

expat.
~~~~~~~~~
وايد يراودني هالتفكير
الموضوع صار جدامي لحكمة
ولازم ابري ذمتي
!!
مواضيع مدونتي للاسف انا حذفتها كلها
بس الاخ بن علي يزاه اله خير اكتشفت انه حافظ كل المواضيع
اتمنى اذا قرأ هذا الموضوع يعطيني فكرة اشلون اضيف البوستات هني
:)

bin3li يقول...

ما بقولج كيييف
:P
لأني ما أعرف كيف
بس بسوي بحث و بشوف كيف ممكن أنقل المواضيع القديمة إذا أمكن


عن الموضوع الصراحة خبري أهلها
ما أنصحج اولاً أنج تتحملين مسؤوليتها بروحج، الأفضل أنج تسملين الأمانة لأهلها و خلج بعيد

البنت صغيرة و ممكن يقص عليها هذا و يستغلها و تضيع
ممكن يضركم أنتو بعد إذا الأخ قاعد يتسأل عنكم و ياخذ الأخبار منها

و بعدين ممكن تكتسب عادة مغازل الشباب، تكلم مليون واحد، و ما بتعرف كيف تتخلص من هالعادة
يعني مستقبلها ممكن يضيع بهذه الطريقة

ما أدري إذا إللي بقوله كلام مبالغ فيه ، بس يمكن البنت تحتاج استشارة نفسية

و انتبهوا لعماركم و حاولوا تعرفون منو هذا إللي تكلمه
إذا قدر يعطيها موبايل
باجر يمكن يدخل البيت عليها و لا عليكم

الله يحفظكم

نون النساء يقول...

استكانة

انا مريت بمثل هذا الموقف
صدقيني الغضب
ماراح ينفع في احتواء المشكلة

مادامت البنت تبي هالشيء


موقفها مشابه جدا لموقف احدى الفتيات
تقدرين اتقولين اهي وايد تحبني
ومن النوع اللي تفضلني على امها في مسألة

لعبة الأسرار
لما كانت في عمر 14 سنة
ياتلي امها بعد ما طقتها
وضربتها ضرب اليهد

نون كلمي بنتي
مو راضية تسمع مني

رحتلها وقعدنا مع بعض بعد ما عرفت الموضوع
للأمانة انا ضحكت

استغربت مني ليش اني ما عصبت عليها
وقعت أسألها عن الشخص اللي كانت اتكلمه
منو اهوه وشلون عرفتيه
وقالتلي كل شي
وطلبت منها انها تقوللي كل شي قبل لا اتسويه

وكان اللي أبيه
واهو كان توه صغير بعد 16 سنة مراهق مثلها

كانو متفقين على الزواج
ههههههههههههههههههههههه


بس
تميت معاها فترة
اكلمها واقنعها بطرق غير مباشرة ان اللي قاعد اتسويه غلط ومامنه فايدة

لكنها تمت على هالحال سنة تقريبا
اتكلمه واتكلم غيره بعد
واكبر منها ب14 سنة

اللي كان مطمني انها كانت تقولي كل شي
شوي شوي بدت تقتنع بكلامي واتركت كل شي

بس صج مرات اقوم اغلي من داخلي
بسبة حركاتها
لكن ما أبي اسوي شي يخرب ثقتها فيني

والحمدالله انها اتركت هالسوالف
وانتبهت حق دراستها

والسنة هاذي اخر سنه لها في الثانوية


:)


اكسبيها صوبج
من غير عصبية
وشد معاها

النتايج راح تكون نهائية

esTeKaNa يقول...

bin3Li
~~~~~~~~
شكرا على المحاوله
:)
كلانك عدل انا مابيها تتعود وما تخاف من احد،والتليفون تليفونها هديه اهلها
!!
تنصحني اكلم الاهل
وشايله هم افتح الموضوع باي طريقه مع والدتها
:(






نون النساء
~~~~~~~~~~~~~
هلاااااااااااا
بالاأحضان يا جميل؟
ازيك وحشتيني
:**
للأمانه انا بعد ضحكت
ابيه شي مو طبيعي
!!
بس اهم شي ركزت عليه اني ما ابين لها رده فعلي،كنت مستمعه جيده لها ولمشاعرها وحاولت بقدر المستطاع اني اكون بعمرها اواتفاعل مع كلماتها واهتم
بس مرات لا شعوريا احس انها تحرني
!!
مابيها تخاف مني وهذا اللي صار
البنت قالت لي تفاصيل كثيرة
وما زلت اكلمها
بس الفرق بيني وبينج انه امها ماتدري
وانا مو معقوله راح اكون طول الوقت معاها
نون انا خايفه يصير شي واهي بعيده ومو مقدره حجم اللي قاعده تسويه
!!
ونستيني على اللي تصير لج
الله يهديهم يارب كلهم ويهدينا
:)

bin3li يقول...

بصراحة مشكلة
اتصلي في فوزية الدريع
:P

لا جد، اتصلي
:P

لا جد جد، ديزي مسج حق امها و اكتبي فاعل خير

بس بتعرفج من الرقم
ما تنفع هالفكرة

انا كلش غمشرتي مب في وقتها

انزين ألحين الأم لازم تعرف

حطي في بالج أنج توصين الأم ما تعصب عليها ، تاخذها بالكلمة الطيبة تفهمها أنه هذا خطر مب بس غلط
خطر عليها
البنت بعدها ما شافت الدنيا

Alather يقول...

السلام عليكم

الله يعينج

ماهو شي سهل

اذا انتي ما راح تقدرين ولا اللي مجابلتها طول الوقت ..

امم اخذي امها وكلميها
عطيها مقدمات قوليلها يعني تتأنى وبنفس الوقت تاخذ خطوات حكيمة

يمكن الدلال الزايد
الا اكيد

والله يعينج




----

اذكر مرة طلعولي بوستاتج
وبلوقج القديم بكبره
جني كنت مسوية سيرج على شغلة شي جذيه

متفرغ يقول...

يقولون كثرة الدق يفك اللحام .... حاولي تاخذينها باللين .... اذا ما نفع بالتهديد .... و اذا هم ما نفع كلمي احد اخوانها المتفهمين اللي ياخذون الامور بروية و شرحي له السالفة عدل .... و بعدين اذا ما نفعت كل هالاساليب لازم الاهل تكون لهم وقفة مع البنت ..... و الله يهديها انشالله :)

سالفة قلب يقول...

الحاجه للحب حاجه ضرورية
لذلك كان لابد لهذه السن محضن يحتويها
يغرس بها قيم.يملأ فراغ وقتها بما ينفعها
يفجر فيها طاقاتها الابداعيه

نفسك ان لم تشغلها بالحق...شغلتك بالباطل

حلمك وسعة صدرك ..هما طوق النجاة للغريق

يجب ان لانرفض انفسنا بعد الوقوع بالخطأ
جل ماعلينا ان نمحي الماضي ونضع بدلا منه صورة حسنه

اللهم احفظنا واحفظ شباب وبنات المسلمين

a7La eNG يقول...

she's only 13 @@

تدرين وين الخطر .. مثل ما قلتاااي

انها مو مستوعبة حجم الغلط

نغلط و ندري و الاحساس بالذنب معانا

غير
لما نفكر انه حق مكتسب لنا و انه غلط بعين الناس بس
!!

احس لو انها من الفئة الأولى .. احتوائها اسلم

بس .. هي بصراحة تحتاج نفضة و حزم
على و عسى يغيير افكارها الخطيرة جدا
!
انتي ادرى منا بأمها فكري بطريقة
اذا ممكن تفهم بسالفة غير مباشرة
قصي لها عن بنت عمرها 13 و نص
اخت رفيجتج كيت و كيت و كيت

اذا لا .. خالتي يا حليلها بنتج البنات سوالف و ضحك واهيا كلش مو معاهم ما غير موبايلها باذنها نهار و ليل
!

تبين ادق عليها و اقول انا فاعلة خير
لانه حرام بنت ناس تتسهيل هالطريج
:(
الله يهدي الجميع يا رب
-----
بس اعترف لج اني ضحكت ذيج خذت اللي كلمته و انتي ما تزوجتي

ههههههههههههههههههههههههه
يعني بالفصيح
يا استكانة اخاف فادج الخلق الرفيع
;D

Cr8ivia يقول...

سؤال استكانة

ماذا لو كان هذا الشاب اللي تكلمه
ذئب بشري بكل ما تحمله الكلمة من معنى
و الذئاب هالايام على افا من يشيل
ماذا لو استدرجها و غفل عقلها لما هو اكبر من مجرد محادثات في التلفون؟ و لما هو اكبر من ان يكون مواعد في الجمعيه او نظرات خاطفه من بعيد؟
لو كبر الموضوع اكبر من صداقة على قولتها .. و اوهمها بما هو اكبر .. و ابتزها و استخدم كل المعلومات اللي عندها و تعطيه ااياه عن طيب خاطر؟
لا تنسين ان اكبر منها ب 10 سنين اذا مو اكبر

يعني النيه الطيبه عنده لا تتعدا الاحد بالاميه :)

لو سكتي
و تغاضيتي عن الموضوع
و صار ما لم يكن بالحسبان
و طاح الفاس بالراس
و الفضيحه صارت مصيبه ما بعدها مصيبه

هل ممكن لحظتها تغفي لج عين او تظين لحظه و انتي مرتاحه؟

اجابتج على هالسؤال راح تحدد لج شنو لازم تسوين الان !

غير معرف يقول...

شوفي الي قدرت تقص على الدنيا كلها
كيفهاااااااا ختنقرص

انا بصراحه ما انسى مرا من المرات شفت نفس موقفج

ورحت قلت حق الام
و ياريتني ما قلت

صرت انا المنبوووووووذه

و صرت انا الي اغار من بنتها و اطلع حجي

و شي لا صار و لا استوى

و البنت اصغر مني بعشر سنوات

و من خوفي عليها و حرقه دمي نصحت امها

البنت تزوجت
و يوم عرسهاااااااااااااا
امها تقولي
شفتي يا فطووومه التلفونات سوت شغل

هذييييييييييييييييييي
الام

خليها على الله

لا تعدلينهااااااا
ترا محد غبي و طيب


الناس ما يقبلون شي على عيالهم




نسيت اقوووووولج
انا لووووووير
و اكاونتي معفوووووس


لوير

qalm-jaf يقول...
أزال المؤلف هذا التعليق.
qalm-jaf يقول...

من شق ثوب الناس شقوا وزاره
ومن ضحك بالثرمان يضحك بلا سن
.
.
.
اذا بتقولين حق احد من اخوانها قولي له يراقبها لين يطيح عليها علشان تطلعين من السالفه تبين الصج 13 سنه موبايل ونت وفراغ
فى اعتقادي المراهق مايتعلم من النصيحه يتعلم من التجربه المؤلمه علشان يفهم
استكانه الكل يعرف الصح ومافى احد كبير وصغير مايعرفه بس الموضوع يحسسها بالسعاده وان فى واحد يحبها ويخاف عليها ترى ويسليها بوقت فراغها الكبير عبر الاثير الحل قولى حق الاب او الاخوان لان الام راح تطمطم على الموضوع وربما ربما ربما تكون تعرف آسف ربما الام تحس حتى لو البنت تفكر او سرحانه فى فارس احلامه تحس ان بنتها سرحانه اشلون تلفون 24 ساعه ؟؟؟؟ ربما
لازم الطرف الاخر الشاب يتعاقب او ينزف او يتم تهديده مو بس عشان هذي البنت علشان ضحايا المستقبل
وللحديث بقيه الله يعين
.
.
؟؟

esTeKaNa يقول...

bin3Li
~~~~~~~~~
hehehehe:)
بخاطري من زمان اتصل على فوزيه دريع
:pP~
الام تحبني وايد
وعلاقتي فيها قويه
بس مهما كان الموضوع مو شويه وقاعده افكر بطريقه مناسبه افاتحها فيه







al_ather
~~~~~~~~~~~~
انا ااتفق معاج
هذا اهو الدلال الزايد
يموت الخوف بقلب البنت
!!
شكرا على النصيحة وشكرا على المعلومه المفيده
:)





متفرغ
~~~~~~~~~~~
امين ويهدينا اجمعين يارب
تصدق انا ما فكرت اهددها
!!وايد كنت طيبه وياها ويمكن هذا اللي خلاها تستمر
عطيتني فكرة بحاول استغلها بطريقه جيده
شكرا اخوي
:)


سالفه قلب
~~~~~~~~~~~~~
هلا بشيخة الطيب
!!يجب ان لا نرفض أنفسنا بعد الخطأ
كلماتك دائما لها اثر اخر في قلبي
جزاااك الله كل خير
اللهم امين
:)








a7La_eNg
~~~~~~~~~~~~
hahahahahahhahahah:D~
امس بس شفتج تذكرت كلمتج:
أخاف فادج الخلق الرفيييييع
:))
اه يا اخيتي
انتي ادرا بالسالفه بكل تفاصيلها
وادرا فيني وبحب اهلها بقلبي
وايد الموضوع شاغل بالي ولازم اتخذ اي اجراء لانه في تطورات تحتاج يا زواره اسولف لج فيها او اتصال ومكالمه طويله
:)



cr8ivia
~~~~~~~~~
تعرفين لما تحسين بشي بقلبج ينقبض
!!شي يعور بكل تفاصيله
هذا اللي حسيت فيه لما قريت الفرضيه اللي كتبتيها
افكر اخذ اجراء باسرع وقت ممكن
يزاج الله خير حبيبتي







Lawyer
~~~~~~~~~
من صجج؟
واي واي احترييييييييييييييييت
انا اسفه
مع احترامي لج
وللبنت
وامها
بس اهم مو طبيعين
!!
يعني اذا غايه الزواج تخلينه نبيع بناتنا علهم ما تزوجو
يعني كل مرة بتسلم الجره؟
لوير حبيبتي انتي،فكرت اني اسكت بس لو يصير بالبنت شي ما ظنتي يهنا لي قلبي بعدها ارتاح
راح احس بتأنيب الضمير
:(







qaLam_jaf
~~~~~~~~~~~
تهقه اقول حق اخوانها؟
اخاف نرد حق وأد البنات
:)
راح افكر بطريقه تنبيه لهم واشوف شنو يصير معاي
جزاك الله كل خير يا اخوي قلم جاف
الله لا يحرمني من اخوتكم الطيبه

charisma يقول...

اول شى يا بختنا بالعوده يا ستكانه
ولا شى شى داشه بستكانه ورديه
هههههههههه
كشخاا
:))

السالفه اتعور القلب اصدقين ضاق خلقى
انا لو مكانج بعتفس ما احب جذى
هذى ياهل
بسرعه ينقص عليها

ما ادرى شلون جذى
هالعمر حرج الصراحه
واذا اهى يرعه وما اتخاف فلازم اهلها يعطونها اهتمام اكثر
يعنى بهالعمر تيرعت وكلمت !!
باجر شنو ممكن يصير
:(

حرام جذى

وما عليج منها ترى اهى ما راح تقولج الصج
وانج اتعلمين احد من خوانها ما افضل

امها اهون
الام حكيمه الخوان الرياييل اسالبهم تحطيميه
بيبدون يشكون فيها ويحكرونها وتنقلب حياتها الى جحيم

امها اذا متفهما مسكيها وقوليلها
وقعدى معاها واتفقاو على حل

واذا الام من النوع الى ما اتعرف تتصرف والبنت صج اتعز عليج لا اتهدينها
وحاولى فيها مره ومرتين

وبينى لها ابعااد هالسووالف

وااى توهم صغااار

اذكر احنا بعمرهم مو صوب هالسوالف

كنا حفاى انحوس بالحوشه وقوارى ولعب وهيله

ما حسينا بهالمشاعر والرومانس الا بالجامعه
ولالا اخر السنين

هالجيل يخرع
لا اتهدينها استكانه
والله ياجرج حرام البنت صغيره

ٍٍStock يقول...

والله موضووعج يضيق الخلق ويحز بالنفس

والكلام الي ذكرتيه هذا واقع كثير من الناس

لكن ابي اختصر الحل بشي واحد رئيسي

وهو عودتنا الى الاسلام وتعاليمة الراسخة في تربية الابناء والاسرة فصلاحها هو صلاح للمجتمع باسره

وبالتالي

الاب والام هما المسؤول الاول والاخير


نصيحتي ان تؤدين الواجب الي عليج وهو انج تبلغين امها وابوها

فما على الرسول الا البلاغ


وقال الله تعالى (انما عليك البلاغ وعلينا الحساب)وعسى الله يهدينا جميعا


اللهم ردنا الى دينك ردا جميلا


اخوكم

ستوك

bin3li يقول...

الخوف مب بس على البنات
حتى الشباب ينخاف عليهم
هذا واحد صار ضحية بنت تعرف عليها في منتدى من المنتديات

كلك هير

خلاص أنا ما بكلم حد
:P

نون النساء يقول...
أزال المؤلف هذا التعليق.
نون النساء يقول...

^
^

يستاهل

;)

محـــــارة يقول...

إذا لج مزاج كلميها أكثر من مره .. على أني أعتقد تبع تربيتها راح ترجع للغلط مره ثانيه بوقتنا الحاضر زيادة الدلع والحريه لبنات بهالعمر للأسف يستغلون غلط .. عندنا بالمجتمع ككل خلط بالمفاهيم مابين الحريه ومابين الانفلات ..والي صاير انفلات كبير والعذر أن لاتسوي هالشيء من وراي دامه غلط فشنو الفايده أعرفه .. اتكلم عن الأهل .. من الاخر أفضل تكلمين امها بطريقه هاديه إذا أمها من النوع الي يسمع أما إذا كانت أم بسيطه أو عصبيه فحاولي تحتوين البنت أكثر .. والله الله بأختج العمر هذا يخوف أهما الي يلعبون فينا دامه وربنا يحفظنا ويحفظهم من كل شر

بنت الشامية يقول...

استكانه....حبيبتى لى صديقه مرت بنفس المشكله بس اهى عندها ولد وشافت صديق ولدها فى موقف غير صحيح وخافت عليه ان يتمادي كل ما كبر

فتدخل زوجها وكلم ابو الولد لانهم اقارب وربع.....وعينك ما تشوف الا النور صارت مشكله وكبرت السالفه وحطوا الخطاء على ولد صديقتى وهو ما له دخل بالموضوع.....وانقطعت العلاقه بينهم

فنصيحتى لا تكلمين امها ولا تسوين شئ

وحطى بالج على اخيتج ابرك لج

محد يتقبل نصيحة احد هالايام

والبنت بتكبر وتعقل...وتميز الصح من الخطاء بروحها

والله يحفظها ويحفظ عيالنا كلهم

qalm-jaf يقول...

نــــــــــــــــون النساء
منو اللى يستاهل
فهووووووووووودي
(:

عيون الحب يقول...

هلا استكانة ..
مبروك عالنيو لوك ..
::
::
المشكلة كثير كبيرة..
شوفي انا اقول كلميها وتمي وراها احسن ..
صدق ما تدرين شو ردة فعل الام بعد ما تسمع اللي قلتيه ..
::
::
لا تخسرين محبه هالناس بسببهم ..
حاولي معاها واكيد باسلوبج الحلو بتقنعينها ان شاء الله ..
::
::
بن علي ..
بصراحة صدمني فهد ما توقعت في شاب بهالسذاجة :|

bin3li يقول...

و انا ما توقعت بنت بخبث آمنة!!

esTeKaNa يقول...

bin3Li
~~~~~~~~~
القانون لا يحمي المغفلين
هي خبيثه وهو للاسف ساذج

للجميع
~~~~~~~
شكرا من القلب للقلب
انا حاليا في قمة الراحة النفسيه ورضا الضمير
اليوم كنت في زياره لبيتهم صباحا والبنت في المدرسه
جلست مع والدتها ساعه ونصف في المطبخ ،هي تتكلم ومن موضوع الى موضوع وانا افكر كيف انفذ من بين هذه المواضيع لاوصل ما في قلبي
الحمدلله الذي رزقني في حينها فطنه واسلوب رقيق اوصلت لها كل الموضوع بيسر وسهاله بعد التمهيد له
عيني امها الحزينه
ورغبتها في معرفه كل التفاصيل
اهتمامها بوضع خطة جديده للتعامل مع البنت واستشارتي فيها جعلتني اشعر بثقه كبيرة
ضمتني لقلبها وحلفت بأني ابنتها التي لم ولن تزعل عليها ابدا او تحمل عليها شيئا في خاطرها
الحمدلله
:)

bin3li يقول...

أيواا يا قانونية
;)

الحمدلله أنج وصلتي الأمانة و الحمدلله أن الام تفاعلت ، و الله يقر عينها ببنتها

عيون الحب يقول...

هههه بن علي ..

لا تنسى ان كيدهن عظيم ..

وبعدين على القصص اللي تارسة المنتديات عن الكذب والخداع اللي في الانترنت كيف طاح في شي زي هذا؟؟

الله يعينه على ما ابتلاه .. وعسى الله لا يبلي غيره ان شاء الله ..

::
::
كأني طلعت عن الموضوع لوول ..
-------------
استكانة ..

الحمدلله انج ارتحتي وعسى الامور كلها تتعدل وتصير من الاحسن الى الافضل :)

::
::

=) عسى الله يوفقج دنيا واخرة يارب

QiYaDiYa يقول...

اعتذر على التأخير بالرد

;$


هذا الي كنت بقوله ..
و الي سويته عين الصواب ..

اذا الام متفهمه بالعكس احسن ..
يعني منو راح يفهم البنت كثر الام ؟
و بعدين انتي ما راح تخلين الام بروحها تحل المشكلة ..
بس بنفس الوقت انتي وراج دراسة و اكيد راح تلهين و بتغيب عن نظرج فالام تقدر اتابعها ..

عسى الله يوفقج دنيا و اخرة ..
و يعطيج على قد نيتج و اكثر ;**